“O se ke wa tlogela go bolela ka puku ye ya Molao, ebile o e bale o be o naganišiše ka yona bošego le mosegare e le gore o latele dilo ka moka tšeo di ngwadilwego go yona. Ke moo o tlago go atlega gomme wa dira dilo ka bohlale.”

Joshua 1:8

“Ba ile ba tšwela pele ba bala puku ya Molao wa Modimo wa nnete ka go hlaboša, ba e hlalosa ka tsela e kwagalago, e le gore ba thuše batho go e kwešiša.”

Nehemia 8:8

“Go thaba motho yo a sa latelego keletšo ya batho ba babe . . . , eupša a rata molao wa Jehofa kudu, gomme a bala molao woo le go naganišiša ka wona bošego le mosegare. . . . Dilo ka moka tšeo a di dirago di tla atlega.”

Psalme 1:1-3

“Filipi a kitima kgauswi le kariki yeo, a kwa monna yoo a balela godimo puku ya moporofeta Jesaya gomme a re go yena: ‘Na dilo tše o di balago o a di kwešiša?’ Yena a re: ‘Ke tla kwešiša bjang ka ntle le gore motho yo mongwe a ntlhalosetše?’”

Ditiro 8:30, 31

 “Dika tša gagwe tšeo di sa bonagalego di bonwa gabotse dilong tšeo a di hlodilego. Batho ba ka kgona go di lemoga gabotse ge ba ka ipha nako ya go ithuta dilong tšeo a di hlodilego. Di bontšha gabotse maatla a gagwe ao a sa felego le gore ke yena Modimo. Ke ka baka leo go se nago lebaka la gore batho ba se dumele go Modimo.”

Baroma 1:20

“Naganišiša ka dilo tše, o ineele go tšona, e le gore batho ka moka ba tle ba bone gabotse gore o Mokriste yo a butšwitšego.”

1 Timotheo 4:15

“A re hlokomelaneng e le gore re hlohleletšane go ba le lerato le go dira dilo tše dibotse, re se tlogele go bokana mmogo.”

Baheberu 10:24, 25

“Motho le ge e le ofe yo a nyakago bohlale, a a dule a bo kgopela go Modimo, gomme yena o tla mo nea bjona, ka gobane o bo nea bohle ka pelo ka moka ka ntle le go nyaka diphošo.”

Jakobo 1:5