1 Juan 3:1-24
3 Imano yo no panon kabaleg so panangaro na Ama ed sikatayo, ta pian natawag itayon ananak na Dios; tan ontan itayo. Kanian sikatayoy agkabat na mundo, lapud agda kabat so Dios.
2 Inad-arok ira, natan et ananak itayo na Dios, ingen ta agni nipaamta no antoy pagmaliwan tayo. Balet amta tayo a sano sikatoy niparungtal la, magmaliw itayon singa sikato, lapud sikatoy peteg a nanengneng tayo.
3 Tan lapud sikatoy malinis, balang sakey a maniilalo ed sikato et nepeg a linisan toy inkasikato.
4 Amin a manggagaway kasalanan et manggagawa met na kaugsan, kanian say kasalanan et kaugsan.
5 Amta yo met a sinmabi si Jesus pian ekalen to iray kasalanan tayo, tan sikatoy andian na kasalanan.
6 Amin a mansiasiansian akikasakey ed sikato et agmanggagaway kasalanan; siopaman a manggagaway kasalanan et agto anengneng odino agto kabat si Jesus.
7 Ana’ko ran angkekelag, anggapo komon so mangibalang ed sikayo; samay manggagawa na inkatunong et matunong, no panon a si Jesus et matunong.
8 Samay manggagaway kasalanan et walad dapag na Diablo, ta say Diablo et mankakasalanan la manlapud gapo. Nisengeg ed saya et nipatnag so Anak na Dios, salanti, pian deralen to iray kimey na Diablo.
9 Amin ya ananak na Dios et agmanggagaway kasalanan, lapud mansiasiansia ed sikara so bini To, tan ag-ira nayarin manggaway kasalanan, lapud ananak ira na Dios.
10 Saray ananak na Dios tan saray ananak na Diablo et napatnagan ed saya: Balang sakey ya agmanggagawa na inkatunong tan agmangaaro ed agi to et anggapo ed dapag na Dios.
11 Ta oniay mensahe a nadngel yo diad gapo, a nepeg a manaaroan itayo;
12 aliwan singa si Cain, a walad dapag na samay sakey a mauges tan pinatey toy agi to. Tan antoy makasengeg a pinatey to? Lapud mauges iray mismon gawa to, balet matunong iray gawa na agi to.
13 Agagi, agyo pankelawan a bubusolen kayo na mundo.
14 Amta tayo a singa tayo inatey nensaman, balet natan et mabilay itayo la, lapud aaroen tayo iray agagi. Samay agmangaaro et mansiasiansia ed patey.
15 Balang sakey a mamubusol ed agi to et sakey a managpatey, tan amta yo ya anggapo so bilay ya andi-anggaan ed sakey a managpatey.
16 Diad saya et akabatan tayo so nipaakar ed aro, ta inter nen Jesus so kamarerwa to parad sikatayo; tan nepeg tayon iter iray kamarerwa tayo parad agagi tayo.
17 Balet siopaman a walaan na magenap a pambilay tan nanenengneng to a mankakkaukolan so agi to ingen ta agto labay a kasian, panon a nibaga ya aaroen toy Dios?
18 Ana’ko ran angkekelag, mangaro itayo, aliwan diad salita odino diad dila, noagta diad gawa tan katuaan.
19 Diad saya et naamtaan tayo a wala itayo ed katuaan, tan napaseguroan tayoy kapusoan tayo ed arapan to
20 anggano uukomen itayo na kapusoan tayo, lapud say Dios et babaleg nen say kapusoan tayo tan amta to so amin a bengatla.
21 Inad-arok ira, no ag-itayo uukomen na kapusoan tayo, walay kawayangan tayon makapansalita ed arap na Dios;
22 tan antokaman so kerewen tayo ed sikato et awaten tayo, lapud uunoren tayo iray ganggan to tan gagawaen tayo iray makapaliket ed imaton to.
23 On, saya so ganggan to, a panisiaan tayo so ngaran na Anak ton si Jesu-Kristo tan manaaroan itayo, unong ya ingganggan to ed sikatayo.
24 Sakey ni, say manguunor ed saray ganggan to et mansiasiansian nikasakey ed sikato, tan sikatoy nikasakey met ed satan a too; tan diad saya et amta tayo a sikatoy mansiansian nikasakey ed sikatayo, lapud espiritu ya inter to ed sikatayo.
