Mateyu Edwɛkpa 6:1-34

  • BOKA ZO EDWƐKƐ NE (1-34)

    • Bɛmmayɛ bɛ tenleneyɛlɛ wɔ menli nyunlu (1-4)

    • Kɛzi bɛyɛ asɔne la (5-15)

      • Asɔneyɛlɛ nwo neazo (9-13)

    • Ɛhɔnehyelɛ (16-18)

    • Anwonyia wɔ anwuma nee azɛlɛ ye azo (19-24)

    • Bɛmmadwenledwenle (25-34)

      • Bɛhɔ zo bɛkpondɛ Belemgbunlililɛ ne (33)

6  “Bɛnlea boɛ na bɛanyɛ bɛ tenleneyɛlɛ ne wɔ menli nyunlu kɛ bɛmaa bɛanwu bɛ;+ anrɛɛ bɛnrɛnyia ahatualɛ biala bɛnrɛvi bɛ Ze mɔɔ wɔ anwuma la ɛkɛ.  Yemɔti saa bɛfa ahyɛlɛdeɛ* bɛamaa a, bɛmmadimoa bɛbɔ ye nolo, kɛ mɔɔ nabalabama ne yɛ ye wɔ nyianu azua ne mɔ anu nee awɔdenle ne mɔ azo amaa menli awula bɛ anyunlunyia la. Nɔhalɛ nu, meka meahile bɛ kɛ, bɛnyia bɛ ahatualɛ kɔsɔɔti bɛwie.  Noko bɛmɛ, saa bɛfa debie bɛahyɛ a, bɛmmamaa bɛ sa bɛne ne nwu mɔɔ bɛ sa fema ne ɛlɛyɛ la,  amaa bɛ ahyɛlɛdeɛ ne ayɛ fealeranu debie. Na bɛ Ze ne mɔɔ nwu fealeranu debie la badua bɛ kakɛ.+  “Bieko, saa bɛlɛyɛ asɔne a, bɛmmayɛ ye kɛ mɔɔ nabalabama+ ne yɛ ye la, ɔluakɛ bɛkulo kɛ bɛgyinla nyianu azua nu nee awɔdenle mgbole zo bɛyɛ asɔne amaa menli anwu bɛ.+ Nɔhalɛ nu meka meahile bɛ kɛ, bɛnyia bɛ ahatualɛ kɔsɔɔti bɛwie.  Noko saa ɛyɛ asɔne a, kɔvea wɔ suakunlu, na ɛto wɔ anlenkɛ ne anu a, wɔazɛlɛ ɛ Ze ne mɔɔ wɔ fealeranu la.+ Na ɛ Ze ne mɔɔ nwu fealeranu debie la badua wɔ kakɛ.  Saa ɛlɛyɛ asɔne a, mmaka edwɛkɛ ko ne ala fane dɔɔnwo kɛ mɔɔ menli mɔɔ wɔ maanle maanle ne anu la yɛ ye la, ɔluakɛ bɛsuzu kɛ bɛka edwɛkɛ dɔɔnwo a yɛɛ bɛbadie bɛ a.  Zɔhane ati bɛmmayɛ kɛ menli zɔhane mɔ la, ɔluakɛ bɛ Ze mɔɔ wɔ anwuma la ze mɔɔ bɛhyia+ nwo la kolaa na bɛabiza ye.  “Yemɔti bɛyɛ asɔne a, bɛyɛ ye zɛhae:+ “‘Yɛ Ze mɔɔ wɔ anwuma, wɔ duma+ nwo ɛde.*+ 10  Wɔ Belemgbunlililɛ ɛrɛla.+ Wɔ ɛhulolɛdeɛ+ ɛyɛ ɛkɛ wɔ azɛlɛ ye azo kɛ anwuma la.+ 11  Maa yɛ ɛnɛ aleɛ* wɔ alehyenlɛ ɛhye anu;+ 12  na fa yɛ kakɛ kyɛ yɛ kɛ mɔɔ yɛdayɛ noko yɛva yɛhyɛ menli mɔɔ tua yɛ kakɛ la.+ 13  Mmafa yɛ ɛkɔ sɔnea nu,+ emomu die yɛ fi amumuyɛnli ne+ asa anu.’ 14  “Ɔluakɛ saa bɛfa awie mɔ nvonleɛ bɛkyɛ bɛ a, yɛɛ bɛ Ze mɔɔ wɔ anwuma la noko bava bɛ nvonleɛ ahyɛ bɛ a;+ 15  na saa bɛanva awie mɔ nvonleɛ bɛangyɛ bɛ a, bɛ Ze ne noko ɛnrɛva bɛ nvonleɛ ɛnrɛhyɛ bɛ.+ 16  “Saa bɛkye ɛhɔne a,+ bɛmmayɛ bɛ nyunlu alɔbɔlɛ alɔbɔlɛ kɛ mɔɔ nabalabama ne yɛ la, ɔluakɛ bɛyɛ bɛ nyunlu basaa* amaa menli anwu kɛ bɛlɛkye ɛhɔne.+ Nɔhalɛ nu meka meahile bɛ kɛ, bɛnyia bɛ ahatualɛ kɔsɔɔti bɛwie. 17  Noko bɛmɛ, saa bɛlɛkye ɛhɔne a, bɛva nwole bɛkpokpa bɛ ti zo na bɛwowo bɛ nyunlu, 18  amaa menli annwu kɛ bɛlɛkye ɛhɔne kyesɛ bɛ Ze ne mɔɔ nwu fealeranu debie la ala. Na bɛ Ze ne mɔɔ nwu fealeranu debie la badua bɛ kakɛ. 19  “Bɛgyakyi kɛ bɛkɛkpondɛ bɛ anwonyia bɛkɛzie azɛlɛ ye azo,+ ɛleka mɔɔ ngɛkɛba nee nrɛlana kola sɛkye ye na nwule kola kɔwua la. 20  Emomu, bɛkpondɛ bɛ anwonyia bɛzie anwuma,+ ɛleka mɔɔ ngɛkɛba nee nrɛlana ɛngola ɛnzɛkye ye,+ na nwule ɛngola ɛngɔnwua la. 21  Ɔluakɛ ɛleka mɔɔ wɔ anwonyia wɔ la, ɛkɛ ne a wɔ ahonle noko wɔ a. 22  “Sonlabaka ne kɛnlaneɛ a le ɛnyelɛ.+ Yemɔti, saa ɛ nye nea debie ko ala a,* wɔ sonlabaka ne amuala bada.* 23  Noko saa ɛ nye bolo debie a,*+ wɔ sonlabaka ne amuala bayɛ awozinli. Na saa wienyi ne mɔɔ wɔ wɔ nu la le awozinli a, nea kɛzi awozinli ne bayɛ kpole a! 24  “Awie biala ɛnrɛhola ɛnrɛzonle menlenlɛ nwiɔ; ɔluakɛ ɔbahulo ko na yeakpɔ ko, anzɛɛ ɔbali ko eni yeagyakyi ko.+ Bɛnrɛhola bɛnrɛzonle Nyamenle nee Anwonyia.+ 25  “Ɛhye ati meka meahile bɛ kɛ: Bɛmmadwenledwenle*+ bɛ ngoane* nwo kɛ duzu a bɛbali anzɛɛ duzu a bɛbanlo a, anzɛɛ bɛ sonlabaka ne anwo kɛ duzu a bɛbaheda a.+ Asoo ngoane* ɛngyia ɛndɛla aleɛ yɛɛ sonlabaka ne ɛngyia ɛndɛla ɛdanlɛ?+ 26  Bɛnlea anwomanyunlu nloma;+ bɛnlua ma yɛɛ bɛnde anzɛɛ bɛmboɔboa aleɛ nloa bɛnzie, noko bɛ Ze mɔɔ wɔ anwuma la maa bɛ aleɛ. Asoo bɛ nwo ɛngyia ɛndɛla bɛ? 27  Bɛ nuhua boni a dwenledwenle a ɔbahola yeava mekɛ ekyi* yeaboka ye ngoane mekɛ nwo a?+ 28  Bieko, duzu ati a bɛdwenle ndanlɛ nwo a? Bɛnlea kɛzi ɛbɔ nu aloa nyi la na bɛzukoa debie; bɛnyɛ gyima anzɛɛ bɛnnwo ndanlɛ; 29  noko meka meahile bɛ kɛ, wɔ Sɔlɔmɔn+ anyunlunyia ne kɔsɔɔti anu bɔbɔ, yeanziezie ɔ nwo kɛ aloa ɛhye mɔ anu ko la. 30  Yemɔti, saa zɛhae a Nyamenle siezie ɛbɔ nu ndile mɔɔ ɛnɛ bɛfifi a ɛhyema ɛnee bɛyela bɛ la a, asoo ɔnrɛheda bɛdabɛ noko ndanlɛ, bɛmɛ mɔɔ bɛ diedi le ekyi a? 31  Zɔhane ati, bɛmmadwenledwenle+ na bɛka kɛ, ‘Duzu a yɛbali a?’ anzɛɛ, ‘Duzu a yɛbanlo a?’ anzɛɛ, ‘Duzu a yɛbaheda a?’+ 32  Ɔluakɛ ninyɛne ɛhye mɔ a maanle maanle ne anu amra anye ɛbolo ɛlɛkpondɛ a. Bɛ Ze mɔɔ wɔ anwuma la ze kɛ bɛhyia ninyɛne ɛhye mɔ kɔsɔɔti anwo. 33  “Yemɔti, bɛhɔ zo bɛlimoa bɛkpondɛ Belemgbunlililɛ ne nee Nyamenle tenleneyɛlɛ ne, na ɔbava ninyɛne ɛhye mɔ mɔɔ ɛha la amuala yeaboka nwo yeamaa bɛ.+ 34  Ɛhye ati, bɛmmadwenledwenle ɛhyema anwo,+ ɔluakɛ ɛhyema ɔdaye ɔbanyia ye adwenleadwenle ɛdeɛ. Kenle biala anu ngyegyelɛ zonle maa kenle ne.

Ɔbodwɛkɛ

Anzɛɛ “ahyɛlɛdeɛ mɔɔ bɛfa bɛmaa ehyiavolɛma la.” Nea Edwɛkɛbohilelɛ.
Anzɛɛ “maa bɛyɛ wɔ duma nwuanzanwuanza; maa bɛbu wɔ duma kɛ ɔle nwuanzanwuanza.”
Giliki aneɛ nu, “paano.”
Anzɛɛ “bɛnziezie bɛ nwo.”
Anzɛɛ “nwu debie kpalɛ; nea ɛ nyunlu fɔɔnwo a.”
Anzɛɛ “bayɛ wienyi kpalɛ.”
Giliki aneɛ nu, “saa ɛ nye le ɛtane; amumuyɛ.”
Anzɛɛ “Bɛgyakyi kɛ bɛbadwenledwenle.”
Anzɛɛ “ɛkɛla.”
Anzɛɛ “ɛkɛla.”
Giliki aneɛ nu, “kubit ko.” Nea Mok. B14.