Dwɔn Edwɛkpa 14:1-31
14 “Bɛmmamaa bɛ ahonle tu.+ Bɛnyia diedi wɔ Nyamenle anu;+ bɛnyia diedi wɔ medame noko me nu.
2 Ɛleka dɔɔnwo wɔ me Ze sua nu. Saa ɔnle zɔ a, anrɛɛ meha mehile bɛ, ɔluakɛ melɛkɔ meahɔziezie ɛleka meamaa bɛ.+
3 Na saa mekɔ na mekɔsiezie ɛleka memaa bɛ a, mebara bieko na mearava bɛ meahɔ me sua nu, amaa ɛleka mɔɔ mewɔ la bɛdabɛ noko bɛara ɛkɛ.+
4 Na ɛleka mɔɔ melɛkɔ la, bɛze adenle ne.”
5 Tɔmase+ zele ye kɛ: “Awulae, yɛnze ɛleka mɔɔ ɛlɛkɔ la. Kɛ ɔkɛyɛ na yɛanwu adenle ne ɛ?”
6 Gyisɛse buale ye kɛ: “Mame a mele adenle ne+ nee nɔhalɛ ne+ nee ngoane ne+ a. Awie biala ɛmba Selɛ ne ɛkɛ kyesɛ ɔdua me nwo zo.+
7 Saa bɛze me a, anrɛɛ bɛze me Ze noko; ɔvi mekɛ ɛhye mɔɔ kɔ la, bɛze ye yɛɛ bɛnwu ye.”+
8 Felepe zele ye kɛ: “Awulae, kile yɛ Selɛ ne na yemɔ ala le kpalɛ maa yɛ.”
9 Gyisɛse buale ye kɛ: “Felepe, mekɛ tendenle ɛhye mɔɔ me nee bɛ ɛdɛnla la, ɛtɛnwunle me? Mɔɔ ɛnwu me la ɛnwu Selɛ ne noko.+ Duzu ati a ɛse, ‘Kile yɛ Selɛ ne’ ɛ?
10 Ɛnlie ɛnli kɛ me nee Selɛ ne le ko yɛɛ Selɛ ne nee me le ko ɔ?+ Edwɛkɛ mɔɔ meka mekile bɛ la, membɔ me ti anu a meka a,+ emomu Selɛ ne mɔɔ ɔ nee me le ko la yɛɛ ɔlɛyɛ ye gyima a.
11 Bɛlie me bɛli kɛ me nee Selɛ ne le ko yɛɛ Selɛ ne nee me le ko; saa tɛ ye zɔhane bɔbɔ a, gyima mɔɔ meyɛ la ati, bɛlie bɛli.+
12 Meka nɔhalɛ ne meahile bɛ, awie mɔɔ kɛla ye ali kɛ ɔlɛ diedi wɔ me nu la, ɔdaye noko ɔbayɛ gyima mɔɔ meyɛ la bie; na ɔbayɛ gyima mgbole mɔɔ tɛla ɛhye mɔ la,+ ɔluakɛ melɛkɔ Selɛ ne anwo lɔ.+
13 Bieko, debie biala mɔɔ bɛkɛbiza ye wɔ me duma nu la, mebayɛ, amaa bɛalua Ralɛ ne anwo zo bɛawula Selɛ ne anyunlunyia.+
14 Debie biala mɔɔ bɛkɛbiza ye wɔ me duma nu la, mebayɛ.
15 “Saa bɛkulo me a, bɛbali me mɛla ne mɔ azo.+
16 Na mebabiza Selɛ ne, na yeamaa bɛ boavolɛ* bieko mɔɔ ɔ nee bɛ badɛnla dahuu a,+
17 sunsum ne mɔɔ maa bɛnwu nɔhalɛ ne,+ mɔɔ ewiade ne ɛnrɛhola ɛnrɛnyia ye la, ɔluakɛ ɔnnwu ye yɛɛ ɔnze ye.+ Bɛmɛ, bɛze ye ɔluakɛ ɔwɔ bɛ nwo ɛkɛ yɛɛ ɔde bɛ nu.
18 Menrɛgyakyi bɛ nrisa. Mebazia meara bɛ nwo ɛkɛ bieko.+
19 Yeha mekɛ ekyi bie, ewiade ne ɛnrɛnwu me bieko, noko bɛmɛ, bɛbanwu me+ ɔluakɛ mede aze yɛɛ bɛbadɛnla aze.
20 Kenle zɔhane, bɛbanwu kɛ me nee Selɛ ne le ko na bɛ nee me le ko yɛɛ me nee bɛ le ko.+
21 Awie biala mɔɔ kɛlie me mɛla ne na ɔkɛli zo la ɛnee ɔkulo me. Na awie biala mɔɔ kulo me la, me Ze bahulo ye, na medame noko mebahulo ye na meaye me nwo meahile ye.”
22 Dwudase,+ tɛ Yesekaleɔto ɔ, zele ye kɛ: “Awulae, duzu ati a ɛkulo kɛ ɛye ɛ nwo ɛkile yɛ wienyi na ɛnrɛye ɛ nwo ɛnrɛhile ewiade ne ɛ?”
23 Gyisɛse buale ye kɛ: “Saa awie kulo me a, ɔbali me edwɛkɛ zo,+ na me Ze bahulo ye na yɛbara ɔ nwo ɛkɛ na yɛ nee ye adɛnla.+
24 Awie biala mɔɔ ɛngulo me la ɛnli me edwɛkɛ zo. Edwɛkɛ ne mɔɔ bɛlɛtie la ɛnle me ɛdeɛ, emomu ɔle Selɛ ne mɔɔ zoanle me la ɛdeɛ.+
25 “Meha ɛhye mɔ amuala mehile bɛ wɔ mekɛ mɔɔ mewɔ bɛ nwo ɛke la.
26 Noko boavolɛ ne, sunsum nwuanzanwuanza ne, mɔɔ Selɛ ne bazoa ye wɔ me duma nu la, yemɔ yɛɛ ɔbahilehile bɛ debie biala na yeahakye bɛ ninyɛne mɔɔ meha mehile bɛ la amuala a.+
27 Anzodwolɛ a mefa meagyakyi bɛ a; meva me anzodwolɛ memaa bɛ.+ Menva memmaa bɛ kɛ mɔɔ ewiade ne fa maa la. Bɛmmamaa bɛ ahonle tu yɛɛ bɛmmasulo.
28 Bɛdele kɛ meha kɛ, ‘Melɛkɔ na mebazia meara bɛ nwo ɛkɛ bieko.’ Saa bɛkulo me a anrɛɛ bɛbali fɛlɛko kɛ melɛkɔ Selɛ ne anwo lɔ la, ɔluakɛ Selɛ ne le kpole tɛla me.+
29 Yemɔti kɛkala, meha mehile bɛ kolaa na yeazi, amaa saa ɔsi a bɛalie bɛali.+
30 Me nee bɛ ɛnrɛdendɛ dɔɔnwo bieko, ɔluakɛ mɔɔ nea ewiade ye azo la+ ɛlɛba, na ɔnlɛ me nwo zo tumi biala.+
31 Noko amaa ewiade ne anwu kɛ mekulo Selɛ ne la, melɛyɛ mɔɔ Selɛ ne ɛha ɛhile me kɛ menyɛ la ala.+ Bɛdwazo, bɛmaa yɛvi ɛke yɛhɔ.
Ɔbodwɛkɛ
^ Anzɛɛ “arɛlekyekyevolɛ.”
