Mateyu Edwɛkpa 9:1-38

  • Gyisɛse yɛ nrenyia bie mɔɔ ɛbubu la ayile (1-8)

  • Gyisɛse fɛlɛ Mateyu (9-13)

  • Ɛhɔnehyelɛ nwo kpuya (14-17)

  • Gyeelɛse ara raalɛ ne; raalɛ bie vale ɔ sa hanle Gyisɛse tɛladeɛ aguzo ne (18-26)

  • Gyisɛse yɛ anyezinliravolɛma nee mumule ayile (27-34)

  • Ma ɛdelɛ gyima ne le kpole noko gyimayɛvoma ne le ekyi (35-38)

9  Yemɔti ɔvole ɛlɛne ne anu, na ɔpɛle ɔhɔle ye sua zo.+  Na nea! ɛnee bɛlɛfa nrenyia bie mɔɔ ɛbubu na ɔla ɛkpa zo la bɛarɛlɛ ye. Mɔɔ Gyisɛse nwunle bɛ diedi ne la, ɔzele nrenyia ne mɔɔ ɛbubu la kɛ: “Ka wɔ ahonle to azule nu, me ra! Bɛva wɔ ɛtane bɛhyɛ wɔ.”+  Na mɛla kilehilevolɛma bie hanle ye bɛ nwo ɛkɛ ne kɛ: “Nrenyia ɛhye ɛlɛka munzule edwɛkɛ.”  Gyisɛse nwunle bɛ adwenle, yemɔti ɔhanle kɛ: “Duzu ati a bɛlɛdwenle ninyɛndane nwo wɔ bɛ ahonle nu a?+  Kɛ neazo la, boni a ɛnyɛ se a, kɛ ɛka kɛ, ‘Bɛva wɔ ɛtane bɛhyɛ wɔ,’ anzɛɛ ɛka kɛ, ‘Dwazo na tia’?+  Noko amaa bɛanwu kɛ sonla Ra ne lɛ tumi wɔ azɛlɛ ye azo kɛ ɔfa ɛtane ɔkyɛ la ati—” akee ɔzele nrenyia ne mɔɔ ɛbubu la kɛ: “Dwazo, fa wɔ ɛkpa ne na kɔ sua nu.”+  Yemɔti ɔdwazole ɔhɔle sua nu.  Mekɛ mɔɔ menli dɔɔnwo ne nwunle ɛhye la, ɛzulolɛ hanle bɛ na bɛwulale Nyamenle mɔɔ yeva tumi zɛhae yemaa menli la anyunlunyia.  Akee Gyisɛse vi ɛkɛ ne na ɔkɔ la, ɔnwunle nrenyia bie mɔɔ bɛfɛlɛ ye Mateyu la kɛ ɔde ɛleka mɔɔ bɛtua adwule la, na ɔzele ye kɛ: “Badoa me.” Ɔti ɔdwazole na ɔdoale ye.+ 10  Nzinlii mɔɔ ɔlɛdi debie wɔ sua nu ɛkɛ ne la, nea! adwuledievolɛma nee ɛtanevolɛma dɔɔnwo rale na bɛ nee Gyisɛse nee ye ɛdoavolɛma ne lile debie.+ 11  Noko mɔɔ Falasiima ne nwunle ɛhye la, bɛbizale ye ɛdoavolɛma ne kɛ: “Duzu ati a bɛ kilehilevolɛ ne nee adwuledievolɛma yɛɛ ɛtanevolɛma di aleɛ a?”+ 12  Ɔdele bɛ edwɛkɛ ne la, ɔzele kɛ: “Menli mɔɔ te kpɔkɛ la ɛngyia ayileyɛvolɛ nwo, emomu menli mɔɔ ɛnde kpɔkɛ la a hyia bie a.+ 13  Akee bɛhɔ, na bɛhɔzukoa mɔɔ ɛhye kile la: ‘Mekulo anwunvɔnezelɛ, na tɛ afɔlebɔlɛ ɔ.’+ Ɔluakɛ membale kɛ mebavɛlɛ ɛtanevolɛma na tɛ tenlenema ɔ.” 14  Akee Dwɔn ɛdoavolɛma ne rale ɔ nwo ɛkɛ ne na bɛbizale ye kɛ: “Duzu ati a yɛ nee Falasiima kye ɛhɔne noko wɔ ɛdoavolɛma ne ɛngye ɛhɔne ɛ?”+ 15  Ɛhye maanle Gyisɛse zele bɛ kɛ: “Ɔngyia kɛ atɔfolɛ nrenyia ne agɔnwo mɔ di nyane wɔ mekɛ ala mɔɔ atɔfolɛ nrenyia+ ne wɔ bɛ nwo ɛkɛ la, ɔnle zɔ ɔ? Noko mekɛ bara mɔɔ bɛbaye atɔfolɛ nrenyia ne bɛavi bɛ nwo ɛkɛ a,+ na akee bɛbahye ɛhɔne. 16  Awie biala ɛnva ɛdanlɛ fofolɛ ɛnda ɛdanlɛ dɛba nu, ɔluakɛ ɛdanlɛ fofolɛ ne bamaa dɛba ne ade na tokule ne ayɛ kpole.+ 17  Anzɛɛ menli ɛnva nwanye fofolɛ ɛngua nwanye nwoma kodoku dɛba nu. Saa bɛyɛ ye zɔ a, nwanye nwoma kodoku ne kpuke maa nwanye ne gua aze na nwanye nwoma kodoku ne sɛkye. Emomu, menli fa nwanye fofolɛ gua nwanye nwoma kodoku fofolɛ nu, na yeabɔ ɔ mu nwiɔ anwo bane.” 18  Mekɛ mɔɔ ɔlɛka ɛhye mɔ yeahile bɛ la, kpanyinli* bie mɔɔ ɛra ɛkɛ ne la rahotole ye* na ɔhanle kɛ: “Kɛkala ɔbayɛ kɛ me ra raalɛ ne ɛwu, noko bɛla bava ɛ sa to ɔ nwo zo, na ɔbara ngoane nu.”+ 19  Yemɔti Gyisɛse dwazole na ɔ nee ye ɛdoavolɛma ne doale ye. 20  Na nea! raalɛ bie mɔɔ ɛdudu mogya too ɛvolɛ 12 la+ ralile ɔ nzi na ɔvale ɔ sa ɔhanle ye tɛladeɛ aguzo ne anloa,+ 21  ɔluakɛ ɔhɔle zo ɔhanle ye ɔ ti anu kɛ: “Saa mefa me sa meka ye tɛladeɛ aguzo ne bɔbɔ a, mebade kpɔkɛ.” 22  Gyisɛse hakyile ɔ nye na ɔnwunle ye la, ɔhanle kɛ: “Me ra raalɛ, ka wɔ ahonle to azule nu! Wɔ diedi ɛmaa wɔde kpɔkɛ.”+ Na ɛkɛ ne ala raalɛ ne dele kpɔkɛ.+ 23  Akee mekɛ mɔɔ ɔrale kpanyinli ne sua nu ɛkɛ ne na ɔnwunle menli mɔɔ ɛlɛbɔ fulutu nee menli dɔɔnwo ne mɔɔ ɛlɛsu adeɛdea nu la,+ 24  Gyisɛse hanle kɛ: “Bɛhwe bɛ nwo, kakula raalɛ ne ɛtɛwule, yelafe ala.”+ Yemɔti bɛbɔle ɔ bo bɛzelele ye. 25  Mɔɔ menli ne vindele ala la, ɔwolole ɛkɛ na ɔzɔle ɔ sa,+ na kakula raalɛ ne dwazole.+ 26  Nɔhalɛ nu, ɛhye anwo edwɛkɛ dɛlɛle wɔ maanzinli ne anu amuala. 27  Gyisɛse vi ɛkɛ ne mɔɔ ɔkɔ la, anyenzinliravolɛma nwiɔ+ doale ye na bɛdeɛdeanle nu kɛ: “Devidi Ara, nwu yɛ anwunvɔne.” 28  Nzinlii mɔɔ ɔhɔle sua nu ɛkɛ ne la, anyenzinliravolɛma nwiɔ ne rale ɔ nwo ɛkɛ, na Gyisɛse bizale bɛ kɛ: “Bɛdie bɛdi kɛ mebahola meayɛ ɛhye ɔ?”+ Bɛbuale ye kɛ: “Ɛhɛe, Awulae.” 29  Akee ɔvale ɔ sa ɔhehanle bɛ nye,+ na ɔhanle kɛ: “Kɛ mɔɔ bɛ diedi ne de la ɔyɛ zɔ ɔmaa bɛ.” 30  Na bɛ nye nwunle debie. Akee Gyisɛse bɔle bɛ kɔkɔ ɛsesebɛ kɛ: “Bɛnlea na awie biala ande nwolɛ edwɛkɛ.”+ 31  Noko mɔɔ bɛvindele la, bɛhanle ɔ nwo edwɛkɛ wɔ maanzinli ne anu amuala. 32  Mekɛ mɔɔ bɛlɛfi ɛkɛ ne la, nea! menli bie vale nrenyia mumule bie mɔɔ sunsum ɛtane wɔ ɔ nwo la rɛlɛle ye;+ 33  na mɔɔ ɔdule sunsum ɛtane ne la, nrenyia mumule ne dendɛle.+ Ɔzinle menli ne anwo na bɛhanle kɛ: “Yɛtɛnwunle ɛhye bie ɛlɛ wɔ Yizilayɛ.”+ 34  Noko ɛnee Falasiima ne ɛlɛka kɛ: “Ɔdua sunsum ɛtane ne mɔ kpanyinli ne anwo zo a ɔtu sunsum ɛtane ne mɔ a.”+ 35  Na Gyisɛse hɔkpɔsale azuamgbole nee namunamu ne mɔ amuala azo, ɔhilehilele wɔ bɛ nyianu azua ne mɔ anu na ɔbɔle Belemgbunlililɛ ne anwo edwɛkpa ne nolo na ɔyɛle anwodolɛ nee ewule ngakyile ayile.+ 36  Mɔɔ ɔnwunle menli dɔɔnwo ne la, bɛ nwo yɛle ye alɔbɔlɛ,+ ɔluakɛ ɛnee bɛle kɛ mboane mɔɔ ɛnlɛ neavolɛ mɔɔ bɛbodɛboda bɛ na bɛgyakyi bɛ ɛkɛ ne la.+ 37  Akee ɔzele ye ɛdoavolɛma ne kɛ: “Nɔhalɛ nu, ma ɛdelɛ gyima ne le kpole, noko gyimayɛvoma ne le ekyi.+ 38  Yemɔti bɛzɛlɛ ma ɛdelɛ gyima ne Amenle kɛ ɔmaa gyimayɛvoma ɛrɛla ye ma ɛdelɛ gyima ne anu.”+

Ɔbodwɛkɛ

Ɛhye kile, nyianusua ne anu kpanyinli.
Anzɛɛ “rabɔle ɔ ti aze maanle ye.”