1 Juan 4:1-21
4 Inad-arok ira, agyo papanisiaan so kada impuyan a salita, noag ingen subok yo iray impuyan a salita pian naseguro yo no kasin nanlapu iratan ed Dios, ta dakel so palson propeta a linmesa diad mundo.
2 Naamtaan yo so impuyan a salitan nanlapud Dios ed onian paraan: Say kada impuyan a salita et nanlapud Dios no bibidbiren na satan a nagmaliw a too si Jesu-Kristo,
3 balet say kada impuyan a salita et agnanlapud Dios no agbibidbiren na satan so nipaakar ed si Jesus. Niarum ni, saya imay impuyan a salita na antikristo a nadngel yon onsabi, tan natan et wala la ed mundo.
4 Ana’ko ran angkekelag, wala kayo ed dapag na Dios, tan adaeg yo la iratan a totoo, lapud samay akikasakey ed sikayo et mas makapanyari nen samay akikasakey ed mundo.
5 Walara ed dapag na mundo; kanian say sasalitaen da et manlalapud mundo tan dedengelen ira na mundo.
6 Wala tayo ed dapag na Dios. Samay manaaral pian nakabat to so Dios et ondedengel ed sikatayo, balet samay anggapo ed dapag na Dios et ag-ondedengel ed sikatayo. Diad onian paraan et nabidbir tayo no dinan ya impuyan a salita so katuaan odino katilaan.
7 Inad-arok ira, mantultuloy itayon manaaroan, lapud say aro et nanlapud Dios, tan balang sakey a mangaaro et anak na Dios tan manaaral pian nakabat toy Dios.
8 Samay agmangaaro et agto kabat so Dios, ta say Dios et aro.
9 Lapud saya et nipatnag so aro na Dios ed sikatayo, ta imbaki na Dios so bogbogtong ya Anak to diad mundo pian nagamoran tayo so bilay diad panamegley to.
10 Sayan panangaro et aliwan lapud inaro tayo so Dios, noagta lapud inaro to itayo tan imbaki toy Anak to bilang bagat a manakbong* ed saray kasalanan tayo.
11 Inad-arok ira, no onia so impangaro na Dios ed sikatayo, obligado itayo sirin a manaaroan.
12 Anggapo nin balot so toon akanengneng ed Dios. No mantultuloy itayon manaaroan, mansiansia ed sikatayo so Dios tan magmaliw ya ayadyari so aro to ed sikatayo.
13 Diad saya et amta tayo a mansiasiansia itayon nikasakey ed sikato tan sikatoy nikasakey ed sikatayo, lapud inter to ed sikatayo so espiritu to.
14 Niarum ni, anengneng tayon mismo tan tatasian tayo ya imbaki na Ama so Anak to bilang Manangilaban na mundo.
15 Siopaman a mamibidbir a si Jesu-Kristo et Anak na Dios, mansiansian nikasakey ed sikato so Dios tan sikatoy nikasakey ed Dios.
16 Tan naamtaan tayo la tan papanisiaan tayo so panangaro na Dios ed sikatayo.
Say Dios et aro, tan samay mansiansia ed aro et mansiansian nikasakey ed Dios tan say Dios et mansiansian nikasakey ed sikato.
17 Nagmaliw ya ayadyari ed sikatayo so aro ed onian paraan, pian makpel itayon makapansalita diad agew na panangukom, ta diad sayan mundo et singa itayo si Kristo.
18 Diad aro et anggapo so takot, ta papaandien na ayadyarin aro so takot, lapud say takot et makaamper. On, agni ayadyari so aro ed toon matakot.
19 Balet, mangaaro itayo lapud sikato so inmunan angaro ed sikatayo.
20 No siopaman so mangibagan: “Inarok so Dios,” ingen ta bubusolen toy agi to, sikatoy matila. Ta samay agmangaaro ed agi to a nanenengneng to et agto nayarian ya aroen so Dios ya agto nanenengneng.
21 Tan nanlapud sikato iyan ganggan ed sikatayo, a samay mangaaro ed Dios et nepeg ya aroen to met so agi to.
