1 Tesalonica 4:1-18
4 Kaunoran, agagi, binilin mi kayo la no panon so nepeg yon pankurang tan pamaliket ed Dios, tan gagawaen yo la iya. Kerewen mi natan ed sikayo tan pasesegen mi kayo diad ngaran na Katawan a Jesus ya itultuloy yon gawaen iya a nagkalalo.
2 Ta amta yo iray ganggan ya inter mi ed sikayo diad panamegley na Katawan a Jesus.
3 Ta linawa na Dios a napasanto kayo, ya arawian yo so pilalawanan;*
4 a nepeg ya amtaen na kada sakey ed sikayo no panon ton kontrolen so laman ton dili diad kasantosan tan kagalangan,
5 ya aliwan diad maagum a pilalek ed sekso a singa say gagawaen na saramay nasyon ya agmikabat ed Dios;
6 pian anggapo ed sikayo so manggawa na makaderal ed agi to odino pibalian to iray kanepegan na agi to nipaakar ed saya, ta dusaen nen Jehova iramay manggagawa ed sarayan amin, unong ya imbaga mi la nensaman tan impaliwawa mi met la ed sikayo.
7 Ta tinawag itayo na Dios, aliwan parad karutakan, noagta nipaakar ed kasantosan.
8 Kanian, samay mangibabaliwala ed sayan bangat et aliwan too so ibabaliwala to noagta say Dios, a mangiiter ed sikayo na masanton espiritu to.
9 Balet, nipaakar ed aroan bilang sanaagi, agla nakaukolan a sulatan mi kayo ni, ta imbangat kayo la na Dios a manaaroan kayo;
10 tan, diad tua et gagawaen yo la itan ed amin ya agagi ed interon Macedonia. Balet pasesegen mi kayo, agagi, ya itultuloy yon gawaen itan a nagkalalo,
11 tan panggunaetan yo so manbilay a mareen tan agkayo mibabali ed gagawaen na arum tan mankimey kayo diad saray lima yon dili, unong ed ingganggan mi la ed sikayo;
12 ta pian magmaliw a masimpit so kabibilay yo diad imaton na saray totoo ed paway* tan anggapo lay antokaman a nakaukolan yo.
13 Niarum ni, agagi, agmi labay ya anggapoy pikakabat yo nipaakar ed saramay nanaugip ed patey; pian agkayo manermen a singa ed paneermen na arum ya andian na ilalo.
14 Ta no papanisiaan tayo a si Jesus et inatey tan inmoli, panisiaan tayo met a paolien na Dios iramay naugip la ed patey diad panamegley nen Jesus pian nakaiba to.
15 Ta saya so ibabaga mi ed sikayo unong ed salita nen Jehova: sikatayoran mabilay legan na kiwawala na Katawan et agtayon balot unaan iramay naugip la ed patey;
16 lapud say Katawan a mismo so onleksab manlapud tawen tan mangiganggan, a walaan na boses na sakey ya arkanghel tan walaan na trumpeta na Dios, tan saramay inaatey a nikasakey ed si Kristo so unonan onoli.
17 Kayari na satan, sikatayoran mabilay, pati sikara, so alaen ed saray lurem pian mangabet ed Katawan diad dagem; diad ontan et naynay tayo lan nakaiba so Katawan.
18 Kanian itultuloy yon ligliwaen so sakey tan sakey diad panamegley na sarayan salita.
