Edwɛne 67:1-7

  • Azɛlɛ ye ɛleka biala bazulo Nyamenle

    • Bɛbanwu Nyamenle adenle ne (2)

    • ‘Bɛmaa menli kɔsɔɔti ɛye Nyamenle ayɛlɛ’ (3, 5)

    • “Nyamenle bayila yɛ” (6, 7)

Kɔmaa edwɛndolɛma kpanyinli ne; bɛva getaa* bɛboka nwo bɛdo. Ayɛlɛyelɛ edwɛne. Edwɛne. 67  Nyamenle bamaa yɛanyia ɔ nyunlu ɛlolɛ na yeayila yɛ;Ɔbamaa ɔ nyunlu ada yɛ nwo zo+ (Sila)   Amaa bɛanwu wɔ ndenle wɔ azɛlɛ ye ɛleka biala,+Wɔ ngoanelielɛ gyima ne mɔ wɔ maanle maanle kɔsɔɔti anu.+   O Nyamenle, maa menli ɛye wɔ ayɛlɛ;Maa menli kɔsɔɔti ɛye wɔ ayɛlɛ.   Maa maanle maanle ne mɔ ɛli fɛlɛko na bɛva anyelielɛ bɛdeɛdea nu,+Ɔluakɛ ɛbabua menli ne mɔ ndɛne fɔɔnwo.+ Ɛbahile maanle maanle mɔɔ wɔ azɛlɛ ye azo la adenle. (Sila)   O Nyamenle, maa menli ɛye wɔ ayɛlɛ;Maa menli kɔsɔɔti ɛye wɔ ayɛlɛ.   Azɛlɛ ne bazo ye ma;+Nyamenle, yɛ Nyamenle ne bayila yɛ.+   Nyamenle bayila yɛ,Na menli mɔɔ wɔ azɛlɛ ne ɛleka biala la bazulo ye.*+

Ɔbodwɛkɛ

Nea 33:2 ɔbdw.
Anzɛɛ “bali ye eni.”