Dwɔn Edwɛkpa 21:1-25

  • Gyisɛse ye ɔ nwo ahile ye ɛdoavolɛma (1-14)

  • Pita maa Gyisɛse anwu kɛ ɔkulo ye (15-19)

    • “Maa me mboane ngyikyi ne aleɛ” (17)

  • Ɛdoavolɛ mɔɔ Gyisɛse kulo ye edwɛkɛ la kenle bie (20-23)

  • Adwulaleɛ (24, 25)

21  Ɛhye anzi, Gyisɛse yele ɔ nwo hilele ɛdoavolɛma ne bieko wɔ Taebilease Nyevile ne anloa. Ɔyele ɔ nwo ɔhilele bɛ wɔ adenle zɛhae azo.  Ɛnee bɛdabɛ mɔɔ bɛwɔ ɛkɛ ne la a le Saemɔn Pita, Tɔmase (mɔɔ bɛfɛlɛ ye Nda la),+ Natanayɛle+ mɔɔ vi Kana mɔɔ wɔ Galeli, Zɛbɛdi amra ne mɔ,+ yɛɛ ye ɛdoavolɛma gyɛne nwiɔ.  Saemɔn Pita zele bɛ kɛ: “Mekahye fɛlɛ.” Bɛzele ye kɛ: “Yɛ nee wɔ kɔ.” Bɛvindele bɛhɔvale ɛlɛne, noko nɔe ne amuala bɛangye ɛhwee.+  Noko mɔɔ maanle nu ɛlɛtete la, Gyisɛse ragyinlanle nyevile ne anloa, noko ɛdoavolɛma ne annwu kɛ Gyisɛse ɔ.+  Na Gyisɛse bizale bɛ kɛ: “Ngakula, bɛlɛ debie* mɔɔ bɛbali ɔ?” Bɛbuale kɛ: “Kyɛkyɛ!”  Ɔzele bɛ kɛ: “Bɛdo avonle ne wɔ ɛlɛne ne fema zo na bɛbahye bie.” Yemɔti bɛdole, na kɛmɔ bɛhyele fɛlɛ dɔɔnwo la ati, ɛnee bɛngola ye twe.+  Ɛdoavolɛ ne mɔɔ ɛnee Gyisɛse kulo ye edwɛkɛ la+ zele Pita kɛ: “Awulae ɔ!” Mɔɔ Saemɔn Pita dele kɛ Awulae ye la, ɔwulale ye anwuma tɛladeɛ ne, ɔluakɛ ɛnee ɔnwula tɛladeɛ,* na ɔdɔle nyevile ne anu.  Noko ɛdoavolɛma ne mɔɔ ɛha la vale ɛlɛne ekyi ne rale, na bɛhwenle avonle ne mɔɔ fɛlɛ ɛyi ye tɛkɛɛ la, ɔluakɛ ɛnee ɛkɛ ne mɔɔ ba aze la anwa, kɛyɛ mita 90* ala.  Mekɛ mɔɔ bɛdwule aze la, bɛnwunle kɛ bɛva emunlike bɛwuda senle na fɛlɛ gua zo yɛɛ paano. 10  Gyisɛse zele bɛ kɛ: “Bɛva fɛlɛ ne mɔɔ bɛhye ye kɛkala la bie bɛrɛla.” 11  Yemɔti Saemɔn Pita vole ɛlɛne ne anu hɔhwenle avonle ne mɔɔ fɛlɛ ɛyi ye tɛkɛɛ la rale, ɛnee fɛlɛ 153 a wɔ nu a. Bɛhyele fɛlɛ dɔɔnwo ɛdeɛ, noko avonle ne antete. 12  Gyisɛse zele bɛ kɛ: “Bɛrɛla bɛrali debie.” Ɛdoavolɛma ne anu ko bɔbɔ annyia akɛnrasesebɛ ambiza ye kɛ: “Ɛdawɔ nwane ɔ?” ɔluakɛ ɛnee bɛze kɛ Awulae ɔ. 13  Gyisɛse vale paano ne maanle bɛ na ɔvale fɛlɛ ne noko ɔmaanle bɛ. 14  Ɛhye a le ye fane nsa ne azo+ mɔɔ Gyisɛse yele ɔ nwo hilele ɛdoavolɛma ne wɔ mekɛ mɔɔ bɛdwazole ye bɛvile mowuamra anu la a. 15  Mɔɔ bɛlile debie bɛwiele la, Gyisɛse bizale Saemɔn Pita kɛ: “Dwɔn ara Saemɔn, ɛkulo me ɛtɛla ɛhye mɔ ɔ?” Ɔbuale ye kɛ: “Ɛhɛe, Awulae, ɛze kɛ mekulo wɔ edwɛkɛ.” Ɔzele ye kɛ: “Maa me mboane mralɛ ne mɔ aleɛ.”+ 16  Ɔbizale ye bieko kɛ: “Dwɔn ara Saemɔn, ɛkulo me ɔ?” Ɔbuale kɛ: “Ɛhɛe, Awulae, ɛze kɛ mekulo wɔ edwɛkɛ.” Ɔzele ye kɛ: “Nea me mboane ngyikyi ne.”+ 17  Ɔbizale ye fane nsa ne azo kɛ: “Dwɔn ara Saemɔn, ɛkulo me edwɛkɛ ɔ?” Ɔyɛle Pita nyane kɛ yebiza ye fane nsa kɛ: “Ɛkulo me edwɛkɛ ɔ?” Ɔti ɔzele ye kɛ: “Awulae, ɛze debie biala; ɛze kɛ mekulo wɔ edwɛkɛ.” Gyisɛse zele ye kɛ: “Maa me mboane ngyikyi ne aleɛ.+ 18  Nɔhalɛ nu, meka meahile wɔ kɛ, mekɛ mɔɔ ɛle kpavolɛ la, ɛnee ɛkola ɛwula tɛladeɛ na ɛkɔ ɛleka biala mɔɔ ɛkulo la. Noko saa ɛyɛ kpanyinli a ɛbadenrɛ ɛ sa, na awie awula wɔ tɛladeɛ na yeava wɔ yeahɔ ɛleka mɔɔ ɛngulo la.” 19  Ɔhanle ɛhye ɔvale ɔhilele kɛzi Pita bawu yeava yeawula Nyamenle anyunlunyia la. Ɔhanle ɛhye la, ɔzele ye kɛ: “Kɔ zo toa me.”+ 20  Pita hakyile ɔ nwo na ɔnwunle ɛdoavolɛ ne mɔɔ ɛnee Gyisɛse kulo ye edwɛkɛ la+ kɛ ɔdoa bɛ, yemɔ a bɛdi nɔsolɛ aleɛ ne la ɔlale ɔ kɛnra anu ɔbizale ye kɛ: “Awulae, nwane a baye wɔ amaa?” la. 21  Yemɔti mɔɔ Pita nwunle ye la, ɔbizale Gyisɛse kɛ: “Awulae, na nrenyia ɛhye ɛ?” 22  Gyisɛse buale ye kɛ: “Saa mekulo kɛ ɔtɛnla ɛkɛ kɔkpula kɛ mekɛra a, kɛzi ɔfale ɛ nwo ɛ? Wɔmɔ kɔ zo toa me.” 23  Yemɔti edwɛkɛ ne dɛlɛle mediema ne mɔ avinli kɛ ɛdoavolɛ ɛhye ɛnrɛwu. Noko Gyisɛse anga angile ye kɛ ɔnrɛwu, emomu ɔhanle kɛ: “Saa mekulo kɛ ɔtɛnla ɛkɛ kɔkpula kɛ mekɛra a, kɛzi ɔfale ɛ nwo ɛ?” 24  Ɛdoavolɛ zɔhane+ a di ɛhye mɔ anwo daselɛ na ɔhɛlɛle ɛhye mɔ a, na yɛze kɛ ye daselɛ ne le nɔhalɛ. 25  Nɔhalɛ nu, ninyɛne dɔɔnwo wɔ ɛkɛ mɔɔ Gyisɛse yɛle mɔɔ saa bɛhɛlɛle ɔ muala a, anrɛɛ mesuzu kɛ nwolɛ mbuluku ɛnrɛhɔ ewiade ye anu a.+

Ɔbodwɛkɛ

Anzɛɛ “fɛlɛ.”
Anzɛɛ “ɔwula aze tɛladeɛ ala.”
Giliki aneɛ nu, “kɛyɛ kubit 200.” Nea Mok. B14.