1 Tesalonica 3:1-13
3 Kanian, sanen agmi la nitepel, denesidi mi so ontilak diad Atenas;
2 tan imbaki mi si Timoteo, ya agi tayo tan ministro na Dios parad maong a balita nipaakar ed Kristo, ta pian pabiskegen tan ligliwaen to kayo nisengeg ed pananisia yo,
3 pian anggapo so nisian lapud sarayan kairapan. Ta amta yo a seguradon nagawa ed sikatayo iyan mismon bengatla.
4 Diad tua, sanen kaiba mi kayo, naynay mi lan ibabaga ed sikayo a seguradon sagmaken tayoy kairapan, a singa agawa met la tan amta yo itan.
5 Kanian, sanen agko la nitepel, imbakik si Timoteo pian naamtaan koy nipaakar ed katooran yo, ompano natutukso kayo la na Managtukso, tan magmaliw ya anggapoy kakanaan na impansagpot mi.
6 Balet kasabisabi dia natan nen Timoteo a nanlapud sikayo tan impasabi to ed sikami so maong a balita nipaakar ed katooran tan panangaro yo, tan naynay yon nononoten iray maliket ya impanlilimog tayo, a pipirawaten yoy makapinengnengan ed sikami, on, singa ed pampipirawat mi met ed sikayo.
7 Kanian, agagi, aligliwa kami ed ipapanengneng yon katooran, anggano mankakkaukolan tan maniirap kami,
8 ta natan et nabibilay kami no ontatalindeg kayo nipaakar ed Katawan.
9 Ta panon min nipanengneng ed Dios so pisasalamat mi lapud sikayo, tan lapud amin a pamapaliket yo ed sikami ed arap na Dios tayo,
10 ta agew-labi kamin manpipikasi a masimsimoon pian napinengnengan mi kayo tan napanoan mi no antoy kulang nipaakar ed pananisia yo?
11 Komon ta say Dios tan Ama tayo tan say Katawan tayon Jesus so mangiwanwan no iner so dalanen mi pian makakar kami ed sikayo.
12 Niarum ni, pakiwasen kayo komon na Katawan a mas lalon aroen yoy sakey tan sakey tan say amin, a singa gagawaen mi met ed sikayo;
13 diad ontan et napabiskeg toy kapusoan yo, tan magmaliw kayon andiay pakabalawan tan masanto ed arap na Dios tan Ama tayo diad kiwawala na Katawan tayon Jesus a kaiba so amin a masanton totoo to.
