1 Tesalonica 5:1-28
5 Natan, agagi, nipaakar ed saray panaon tan tiempo, anggapo lay kaukolan ya isulat mi ed sikayo.
2 Ta kabkabat yo a say agew nen Jehova et onsabin singa matakew ed labi.
3 Sano ibabaga ran: “Kareenan tan kaligenan!” et tampol ya onsabi ed sikara so biglan kadederal a singa pampapasakit na biin malukon; tan ag-iran balot makaliktar.
4 Balet sikayo, agagi, anggapo kayo ed kabilungetan pian nasabian na satan ya agew a singa ed saray matakew,
5 ta sikayon amin et ananak na liwawa tan ananak na agew. Anggapo itayo ed labi odino diad kabilungetan.
6 Kanian, ag-itayo la komon nanaugip a singa gagawaen na arum, noagta mansiansia itayon aliing tan mantultuloy itayon manlikas.
7 Ta diad labi so apasalan lan iyugip na saramay nanaugip, tan diad labi met so naynay a pakakabuek na saramay manbuabuanges.
8 Balet sikatayo ya ananak na agew, mantultuloy itayon manlikas tan isulong tayo so pananisia tan aro a singa samben ed pagew tan say ilalo na kilalaban a singa hilmit;
9 ta sikatayoy pinili na Dios pian nilaban diad panamegley na Katawan tayon Jesu-Kristo, aliwan pian managmak na sanok to.
10 Sikatoy inatey parad sikatayo, pian balanglan mansiasiansia itayon aliing odino nanaugip, manbilay itayon kaiba to.
11 Kanian itultuloy yon ligliwaen tan pabiskegen so sakey tan sakey, a singa gagawaen yo la.
12 Kerewen mi natan ed sikayo, agagi, a respeto yo iramay mansasagpot ed limog yo tan mangidadaulo ed sikayo ed kimey na Katawan tan manisimbawa ed sikayo;
13 tan ipanengneng yo ed sikara so mas aralem a panamabli tan panangaro lapud kimey da. Pansiansia yo so kareenan ed sakey tan sakey.
14 Balet, bilinen mi kayo, agagi, a simbawa yo iramay ag-ontutulok, ligliwa yo iramay maneermen, tulongan yo iramay makapuy, itultuloy yon anosan so amin.
15 Anggapon balot komon ed sikayo so ombawi ed mauges a ginawa na arum, noag ingen manggawa kayon naynay na maabig ed balang sakey tan ed amin.
16 Manliket kayon naynay.
17 Mantultuloy kayon manpikasi.
18 Misalamat kayo parad amin a bengatla. Ta saya so linawa na Dios ed sikayo diad panamegley nen Kristo Jesus.
19 Agyo eerepen so apoy na espiritu.
20 Agyo mumudmoraen iray panagpropesiya.
21 Seguroen yo so amin a bengatla; ombemben kayon malet ed maabig a bengatla.
22 Arawian yo so amin a klase na kaugsan.
23 Komon ta sigpot kayon pasantosen na Dios na kareenan. Say espiritu tan kamarerwa tan laman yo, agagi, so mansiansia komon ya anggapoy pakabalawan tan nagnap ed amin a paraan diad kiwawala na Katawan tayon Jesu-Kristo.
24 Matoor so Dios a manatawag ed sikayo, tan tooren toy salita to.
25 Agagi, itultuloy yo kamin ipikasi.
26 Ibano yo so amin ya agagi diad panamegley na masanton angob.
27 Iganggan ta kayo diad ngaran na Katawan ya ibasa yo iyan sulat ed amin ya agagi.
28 Niwala komon ed sikayo so agnaparaan a kaabigan na Katawan tayon Jesu-Kristo.
