Edwɛne 72:1-20

  • Nyamenle belemgbunli ne bali tumi anzodwolɛ nu

    • “Tenlenema bakpazi” (7)

    • Ɔbanyia maanlema yeavi nyevile nloa yeahɔdwu nyevile nloa (8)

    • Ɔbalie bɛ yeavi basabasayɛlɛ nu (14)

    • Aleɛ babu azɛlɛ ne azo (16)

    • Bɛye Nyamenle duma ne ayɛlɛ dahuu (19)

Ɔfale Sɔlɔmɔn anwo. 72  O Nyamenle, fa wɔ ndɛnebualɛ ne mɔ maa belemgbunli ne,Na fa wɔ tenleneyɛlɛ ne maa belemgbunli ara ne.+   Maa ɔva tenleneyɛlɛ ɔbua wɔ menli ne ndɛne,Na ɔva pɛlepɛlelilɛ ɔbua koahweabanema ndɛne.+   Maa awoka mgbole ne mɔ ɛva anzodwolɛ ɛrɛlɛ menli ne,Na awoka ngyikyi ne mɔ ɛva tenleneyɛlɛ ɛrɛla.   Maa ɔli koahweabanema mɔɔ wɔ menli ne anu la edwɛkɛ ɔmaa bɛ,*Maa ɔlie ehyianli amra,Na ɔzɛkye nzisima.+   Mekɛ ala mɔɔ sɛnzɛne ne wɔ ɛkɛYɛɛ mekɛ ala mɔɔ siane ne wɔ ɛkɛ ne la bɛbazulo wɔ,Ɔvi awolɛndoazo zo kɔdwu awolɛndoazo zo.+   Ɔbayɛ kɛ ezule mɔɔ tɔ gua ndile mɔɔ bɛpɛ zo la azo la,Kɛ nyenyensuo mɔɔ doɔloa azɛlɛ ne la.+   Tenlenema bakpazi* wɔ ye mekɛ zo,+Na anzodwolɛ ara ɛleka biala+ kɔkpula kɛ siane ne ɛnle ɛkɛ ne bieko.   Ɔbanyia maanlema* yeavi nyevile nloa yeahɔdwu nyevile nloaNee Azule ne* anloa yeahɔdwu azɛlɛ ne ɛleka biala.+   Bɛdabɛ mɔɔ bɛde ɛsɛlɛ zo la bɛabɔ bɛ ti aze wɔ ɔ nyunlu,Yɛɛ ye kpɔvolɛma batafe ndɛtɛlɛ.+ 10  Tahyehye nee bɔra ne mɔ azo arelemgbunli badua adwule.+ Hyiba nee Siba arelemgbunli bava ahyɛlɛdeɛ ara.+ 11  Arelemgbunli kɔsɔɔti babɔ bɛ ti aze wɔ ɔ nyunlu,Yɛɛ maanle maanle kɔsɔɔti bazonle ye. 12  Ɔluakɛ ɔbalie ehyianli mɔɔ su kpondɛ moalɛ,Koahweabane nee mɔɔ ɛnlɛ boavolɛ la noko. 13  Ɔbaze koahweabane nee ehyianli anwunvɔne,Na yealie ehyianli ngoane.* 14  Ɔbalie bɛ yeavi nzisi nee basabasayɛlɛ nu,Na bɛ mogya bolɛ bayɛ se* wɔ ɔ nye zo. 15  Maa ɔdɛnla ngoane nu na bɛva Hyiba nvutuke bɛrɛlɛ ye.+ Maa bɛyɛ asɔne bɛmaa ye dahuu,Na maa bɛyila ye dahuu. 16  Aleɛ babu azɛlɛ ne azo;+Ɔbabu awoka ne mɔ azo. Belemgbunli ne bakama bakpazi kɛ Lɛbanɔn+ ɛdeɛ ne la,Yɛɛ menli nwo bazo azuamgbole ne mɔ azo kɛ azɛlɛ ye azo ndile.+ 17  Maa ye duma ɛdɛnla ɛkɛ ne dahuu,+Na maa ɔkpazi kɛ sɛnzɛne ne mɔɔ ɔwɔ ɛkɛ ne dahuu la. Maa menli ɛlua ɔ nwo zo ɛnyia nyilalɛ;+Maa maanle maanle kɔsɔɔti ɛvɛlɛ ye anyelielɛ. 18  Ayɛlɛyelɛ ɛha Gyihova Nyamenle, Yizilayɛ Nyamenle ne,+Mɔɔ ɔ ngomekye ala a ɔyɛ nwanwane ninyɛne la.+ 19  Bɛye ye anyunlunyia duma ne ayɛlɛ dahuu,+Na bɛmaa ye anyunlunyia ɛyi azɛlɛ ye amuala tɛkɛɛ.+ Amen yɛɛ Amen. 20  Gyɛsi ara+ Devidi asɔneyɛlɛ ne mɔ awieleɛ ɛne.

Ɔbodwɛkɛ

Hibulu aneɛ nu, “ɔbua bɛ ndɛne.”
Hibulu aneɛ nu, “bafifi.”
Anzɛɛ “Ɔbali tumi.”
Ɛhye kile, Yufileti ne.
Anzɛɛ “ɛkɛla.”
Anzɛɛ “bazonle bolɛ.”