1 Juan 5:1-21
5 Amin a manisia a si Jesus so Kristo et ananak na Dios, tan amin a mangaaro ed Ama et mangaaro met ed anak to.
2 Diad saya et naamtaan tayo ya aaroen tayo so ananak na Dios, sano aaroen tayo so Dios tan gagawaen tayo iray ganggan to.
3 Ta saya so kabaliksan na panangaro ed Dios, ya unoren tayo iray ganggan to; tan aliwan makapabelat iray ganggan to,
4 lapud say mundo et tinalo na amin ya ananak na Dios. Tan tinalo tayo so mundo diad panamegley na pananisia tayo.
5 Siopay makatalo ed mundo noag samay walaan na pananisia a si Jesus so Anak na Dios?
6 Saya imay sinmabi ed panamegley na danum tan dala, si Jesu-Kristo; aliwan diad danum lambengat, noagta diad danum tan diad dala. Tan say espiritu so mantatasi, lapud say espiritu et katuaan.
7 Ta walay taloran mantatasi,
8 say espiritu tan say danum tan say dala, tan manpapaknaan irayan talo.
9 Mas mabiskeg ni pantatasi na Dios nen say pantatasi na totoo ya aawaten tayo, lapud say tatasian na Dios et say katuaan a tinasian toy nipaakar ed Anak to.
10 Say too a papanisiaan toy Anak na Dios et walay pantasin niiter ed sikato. Say toon andian na pananisia ed Dios et gagawaen ton matila so Dios, lapud agto anisiaan so pantasin niiter, salanti, say impantasi na Dios nipaakar ed Anak to.
11 Tan saya so pantasin niiter, salanti, say Dios so angiter ed sikatayo na bilay ya andi-anggaan, tan sayan bilay et walad Anak to.
12 Samay mangawat ed Anak et walaan na sayan bilay; samay agmangawat ed Anak na Dios et andian na sayan bilay.
13 Isusulat ko ed sikayo irayan bengatla ta pian naamtaan yo a walaan kayoy bilay ya andi-anggaan, sikayoran manisia ed ngaran na Anak na Dios.
14 Tan makapanmatalek itayo ed sikato ya antokaman so kerewen tayo unong ed linawa to, dengelen to itayo.
15 Sakey ni, no amta tayon dedengelen to so antokaman a kerewen tayo, amta tayo ya awaten tayo iratan lapud kinerew tayo ed sikato.
16 No say sakey et nanengneng toy agi to a manggagaway kasalanan ya agmansumpal ed patey, sikatoy ipikasi to, tan iter na Dios ed sikato so bilay, on, diad saramay agmanggagawa na kasalanan a mansumpal ed patey. Walay kasalanan a mansumpal ed patey. Nipaakar ed sayan kasalanan et agko ibabaga ya ipikasi to imay manggagawa ed saya.
17 Amin ya ag-inkatunong et kasalanan; ingen ta walay kasalanan ya agmansumpal ed patey.
18 Amta tayo ya agmanggagawa na kasalanan so balang anak na Dios, balet sikatoy babantayan na Anak na Dios, tan agnapasakitan na samay sakey a mauges.
19 Amta tayo a wala itayo ed dapag na Dios, balet say interon mundo et walad pakayari na samay sakey a mauges.
20 Balet amta tayo a sinmabi lay Anak na Dios, tan inikdan to itayo na pakatalos pian nakabat tayo so tuan Dios. Tan diad panamegley na Anak ton si Jesu-Kristo et nikasakey itayo ed sikato. On, saya so tuan Dios tan lapuan na bilay ya andi-anggaan.
21 Ana’ko ran angkekelag, paliisan yo iray idolo.
