1 Tesalonica 1:1-10
1 Siak, si Pablo, kaibak si Silvano* tan si Timoteo, so nansulat ed kongregasyon na saray taga Tesalonica a nikasakey ed Dios ya Ama tayo tan ed Katawan a Jesu-Kristo:
Nawalaan kayo komon na agnaparaan a kaabigan tan deen.
2 Naynay kamin misasalamat ed Dios sano bibitlaen mi ed saray pikakasi mi so nipaakar ed sikayon amin,
3 ta diad imaton na Dios tan Ama tayo et sankanonot min naynay so matoor a pankikimey yo tan maaron pansasagpot yo tan pansusungdo yo lapud ilalo yo ed Katawan tayon Jesu-Kristo.
4 Ta amta mi so impamili na Dios ed sikayo, agagin inad-aro to,
5 lapud akasabi ed sikayo so maong a balita ya ipupulong mi, aliwan diad panamegley labat na panagsalita noagta diad panamegley met na pakayari tan masanton espiritu tan mabiskeg a pananisia. Tan amta yo no anton klase na totoo so nagmaliwan mi nisengeg ed sikayo;
6 tan inalig yo kami tan say Katawan, lapud inawat yo so salita na Dios diad dakel a kairapan tekep na liket, a manlalapud masanton espiritu,
7 kanian nagmaliw kayon ehemplo ed amin a mananisia diad Macedonia tan diad Acaya.
8 Diad tua et agyo labat inyabawag so salita nen Jehova diad Macedonia tan Acaya, noagta diad amin a pasen et nadngelan so nipaakar ed pananisia yo ed Dios, kanian anggapo lan balot so nibaga mi.
9 Ta sikaran mismo et naynay dan ibabalita no panon so unonan impakakar mi ed sikayo tan no panon ya inarawian yo iray idolo yo pian magmaliw kayon ariripen na mabilay tan tuan Dios,
10 ontan met ed panaalagar yo ed Anak to manlapud tawen, a pinaoli to manlapud saray inaatey, salanti, si Jesus, a mangililiktar ed sikatayo manlapud onsasabin sanok.
