Luku Edwɛkpa 4:1-44
4 Akee Gyisɛse mɔɔ sunsum nwuanzanwuanza ne ɛyi ye tɛkɛɛ la vile Dwɔdan ne anloa, na sunsum ne vale ye hɔle fienemgbole ne anu+
2 kenle 40, na Abɔnsam zɔle ye nleanle.+ Yeanli debie biala wɔ mekɛ zɔhane anu, yemɔti ɔrale awieleɛ la, ɛhɔne hunle ye.
3 Na Abɔnsam zele ye kɛ: “Saa ɛle Nyamenle ara a, ka kile bolɛ ɛhye maa ɔhakyi paano.”
4 Noko Gyisɛse buale ye kɛ: “Bɛhɛlɛ kɛ, ‘Tɛ paano angome a maa sonla tɛnla ngoane nu a.’”+
5 Yemɔti ɔvale ye ɔhɔle boka bie azo na ɔhilele ye azɛlɛ ye azo arelemgbunlililɛ kɔsɔɔti wɔ mekɛ ekyi bie anu.+
6 Akee Abɔnsam zele ye kɛ: “Mebava tumililɛ ɛhye mɔ amuala nee bɛ anyunlunyia meamaa wɔ ɔluakɛ bɛva bɛmaa me+ na mefa memaa awie biala mɔɔ mekulo la.
7 Yemɔti saa ɛsonle me kokye ala a, ɔ muala bayɛ wɔ ɛdeɛ.”
8 Na Gyisɛse buale ye kɛ: “Bɛhɛlɛ kɛ, ‘Gyihova* wɔ Nyamenle ne a ɔwɔ kɛ ɛsonle ye a, na ɔ ngome ala a ɔwɔ kɛ ɛkoto ye a.’”*+
9 Akee ɔvale ye ɔhɔle Gyɛlusalɛm na ɔhɔziele ye wɔ ɛzonlenlɛsua ne ati zo na ɔzele ye kɛ: “Saa ɛle Nyamenle ara a, ɛvi ɛke fuandi ɛ nwo te aze,+
10 ɔluakɛ bɛhɛlɛ kɛ, ‘Ɛdawɔ ti ɔbaha yeahile ye anwumabɔvolɛma ne kɛ bɛbɔ ɛ nwo bane,’
11 na ‘Bɛbalɛ wɔ bɛ sa zo, amaa ɛ gyakɛ amkpula bolɛ.’”+
12 Gyisɛse buale ye kɛ: “Bɛhɛlɛ kɛ: ‘Mmasɔ Gyihova* wɔ Nyamenle ne ɛnea.’”+
13 Yemɔti mɔɔ Abɔnsam zɔle ye nleanle wiele la, ɔvile ɔ nwo ɛkɛ ne ɔhɔkpulale mekɛ kpalɛ bieko.+
14 Akee Gyisɛse hɔle Galeli+ na ɛnee Nyamenle sunsum ne wɔ ɔ nwo zo. Na ɔ nwo edwɛkɛ kpalɛ dɛlɛle wɔ maanzinli ne anu amuala.
15 Na ɔbɔle ɔ bo ɔhilehilele wɔ bɛ nyianu azua ne mɔ anu, na menli ne amuala yele ye ayɛlɛ.
16 Akee ɔhɔle Nazalɛte,+ ɛleka mɔɔ bɛtetele ye la, na kɛ mɔɔ ɛnee ɔta ɔyɛ ye Ɛnwomenlelielɛ kenle la, ɔhɔle nyianusua+ ne anu na ɔdwazole ɔgyinlanle kɛ ɔkenga Ngɛlɛlera ne.
17 Yemɔti bɛvale ngapezonli Ayezaya nwomamobɔleɛ ne bɛmaanle ye, na ɔbukele ɛleka mɔɔ bɛhɛlɛ kɛ:
18 “Gyihova* sunsum ne wɔ me nwo zo, ɔluakɛ ɔkpokpale me kɛ menga edwɛkpa mengile ehyiavolɛma. Ɔzoanle me kɛ membambɔ fanwodi nwo nolo mengile menli mɔɔ wɔ akɛlɛzonlenlɛ nu la, na memaa anyezinliravolɛma ɛnwu debie, na bɛdabɛ mɔɔ bɛlɛsisi bɛ la anwo ɛdɔ bɛ,+
19 na membɔ Gyihova* ɛlolɛ mekɛ ne nolo.”+
20 Akee ɔbubule nwomamobɔleɛ ne ɔvale ɔmaanle sonvolɛ ne na ɔdɛnlanle aze; na bɛdabɛ mɔɔ bɛwɔ nyianusua ne anu la amuala anye hale ɔ nwo.
21 Na ɔzele bɛ kɛ: “Ɛnɛ, ngɛlɛlera ɛhye mɔɔ megenga mehile bɛ la ɛra nu.”+
22 Akee bɛ muala bɛbɔle ɔ bo bɛhanle ɔ nwo edwɛkɛ kpalɛ na ye ɛdendɛlɛ kɛnlɛma ne zinle bɛ nwo,+ na ɛnee bɛlɛkeha kɛ: “Asoo tɛ Dwosefi ara ne ɛne?”+
23 Na ɔzele bɛ kɛ: “Meze kɛ bɛbaha edwɛkɛ ɛhye bɛahile me kɛ, ‘Ayileyɛvolɛ, yɛ ɛ nwo ayile. Yɛ ninyɛne mɔɔ yɛde kɛ wɔyɛ wɔ Kapɛnayɛm+ la bie wɔ wɔ sua zo ɛke noko.’”
24 Yemɔti ɔhanle kɛ: “Nɔhalɛ nu meka meahile bɛ kɛ bɛdie ngapezonli bɛto nu wɔ ɛleka biala kyesɛ ye sua zo ala.+
25 Nɔhalɛ nu meka meahile bɛ kɛ: Wɔ Yilaegya mekɛ zo mɔɔ ezule andɔ too ɛvolɛ nsa siane nsia na ɛhɔne kpole rale maanle ne kɔsɔɔti anu la, ɛnee ahunlanvolɛ dɔɔnwo wɔ Yizilayɛ.+
26 Noko bɛanzoa Yilaegya wɔ mraalɛ ɛhye mɔ biala ɛkɛ ne kɛ kunlavolɛ bie mɔɔ wɔ Zalefate wɔ Saedɛn maanzinli nu la ala.+
27 Eza wɔ ngapezonli Yilaehya mekɛ zo, ɛnee kokobɛvolɛma dɔɔnwo wɔ Yizilayɛ; noko bɛanyɛ bɛ nuhua biala ayile kɛ Seleanli Neeyaman ala.”+
28 Akee bɛdabɛ mɔɔ ɛnee bɛlɛtie edwɛkɛ ɛhye wɔ nyianusua ne anu la amuala vale ɛya,+
29 na bɛdwazole bɛhwenle ye bɛhɔle sua ne kandiba, na bɛvale ye bɛhɔle boka ne mɔɔ sua ne gua zo la ati zo kɛ bɛkavuandi ye bɛado kuma ne anu.
30 Noko ɔluale bɛ avinli ɔhɔle ye ɛleka bie.+
31 Akee ɔhɔle Kapɛnayɛm, Galeli sua bie azo. Na ɔhilehilele bɛ wɔ Ɛnwomenlelielɛ kenle ne,+
32 na kɛzi ɔhilehilele la zinle bɛ nwo,+ ɔluakɛ ɔdendɛle tumi zo.
33 Ɛnee nrenyia bie mɔɔ sunsum ɛtane wɔ ɔ nwo la wɔ nyianusua ne anu, na ɔvale ɛnelɛ kpole ɔdeanle nu kɛ:+
34 “Aa! Duzu a ɛkpondɛ wɔavi yɛ ɛkɛ a, Gyisɛse mɔɔ vi Nazalɛte?+ Wɔra kɛ ɛbazɛkye yɛ ɔ? Meze wɔ sonla holɛ, Nwuanzanwuanzanli ne mɔɔ vi Nyamenle ɛkɛ la.”+
35 Noko Gyisɛse deanle ye hanle kɛ: “Yɛ koonwu na fi ɔ nwo tu.” Yemɔti mɔɔ sunsum ɛtane ne pɛle nrenyia ne dole aze wɔ bɛ nyunlu ɛkɛ ne la, ɔdule ɔvile ɔ nwo mɔɔ yeamboda ye a.
36 Ɛhye zinle bɛ kɔsɔɔti bɛ nwo na bɛbɔle ɔ bo bɛzele bɛ nwo ngoko kɛ: “Edwɛkɛ boni ɛne? Ɔtendɛ tumi zo ɔkile sunsum ɛtane ne mɔ, na ɔtu bɛ!”
37 Yemɔti ɔ nwo edwɛkɛ hɔle zo dɛlɛle maanzinli mɔɔ zua ɛkɛ ne la ɛleka biala.
38 Mɔɔ ɔvile nyianusua ne anu la, ɔhɔle Saemɔn sua nu ɛkɛ. Ɛnee ebunlu ɛhye Saemɔn ase ne,* yemɔti bɛzɛlɛle ye kɛ ɔboa ye.+
39 Yemɔti ɔhɔgyinlanle ɔ nwo ɛkɛ wɔ ɛleka mɔɔ ɔla la, na ɔdule ebunlu ne ɔvile ɔ nwo. Ɛkɛ ne ala ɔdwazole ɔkpondɛle debie ɔmaanle bɛ.
40 Na mɔɔ sɛnzɛne ne ɛlɛkɔ ahɔdɔ la, bɛdabɛ mɔɔ bɛlɛ wuliravolɛma la vale bɛ rɛlɛle ye. Ɔvale ɔ sa ɔguale bɛ nuhua ko biala anwo zo ɔyɛle ye ayile.+
41 Sunsum ɛtane ne mɔ noko vile menli dɔɔnwo anwo dule, na bɛdeɛdeanle nu bɛhanle kɛ: “Wɔmɔ a ɛle Nyamenle Ara ne a.”+ Noko ɔdeanle bɛ, yeammaa bɛandendɛ+ ɔluakɛ ɛnee bɛze ye kɛ yemɔ a ɔle Kelaese ne a.+
42 Mɔɔ aleɛ hyenle la, ɔvile ɛkɛ ɔhɔle ɛleka koonwu bie.+ Noko menli ne kpondɛle ye na bɛrale ɛleka mɔɔ ɔwɔ la, na bɛbɔle mɔdenle kɛ bɛnrɛmaa ɔnrɛvi bɛ nwo ɛkɛ ɔnrɛhɔ.
43 Noko ɔzele bɛ kɛ: “Ɔwɔ kɛ mebɔ Nyamenle Belemgbunlililɛ ne anwo edwɛkpa ne nolo wɔ azua mɔɔ ɛha la noko azo, ɔluakɛ ɛhye ati a bɛzoanle me a.”+
44 Yemɔti ɔhɔhanle edwɛkɛ ne wɔ Dwudiya nyianu azua ne mɔ anu.
Ɔbodwɛkɛ
^ Nea Edwɛkɛbohilelɛ.
^ Anzɛɛ “ɛfa ɛzonlenlɛ nwuanzanwuanza ɛmaa ye a.”
^ Anzɛɛ “aye ne mame.”