Dwɔn Edwɛkpa 11:1-57
11 Nrenyia bie mɔɔ bɛfɛlɛ ye Lazalɛse la anwo dole ye; ɔvi Bɛtani, namule ne mɔɔ Mɛle nee ɔ diema raalɛ Maata vi zo la azo.+
2 Mɛle ɛhye a wolale nwole evuanlɛ ne guale Awulae agyakɛ anwo na ɔvale ɔ ti enrinli ɔkyikyile la;+ ɔ diema a le Lazalɛse mɔɔ anwo ɛdo ye la.
3 Yemɔti ɔ mediema mraalɛ ne mɔ dole ye nrɛlaleɛ kɛ: “Awulae, nea! ahenle mɔɔ ɛkulo ye edwɛkɛ la ɛnde kpɔkɛ.”
4 Noko mɔɔ Gyisɛse dele la, ɔhanle kɛ: “Anwodolɛ ɛhye ɛnrɛwie ewule nu, emomu ɔbamaa bɛawula Nyamenle anyunlunyia,+ na ɔlua zo bɛawula Nyamenle Ara ne anyunlunyia.”
5 Ɛnee Gyisɛse kulo Maata nee ɔ diema raalɛ ne yɛɛ Lazalɛse edwɛkɛ.
6 Noko mekɛ mɔɔ ɔdele kɛ Lazalɛse ɛnde kpɔkɛ la, ɔlile kenle nwiɔ wɔ ɛleka mɔɔ ɔwɔ la.
7 Ɛhye anzi ɔhanle ɔhilele ɛdoavolɛma ne kɛ: “Bɛmaa yɛhɔ Dwudiya bieko.”
8 Ɛdoavolɛma ne zele ye kɛ: “Relabae,+ ɔtɛkyɛle biala a Dwudama yɛle kɛ bɛsi wɔ awolɛ a,+ na ɛsia wɔahɔ lɔ bieko ɔ?”
9 Gyisɛse buale kɛ: “Asoo tɛ dɔnehwele 12 a wɔ alehyenlɛ ne anu a?+ Saa awie lua alehyenlɛ nu a, ɔmkpula debie, ɔluakɛ ɔnwu ewiade ɛhye wienyi ne.
10 Noko saa awie lua awozinli nu a, ɔkpula ɔluakɛ ɔnnwu wienyi ne.”
11 Ɔhanle ɛhye la, ɔdoale zo ɔhanle kɛ: “Yɛ gɔnwo Lazalɛse ɛlafe,+ na mekɔ ɛkɛ ne meahɔdunwue ye.”
12 Na ɛdoavolɛma ne zele ye kɛ: “Awulae, saa yelafe a ɛnee ɔ nwo badɔ ye.”
13 Ɛnee Gyisɛse ɛlɛka ye ewule ne anwo edwɛkɛ. Noko ɛnee bɛsuzu kɛ ɔlɛka nafelɛ kpalɛ nwo edwɛkɛ.
14 Akee Gyisɛse hanle ye wienyi hilele bɛ kɛ: “Lazalɛse ɛwu,+
15 na ɔyɛ me fɛ kɛ menle lɔ la, ɔluakɛ mɔɔ mekayɛ la bamaa bɛ diedi ayɛ kpole. Bɛmaa yɛhɔ ɔ nwo ɛkɛ.”
16 Ɔti Tɔmase mɔɔ eza bɛfɛlɛ ye Nda la zele ɔ gɔnwo mɔ ɛdoavolɛma ne kɛ: “Bɛmaa yɛdayɛ noko yɛhɔ, amaa yɛ nee ye awu.”+
17 Mɔɔ Gyisɛse dwule ɛkɛ ne la, ɔnwunle kɛ Lazalɛse ɛwu na yeli kenle nna wɔ nla* ne anu.
18 Bɛtani bikye Gyɛlusalɛm, adenle mɔɔ la bɛ avinli la kɛyɛ mayɛlɛ nwiɔ.*
19 Ɛnee Dwuuma dɔɔnwo ɛra Maata nee Mɛle anwo ɛkɛ ne kɛ bɛbakyekye bɛ rɛle wɔ bɛ diema ne ewule ne anwo.
20 Mɔɔ Maata dele kɛ Gyisɛse ɛlɛba la, ɔhɔyiale ye; noko Mɛle+ ɛdeɛ, ɔdɛnlanle sua nu.
21 Na Maata zele Gyisɛse kɛ: “Awulae, saa ɛwɔ ɛke a anrɛɛ me diema ne anwu.
22 Noko kɛkala bɔbɔ meze kɛ debie biala mɔɔ ɛkɛbiza Nyamenle la, Nyamenle kɛva kɛmaa wɔ.”
23 Gyisɛse zele ye kɛ: “Ɛ diema ne badwazo.”
24 Maata zele ye kɛ: “Meze kɛ ɔbadwazo wɔ ewudwazo ne anu+ wɔ mekɛ mɔɔ li awieleɛ la.”
25 Gyisɛse zele ye kɛ: “Mame a mele ewudwazo ne nee ngoane ne a.+ Mɔɔ kɛla ye ali kɛ ɔlɛ diedi wɔ me nu la, saa ɔwu bɔbɔ a ɔbara ngoane nu;
26 na awie biala mɔɔ de aze na ɔkɛla ye ali kɛ ɔlɛ diedi wɔ me nu la ɛnrɛwu ɛlɛ.+ Ɛdie ɛhye ɛdi ɔ?”
27 Ɔzele ye kɛ: “Ɛhɛe Awulae, medie medi kɛ wɔmɔ a ɛle Kelaese ne, Nyamenle Ara ne mɔɔ ɔwɔ kɛ ba ewiade la.”
28 Mekɛ mɔɔ ɔhanle ɛhye la, ɔhɔvɛlɛle ɔ diema Mɛle ahane na ɔzele ye kɛ: “Kilehilevolɛ ne+ ɛra na ɔlɛfɛlɛ wɔ.”
29 Ɔdele ɛhye la, ɔdwazole ndɛndɛ ɔhɔle ɔ nwo ɛkɛ.
30 Ɛnee Gyisɛse ɛtɛdwule namule ne azo, na ɛnee ɔtɛbɔ ɛleka mɔɔ Maata hɔyiale ye la.
31 Mekɛ mɔɔ Dwuuma mɔɔ wɔ Mɛle anwo ɛkɛ wɔ sua nu ɛlɛkyekye ɔ rɛle nwunle kɛ yedwazo ndɛndɛ yevinde la, bɛdoale ye, ɛnee bɛdwenle kɛ ɔlɛkɔ nla* ne+ azo yeahɔzu.
32 Mɔɔ Mɛle dwule ɛleka mɔɔ Gyisɛse wɔ na ɔnwunle ye la, ɔdule ɔdɔle ɔ gyakɛ anu na ɔzele ye kɛ: “Awulae, saa ɛwɔ ɛke a anrɛɛ me diema ne anwu.”
33 Mɔɔ Gyisɛse nwunle kɛ ɔlɛsu na Dwuuma mɔɔ ɛra ɔ nwo ɛkɛ ne noko ɛlɛsu la, nyane kpole hanle ye na ɔgyegyele ye.
34 Ɔhanle kɛ: “Nienwu a bɛvale ye bɛdole a?” Bɛbuale ye kɛ: “Awulae, bɛla banlea.”
35 Gyisɛse zunle.+
36 Na Dwuuma ne bɔle ɔ bo hanle kɛ: “Nea, amgba ɔkulo ye edwɛkɛ kpalɛ!”
37 Noko bɛ nuhua bie mɔ hanle kɛ: “Nrenyia ɛhye mɔɔ bukele anyenzinliravolɛ+ ne anye la angola anlie ye anvi ewule nu ɔ?”
38 Akee nyane kpole hanle Gyisɛse bieko na ɔhɔle nla* ne anwo. Ɛnee ɔle bolɛ bɔne, na bɛva bolɛ bɛnyi ɔ nloa.
39 Gyisɛse hanle kɛ: “Bɛye bolɛ ne.” Maata mɔɔ ɔ diema a ɛwu la hanle kɛ: “Awulae, kɛkala yebɔ ɔluakɛ yeli kenle nna.”
40 Gyisɛse zele ye kɛ: “Meanga meangile wɔ kɛ saa ɛdie ɛdi a ɛbanwu Nyamenle anyunlunyia ne ɔ?”+
41 Yemɔti bɛyele bolɛ ne. Akee Gyisɛse nleanle anwuma+ na ɔhanle kɛ: “Egya, meda wɔ ase kɛ wɔdie me a.
42 Nɔhalɛ nu, meze kɛ dahuu ɛtie me; noko menli mɔɔ gyigyi ɛke la ati a melɛka ɛhye a, amaa bɛalie bɛali kɛ ɛdawɔ a ɛzoanle me a.”+
43 Mɔɔ ɔhanle ɛhye la, ɔdeanle nu kpole kɛ: “Lazalɛse, finde bɛla!”+
44 Nrenyia ne mɔɔ ɛwu la vindele rale na ɛnee ɛdanlɛ kyekye ɔ gyakɛ nee ɔ sa yɛɛ ɔ nyunlu. Gyisɛse zele bɛ kɛ: “Bɛzianyizianyi ye bɛmaa ɔhɔ.”
45 Ɛhye ati, Dwuuma mɔɔ rale Mɛle anwo ɛkɛ ne na bɛnwunle mɔɔ ɔyɛle la anu dɔɔnwo liele ye lile,+
46 noko bɛ nuhua bie mɔ hɔle Falasiima ne ɛkɛ na bɛhɔhanle mɔɔ Gyisɛse yɛle la bɛhilele bɛ.
47 Yemɔti ɛsɔfo mgbanyinli nee Falasiima ne mɔ yiale Sanhedelin ne na bɛhanle kɛ: “Duzu a yɛyɛ a, ɔluakɛ nrenyia ɛhye yɛ nwanwane ninyɛne dɔɔnwo?+
48 Saa yɛgyakyi ye yɛmaa ɔkɔ zo ɔyɛ ɛhye a, bɛ muala bɛbalie ye bɛali na Wulomuma barava yɛ ɛzonlenlɛsua* ne nee yɛ maanle ne.”
49 Noko bɛ nuhua ko, Keeyafase,+ mɔɔ ɛnee le ɛsɔfo kpanyinli wɔ zɔhane ɛvolɛ ne anu la zele bɛ kɛ: “Bɛnze ɛhwee,
50 yɛɛ bɛtɛsuzule nwolɛ kɛ ɔle kpalɛ kɛ sonla ko kɛwu kɛmaa menli ne tɛla kɛ bɛkɛzɛkye maanle ne amuala la.”
51 Ɔ nye ɛnla nwo yɛɛ ɔhanle ɛhye a, noko kɛmɔ ɛnee ɔle ɛsɔfo kpanyinli wɔ zɔhane ɛvolɛ ne anu la ati, ɔhanle ngapezo kɛ Gyisɛse bawu amaa maanle ne,
52 yɛɛ tɛ maanle ne angome, emomu amaa yeaha Nyamenle amra ne mɔɔ ɛbɔ asande la noko yeabɔ nu yeayɛ bɛ menli ko.
53 Yemɔti ɔvi zɔhane mekɛ ne, bɛbɔle kpɔkɛ kɛ bɛbahu ye.
54 Yemɔti Gyisɛse anye ɔ nyunlu anlua wɔ Dwuuma anu, emomu ɔvile ɛkɛ ne ɔhɔle maanzinli ne mɔɔ bikye fienemgbole ne la anu, wɔ sua bie mɔɔ bɛfɛlɛ ye Yifelaem+ la azo, na ɔ nee ye ɛdoavolɛma ne dɛnlanle ɛkɛ.
55 Ɛnee Dwuuma Akpabɛnwo ne+ ɛbikye, na menli dɔɔnwo mɔɔ vi namunamu ne mɔ azo la hɔle Gyɛlusalɛm kɛ bɛkade bɛ nwo kolaa na Akpabɛnwo ne adwu zo.
56 Ɛnee bɛlɛkpondɛ Gyisɛse, na mɔɔ bɛgyigyi ɛzonlenlɛsua ne anu la, bɛbizebizale bɛ nwo kɛ: “Kɛzi bɛdwenle nwo ɛ? Ɔnrɛra ɛvoyialilɛ ne bie ɔ?”
57 Noko ɛnee ɛsɔfo mgbanyinli nee Falasiima ne mɔ ɛha kɛ saa awie nwu ɛleka mɔɔ Gyisɛse wɔ la a, ɔrabɔ bɛ amaneɛ, amaa bɛahɔhye ye.
Ɔbodwɛkɛ
^ Anzɛɛ “ngakyelɛ nla.”
^ Anzɛɛ “ngakyelɛ nla.”
^ Anzɛɛ “ngakyelɛ nla.”
^ Giliki aneɛ nu, “yɛ ɛleka.”
