Ditilɔnomi 32:1-52

  • Mosisi edwɛne (1-47)

    • Gyihova, Bodane ne (4)

    • Yizilayɛ arɛle vile ye Bodane ne (18)

    • “Nzenralɛlilɛ le me ɛdeɛ” (35)

    • “Maanle maanle, bɛ nee ye menli ne ɛli fɛlɛko” (43)

  • Mosisi bawu wɔ Nibo Boka ne azo (48-52)

32  “O anwuma tie, na metendɛ,Na maa azɛlɛ ɛdie me nloa anu edwɛkɛ.   Me ngilehilelɛ badɔ kɛ ezule;Me edwɛkɛ badɔ kɛ ɛbɔlɛ,Kɛ ezule mɔɔ tɔ gua ndile zoYɛɛ ezule mɔɔ nyenye gua mbaka zo la.   Ɔluakɛ mebabɔ Gyihova duma ne nolo.+ Bɛha yɛ Nyamenle ne kpoleyɛlɛ ne anwo edwɛkɛ!+   Bodane ne, ye gyima di munli,+Ɔluakɛ ye ndenle kɔsɔɔti le pɛlepɛle.+ Ɔle Nyamenle nɔhavo+ mɔɔ ɔnli mɔguazo;+Ɔle tenlenenli yɛɛ ɔdi pɛlepɛle.+   Bɛdabɛ a bɛ ɛbɛla ɛzɛkye a.+ Tɛ ɔ mra a le bɛ, nvonleɛ ne vi bɛdabɛ.+ Bɛle awolɛndoazo mɔɔ bɛ nzo yɛ se yɛɛ bɛle mɛlɛbɛla!+   O menli ahoasea mɔɔ ɛnze nrɛlɛbɛ,+Asoo kɛ ɔwɔ kɛ bɛbu Gyihova la ɛne?+ Asoo tɛ yemɔ a ɔle bɛ Ze mɔɔ bɔle bɛ,+Ahenle mɔɔ ɔmaanle bɛyɛle maanle la ɔ?   Bɛhakye tete;Bɛdwenle awolɛndoazo ne mɔ mɔɔ ɛpɛ nu la anwo. Biza wɔ papa na ɔbaha yeahile wɔ;+Wɔ mgbanyima, na bɛbabɔ wɔ amaneɛ.   Mekɛ mɔɔ Anwuma Anwumanli ne maanle maanle maanle ne mɔ agyapadeɛ,+Mekɛ mɔɔ ɔtetele Adam amra ne mɔ* avinli la,+Ɔnleanle Yizilayɛma dodo ne anwo+Ɔgyale menli ne ɛweɛne.+   Ɔluakɛ Gyihova menli le ye kyɛfoa;+Gyekɔbo le ye agyapadeɛ.+ 10  Ɔnwunle ye wɔ fienemgbole nu+Ɛsɛlɛ mɔɔ ɛhwee ɛnle zo mɔɔ nane su ɛkɛ la azo.+ Ɔbɛngale ɔ nwo ɔyiale na ɔnleanle ye,+Na ɔbɔle ɔ nwo bane kɛ ɔ nye ma.*+ 11  Kɛ mɔɔ kɔleɛ woso ye sane,Ɔtu ɔfa ɔ mra nwo zo,Ɔtɛlɛdɛlɛ ɔ ndɛba anu ɔfa bɛ,Na ɔfia bɛ wɔ ɔ ndɛba azo la,+ 12  Gyihova angomekye a hilele ye* adenle a;+Ɛnee nyamenle gyɛne biala ɛmboka ɔ nwo.+ 13  Ɔmaanle ɔluale azɛlɛ ye azo awoka zo,+Amaa yeali azɛlɛ ne azo aleɛ.+ Ɔmaanle ɔnlonle bodane nu wolɛYɛɛ bolɛ mɔɔ yɛ se la anu nwole, 14  Ɔmaanle ye bɛta mɔɔ vi nlankɛ nu nee mboane melekeYɛɛ mboane mɔɔ ɛlɔ,Beehyan mboane nyinli nee mbɔnkye nyinliYɛɛ hwiiti kpalɛ;+Na ɔnlonle vanye ma nu nzule* kɛ nwanye. 15  Mɔɔ Gyɛhyelan* yɛle belane la, ɔdele atua na ɔtotole ɔ gyakɛ. Wɔyɛ belane, wɔyɛ kpotoloo, wɔyɛ toboo.+ Yemɔti ɔkpole Nyamenle mɔɔ bɔle ye la,+Na yeambu ye ngoanelielɛ Bodane ne. 16  Bɛvale Nyamenle gyɛne bɛhanle ye ɛya;+Bɛvale bɛkyi ninyɛne bɛhanle ye ɛya.+ 17  Bɛbɔle afɔle bɛmaanle sunsum ɛtane ne mɔ, bɛambɔ bɛammaa Nyamenle,+Bɛbɔle bɛmaanle nyamenle mɔɔ bɛnze bɛ,Fofolɛ mɔɔ bɔ zo mɔɔ bɛra,Nyamenle mɔɔ bɛ nenyia mɔ ɛnze bɛ la. 18  Bɛ rɛle vile Bodane ne+ mɔɔ le bɛ ze la,Yɛɛ bɛangakye Nyamenle ne mɔɔ wole bɛ la.+ 19  Mɔɔ Gyihova nwunle ye la, ɔkpole bɛ,+Ɔluakɛ ɔ mra mrenyia nee ɔ mra mraalɛ ne mɔ hanle ye ɛya. 20  Ɔti ɔhanle kɛ, ‘Mebava me nyunlu meavea bɛ;+Mebanlea mɔɔ bado bɛ la. Ɔluakɛ bɛle awolɛndoazo mɔɔ le mɛlɛbɛla,+Mralɛ mɔɔ nɔhalɛlilɛ ɛnle bɛ nu la.+ 21  Bɛva debie mɔɔ ɛnle nyamenle la bɛha me ɛya;+Bɛva bɛ ananze mɔɔ nvasoɛ ɛnle bɛ nwo zo la bɛha me ɛya.+ Ɔti mebamaa bɛahwe menli mɔɔ bɛnzɔho ɛhwee la anwo nungule;+Mebava maanle koasea bie meaha bɛ ɛya.+ 22  Ɔluakɛ me ɛya ne ɛzɔ senle+Mɔɔ ɔbayela too yeahɔdwu Nla* ne abo la,+Na ɔbayela azɛlɛ nee zolɛ ninyɛneNa yeayela awoka ne mɔ adiabo ne mɔ. 23  Mebamaa munzule dɔɔnwo ado bɛ;Mebatoto me ɛda ne mɔ meawowɔ bɛ. 24  Ɛhɔne bamaa bɛ nwo abɛlɛ bɛ+Na ebunlu nee ɛzɛkyelɛ mɔɔ anloa yɛ se la ahu bɛ.+ Mebamaa nane anwo ɛzulolɛ+Yɛɛ ndɛtɛlɛ nu nwɔlɛ* mɔɔ lɛ pɔezen la ara bɛ nwo zo. 25  Bɛbadɔ dadeɛ nloa wɔ alienwo;+Ɛzulolɛ baha bɛ wɔ suakunlu,+Kpavolɛ nee bɛlɛra,Adɔma nee kpanyinli mɔɔ ati zo ɛyɛ egyɛne la amuala.+ 26  Anrɛɛ mebaha kɛ: “Mebabɔ bɛ asande;Mebamaa menli arɛle avi bɛ,” 27  Noko mesulo mɔɔ kpɔvolɛ ne bayɛ wɔ nwolɛ la,+Ɔluakɛ bie a agbɔvolɛ ne mɔ ɛnrɛde ɔ bo.+ Bɛbaha kɛ: “Yɛvale yɛ tumi a yɛlile konim a;+Tɛ Gyihova a yɛle ɛhye mɔ amuala a.” 28  Ɔluakɛ bɛle maanle mɔɔ ɛnze nrɛlɛbɛ,*Yɛɛ bɛnlɛ ndelebɛbo biala.+ 29  Saa bɛze nrɛlɛbɛ a,+ anrɛɛ bɛbadwenle ɛhye anwo.+ Anrɛɛ bɛbadwenle mɔɔ bado bɛ la anwo.+ 30  Kɛ ɔkɛyɛ na sonla ko avoa menli 1,000,Na menli nwiɔ amaa menli 10,000 anriandi ɛ?+ Kyesɛ bɛ Bodane ne ɛdɔne bɛ+Na Gyihova ɛye bɛ ɛmaa. 31  Ɔluakɛ bɛ bodane ne ɛnle kɛ yɛ Bodane ne la,+Yɛ agbɔvolɛ bɔbɔ ɛde ɛhye abo.+ 32  Ɔluakɛ bɛ vanye ne vi SodɔmYɛɛ Gomɔla vanye egyinli ne mɔ anu.+ Bɛ vanye ma ne mɔ le pɔezen,Bɛ siakɛ yɛ ɛnwonle.+ 33  Bɛ nwanye le kɛ nwɔlɛ pɔezen,Ɛwɔbile pɔezen mɔɔ ku bɛ la. 34  Asoo metɛfale ɛhye mɔ amuala metɛsiele,Metɛsɔle ɔ nloa wɔ me ninyɛnezielɛ ɛleka ne ɔ?+ 35  Nzenralɛlilɛ le me ɛdeɛ, na mebadua ɛtane nwo kakɛ,+Wɔ mekɛ mɔɔ bɛ gyakɛ kɛtele la,+Ɔluakɛ bɛ amaneɛnwunlɛ kenle ne ɛbikye,Na mɔɔ ɛlɛkendɛ bɛ la bara ndɛndɛ.’ 36  Ɔluakɛ Gyihova babua ye menli ne ndɛne,+Na yeaze ye azonvolɛ anwunvɔne*+Wɔ mekɛ mɔɔ ɔkɛnwu kɛ bɛ anwosesebɛ ɛwie,Na yeha menli mɔɔ ɛnlɛ boavolɛ na bɛyɛ bɛtɛɛ la ala la. 37  Akee ɔbaha kɛ, ‘Nienwu a bɛ nyamenle ne mɔ hale a,+Bodane ne mɔɔ bɛnriandile bɛhɔveale ɔ bo, 38  Mɔɔ ɛnee bɛdi bɛ afɔlebɔlɛ ne mɔ anu ɛnlome ne,*Na bɛno nwanye mɔɔ bɛfa bɛbɔ nza afɔle la wɔ ni?+ Bɛmaa bɛdwazo na bɛraboa bɛ. Bɛmaa bɛrayɛ bɛ ɛvealeka. 39  Bɛnlea, kɛkala medame, medame a mele Nyamenle a,+Ɛye me a nyamenle bieko ɛnle ɛkɛ.+ Medame a meku yɛɛ medame a memaa bɛtɛnla ngoane nu a.+ Medame a meboda awie+ na meyɛ ye ayile a,+Na awie biala ɛnrɛhola ɛnrɛlie debie ɛnrɛvi me sa nu.+ 40  Ɔluakɛ memaa me sa zo anwuma,Na meka ndane kɛ: “Mekɛ ala mɔɔ mede aze dahuu la,”+ 41  Saa mesi me konle dadeɛ ne mɔɔ ta memeamemea laNa mesiezie me sa kɛ mebua ndɛne a,+Mebali me agbɔvolɛ nzenralɛ+Na meadua menli mɔɔ kpɔ me la kakɛ. 42  Mebamaa me ɛda ne mɔ anlo menli mɔɔ bɛhu bɛNee menli mɔɔ bɛhye bɛ la mogya abo,Yɛɛ me dadeɛ ne bali nwonane,Kpɔvolɛ ne mgbanyima ne mɔ ati anwo nwonane ne.’ 43  Maanle maanle, bɛ nee ye menli ne ɛli fɛlɛko,+Ɔluakɛ ɔbali ye azonvolɛ mogya nwo nzenralɛ,+Yɛɛ ɔbali ye agbɔvolɛ nzenralɛ+Na yeali ye menli ne azɛlɛ ne ati mgbɔdalɛ.”* 44  Ɔti Mosisi nee Nɛn ara Hohyia*+ rahanle edwɛne ɛhye anu edwɛkɛ ne amuala maanle menli ne dele.+ 45  Mɔɔ Mosisi hanle edwɛkɛ ɛhye mɔ amuala hilele Yizilayɛma kɔsɔɔti wiele la, 46  ɔzele bɛ kɛ: “Bɛmaa edwɛkɛ ɛhye mɔ amuala mɔɔ meva mebɔ bɛ kɔkɔ ɛnɛ la ɛla bɛ ahonle nwo,+ amaa bɛaha bɛahile bɛ mra bɛamaa bɛali edwɛkɛ mɔɔ wɔ Mɛla ɛhye anu la kɔsɔɔti azo.+ 47  Ɔluakɛ ɔnle edwɛkɛ mgbane bie ala, emomu ɔle bɛ ngoane,+ na ɔlua edwɛkɛ ɛhye azo a bɛbadɛnla azɛlɛ ne mɔɔ bɛlɛpɛ Dwɔdan ne bɛahɔva la azo bɛahyɛ a.” 48  Kenle ko ne ala Gyihova zele Mosisi kɛ: 49  “Kɔ Abalem boka+ ɛhye, mɔɔ le Nibo Boka+ ne mɔɔ wɔ Mowabe azɛlɛ zo na ɔ nye kile Gyɛleko la azo, na nea Keena azɛlɛ ne mɔɔ mebava meamaa Yizilayɛma kɛ agyapadeɛ la.+ 50  Na ɛbawu wɔ boka ne mɔɔ ɔka ekyii ɛfo zolɛ la azo, na bɛbazie wɔ kɛ wɔ menli ne la,* kɛ mɔɔ ɛ diema Aalɔn wule Hɔɔ Boka+ ne azo na bɛziele ye kɛ ye menli ne la, 51  ɔluakɛ bɛ mu nwiɔ bɛanli nɔhalɛ bɛammaa me wɔ Yizilayɛma avinli wɔ Mɛleba nzule ne+ mɔɔ wɔ Keedɛhye wɔ Zen fienemgbole ne anu la anwo, ɔboalekɛ bɛanyɛ me nwuanzanwuanza wɔ Yizilayɛma anyunlu.+ 52  Ɛbanwu azɛlɛ ne wɔ moamoa, noko ɛnrɛhɔ azɛlɛ ne mɔɔ mebava meamaa me menli Yizilayɛma la azo.”+

Ɔbodwɛkɛ

Anzɛɛ ɔkola ɔkile, “alesama.”
Anzɛɛ “kuduarizi; kolonvia.”
Ɛhye kile, Gyekɔbo.
Hibulu aneɛ nu, “mogya.”
Ɔ bo kile “Tenlenenli,” ɔle Yizilayɛ amodinli mɔɔ bɛfa bɛdi ye eni.
Anzɛɛ “Sheol,” ɛhye kile, alesama nla. Nea Edwɛkɛbohilelɛ.
Hibulu aneɛ nu, “nane mɔɔ twenle ɔ nwo aze.”
Anzɛɛ ɔkola ɔkile, “ɛnde folɛ.”
Anzɛɛ “Na yeanlu ɔ nwo wɔ ye azonvolɛ nwo.”
Anzɛɛ “afɔlebɔlɛ kpalɛ ne.”
Anzɛɛ “yeade ye menli ne azɛlɛ ne anwo.”
Dwɔhyua duma mɔɔ ɛnee bɛfa bɛfɛlɛ ye la ɛne. Hohyia le duma Hohyaya mɔɔ bɛpɛ ye sinli, ɔ bo kile “Gyaa Liele Ye; Gyaa Ɛlie Ngoane.”
Edwɛkɛ ɛhye kile kɛ ɔbawu.