Ebangedi ya Johane 13:1-38
13 Jesu o tsebile pele ga monyanya wa Paseka gore nako ya gagwe ya gore a tloge lefaseng a ye go Tate+ e be e fihlile.+ Ka gona ka ge a be a rata barutiwa ba gagwe, o ile a tšwela pele a ba rata go fihlela a hlokofala.+
2 Ge ba dutše ba eja dijo tša mantšiboa, Diabolo o be a šetše a tsentše kgopolo e mpe monaganong wa Judase Isikariote,+ morwa wa Simone. Kgopolo yeo e be e le ya gore a rekiše Jesu.+
3 Jesu o be a tseba gore Tate o be a mo file dilo ka moka le gore o be a romilwe ke Modimo. Le gona o be a tseba gore o be a le kgauswi le go boela go Modimo.+
4 Ka gona, o ile a tloga tafoleng ke moka a apola seaparo sa gagwe sa ka ntle gomme a tšea toulo a itata ka yona mathekeng.+
5 Ka morago a tšea sekotlelo a tšhela meetse ke moka a thoma go hlapiša barutiwa ba gagwe maoto le go a phumola ka toulo yeo a bego a itatile ka yona.
6 Ke moka a fihla go Simone Petro. Simone Petro a re go yena: “Morena, o nyaka go ntlhapiša maoto?”
7 Jesu a re go yena: “Selo seo ke se dirago o ka se se kwešiše gona bjale, eupša o tla se kwešiša ka morago.”
8 Petro a re go yena: “Morena o ka se hlapiše nna maoto.” Jesu a re go yena: “Ge e ba nka se go hlapiše,+ gona o ka se be morutiwa wa ka.”
9 Simone Petro a re go yena: “Morena, gona o se ntlhapiše maoto feela, ntlhapiše le diatla le hlogo.”
10 Jesu a re go yena: “Yo a hlapilego o swanetše go hlapa maoto feela ka gobane mmele wa gagwe ka moka o hlwekile. Lena le hlwekile, eupša e sego ka moka ga lena.”
11 Jesu o be a tseba motho yo a bego a tla mo rekiša.+ Ke ka baka leo a itšego: “Lena le hlwekile, eupša e sego ka moka ga lena.”
12 Bjale, ka morago ga ge a ba hlapišitše maoto, o ile a apara seaparo sa gagwe sa ka ntle, a boela a dula le bona tafoleng, ke moka a re go bona: “Na le a tseba gore ke ka baka la eng ke le hlapišitše maoto?
13 Le mpitša ‘Morutiši,’ le ‘Morena,’ gomme le nepile ka gobane ke nna yena.+
14 Ka gona ge e ba nna ke le Morena le Morutiši eupša ke le hlapišitše maoto,+ gona le lena le swanetše go hlapišana maoto,+
15 ka gobane ke le beetše mohlala wa gore le dire seo le bonego ke se dira.+
16 Ruri ke le botša gore mohlanka ga a fete mong wa gagwe, ebile yo a romilwego ga a fete yo a mo romilego.
17 Ga bjale le tseba dilo tše, eupša le tlo thaba ge e ba le di dira.+
18 Dilo tšeo ke di bolelago ga ke di botše lena ka moka. Ke tseba bao ke ba kgethilego. Eupša seo lengwalo le se boletšego ge le be le re:+ ‘Motho yoo ke bego ke eja le yena o mphetogetše’*+ se swanetše go phethagala.
19 Go tloga nakong ye go ya pele, ke le botša dilo tšeo di tlago go direga pele di direga e le gore ge le bona di ntiragalela le tsebe gore lengwalo le le bolela ka nna.+
20 Ruri ke le botša gore yo a amogelago motho yo ke mo romilego, o amogela le nna.+ Yo a nkamogelago o amogela le yo a nthomilego.”+
21 Ka morago ga ge Jesu a boletše dilo tše, o ile a nyama kudu ke moka a re: “Ruri ke le botša gore yo mongwe wa lena o tlo dira gore manaba a ka a ntshware.”+
22 Barutiwa ba ile ba thoma go lebelelana, ba gakantšhitšwe ke gore o be a bolela ka mang.+
23 Yo mongwe wa barutiwa ba Jesu yoo Jesu a bego a mo rata kudu+ o be a dutše kgauswi le Jesu* tafoleng.
24 Ka gona Simone Petro a šupa morutiwa yoo ka hlogo gomme a mmotšiša a re: “Jesu o bolela ka mang?”
25 Ke moka morutiwa yoo a ithekga ka sehuba sa Jesu gomme a re go yena: “Morena, o bolela ka mang?”+
26 Jesu a re: “Ke yoo ke tlago go mo nea senkgwa se ke tlago go se ina ka sebjaneng.”+ Ka gona ka morago ga gore a ine senkgwa seo, o ile a se fa Judase, morwa wa Simone Isikariote.
27 Ka morago ga ge Judase a tšere senkgwa seo, Sathane o ile a mo hlohleletša.+ Ka gona Jesu a re go yena: “Seo o nyakago go se dira, se dire kapelapela.”
28 Le ge go le bjalo, ga go le o tee wa barutiwa bao ba bego ba dutše le yena tafoleng yo a ilego a tseba gore ke ka baka la eng Jesu a boletše le Judase ka tsela yeo.
29 Ge e le gabotse, ba bangwe ba be ba nagana gore ka ge Judase a be a swara lepokisi la tšhelete,+ Jesu o be a mmotša gore a reke dilo tšeo di nyakegago bakeng sa monyanya goba gore o be a swanetše go fa badiidi tšhelete.
30 Ka morago ga ge Judase a tšere senkgwa seo, o ile a tšwela ka ntle kapelapela. E be e šetše e le bošego.+
31 Ge a tšwetše ka ntle, Jesu o ile a re: “Bjale ba hlompha Morwa wa motho+ ebile ba hlompha Modimo ka baka la gagwe.
32 Le gona Modimo ka noši o tla mo tagafatša+ ebile o tla mo tagafatša kapelapela.
33 Lena bagwera* ba ka, ke na le lena ka nakonyana feela. Le tlo nnyaka ebile go swana le ge ke boditše Bajuda, le lena ke a le botša ke re: ‘Moo ke yago gona le ka se kgone go tla.’+
34 Ke le nea molao o moswa wa gore le ratane. Le ratane+ go swana le nna ge ke le ratile.+
35 Batho ka moka ba tla tseba gore le barutiwa ba ka ge e ba le ratana.”+
36 Simone Petro a re go yena: “Morena, o ya kae?” Jesu a araba a re: “Moo ke yago gona o ka se kgone go ntatela gona bjale, eupša o tla ntatela ka morago.”+
37 Petro a re: “Morena, ke ka baka la eng nka se kgone go go latela gona bjale? Ke ikemišeditše go go hwela.”+
38 Jesu a re: “Na ruri o ikemišeditše go nkhwela? Ruri ke go botša gore mokoko o ka se lle go fihlela o ntatotše gararo.”+
