Ayezaya 49:1-26

  • Gyihova sonvolɛ ne gyima (1-12)

    • Maanle maanle ne mɔ kɛnlaneɛ (6)

  • Bɛkyekye Yizilayɛ arɛle (13-26)

49  Bɛmɛ mbɔra, bɛdie me,Bɛmɛ maanle maanle mɔɔ bɛwɔ moamoa, bɛyɛ ɛnzolɛ bɛdie.+ Gyihova vɛlɛle me kolaa na bɛawo me.*+ Mekɛ mɔɔ mela me mame akunlu la, ɔbɔle me duma.   Ɔmaanle me nloa yɛle kɛ dadeɛ mɔɔ yɛ nla;Ɔvale me ɔveale ɔ sa alubo ne abo.+ Ɔmaanle menyɛle kɛ ɛda baka mɔɔ bɛzi;Ɔvale me ɔveale ye ɛda mbaka kodoku ne anu.   Ɔzele me kɛ: “O Yizilayɛ, ɛle me sonvolɛ+Mɔɔ mebalua ɛ nwo zo meala me anyunlunyia ne ali a.”+   Noko menganle kɛ: “Mevɛ mgbane. Mezɛkye me anwosesebɛ wɔ debie mɔɔ nvasoɛ ɛnle zo, na ɔle mgbane la anwo. Noko nɔhalɛ nu, me ndɛnebualɛ wɔ Gyihova ɛkɛ,*Yɛɛ me ahatualɛ wɔ me Nyamenle ne ɛkɛ.”+   Na kɛkala, Gyihova mɔɔ bɔle me wɔ ɛkolɛ nu kɛ menyɛ ye sonvolɛ la,Ɛze me kɛ menva Gyekɔbo menzia membɛlɛ ye,Amaa meaboɔboa Yizilayɛ anloa meamaa ye.+ Bɛbawula me anyunlunyia wɔ Gyihova anyunlu,Na me Nyamenle ne bayɛ me anwosesebɛ.   Na ɔhanle kɛ: “Ɛnle me sonvolɛKɛ ɛkpogya Gyekɔbo mbusua ne mɔ zoNa wɔava Yizilayɛma mɔɔ bɛbɔ bɛ nwo bane la wɔazia wɔara ala. Eza meva wɔ meyɛ maanle maanle ne mɔ kɛnlaneɛ,+Amaa me ngoanelielɛ ne adwu azɛlɛ ye azo ɛleka biala.”+  Edwɛkɛ mɔɔ Gyihova, Yizilayɛ Kpɔnevolɛ ne, ye Nwuanzanwuanza Ko ne+ ɛha ɛhile ahenle mɔɔ bɛmbu ye bie,+ ahenle mɔɔ maanle maanle ne ɛkpo ye, ahenle mɔɔ ɔle tumivolɛma sonvolɛ la ɛne: “Arelemgbunli banwu ye na bɛadwazo,Yɛɛ mgbanyima babɔ bɛ ti azeƆlua Gyihova mɔɔ ɔle nɔhavo,+Yizilayɛ Nwuanzanwuanza Ko ne mɔɔ ɛkpa wɔ la ati.”+   Edwɛkɛ mɔɔ Gyihova ɛha la ɛne: “Ɛlolɛ mekɛ* nu, membuale wɔ,+Yɛɛ ngoanelielɛ kenle ne, memboale wɔ;+Mengɔle zo membɔle ɛ nwo bane amaa meava wɔ meayɛ ngyekyeleɛ meamaa menli,+Kɛ ɛziezie azɛlɛ ne,Na ɛmaa bɛva bɛ agyapadeɛ ne mɔɔ ɛdɔ mgbane la,+   Kɛ ɛha ɛhile pilizama kɛ, ‘Bɛvinde bɛrɛla!’+ Na ɛha ɛhile bɛdabɛ mɔɔ bɛde awozinli+ nu la kɛ, ‘Bɛla bɛ nwo ali!’ Bɛbadidi wɔ ndenle ne mɔ anloa,Ndenle ne mɔ kɔsɔɔti anloa* bayɛ bɛ adidileka. 10  Ɛhɔne anzɛɛ nzuhɔne ɛnrɛhu bɛ,+Wuluwulu ɛnrɛhu bɛ yɛɛ ewia ɛnrɛbɔ bɛ.+ Ɔluakɛ Ahenle mɔɔ se bɛ anwunvɔne la bali bɛ nyunlu+Na yeava bɛ yeahɔ nzubula nwo.+ 11  Mebamaa me awoka kɔsɔɔti ahakyi adenle,Na meamaa me ademgbole ne mɔ zo anwuma.+ 12  Nea! Ɛhye mɔ vi moamoa ɛlɛba,+Nea! Ɛhye mɔ vi sɔlɔ nee adɔleɛ ɛlɛba,Yɛɛ ɛhye mɔ vi Senem+ azɛlɛ zo.” 13  Anwuma, bɛva fɛlɛkolilɛ bɛdea nu; azɛlɛ, di fɛlɛko.+ Bɛmaa awoka ɛva fɛlɛkolilɛ ɛdeɛdea nu.+ Ɔluakɛ Gyihova ɛkyekye ye menli ne arɛle,+Na yeze ye menli mɔɔ ɛlɛdi nyane la anwunvɔne.+ 14  Noko Zayɔn hɔle zo hanle kɛ: “Gyihova ɛkpo me,+ yɛɛ Gyihova arɛle ɛvi me.”+ 15  Asoo raalɛ arɛle bavi ɔ ra mɔɔ no nyɛfonlɛ,Anzɛɛ ɔ kunlu ɛnrɛyelɛyela ye ɛnrɛmaa ɔ kunlu ralɛ nrenyia ɔ? Saa mraalɛ ɛhye mɔ arɛle fi bɔbɔ a, mame me rɛle ɛnrɛvi wɔ ɛlɛ.+ 16  Nea! Mehɛlɛ wɔ duma wɔ me sa nu. Me nye dua wɔ bane ne mɔ dahuu. 17  Ɛ mra ne mɔ ba ndɛndɛ, Menli mɔɔ bubule wɔ guale na bɛzɛkyele wɔ la bagyakyi wɔ ahɔ. 18  Maa ɛ nye zo fa bɔ ɛ nwo mgbɔlɔka yia. Bɛ muala bɛlɛboɔboa bɛ nloa.+ Bɛlɛba ɛ nwo ɛkɛ. “Mekɛ ala mɔɔ mede aze la,” kɛ Gyihova se la ɛne,“Ɛbava bɛ muala wɔaziezie ɛ nwo kɛ agudeɛ,Na wɔava wɔakyekye ɛ nwo kɛ mɔɔ atɔfolɛ yɛ ye la. 19  Wɔ ɛleka ne mɔ dɔle mgbane na wɔ azɛlɛ ne mɔ zɛkyele bɔbɔ ɛdeɛ,+Noko kɛkala ɔbayɛ ekyi yeamaa bɛdabɛ mɔɔ bɛbadɛnla ɛkɛ ne la,+Na bɛdabɛ mɔɔ bɛmenle wɔ la+ bɛahɔ moamoa.+ 20  Ngakula mrenyia mɔɔ ɛwole bɛ wɔ mekɛ mɔɔ ɛ mra ne mɔ wule la baha agua ɛ nzo nu kɛ,‘Ɛke le ekyi maa yɛ. Maa yɛnyia ɛleka kpole yɛdɛnla.’+ 21  Ɛbaha wɔ wɔ ahonle nu kɛ,‘Nwane a wole ngakula ɛhye mɔ maanle me a?Ɔluakɛ mele raalɛ mɔɔ me mra ɛwu yɛɛ mele mota,Bɛ nee me ɛhɔ akɛlɛzonlenlɛ nu yɛɛ mela efiade. Nwane a tetele ɛhye mɔ a?+ Nea! Ɔhale me ngomekye,+Ɔti ɛhye mɔ vi nienwu a rale a?’”+ 22  Edwɛkɛ mɔɔ Tumivolɛ Awulae Gyihova ɛha la ɛne: “Nea! Mebamaa me sa zo meahile maanle maanle ne mɔ,Na meamaa me sɛkɛlɛneɛ ne zo meahile menli ne.+ Bɛbadedɛ ɛ mra mrenyia ne mɔ wɔ bɛ sa zo* bɛarɛlɛ wɔNa bɛazoa ɛ mra mraalɛ ne mɔ wɔ bɛ kɔme zo.+ 23  Arelemgbunli banlea wɔ,+Yɛɛ arelemgbunli amra mraalɛ banloa wɔ nyɛfonlɛ. Bɛbahoto wɔ na bɛabutu bɛ nyunlu aze+Na bɛatafe ɛ gyakɛ anwo munlutu.+Na ɛbanwu kɛ medame a mele Gyihova a;Menli mɔɔ anye la me nwo zo la anyunlu ɛnrɛgua aze.”+ 24  Asoo bɛkola bɛdie menli mɔɔ katakyie ɛhye bɛ la bɛfi ɔ sa nu,Anzɛɛ bɛkola bɛdie menli mɔɔ atisesebɛnli kɛhye bɛ la? 25  Noko edwɛkɛ mɔɔ Gyihova ɛha la ɛne: “Bɛbalie menli mɔɔ katakyie bɔbɔ ɛhye bɛ la bɛavi ɔ sa nu,+Na bɛalie menli mɔɔ atisesebɛnli kɛhye bɛ la.+ Mebadwazo meatia menli mɔɔ dwazo tia wɔ la,+Na mealie ɛ mra ne mɔ ngoane. 26  Mebamaa menli mɔɔ yɛ bɛ amumuyɛ la ali bɛ ngome bɛ nwonane,Bɛbanlo bɛ ngome bɛ mogya bɛabo kɛ nza mɔɔ yɛ fɛ la. Na menli kɔsɔɔti* banwu kɛ medame a mele Gyihova a,+Wɔ Ngoanedievolɛ+ nee wɔ Kpɔnevolɛ,+Gyekɔbo Tumivolɛ Ko ne.”+

Ɔbodwɛkɛ

Hibulu aneɛ nu, “wɔ ɛkolɛ nu.”
Anzɛɛ “Gyihova babua me ndɛne pɛlepɛle nu.”
Anzɛɛ “Mekɛ titili.”
Anzɛɛ ɔkola ɔkile, “Awoka ngyikyi ne mɔ azo.”
Hibulu aneɛ nu, “bɛ kɛnra azo.”
Hibulu aneɛ nu, “nwonane kɔsɔɔti.”