Bagolo ba swanetše go ekiša Jehofa ka go ba le kwelobohloko ge ba thuša motho yo a tlošitšwego ka phuthegong. Ka mohlala, Jehofa o be a sa emele Baisiraele bao ba sa kwego gore ba itshole pele a ka ba thuša. Eupša o be a ba thuša le pele ba ka bontšha gore ba a itshola. Jehofa o ile a laela Hosea gore a lebalele mosadi wa gagwe yo a bego a dira sebe. Jehofa o be a nyaka go bontšha batho ba gagwe gore o na le kwelobohloko. (Hos. 3:1; Mal. 3:7) Bagolo ba ekiša Jehofa ka go bontšha gore ba tloga ba nyaka gore motho yo a dirilego sebe se segolo a boe ka phuthegong, e bile ba dira sohle seo ba ka se kgonago go mo thuša gore a boe. Seo se diragetšego papišong ya morwa wa lehlaswa, tate yoo ge a bona morwa wa gagwe a boa gae, o ile “a mo kitimela a mo gokarela a mo atla ka lerato.” (Luka 15:20) Tate yoo ga se a ka a emela morwa wa gagwe a mo kgopela gore a mo swarele, eupša o ile a mo kitimela go bontšha gore o a mo rata. w24.08 28 ¶7-8

Mantšu a temana ya lehono a re bontšha gore Jehofa ga a timane ka bohlale bja gagwe. O re nea bjona. Jakobo o bontšhitše gore ge Jehofa a re nea bohlale ga a re goboše. Jehofa ga a nyake gore re tšhabe go mo kgopela bohlale bja gagwe. Go e na le moo, o nyaka gore re mo kgopele bjona re lokologile. (Die. 2:​1-6) Rena re ka ekiša Jehofa bjang? Re ka ekiša Jehofa ka go ruta ba bangwe dilo tšeo re di tsebago. (Ps. 32:8) Bahlanka ba Jehofa ba na le dibaka tše dintšhi tša go ruta ba bangwe. Ka mohlala, ba thuša bao ba sa thomago go ya tšhemong. Bagolo ba thuša bahlanka ba bodiredi le bana babo rena bao ba kolobeditšwego go dira dikabelo tša bona gabotse ka phuthegong. Ba thuša bana babo rena bao ba sa ba felele pelo. Le gona bao ba kgonago go hlokomela meago ya mokgatlo ba tlwaetša batho ba bangwe gore le bona ba kgone go hlokomela meago yeo. w24.09 28-29 ¶11-12

E le gore o swanelege go ba mogolo, o swanetše go “hloka bosodi,” e lego seo se bolelago gore o swanetše go ba yo a tsebegago gabotse ka phuthegong. Go oketša moo, o swanetše go “hlatselwa gabotse ke batho ba ka ntle ga phuthego.” (1 Tim. 3:2) Batho bao ba sa hlankelego Jehofa ba ka no se dumelelane le dilo tšeo o di dumelago eupša ga se ba swanela go ipotšiša ge e ba o botega goba o itshwara gabotse. (Dan. 6:​4, 5) Ipotšiše gore, ‘Na ke itshwara gabotse ge bana bešo ba le gona le ge ba se gona?’ Ge e ba o “rata go loka,” o tlo dula o lebelela dika tše dibotse tšeo batho ba bangwe ba nago le tšona e bile wa ba reta ka seo. (Tito 1:8) O thabela go direla batho ba bangwe dilo tše dibotse le go dira sohle seo o ka se kgonago go ba thuša. Ke ka baka la’ng go le bohlokwa gore bagolo ba be le seka se? Ka gobane ba diriša nako ya bona e ntšhi go hlokomela phuthego le go phetha maikarabelo ao ba nago le ona. (1 Pet. 5:​1-3) Le ge ba na le mošomo o montšhi, ba thabišwa ke go hlankela bana ba bo bona.—Dit. 20:35. w24.11 20-21 ¶3-5

Bahlanka ba bodiredi ba dira mešomo e bohlokwa ka phuthegong. Moapostola Paulo o be a bona banna bao ba botegago ba le bohlokwa. Ka mohlala, ge moapostola Paulo a be a ngwalela Bakriste ba kua Filipi, o ile a dumediša bahlanka ba bodiredi le bagolo. (Bafil. 1:1) Bana babo rena ba baswa goba ba bagolo bao ba kolobeditšwego, ba thabela go ba bahlanka ba bodiredi. Ka mohlala, ngwanabo rena Devan o bile mohlanka wa bodiredi a na le mengwaga e 18. Mola ngwanabo rena yo a bitšwago Luis, a ile a kgethwa gore e be mohlanka wa bodiredi ge a be a na le mengwaga ya ka godimo ga e 50. Luis o be a ikwa go swana le bahlanka ba bangwe ba bodiredi, ka gona o ile a bolela gore: “Ke thabela go ba mohlanka wa bodiredi, ka gobane ke kgona go bontšha bana babo rena le dikgaetšedi ka phuthegong gore ke a ba rata.” Ge e ba o le ngwanabo rena yo a kolobeditšwego gomme o se mohlanka wa bodiredi, o ka dira’ng gore o be mohlanka wa bodiredi? w24.11 14 ¶1-3

Ge Kgoši Hesekia a be na le mengwaga e 39 o ile a swara ke bolwetši bjo bo sa folego. Jehofa o ile a roma moporofeta Jesaya gore a botše Kgoši Hesekia gore o tlo hlokofala ka baka la bolwetši bjoo. (2 Dikg. 20:1) Hesekia o be a bona gore a ka se tsoge a fodile. Hesekia o ile a lla gabohloko ka morago ga gore Jesaya a mmotše molaetša woo. O ile a rapela Jehofa a mo lopa gore a mo thuše. Ge Jehofa a bona Hesekia a lla ebile a mo lopa gore a mo thuše, o ile a re go yena: “Ke kwele thapelo ya gago. Ke bone megokgo ya gago. Šefa ke a go fodiša.” Jehofa o ile a diriša Jesaya go tshepiša Hesekia gore o tla mo thuša ebile o tla phološa Jerusalema seatleng sa Baasiria. (2 Dikg. 20:​4-6) Na o a babja gomme go bonala okare o ka se fole? Rapela Jehofa, o tlo go theetša le ge o lla. Beibele e re kgodiša ka gore “Tate wa dikgaugelo le Modimo wa khomotšo yohle” o tlo re thuša go mathata a rena ka moka.—2 Bakor. 1:​3, 4. w24.12 24 ¶15-17

Re tlo thabela go amogela batho ba ga bo rena bao ba hlokofetšego ba tsošitšwe bahung. Re tlo thabela le go ithuta ka dilo tše dintšhi tšeo Jehofa a di bopilego. (Ps. 104:24; Jes. 11:9) Re tlo ipshina ka go hlankela Jehofa ebile go ka se sa hlokega gore re mo kgopele gore a re lebalele. Na o ka thabela go phela paradeiseng goba go no phela ka tsela yeo wena o e nyakago gona bjale? (Baheb. 11:25) Re a tshepa gore o ka thabela go phela paradeiseng. Ditšhegofatšo tšeo re tlago go di hwetša lefaseng le leswa di phala kgole dilo ka moka tšeo re nago le tšona gona bjale. Lefase le leswa ga se toro. Re tla be re phela moo letšatši le lengwe le le lengwe. Seo se tlo kgonega ka gobane Jehofa o re neile Morwa wa gagwe gore a re hwele. w25.01 29 ¶12

Moshe ke yo mongwe wa batho bao ba nago le tumelo bao go bolelwago ka bona lengwalong la Baheberu. (Baheb. 3:​2-5; 11:​23-25) Moshe o be a na le lebaka la go tshepa Jehofa ka gobane Jehofa o ile a nea Baisiraele dijo le meetse le ge ba be ba le lešokeng leo le bego le omile. (Ek. 15:​22-25; Ps. 78:​23-25) Le ge Moshe a be a tshepa Jehofa, eupša mo e ka bago ngwaga ka morago ga gore Jehofa a ntšhe Baisiraele nageng ya Egepeta ka mohlolo, Moshe o ile a thoma go ipotšiša ge eba Modimo a tla ba fa nama go etša ge a boletše. O ile a thoma go ipotšiša ge e ba batho ba dimilione bao a bego a na le bona lešokeng ba tla kgona go hwetša nama ka moka ga bona. Jehofa o ile a botšiša Moshe gore: “Na seatla sa ka nna Jehofa, ke se se kopana?” (Num. 11:​21-23) Ge e le gabotse Jehofa o be a botšiša Moshe gore: ‘Na o nagana gore nka palelwa ke go dira seo ke boletšego gore ke tla se dira?’ w25.03 26 ¶1-2

Na re ka re seo se ilego sa direga nakong ya Meetsefula se be se bontšha seo se tlago go direga nakong e tlago? Aowa. Ka baka la’ng? Gobane seo ga se seo Beibele e se bolelago. Le ge Jesu a ile a bapetša “mehla ya Noa” le nakong ya go ba gona ga gagwe, o be a sa bolele gore pego ya Meetsefula e be e bontšha seo se tlago go direga nakong e tlago, go swana le ge e ka Jehofa o tswalela lebati la areka. (Mat. 24:​37-39) Noa o ile a arabela bjang ge a be a ekwa molaetša wa Jehofa wa temošo? O ile a bontšha tumelo ka go aga areka. (Baheb. 11:7; 1 Pet. 3:20) Ka mo go swanago, ge batho ba ekwa ditaba tše dibotse tša Mmušo wa Modimo ba swanetše go tšea kgato. (Dit. 3:​17-20) Petro o ile a re Noa e be e le “mmoledi wa toko.” Lehono re swaregile ka go bolela ditaba tše dibotse lefaseng ka moka e bile re dira seo ka mafolofolo. Le ga go le bjalo re ka no se kgone go bolela le motho yo mongwe le yo mongwe ka ditaba tše dibotse pele bofelo bo fihla. w24.05 9-10 ¶3-5

Re swanetše go lwela go hlompha bagwera ba Jehofa le go ba bontšha botho. (Baroma 12:10) Bjang? Selo se sengwe gape seo Psalme 15:4 e re botšago sona ka moeng yo a lego tenteng ya Jehofa ke gore, “o phetha seo a se tshepišitšego le ge go le thata go dira bjalo.” Ge re sa dire dilo tšeo re di tshepišitšego re ka kweša ba bangwe bohloko. (Mat. 5:37) Ka mohlala, Jehofa o letetše gore baeng bao ba lego tenteng ya gagwe ba phelele dikeno tša bona tša lenyalo. O thaba kudu ge batswadi ba dira sohle seo ba ka se kgonago go dira dilo tšeo ba di tshepišitšego bana ba bona. Go rata Modimo le baagišane go tlo re thuša gore re dire sohle seo re ka se kgonago go phethagatša dilo tšeo re di tshepišitšego. Tsela e nngwe ya go hlompha bagwera ba Jehofa ke ka go ba amogela le go ba bontšha botho. (Baroma 12:13) Nako yeo re e fetšago re ithabiša le bana babo rena le dikgaetšedi e dira gore re ba tsebe gakaone e bile re dule re na le segwera se tiilego le Jehofa. Re ekiša Jehofa ge re amogela ba bangwe. w24.06 12 ¶15-16

Jehofa o utollela batho bao ba ikokobeditšego therešo. (Mat. 11:25) Re bontšha gore re na le boikokobetšo ge re dumelela batho ba bangwe ba re thuša go tseba therešo. (Dit. 8:​30, 31) Lega go le bjalo re swanetše go hlokomela gore re se ke ra thoma go ikgogomoša. Ge re ka ba le magetla, re tlo bona eka dikgopolo tša rena di swana le tšeo di lego ka Beibeleng e bile di swana le tlhahlo yeo mokgatlo wa Jehofa o re neago yona. Gore re dule re na le boikokobetšo re swanetše go gopola gore Jehofa o re feta ka bogolo. (Ps. 8:​3, 4) Go rapela go ka re thuša gore re dule re ikokobeditše le go dumelela batho ba bangwe gore ba re rute. Jehofa o tlo re thuša go gopola gore dikgopolo tša gagwe tšeo re ithutago tšona ka Beibeleng le ka mokgatlong wa gagwe di bohlokwa kudu go feta tša rena. Ge o dutše ithuta Beibele, nyaka dilo tšeo di bontšhago gore Jehofa o rata batho bao ba ikokobeditšego gomme o hloile bao ba ikgantšhago le go ikgogomoša. Ge o hwetša ditokelo tše oketšegilego tšeo di dirago gore o be le matla a itšego, šoma ka thata gore o dule o ikokobeditše. w24.07 10 ¶8-9

Ga e sa le go tloga ka 1919, Jesu o be a dutše a diriša sehlopha sa banna ba tloditšwego gore ba rulaganye modiro wa go bolela ditaba tše dibotse le go nea balatedi ba gagwe dijo tša moya. (Luka 12:42) Go molaleng gore Jehofa o šegofatša mošomo wa sehlopha seo. (Jes. 65:​13, 14) Ge nkabe re be re sa rulaganywa gabotse, re be re ka se kgone go phetha mošomo wo Jesu a re neilego ona. (Mat. 28:​19, 20) A re re ka mohlala, go be go se na ditšhemo tšeo di abilwego, motho yo mongwe le yo mongwe o be a ka šoma moo a ratago gona. Mafelo a mangwe a be a ka šongwa gantšhi le gantšhi mola a mangwe a be a ka se fihlelelwe ka ditaba tše dibotse. Nagana ka ditsela tše dingwe tšeo re holegago ka tšona ka baka la go rulaganywa gabotse. Jesu o sa tšwela pele go re rulaganya le lehono go swana le ge a ile a rulaganya balatedi ba gagwe nakong ya ge a be a le mo lefaseng. w24.04 8-9 ¶2-4

Kaine e be e le ngwana wa mathomo wa Adama le Efa. Le yena o be a na le sebe go swana le batswadi ba gagwe, e bile Beibele ge e mo hlalosa e re: “O be a dira dilo tše mpe.” (1 Joh. 3:12) Mohlomongwe le ke lebaka leo Jehofa a bego a sa amogele “Kaine le sehlabelo sa gagwe.” Go e na le gore Kaine a fetoge, “o ile a galefa kudu e bile sefahlego sa gagwe se be se bontšha gore o nyamile.” Ka morago ga gore Jehofa a lemoge seo o ile a bolela le yena. (Gen. 4:​3-7) O ile a bolela le Kaine gabotse, a ba a mo tshepiša gore ge a ka mo kwa o tla mo šegofatša. Ka maswabi, Kaine o ile a se mo theetše. O ile a gana ge Jehofa a mo thuša gore a itshole. Ka ge Kaine a se a ka a kwa Jehofa, na se se dirile gore Jehofa a tlogele le go thuša batho ba bangwe? Le gatee. w24.08 10 ¶8

Baisiraele ba be ba na le bokamoso bjo bo kgahlišago. Jehofa o be a tlo šegofatša Baisiraele gomme ba phela nako e telele nageng yeo a ba tshepišitšego yona. E be e tloga e le naga e botse le yeo e nago le dimela tše dintšhi. Ge Moshe a ba botša ka naga yeo, o ile a re le tlo hwetša “metse e mebotse le e megolo yeo le sego la e aga, dintlo tšeo di tletšego ka dilo tše dintšhi tše dibotse tšeo le sego la di šomela, didiba tšeo le sego la di epa, mašemo a diterebe le mehlare ya mehlware yeo le sego la e bjala.” (Doit. 6:​10, 11) Moshe o ile a lemoša Baisiraele. Ba be ba swanetše go kwa ditaelo tša Jehofa gore ba kgone go tsena nageng yeo a ba tshepišitšego yona. Moshe o ile a ba kgothaletša gore ba “kgethe bophelo” ka go theetša Jehofa le go dula ba mo kgomaretše. (Doit. 30:20) Eupša Baisiraele ba ile ba se kwe keletšo yeo. Ka gona, Modimo o ile a dumelela Baasiria gore ba fenye Baisiraele, ke moka ka morago a dumelela le Bababilona gore ba ba fenye le go ba iša bothopša.—2 Dikg. 17:​6-8, 13, 14; 2 Dikor. 36:​15-17, 20. w24.11 9 ¶5-6

Batho ba bantšhi ba re ba “dumela go Jesu” e bile ba mmitša mophološi wa bona. (Joh. 6:29) Gona moo lešabeng leo go be go na le bao ba bego ba dumela go Jesu, eupša ka morago ba se sa dumela go yena. Ke ka baka la’ng seo se ile sa direga? Batho ba bantšhi bao Jesu a ilego a ba fepa, ba be ba mo šala morago ge fela a ba nea dilo tšeo ba di hlokago. Ba be ba nyaka gore a ba fodiše, a ba nee dijo le go ba ruta ka dilo tšeo bona ba bego ba nyaka go di kwa. Eupša gore motho e be molatedi wa Jesu, o be a se a swanelwa ke go no kgahlwa ke dilo tšeo feela. Jesu ga se a no tlela mo lefaseng feela gore a nee batho dilo tšeo ba di hlokago. O be a tletše le go ba ruta dilo tša bohlokwa gore ba tle ba kgone go ba balatedi ba gagwe.—Joh. 5:40. w24.12 12 ¶12-13

Banna ba ka thušwa ke eng gore ba tlogele go tlaiša basadi ba bona le go dira gore ba ikwe ba nyatšega? Ba ka ekiša Jesu. Tsela yeo a bego a swara barutiwa ba gagwe ka yona e ka ruta banna kamoo ba swanetšego go swara basadi ba bona ka gona. Banna ba Bakriste ba ka ithuta go bolela le basadi ba bona tseleng yeo Jesu a bego a bolela le barutiwa ba gagwe ka yona le go ba swara ka yona. Jesu o be a swara baapostola ba gagwe ka botho le go ba hlompha. O be a sa ba gatelele goba go dira gore ba ikwe ba nyatšega. Ga se a ka a šomiša matla a gagwe go ba gatelela. Go e na le moo, o be a ba hlankela ka botho. (Joh. 13:​12-17) Jesu o boditše balatedi ba gagwe gore: “Le ithute go nna, gobane ke wa moya o boleta e bile ke wa pelo e ikokobeditšego gomme le tla hweletša meoya ya lena tapologo.” (Mat. 11:​28-30) Jesu o be a le boleta. Ge motho a le boleta ga se gore o a nyatšega. Go e na le moo, o bontšha gore o kgona go itshwara. Ge batho ba bangwe ba mo kwatiša o dula a išitše maswafo fase le go laola tsela yeo a arabelago ka yona. w25.01 10 ¶10-11

Re ka letela gore mathata a ditšhelete e be a mantšhi ge tshepedišo ye e dutše e batamela bofelong. Mo re dulago gona go ka ba le mathata a dipolotiki, gwa tsoga dintwa, gwa ba le dikotsi tša tlhago goba gwa tsoga mauba a malwetši, gomme dilo tše ka moka tša dira gore re lahlegelwe ke mošomo, tšhelete, dilo tšeo re nago le tšona goba magae a rena. Ke’ng seo se ka re thušago go dira diphetho tšeo di bontšhago gore re tshepa gore Jehofa o tlo re thuša? Selo sa bohlokwa seo se ka go thušago ke go rapela Jehofa gomme o mmotše ka dilo ka moka tšeo di go tshwenyago. Mo kgopele gore a go nee bohlale gore o kgone go dira diphetho tše dibotse le gore a go thuše gore o se ke wa “tshwenyega kudu” ka mathata ao o nago le ona. (Luka 12:​29-31) Mo lope gore a go thuše go kgotsofalela dilo tša bohlokwa tšeo o nago le tšona tšeo di go thušago gore o phele. (1 Tim. 6:​7, 8) Dira nyakišišo ka go bala dikgatišo tša rena tšeo di bolelago ka dilo tšeo o ka di dirago ge o na le mathata a ditšhelete. Batho ba bantšhi ba bolela gore dikgatišo le dibidio tšeo di lego go jw.org tšeo di bolelago ka mathata a ditšhelete di ba thušitše kudu. w25.03 28-29 ¶10-11

Go ile gwa fihla nako ya gore batho bao e bego e se Bajuda ebile ba se ba bolla ba ithute ka Modimo. Moapostola Petro o ile a hwetša kabelo ya go ruta Koronelio yo e bego e se Mojuda. Ka moragonyana Koronelio o ile a ba Mokriste. Bajuda ba be ba sa dirišane le batho bao e sego Bajuda, ke ka baka leo Petro a ilego a swanelwa ke go šoma ka thata gore a kgone go ba ruta ka Jehofa. Ge Petro a se na go ithuta gore Jehofa o lebelela batho bjang, o ile a swanelwa ke go fetola tsela yeo a bego a nagana ka yona. Ke ka baka leo a ilego a “se gane” ge Koronelio a mo kgopela gore a mo etele. (Dit. 10:​28, 29) O ile a ruta Koronelio le ba lapa la gagwe gomme ba kolobetšwa . (Dit. 10:​21-23, 34, 35, 44-48) Ge nako e dutše e eya, Petro o ile a kgothaletša Bakriste gotee le yena gore ba ‘nagane go swana.’ (1 Pet. 3:8) Re ka nagana go swana le bana babo rena le dikgaetšedi. Re ka kgona ge feela re ka ithuta Lentšu la Modimo gomme ra ekiša tsela yeo Jehofa a nagana ka yona. w25.03 9-10 ¶7-8

Tsela yeo batho ba naganago ka yona le yeo ba dirago dilo ka yona e fapana le tsela yeo Jehofa a dirago dilo ka yona. (Die. 17:15) Re swanetše go tseba dilo tšeo baganetši ba rena ba ka di dirišago go re nyamiša goba go re aroša. Re swanetše go diriša keletšo yeo moapostola Paulo a e neilego Bakriste ba Baheberu ya gore ba phegelele kgolong. Se se bolela gore re swanetše go bala Beibele ka mo go tseneletšego le go nagana go swana le Jehofa. Se se swanetše go dirwa le ka morago ga go ineela le go kolobetšwa. Go sa šetšwe gore re na le nako e kaaka’ng re le ka phuthegong, ka moka ga rena re swanetše go bala le go ithuta Lentšu la Modimo ka mehla. (Ps. 1:2) Go dula re ithuta Beibele ka mehla go tlo re thuša gore re be le tumelo e tiilego, e lego seka seo Paulo a kgothaleditšego Bakriste gore ba be le sona.—Baheb. 11:​1, 6. w24.09 10 ¶7-8

Ge re ka lebelela Jehofa e le mogwera wa rena go tlo ba bonolo gore re dule re mmotegela. Josefa le yena o ile a ba mogwera wa Modimo. O ile a gana go dira bootswa. Modimo e be e le mogwera wa gagwe, e bile o be a sa nyake go dira selo seo se mo šišimišago. (Gen. 39:9) E le gore re be bagwera ba Jehofa re swanetše go dula re mo rapela le go bala Lentšu la gagwe. Ge re dira bjalo segwera sa rena le yena se tlo gola. Ge re ka swana le Josefa gomme ra ba le segwera se sebotse le Jehofa, re ka se nyake go dira dilo tšeo di mo šišimišago. Batho bao ba sa tshepego Jehofa ba ka tlogela go gwerana le yena. Nagana ka seo Baisiraele ba ilego ba se dira ge ba be ba le lešokeng. Ba be ba tseba gore Jehofa o gona, eupša ba ile ba thoma go nagana gore a ka se sa ba hlokomela. (Ek. 17:​2, 7) Se se ile sa dira gore ba fetoge marabele. Ruri ga re nyake go swana le bona.—Baheb. 3:12. w24.06 24 ¶14-15

Ka ge re phela mehleng ya bofelo re ka letela gore re lle gantšhi ka baka la mathata ao re tlogo kopana le ona. Jehofa o a re kwa ge re lla ebile o nyaka go re thuša. O kwa bohloko kudu ge a bona re lla. Ka gona ge re kopana le mathata, re swanetše go rapela re ntšhetše Jehofa sa mafahleng. Ka mehla a re direng sohle seo re ka se kgonago gore re dule re na le bana babo rena le dikgaetšedi. Eka re ka homotšwa ke mantšu ao re a hwetšago ka lentšung la Modimo. Re ka kgodišega gore ge e ba re ka dula re kgotleletše Jehofa o tlo re putsa. Mafelelong Jehofa o tlo tloša mathata ka moka ao a dirago gore re lle. (Kut. 21:4) Ke moka ge re tla be re ntšha megokgo e tla be e le ya lethabo feela. w24.12 20 ¶3; 25 ¶19

Jehofa o re kgethile gore re be dihlatse tša gagwe e bile o re tshepiša gore o tlo re thuša gore re be le sebete. (Jes. 43:​10, 11) A re boneng ditsela tše nne tšeo a re thušago ka tšona. Tsela ya mathomo ke gore nako le nako ge re bolela ditaba tše dibotse, Jesu o na le rena. (Mat. 28:​18-20) Ya bobedi, Jehofa o šomiša barongwa go re thuša. (Kut. 14:6) Ya boraro, Jehofa o diriša moya wa gagwe o mokgethwa go re thuša go gopola dilo tšeo re ithutilego tšona. (Joh. 14:​25, 26) Ya bone, Jehofa o re neile bana babo rena le dikgaetšedi gore re šome le bona. Ka ge Jehofa le bana babo rena le dikgaetšedi ba re thekga, re na le sohle seo re se hlokago gore re be le sebete gomme re tšwele pele re bolela ditaba tše dibotse. Eupša ge o nyamišwa ke go se hwetše batho ka magaeng a bona. Ipotšiše gore: ‘Batho ba mo tšhemong ya gešo ba kae gona bjale?’ (Dit. 16:13) ‘Na ba mošomong goba ba mabenkeleng?’ Ge e ba go le bjalo, na o ka hwetša batho ba bantšhi ge o ka bolela ditaba tše dibotse mošomong wa seterateng? w24.04 17 ¶10-11

Ge e ba o le hlogo ya lapa gomme o nyaka go ba mogolo, tsela yeo lapa la gago le tumilego ka yona e ka dira gore o swanelege goba o se ke wa swanelega. Ka gona, o swanetše gore o “okamele lapa la [gago] ka mokgwa o mobotse.” O swanetše go tsebega o le hlogo ya lapa yeo e nago le lerato le maikarabelo. O swara borapedi bja lapa, o netefatša gore lapa la gago le ba gona dibokeng ka mehla e bile le ya tšhemong. Ge e ba o le tate, o swanetše go ba o na le “bana bao ba ikokobetšago, bao ba sa tšeego dilo gabohwefo le gatee.” (1 Tim. 3:4) O swanetše go ba ruta le go ba tlwaetša ka lerato. Re a tseba gore bana ka moka ba swanetše go thaba le go fela ba e ba le nako ya go bapala. Eupša ge o ka ba tlwaetša, ba tlo kwa, ba hlompha le go itshwara gabotse. O swanetše go dira sohle seo o ka se kgonago go thuša bana ba gago gore ba gwerane le Jehofa, ba phele ka melao ya motheo ya Beibele le gore ba feleletše ba kolobeditšwe. w24.11 22 ¶10-11

Ge re ka fetša nako e ntšhi re hlankela Jehofa, re tlo kgona go bona gore o a re thekga gomme seo sa dira gore re mo tshepe le go feta. (1 Bakor. 3:9) Jehofa ga a re bapetše le batho ba bangwe, o bona seo se lego ka pelong. O a thaba ge a bona gore o dira sohle seo o ka se kgonago go leboga mpho ya topollo. (1 Sam. 16:7; Mar. 12:​41-44) Topollo ke yona e dirilego gore Jehofa a kgone go re lebalela dibe tša rena, gore re be le segwera se se botse le yena le gore re tle re phele go ya ile. Anke re dule re leboga Jehofa ka lerato leo a re bontšhitšego lona le ka dilo tše dibotse tšeo a re šegofatšago ka tšona. (1 Joh. 4:19) Le gona, a re duleng re leboga lerato leo Jesu a re bontšhitšego lona ka go re hwela. w25.01 31 ¶16-18

Nagana kamoo mongwadi wa Psalme 73 a bego a ikwa ka gona. O be a bona eka batho ba bangwe ba ipshina ka bophelo e bile dilo di ba sepelela gabotse. (Ps. 73:​3-5, 12) Seo se dirile gore a bone okare o sentše nako ka go hlankela Jehofa. O be a “tlaišega letšatši ka moka” ka baka la dilo tšeo a bego a di nagana. (Ps. 73:​13, 14) O ile a thušwa ke’ng? Mopsalme o ile a ya sekgethweng sa Jehofa moo go bego go na le khutšo. (Psalme 73:​16-18) Ge a be a le moo o be a kgona go nagana gabotse. O ile a kwešiša gore le ge ba bangwe ba bonagala ba ipshina ka bophelo, ba be ba se na kholofelo ya go phela ka mo go sa felego. Ka baka la seo, o ile a ba le khutšo ya monagano gomme a bona le gore go hlankela Jehofa ke phetho e kaone kudu go di phala ka moka. Seo se mo thušitše gore a ikemišetše go dula a hlankela Jehofa.—Ps. 73:​23-28. w24.10 27 ¶11-12

Jehofa o re kgethile gore re be “dihlatse” tša gagwe. (Jes. 43:​10-12) Mengwaga e sego kae e fetilego Sehlopha se Bušago se ile sa re ngwalela lengwalo sa re: “Tokelo e kgolo kudu yeo yo mongwe le yo mongwe wa rena a nago le yona, ke ya go bitšwa yo mongwe wa Dihlatse tša Jehofa.” Ke ka baka la’ng re re’alo? Nagana ka mohlala wo. Ge e ba o le kgorong ya tsheko o pharilwe ka molato wo o sa o tsebego, o tlo nyaka motho wa mohuta mang gore a go emelele? O tlo nyaka motho yo o mo tsebago gabotse le go mo tshepa. Le rena Jehofa o re kgethile gore re be Dihlatse tša gagwe ka gobane a re tseba gabotse le go re tshepa. O a tseba gore re tlo kgona go hlatsela gore ke yena Modimo a nnoši wa therešo. Re tšeela godimo kudu tokelo ya go ba Dihlatse tša Jehofa, ke ka baka leo re dirišago sebaka se sengwe le se sengwe go tsebatša leina la gagwe. E bile re šoma ka thata gore re hlatswe leina la Modimo. Re phelela seo leina la rena le se bolelago e lego go hlatsela Jehofa!—Baroma 10:​13-15. w24.05 18 ¶13

Jesu o be a thabišwa ke go hlankela batho ba bangwe. Ka nako e nngwe ga se a no ruta lešaba feela, eupša o ile a le thuša le ka dilo tše dingwe. O ile a direla batho bao dijo ka mohlolo gomme a kgopela barutiwa ba gagwe gore ba ba fe tšona. (Mar. 6:41) O rutile barutiwa ba gagwe gore ba hlankele batho ba bangwe. O bontšhitše gore mešomo ya go swana le ye e bohlokwa kudu. Barutiwa ba Jesu ba ile ba thaba kudu ge ba be ba mo thuša go nea lešaba dijo gomme ba bona “bohle ba [eja] ba khora.” (Mar. 6:42) Mohlala wo o re bontšha gore Jesu o be a tšea batho ba bangwe ba le bohlokwa kudu. Ge a be a le mo lefaseng o be a phelela batho ba bangwe. (Mat. 4:23) Jesu o be a thabišwa ke go ruta ba bangwe le go ba thuša ka dilo tšeo ba di hlokago. w24.11 16 ¶10-11

Ge lefase le le dutše le senyega le go feta, re tlo swanelwa ke go thuša bana babo rena le dikgaetšedi. Re ka kgona go homotša bana babo rena le go ba kgothatša ka dilo tša moya. Tsela e nngwe yeo re ka dirago seo ka yona ke ka go dira gore ba ikwe ba le gae ga mahlaku ge ba tlile dibokeng Holong ya Mmušo le go dira gore ka phuthegong go be le botee. Re nyaka gore ge bana babo rena ba etla dibokeng ba ikwe ba ratwa, ba lapologa le go ikwa ba bolokegile. Bagolo ba ka thuša bana babo bona bao ba nago le mathata goba bao ba wetšwego ke dikotsi. Nakong ya dikotsi goba ge motho a na le mathata a tša maphelo, bagolo ba ka kgona go mo thuša e bile ba mo kgothatša le ka dilo tša moya. Bana babo rena ba ka kgona go batamela mogolo ge ba bona gore o na le botho, o na le kwelobohloko e bile o ikemišeditše go ba theetša. Dika tšeo di dira gore ba bangwe ba ikwe ba ratwa gomme seo se dira gore ba amogele keletšo e theilwego Beibeleng yeo mogolo a ba neago yona.—1 Bathes. 2:​7, 8, 11. w24.06 29 ¶12-13

Ga se ra swanela go nagana gore Jehofa ga a na maikwelo ka ge e le Modimo ramatlaohle. Re bopilwe ka seswantšho sa Modimo ebile re na le maikwelo, ka gona go a kwagala go dumela gore Jehofa o na le maikwelo. Beibele e re botša gore o be a kwele “bohloko.” (Ps. 78:​40, 41) Jehofa a ka ba a ile a kwa bohloko ge a be a lebeletše Morwa wa gagwe a tlaišwa pele a ehwa. Topollo e re ruta gore ga go na motho le o tee yo a ka re ratago kamoo Jehofa a re ratago ka gona. (Baroma 8:​32, 38, 39) Ga go pelaelo gore Jehofa o re rata kudu go feta kamoo re ithatago ka gona. Na o nyaka go phela ka mo go sa felego? Jehofa o nyaka seo le go feta. Na o nyaka gore dibe tša gago di lebalelwe? Jehofa o nyaka go go lebalela le go feta. O no nyaka re bontšha gore re leboga mpho ye a re neilego yona ka go ba le tumelo le go kwa. Topollo ke tsela e kaone kudu ya go bontšha gore Modimo o a re rata.—Mmo. 3:11. w25.01 22-23 ¶8-9

Re kgona go dira diphetho re ithekgile ka dilo tšeo re di bonago, dilo tšeo re di kwago le tsela yeo re ikwago ka yona. Ka dinako tše dingwe dilo tšeo re di bonago goba re di kwago di ka re diriša diphošo. Go dira diphetho ka baka la dilo tšeo re di bonago goba re di kwago, go ka re tsenya mathateng. Ge eba re sepela feela ka go bona, re ka feleletša re dirile dilo tšeo Jehofa a sa nyakego re di dira. (Mmo. 11:9; Mat. 24:​37-39) Diphetho tšeo re di dirago di tlo “amogelega go Morena” ge eba re sepela ka tumelo. Go kwa keletšo yeo Modimo a re neago yona go tlo dira gore re dule re thabile. (Ps. 16:​8, 9; Jes. 48:​17, 18) Le gona ge eba re dula re sepela ka tumelo, re tlo phela ka mo go sa felego. (2 Bakor. 4:18) Ke’ng seo se ka re thušago go tseba ge eba re sepela ka tumelo goba ka go bona? Re ka ipotšiša dipotšišo tše di latelago: Re thušwa ke eng ge re dira diphetho? Na re dira diphetho feela ka baka la dilo tšeo re di bonago? Goba na ge re dira diphetho re tshepa keletšo yeo Jehofa a re neago yona? w25.03 20-21 ¶3-4

Yo mongwe le yo mongwe wa rena o na le karolo e bohlokwa yeo a swanetšego go e phetha ya go dira gore batho ba kgahlwe ke paradeise ya moya. Re ka kgona go dira se ge re ka ekiša Jehofa. Ga a gapeletše batho gore ba tle ka mokgatlong wa gagwe. Go e na le moo o ba ‘gogela’ go yena ka boleta. (Joh. 6:44; Jer. 31:3) Batho ba dipelo tše dibotse bao ba ithutago ka dika tša Jehofa le semelo sa gagwe se se kgahlišago ba gogelega go yena. Rena re ka gogela batho bjang paradeiseng ya moya ka dika tša rena le boitshwaro bja rena bjo bobotse? Re swanetše go swara bana babo rena le dikgaetšedi ka botho. Ge batho bao ba nago le kgahlego ba thoma go tla dibokeng tša rena, re nyaka gore ba ikwe go swana le batho bao e bego e se Bakriste bao go ka diregago gore ba ile ba ya dibokeng tša kua Korinthe ya kgale. Ba ile ba re: “Ruri Modimo o gare ga lena.” (1 Bakor. 14:​24, 25; Sak. 8:23) Ka gona re swanetše go tšwela pele re ekwa keletšo yeo e lego temaneng ya lehono. w24.04 23-24 ¶16-17