Luku Edwɛkpa 5:1-39

  • Fɛlɛhyelɛ wɔ nwanwane adenle zo; ɛdoavolɛma mɔɔ limoa (1-11)

  • Kokobɛvolɛ bie ayileyɛlɛ (12-16)

  • Gyisɛse yɛ awie mɔɔ ɛbubu la ayile (17-26)

  • Gyisɛse fɛlɛ Livae (27-32)

  • Ɛhɔnehyelɛ nwo kpuya (33-39)

5  Mekɛ bie mɔɔ Gyisɛse ɛlɛkilehile Nyamenle edwɛkɛ ne wɔ Gɛnɛzalɛte tandane ne* anloa na menli dɔɔnwo ɛlɛtie ye la, bɛhyelele ɔ nwo zo.+  Ɔnwunle ɛlɛne nwiɔ kɛ bɛgyigyi tandane ne anloa, noko ɛnee fɛlɛkyevoma ne ɛdwu aze ɛlɛwowo bɛ avonle nu.+  Ɔvole ɛlɛne ne ko mɔɔ le Saemɔn ɛdeɛ la anu, na ɔzele ye kɛ ɔzuhu ye ɔhɔ ɔ kunlu ekyii. Akee ɔdɛnlanle aze wɔ ɛlɛne ne anu na ɔbɔle ɔ bo ɔhilehilele menli dɔɔnwo ne.  Mɔɔ ɔdendɛle ɔwiele la, ɔzele Saemɔn kɛ: “Ka ɛlɛne ne kɔ ɛleka mɔɔ le kuma la na bɛdo bɛ avonle ne bɛhye fɛlɛ.”  Na Saemɔn zele ye kɛ: “Kilehilevolɛ, yɛyɛ gyima nɔe dedee yɛangye ɛhwee,+ noko kɛmɔ wɔha la ati, mebado avonle ne.”  Na mɔɔ bɛyɛle zɔ la, bɛhyele fɛlɛ dɔɔnwo kpalɛ. Nɔhalɛ nu, bɛ avonle ne bɔle ɔ bo kɛ ɔtete.+  Yemɔti bɛdole bɛ sa bɛvɛlɛle bɛ gɔnwo mɔ mɔɔ wɔ ɛlɛne ɛhendeɛ ne anu la kɛ bɛraboa bɛ, na bɛrale la ɛlɛne nwiɔ ne yile tetɛkɛɛ mɔɔ anrɛɛ bɛnoma a.  Mɔɔ Saemɔn Pita nwunle ɛhye la, ɔhotole Gyisɛse anyunlu ɛkɛ na ɔzele ye kɛ: “Awulae, fi me nwo ɛke kɔ, ɔluakɛ mele ɛtanevolɛ.”  Fɛlɛ ne mɔɔ bɛhyele la zinle ɔdaye nee menli mɔɔ boka ɔ nwo la anwo, 10  zɔhane ala a ɔzinle Zɛbɛdi amra nwiɔ ne, Gyemise nee Dwɔn+ mɔɔ bɛ nee Saemɔn yɛ gyima la noko anwo a. Noko Gyisɛse zele Saemɔn kɛ: “Mmasulo. Ɔvi ɛnɛ mɔɔ kɔ la ɛbahye menli kɛ bɛkye fɛlɛ la.”+ 11  Yemɔti bɛhwenle ɛlɛne ne mɔ aze na bɛgyakyile debie biala ɛkɛ na bɛdoale ye.+ 12  Mekɛ bie mɔɔ ɛnee Gyisɛse wɔ suakpole bie azo la, nea! ɛnee nrenyia bie mɔɔ kokobɛ ɛgua ɔ nwo amuala la wɔ ɛkɛ! Mɔɔ ɔnwunle Gyisɛse la, ɔdule ɔdɔle ɔ gyakɛ anu na ɔzɛlɛle ye kɛ: “Awulae, saa ɛkulo a maa me nwo ɛde.”+ 13  Yemɔti ɔdenrɛle ɔ sa ɔzɔle ye na ɔhanle kɛ: “Mekulo! Ɛ nwo ɛde.” Ɛkɛ ne ala ye kokobɛ ne hɔle.+ 14  Akee ɔzele nrenyia ne kɛ ɔmmaka ɔkile awie biala: “Noko kɔva ɛ nwo kile ɛsɔfo ne, na bɔ wɔ anwodelɛ nwo afɔle ne kɛ mɔɔ Mosisi hanle la,+ amaa yeayɛ daselɛ yeamaa bɛ.”+ 15  Noko ɔ nwo edwɛkɛ hɔle zo dɛlɛle, na menli dɔɔnwo radiele ye na ɔyɛle bɛ ewule ne mɔ ayile.+ 16  Noko ɛnee ɔta ɔkɔ ɛleka koonwu bie mɔ ɔkɔyɛ asɔne. 17  Kenle ko bie mɔɔ ɔlɛkilehile la, ɛnee Falasiima nee Mɛla kilehilevolɛma mɔɔ bɛvi namule biala mɔɔ wɔ Galeli nee Dwudiya azo yɛɛ Gyɛlusalɛm ɛra la dede ɛkɛ; na ɛnee Gyihova* ɛmaa ye tumi kɛ ɔyɛ ayile.+ 18  Na nea! bɛzoale nrenyia bie mɔɔ ɛbubu mɔɔ ɔla ɛkpa zo la bɛrale, ɛnee bɛlɛbɔ mɔdenle kɛ bɛfa ye bɛawolo ɛleka mɔɔ Gyisɛse wɔ la bɛahɔdo ye ɔ nyunlu ɛkɛ.+ 19  Noko menli dɔɔnwo ne ati bɛannyia adenle bɛanva ye bɛangɔ ɛleka mɔɔ ɔwɔ la, yemɔti bɛvole sua ne ati zo bɛpɛle tokule na bɛvale ye wɔ ɛkpa ne azo bɛdwulale ye wɔ Gyisɛse anyunlu ɛkɛ. 20  Mɔɔ ɔnwunle bɛ diedi ne la, ɔhanle kɛ: “Me gɔnwo, bɛva wɔ ɛtane bɛhyɛ wɔ.”+ 21  Na mɛla kilehilevolɛma* nee Falasiima ne mɔ bɔle ɔ bo zuzule nwolɛ na bɛhanle kɛ: “Nwane ɛne mɔɔ ɔka munzule edwɛkɛ zɛhae a? Nwane a kola fa ɛtane kyɛ a, asoo tɛ Nyamenle ala?”+ 22  Noko Gyisɛse nwunle mɔɔ bɛlɛsuzu nwolɛ la na ɔbuale bɛ kɛ: “Duzu a bɛlɛsuzu nwo wɔ bɛ ahonle nu la? 23  Boni a ɛnyɛ se a, kɛ ɛka kɛ, ‘Bɛva wɔ ɛtane bɛhyɛ wɔ,’ anzɛɛ ɛka kɛ, ‘Dwazo na tia’? 24  Noko amaa bɛanwu kɛ sonla Ra ne lɛ tumi wɔ azɛlɛ ye azo kɛ ɔfa ɛtane ɔkyɛ la ati—” ɔzele nrenyia ne mɔɔ ɛbubu la kɛ: “Meka meahile wɔ kɛ, Dwazo, fa wɔ ɛkpa ne na kɔ sua nu.”+ 25  Na ɔdwazole ɔgyinlanle bɛ nyunlu ɛkɛ, ɔvale deɛ ne mɔɔ ɛnee ɔla zo la, na ɔyele Nyamenle ayɛlɛ ɔhɔle sua nu. 26  Ɔzinle bɛ muala bɛ nwo na bɛbɔle ɔ bo bɛyele Nyamenle ayɛlɛ, ɔyɛle bɛ ɛzulolɛ na bɛhanle kɛ: “Yɛnwu debie mɔɔ yɛ nwanwane la ɛnɛ!” 27  Ɛhye anzi, ɔvindele na ɔnwunle adwuledievolɛ bie mɔɔ bɛfɛlɛ ye Livae la kɛ ɔde ɛleka mɔɔ bɛtua adwule la, na ɔzele ye kɛ: “Badoa me.”+ 28  Na ɔgyakyile debie biala wɔ ɛkɛ na ɔdwazole ɔdoale ye. 29  Akee Livae dole ɛkponle kpole bie maanle ye wɔ ye sua nu, na adwuledievolɛma nee menli dɔɔnwo nee bɛ lile debie.*+ 30  Na Falasiima nee bɛ mɛla kilehilevolɛma ne mɔ bɔle ɔ bo dendɛle bɛ nzo abo na bɛzele ye ɛdoavolɛma ne kɛ: “Duzu ati a bɛ nee adwuledievolɛma nee ɛtanevolɛma di na bɛno ɛ?”+ 31  Gyisɛse buale bɛ kɛ: “Bɛdabɛ mɔɔ bɛte kpɔkɛ la ɛngyia ayileyɛvolɛ nwo, emomu bɛdabɛ mɔɔ bɛnde kpɔkɛ la a hyia bie a.+ 32  Membale kɛ mebavɛlɛ ɛtanevolɛma meamaa bɛanlu bɛ nwo na tɛ tenlenema ɔ.”+ 33  Bɛzele ye kɛ: “Dwɔn ɛdoavolɛma ta kye ɛhɔne na bɛyɛ modolɛ nzɛlɛlɛ, zɔhane ala a Falasiima ɛdoavolɛma noko yɛ a, noko wɔ ɛdoavolɛma ne ɛdeɛ, bɛdi na bɛno.”+ 34  Gyisɛse zele bɛ kɛ: “Bɛnrɛhola bɛnrɛmaa atɔfolɛ nrenyia ne agɔnwo mɔ ɛnrɛhye ɛhɔne wɔ mekɛ ala mɔɔ atɔfolɛ nrenyia ne wɔ bɛ nwo ɛkɛ la, ɔnle zɔ ɔ? 35  Nɔhalɛ nu, mekɛ bara mɔɔ bɛbaye atɔfolɛ nrenyia+ ne bɛavi bɛ nwo ɛkɛ a; akee bɛbahye ɛhɔne wɔ mekɛ zɔhane anu.”+ 36  Eza ɔmaanle bɛ ndonwo* bie kɛ: “Awie biala ɛmpɛ ɛdanlɛ fofolɛ ɛnva ɛnda ɛdanlɛ dɛba nu. Saa ɔyɛ ye zɔ a, ɛdanlɛ fofolɛ ne bade avi dɛba ne anu na ɔ nee dɛba ne ɛnrɛyɛ ko.+ 37  Bieko, awie ɛnva nwanye fofolɛ ɛngua nwanye nwoma kodoku dɛba nu. Saa ɔyɛ ye zɔ a, nwanye fofolɛ ne bakpuke nwoma kodoku ne, na nwanye ne bagua aze na nwoma kodoku ne azɛkye. 38  Emomu, ɔwɔ kɛ bɛfa nwanye fofolɛ bɛgua nwanye nwoma kodoku fofolɛ nu. 39  Awie biala mɔɔ ɛnlo nwanye dɛba la ɛnrɛkpondɛ nwanye fofolɛ, ɔluakɛ ɔka kɛ, ‘Dɛba ne le kpalɛ.’”

Ɔbodwɛkɛ

Ɛhye kile, Galeli Nyevile ne.
Mɔlebɛbo ne, ɛnee ɛhye le Ngɛlɛlera ne anwo kɛlɛhɛlɛvolɛ, noko wɔ Gyisɛse mekɛ zo, ɛnee ɔle awie mɔɔ ze Mɛla ne kpalɛ na ɔkilehile la.
Anzɛɛ “dɛnlanle ɛkponle nwo.”
Anzɛɛ “ɔbule bɛ ɛrɛlɛ.”