Kɛmɔ yɛnwunle ye wɔ edwɛkɛ mɔɔ lumua ɛhye anyunlu anu la, Gyisɛse vale ye mekɛ kɔsɔɔti ‘bɔle Belemgbunlililɛ ne anwo edwɛkpa ne nolo.’ (Luku 8:1) Ɔbɔle mɔdenle ɔdiale adenle mayɛlɛ ɛya dɔɔnwo wɔ Yizilayɛ maanle nu amaa yeahilehile menli Nyamenle Belemgbunlililɛ ne anwo debie. Bɛhɛlɛ Gyisɛse ɛzonlenlɛ gyima ne anwo edwɛkɛ wɔ Edwɛkpa nna ne mɔɔ ka Belemgbunlililɛ ne anwo edwɛkɛ mɔɔ bo 100 la anu. Nuhua dɔɔnwo wɔ edwɛkɛ mɔɔ Gyisɛse hanle la anu, noko bɛle Nyamenle Belemgbunlililɛ ne anwo edwɛkɛ mɔɔ ɔhanle la anu ekyi bie!—Dwɔn 21:25.

Duzu ati a Gyisɛse wɔ azɛlɛ ye azo la ɛnee Belemgbunlililɛ ne hyia ye kpole a? Ɛnee Gyisɛse ze kɛ, Nyamenle ɛye ye kɛ ɔbayɛ zolɛ Tumivolɛ. (Ayezaya 9:6; Luku 22:28-30) Noko ɛnee ɔngyi Gyisɛse anye zo kɛ ɔdie tumi anzɛɛ anyunlunyia yeamaa ɔ nwo. (Mateyu 11:29; Maake 10:17, 18) Tɛ ye boɛyɛlɛ ti a ɔhanle Belemgbunlililɛ ne anwo edwɛkɛ dɔɔnwo a. Ɛnee Nyamenle Belemgbunlililɛ ne * hyia Gyisɛse titile, ɔlua mɔɔ ɔbayɛ yeamaa menli mɔɔ ɔkulo bɛ la—ye anwuma Selɛ ne yɛɛ ye nɔhalɛ ɛdoavolɛma.

Gyisɛse kulo ye anwuma Selɛ ne kpole. (Mrɛlɛbulɛ 8:30; Dwɔn 14:31) Ɔ nye die ye Papa subane ngɛnlɛma, mɔɔ le kɛ Ye ɛlɔlɛ, Ye anwunvɔnezelɛ yɛɛ Ye pɛlepɛlelilɛ ne anwo. (Mɛla ne 32:4; Ayezaya 49:15; 1 Dwɔn 4:8) Ɛnee ɔle nɔhalɛ kɛ, Gyisɛse kyi adalɛ mɔɔ bɛbɔ wɔ ɔ Ze anwo la—adalɛ mɔɔ le kɛ Nyamenle ɛndwenle alesama amaneɛnwunlɛ nwo yɛɛ Nyamenle kpondɛ kɛ yɛnwu amaneɛ la. Ɛhye a le adwenle ko mɔɔ ɔti Gyisɛse bɔle mɔdenle ‘bɔle Belemgbunlililɛ edwɛkpa ne nolo’ la—ɛnee ɔze kɛ ɔnrɛhyɛ Belemgbunlililɛ ne bade ye Papa duma nwo. (Mateyu 4:23; 6:9, 10) Kɛzi ɔbayɛ ye ɛ?

Gyihova balua Belemgbunlililɛ ne azo ayɛ nzenzaleɛ dɔɔnwo mɔɔ baboa alesama abusua ne la. Ɔbakyikyi alesama mɔɔ di nɔhalɛ la ‘anye anwo monle.’ Gyihova baye mɔɔ maa bɛsu la avi ɛkɛ, yeanlea kɛ ‘ewule ɛnle ɛkɛ bieko, na monle nee nyane nee ɛzunlɛ ɛnle ɛkɛ ne bieko.’ (Yekile 21:3, 4) Nyamenle balua Belemgbunlililɛ ne azo aye alesama amaneɛnwunlɛ kɔsɔɔti avi ɛkɛ. *

 Ɔnyɛ nwanwane kɛ Gyisɛse anye bolole kɛ ɔbaha Belemgbunlililɛ ne anwo edwɛkɛ yeahile menli la! Ɛnee ɔze kɛ ɔbamaa bɛanwu kɛzi amgba ye Papa tumi ne le kpole nee kɛzi ɔse anwunvɔne la. (Gyemise 5:11) Ɛnee Gyisɛse ze noko kɛ, Belemgbunlililɛ ne baboa awie mɔ mɔɔ ɔkulo bɛ edwɛkɛ—alesama mɔɔ di nɔhalɛ la.

Mekɛ tendenle kolaa na Gyisɛse ara azɛlɛ ye azo la, ɛnee ɔwɔ ɔ Ze anwo lɔ wɔ anwuma. Selɛ ne luale Ralɛ ne anwo zo bɔle debie biala—ɔvi anwuma mɔɔ nwɔlɔra ekpunli ngakyile mɔɔ yɛ nwanwane dɔɔnwo wɔ ɛkɛ badwu yɛ azɛlɛ kɛnlɛma ye mɔɔ nane ɛyi zolɛ la azo. (Kɔlɔsaema 1:15, 16) Noko, ɛhye mɔ amuala anu, ɛnee Gyisɛse ‘anye die’ menli nwo.—Mrɛlɛbulɛ 8:31.

Ɛnee Gyisɛse ɛzonlenlɛ gyima ne gyi menli nwo ɛlɔlɛ zo. Ɔbɔle ɔ bo ala la, ɔmanle ɔlale ali wienyi kɛ yera kɛ ɔbabɔ ‘edwɛkpa ne nolo’ yeahile ehyiavolɛma. (Luku 4:18) Noko tɛ menli mɔɔ Gyisɛse boa bɛ la anwo edwɛkɛ ala a ɔhanle a. Fane dɔɔnwo ne ala, ɔhilele kɛ ɔlɛ alesama anwo ɛlɔlɛ. Kɛ neazo la, mekɛ mɔɔ ɔdendɛle ɔhilele menli ekpunli bie la, Gyisɛse lile “bɛ nwo nyane na ɔyɛle wuleravolɛma mɔɔ wɔ nu la ayile ɔmanle bɛdele kpɔkɛ.” (Mateyu 14:14) Mekɛ mɔɔ wuleravolɛ bie nyianle diedi kɛ Gyisɛse kulo a ɔbahola yeayɛ ye ayile la, ɛlɔlɛ hanle Gyisɛse manle ɔyɛle zɔ. Ɔyɛle nrenya ne ayile, na ɔzele ye anwunvɔne ɔhanle kɛ: “Mekulo! Ɛ nwo ɛza!” (Luku 5:12, 13) Mekɛ mɔɔ Gyisɛse nwunle kɛ ɔ gɔnwo Mɛle ɛlɛsu ɔ diema Lazalɛse ewule ne la, ‘nyane kpole hanle Gyisɛse manle alɔbɔlɛ hunle ye, na ɔzunle.’ (Dwɔn 11:32-36) Akee ɔyɛle debie nwanwane bie—Gyisɛse dwazole Lazalɛse ɔnva nwo kɛ yewu kenle nna la!—Dwɔn 11:38-44.

Nɔhalɛ nu, ɛnee Gyisɛse ze kɛ anwodɔlɛ mɔɔ ɔmanle menli nyianle la le mekɛ ekyi bie anu ɛdeɛ. Ɔnwunle ye kɛ ɔnrɛhyɛ, menli kɔsɔɔti mɔɔ ɔyɛle bɛ ayile la anwo bɛado bɛ bieko yɛɛ menli mɔɔ ɔdwazole bɛ la kɔsɔɔti bɛawu bieko. Noko akee, ɛnee Gyisɛse ze noko kɛ Nyamenle Belemgbunlililɛ ne bayɛ ngyegyelɛ ɛhye mɔ sɔbelɛ bɔkɔɔ. Ɛhye ati Gyisɛse anyɛ nwanwane gyima ala; eza ɔbɔle mɔdenle ɔbɔle ‘Belemgbunlililɛ ne anwo edwɛkpa ne nolo.’ (Mateyu 9:35) Ye nwanwane gyima ne mɔ manle bɛnwunle ninyɛne mɔɔ Nyamenle Belemgbunlililɛ ne bayɛ wɔ ewiade amuala la anu ekyi bie. Suzu ɛwɔkɛ mɔɔ Baebolo ne ɛbɔ wɔ zɔhane mekɛ ne anwo la anwo nea.

•  Anwodolɛ ɛnle ɛkɛ bieko.

  ‘Zɔhane mekɛ ne anyezinlirama anye badukue, anzodilirama anzo badukue. Zɔhane mekɛ ne abuburama bawuluwulu kɛ ahɛtɛboɛ, yɛɛ mumulema bava anyelielɛ ado edwɛne.’ Bieko, ‘maanlema ne anu biala ɛnrɛha kɛ: ‘Me nwo ɛdo me.’’—Ayezaya 33:24; 35:5, 6.

• Ewule ɛnle ɛkɛ bieko.

  “Tenlenema bava azɛlɛ ne ayɛ bɛ ɛdeɛ, na bɛadɛnla zolɛ dahuu.”—Edwɛndolɛ 37:29.

  “Ɔbame ewule bɔkɔɔ, na Awulae Nyamenle ne bakyikyi awie biala anye anwo monle.”—Ayezaya 25:8.

• Mɔwuamra bazia ara ngoane nu.

  “Mɔwuamra amuala bade ɔ ne wɔ bɛ nla ne mɔ anu, na bɛvi bɛ nla ne mɔ anu bɛbavinde.”—Dwɔn 5:28, 29.

  “Ɛtanevolɛma nee kpalɛyɛlɛma badwazo ara ngoane nu.”—Gyima ne 24:15.

• Awie biala banyia sua adɛnla nu anzɛɛ gyima ayɛ.

  “Bɛbasisi azua bɛadɛnla nu, bɛbayɛ vanye egyinli na bɛali nuhua ma ne bie. Bɛnrɛsisi azua na awie mɔ gyɛne adɛnlɛdɛnla nu; bɛnrɛlua na awie mɔ gyɛne ali. . . . Me menli ne mɔɔ mekpa nu meye bɛ la badidi bɛ sa anloa gyima nwo bɛ nye alie ahyɛ.”—Ayezaya 65:21, 22.

•  Konle ɛnle ɛkɛ bieko.

  “Ɔmaa bɛgyakyi konle wɔ azɛlɛ ye amuala azo!”—Edwɛndolɛ 46:9.

  “Maanle ko nee maanle ko ɛnrɛho bieko, yɛɛ bɛnrɛzukoa konle ɛhonlɛ bieko.”—Ayezaya 2:4.

• Ɛhɔne ɛnle ɛkɛ bieko.

  ‘Azɛlɛ ne bahye aleɛ dɔɔnwo amaa yɛ, Nyamenle, yɛ Nyamenle ne, bayila yɛ.’—Edwɛndolɛ 67:6.

  ‘Aleɛ babu azɛlɛ ne azo; ɔbabu zo wɔ awoka ne mɔ azo.’—Edwɛndolɛ 72:16.

• Ehyia ɛnle ɛkɛ bieko.

  ‘Bɛ rɛle ɛnrɛvi ehyianli dahuu.’—Edwɛndolɛ 9:18.

  ‘Mɔɔ ɛnlɛ bie la fɛlɛ a ɔbalie ye zo, ɔbalie ehyianli nee mɔɔ ɛnlɛ boavolɛ la zo. Ɔbanwu mɔɔ ɛnlɛ anwosesebɛ nee mɔɔ ɛnlɛ bie la anwunvɔne, na ɔbalie mɔɔ ɛnlɛ bie la ngoane.’—Edwɛndolɛ 72:12, 13.

Saa ɛsuzu Nyamenle Belemgbunlililɛ ne anwo ɛwɔkɛ ɛhye mɔ anwo a, ɛnwu deɛmɔti ɛnee Belemgbunlililɛ ne hyia Gyisɛse kpole la ɔ? Mekɛ mɔɔ ɔwɔ azɛlɛ ye azo la, ɔ nye bolole kɛ ɔbaha Nyamenle Belemgbunlililɛ ne anwo edwɛkɛ yeahile awie biala mɔɔ badie la, ɔluakɛ ɛnee ɔze kɛ Belemgbunlililɛ ne baye ngyegyelɛ kɔsɔɔti mɔɔ yɛnwu ye ɛnɛ la avi ɛkɛ.

Ɛ nye die Belemgbunlililɛ ne anwo ɛwɔkɛ ɛhye mɔ mɔɔ Baebolo ne ka la anwo ɔ? Saa ɛ nye die nwo a, kɛ ɔkɛyɛ na wɔazukoa Belemgbunlililɛ ne anwo ninyɛne dɔɔnwo ɛ? Duzu a ɛyɛ a ɔbamaa wɔanyia nuhua nyilalɛ ne bie a? Edwɛkɛ mɔɔ doa zo la babua kpuyia ɛhye mɔ.