Promé Karta di Pedro 3:1-22
3 Di igual manera, esposanan, sea sumiso na boso esposo.+ Si akaso un esposo no ta obedesé palabra di Dios, e por ser ganá pa medio di e bon kondukta di su esposa, sin ku su esposa papia ni un pia di palabra,+
2 pasobra su propio wowonan ta mira* ku su esposa tin bon kondukta*+ i rèspèt profundo.
3 No enfoká solamente riba adorno di pafó, manera estilo di kabei di flèktu, hoya di oro+ òf paña karu.
4 Laga e persona ku boso ta di paden ta bunita. Ta e bunitesa ei, ku no ta pasahero i ku ta enserá ser un persona suave i trankil,+ ta loke ta masha presioso den bista di Dios.
5 Asina e hende muhénan santu di ántes, ku tabatin fe* den Dios, tabata dòrna nan mes. I nan tabata sumiso na nan esposo.
6 Tuma Sara komo ehèmpel. Sara tabata obedesé Ábraham, i e tabata yama Ábraham, “Señor.”+ Boso lo ta yu di Sara si boso sigui hasi loke ta bon i no laga miedu dominá boso.+
7 I boso ku ta esposo, sigui tene konsiderashon ku boso esposa.* Trata boso esposa ku rèspèt.+ Trat’é manera ta un poron mas frágil boso ta trata kuné, pa boso orashonnan no ser strobá pasobra, meskos ku boso, boso esposa tambe lo heredá bida+ danki na Dios su bondat inmeresí.
8 Pa konkluí, ta bon pa boso tur ta pensa meskos.+ Mustra empatia; stima otro manera ruman; mustra tierno kompashon+ i sea humilde.+
9 No paga malu ku malu.+ I ora hende ofendé* boso, no ofendé nan bèk.+ Al kontrario, bendishoná nan,+ pasobra Dios a skohe* boso pa boso bendishoná hende. Dios, na su turno, lo bendishoná boso.
10 Ta pará skirbí: “Ken ku ke disfrutá di bida i biba largu i felis mester frena su lenga pa e no papia loke ta malu+ i frena su lepnan pa e no papia mentira.
11 E mester evitá loke ta malu+ i hasi loke ta bon.+ E mester buska pas i hasi esfuerso pa e keda na pas ku otro hende.+
12 Pasobra Yehova* su bista ta riba hende hustu, i su oreanan ta skucha nan súplikanan.+ Yehova* ta kontra hende ku ta hasi malu.”+
13 Si boso ta hasi tur boso esfuerso pa hasi loke ta bon, ken por hasi boso daño?+
14 Asta si boso tin ku sufri pa motibu di hustisia, boso lo ta felis.+ Boso no mester tin miedu di loke otro hende tin miedu di dje,* i boso no mester preokupá.+
15 Onra Kristu, nos Señor,* i sea semper kla pa kontestá tur hende ku ta hasi boso pregunta tokante e speransa ku boso ta karga. Ora boso ta kontestá nan, hasi esei na un manera suave+ i ku rèspèt profundo.+
16 Sòru pa semper boso tin un konsenshi limpi,+ ya asina e hendenan ku ta papia malu di boso por mira ku boso ta siguidó di Kristu. Nan lo haña bèrgwensa+ debí na boso bon kondukta.+
17 Ta mihó boso sufri pa motibu ku boso ta hasi bon,+ si Dios permití esei, ku boso sufri pa motibu ku boso ta hasi maldat.+
18 Kristu tabata un hòmber hustu. El a muri un biaha i pa semper pa eliminá piká+ di hende inhustu.+ Asina, el a hasi posibel ku nos por hala serka Dios.+ Nan a mat’é ora e tabata na tera komo un ser humano,+ pero el a haña bida bèk i awor e ta un ser selestial.*+
19 Despues ku el a bira spiritu, el a bai proklamá un mensahe na e spiritunan* den prizòn.+
20 Tabata trata di e spiritunan ku a desobedesé Dios den e dianan di Noe,+ tempu ku Dios tabata warda ku pasenshi durante konstrukshon di e arka.+ Ta masha poko hende, ocho alma* so, a drenta den e arka i ser hibá sano i salvo atraves di e awanan.+
21 Awe, den un sentido similar, boso tambe por ser salbá pa medio di boso boutismo, danki na resurekshon di Hesukristu. (Boutismo no ta laba kita impuresa di karni. Boutismo ta un persona su petishon na Dios pa un konsenshi limpi.)+
22 Kristu a bai shelu, i awor e ta na man drechi di Dios.+ Anto Dios a pone e angelnan i e personanan ku tin poder i hende ku outoridat bou di outoridat di Kristu.+
Nota
^ Òf: “pasobra e ta testigu okular.”
^ Òf: “tin kondukta puru.”
^ Òf: “ku tabata konfia.”
^ Òf: “sigui mustra komprenshon na boso esposa, ku ta biba huntu ku boso.”
^ Òf: “insultá.”
^ Lit.: “yama.”
^ Òf posiblemente: “No laga menasa di hende pone boso drenta pániko.”
^ Òf: “Santifiká Kristu, nos Señor, den boso kurason.”
^ Lit.: “un spiritu.”
^ Esta, e demoñonan.
^ Òf: “hende.”
