1 Tesalonica 2:1-20
2 Sikayon mismo, agagi, so makaamta no panon a say imbisita mi ed sikayo et agnagmaliw ya anggapoy resulta,
2 balet kayari na impanirap mi tan impanmaltrato ed sikami diad Filipos (unong ya amta yo la), akapampakpel kamin maong diad tulong na Dios tayo pian nipulong mi ed sikayo so maong a balita nipaakar ed Dios diad pinasyan impansagpot mi.
3 Ta say pamibilin mi et agmanlalapud katilaan odino karutakan odino diad panagpalikdo,
4 balet mansasalita kami, aliwan pian paliketen iray totoo, noag say Dios a manuusisa ed kapusoan mi, ta pinaneknekan na Dios a manepeg kamin pangimatalekan na maong a balita.
5 Say Dios so makatasi ya anggan kapigan et agmi kayo nilaroglarogan, (unong ya amta yo met la) odino nankunkunwari kami lapud inkaagum!
6 Ta agmi pipirawaten ya igloria kami na totoo, andi, balanglan sikayo odino say arum, anggano nayarian mi komon so magmaliw a pabelat ed sikayo bilang apostoles nen Kristo.
7 Balet nagmaliw kamin mauyamo ed limog yo, a singa sakey a manpapasuson ina a maar-aro ed dilin ananak to.
8 Kanian lapud panamabli mi ed sikayo, aliwa labat a say maong a balita nipaakar ed Dios so nanliketan min inabang ed sikayo noagta say bilay* mi met, ta inar-aro mi kayo.
9 Seguradon nonodnonoten yo, agagi, so impankimey tan impansagpot mi. Agew-labi kamin nantrabaho, ta pian agkami magmaliw a pabelat ed anggan siopa ed sikayo, sanen impulong mi ed sikayo so maong a balita nipaakar ed Dios.
10 Natasian yo, ontan met na Dios, a nagmaliw kamin matoor tan matunong tan anggapoy pakabalawan mi diad sikayoran mananisia.
11 Unong ed satan, amta yo no panon a naynay min bibilinen so kada sakey ed sikayo, tan liligliwaen tan papasesegen mi kayo, a singa gagawaen na ama ed ananak to,
12 ta pian manbilay kayon makana ed imaton na Dios a manatawag ed sikayo diad panarian tan gloria to.
13 Kanian agkami met ontutundan misasalamat ed Dios, ta sanen nadngel yo ed sikami so salita na Dios, inawat yo itan bilang salita na Dios, aliwan salita na totoo, ta saya so katuaan tan walaan met na impluensya ed sikayoran mananisia.
14 Ta inalig yo, agagi, so alimbawa na saray kongregasyon na Dios diad Judea bilang nikasakey ed si Kristo Jesus, lapud pinairap kayo met na saray kanasyonan yo a singa ed impamairap met ed sikara na saray Judio,
15 ya amatey ni ingen ed Katawan a Jesus tan saray propeta tan amasegsegang ed sikami. Sakey ni et agda papaliketen so Dios noagta sumpa ra ed saray pankaabigan na amin a totoo,
16 tan aamperen da kamin manpulong ed saray totoo na nasyon pian saraya so nilaban komon, kanian naynay a mankakasalanan ira. Balet sinmabin siansia ed sikara so sanok to.
17 Balet, agagi, sanen niyarawi kami ed sikayo ed aganon panaon, sankanonot mi kayo anggaman agmi kayo nanenengneng. Kanian lalon nanseetan mi tan nampirpirawatan mi so makapinengnengan ed sikayo.
18 Lapud saya et labalabay mi lay onla ed sikayo, tan amidua lan ginetmak so onla ed sikayo, on, siak a mismo, balet ta sinaraan nen Satanas so dalan mi.
19 Ta antoy ilalo mi odino liket mi odino korona a panggagayagaan mi ed arap na Katawan tayon Jesus diad kiwawala* to? Agta sikayo?
20 On, sikayo so gloria tan liket mi.
