Ditiro tša Baapostola 8:1-40
8 Saulo o be a dumelelana le taba ya gore Stefano a bolawe.+
Go tloga ka letšatši leo, phuthego yeo e bego e le Jerusalema e ile ya tlaišwa kudu. Batho ka moka ba ile ba phatlalala ba ya ditikologong tša Judea le Samaria gomme gwa šala baapostola feela.+
2 Eupša banna ba bangwe bao ba bego ba boifa Modimo ba ile ba tšea Stefano ba ya ba mmoloka, gomme ba mo llela.
3 Saulo yena o ile a tlaiša phuthego. O be a tsena ka ntlo le ntlo, a goga banna le basadi a ba iša kgolegong.+
4 Barutiwa bao ba bego ba phatlaletše ba be ba tšama ba bolela ditaba tše dibotse tša lentšu la Modimo metseng e mengwe.+
5 Bjale Filipi a theogela motseng wa Samaria,+ gomme a thoma go ba botša ka Kriste.
6 Batho ba bantši ba be ba theeditše ka ditsebe tše pedi ge Filipi a bolela, ebile ba lebeletše dilo tše di makatšago tšeo a bego a di dira.
7 Le gona ba bantši ba bona ba be ba na le matemona. Matemona ao a be a ba goeletša ke moka a tšwa bathong bao.+ Ebile batho ba bantši bao ba bego ba golofetše le bao ba bego ba hlotša ba ile ba fodišwa.
8 Ka gona, batho ba motseng woo ba ile ba thaba kudu.
9 Bjale motseng woo go be go na le monna yo a bego a bitšwa Simone, yoo pele ga moo a bego a makatša setšhaba sa Samaria ka go dira maselamose, ebile a ipolela gore o na le maatla.
10 Batho ka moka go tloga ka ba maemo a fase go fihla ka ba maemo a godimo, bao ba bego ba mo theeditše ba re: “Monna yo o na le maatla ao a tšwago go Modimo.”
11 Bjale ba be ba tloga ba mo theetša ka gobane o ile a ba makatša ka nako e telele ka go dira maselamose.
12 Eupša ka morago ga gore Filipi a tle gomme a ba botše ditaba tše dibotse tša Mmušo wa Modimo+ le tša leina la Jesu Kriste, banna le basadi ba ile ba kolobetšwa.+
13 Simone le yena o ile a ba modumedi, gomme ka morago ga gore a kolobetšwe o ile a dula a na le Filipi.+ O ile a makatšwa ke go bona mehlolo le dilo tše di makatšago tšeo Filipi a bego a di dira.
14 Ge baapostola kua Jerusalema ba ekwa gore batho ba Samaria ba amogetše lentšu la Modimo,+ ba ile ba roma Petro le Johane go bona,
15 ke moka bona ba theogela go bona kua Samaria ba ba rapelela gore ba hwetše moya o mokgethwa.+
16 Ka gobane mo go bona go be go se na yo a hweditšego moya o mokgethwa, eupša ba be ba kolobeditšwe feela ka leina la Morena Jesu.+
17 Ke moka Petro le Johane ba ba bea diatla+ gomme ba hwetša moya o mokgethwa.
18 Bjale ge Simone a bona gore batho ba be ba hwetša moya o mokgethwa ka morago ga gore baapostola ba ba bee diatla, a tshepiša go fa baapostola tšhelete,
19 a re: “Le nna mpheng maatla a, e le gore motho yo mongwe le yo mongwe yo ke mmeago diatla, le yena a hwetše moya o mokgethwa.”
20 Eupša Petro a re go yena: “Okare tšhelete ya gago e ka fedišwa le wena, ka gobane o nagana gore o ka reka mpho ya mahala ya Modimo.+
21 Ga o tsene felo tabeng ye ka gobane ga o tshepege pele ga Modimo.
22 Ka gona itshole sebeng sa gago gomme o kgopele Jehofa* gore ge e ba go kgonega a go lebalele selo se sebe seo o nagannego go se dira,
23 ka gobane ke a bona gore o swana le mpholo wo o galakago ebile o lekgoba la go dira dilo tše di sa lokago.”
24 Simone a ba araba a re: “Nkgopeleleng go Jehofa gore ke se ke ka diragalelwa ke selo le setee sa dilo tšeo le di boletšego.”
25 Ka gona ge ba neile bohlatse ka mo go feletšego gomme ba boletše lentšu la Jehofa, ba ile ba boela morago Jerusalema, ke moka ba tšama ba bolela ditaba tše dibotse metsaneng e mentši ya Basamaria.+
26 Eupša morongwa wa Jehofa+ o ile a bolela le Filipi, a re: “Ema o ye ka thoko ya borwa tseleng yeo e theogago e etšwa Jerusalema e eya Gatsa.” (Ye ke tsela ya leganata.)
27 Ke moka a ema a sepela gomme gwa tla ntona* ya Moethopia, e lego monna yo a bego a na le maemo a godimo ebile a thuša Kandase kgošigadi ya Baethopia. Monna yo o be a hlokometše dilo ka moka tše bohlokwa tša kgošigadi yeo. Bjale monna yo o be a ile go rapela Jerusalema,+
28 gomme o be a boela morago a dutše kariking ya gagwe a balela godimo puku ya moporofeta Jesaya.
29 Ka gona, moya o mokgethwa wa re go Filipi: “Batamela kariki ye.”
30 Filipi a kitima kgauswi le kariki yeo, a kwa monna yoo a balela godimo puku ya moporofeta Jesaya gomme a re go yena: “Na dilo tše o di balago o a di kwešiša?”
31 Yena a re: “Ke tla kwešiša bjang ka ntle le gore motho yo mongwe a ntlhalosetše?” Ke moka a kgopela Filipi gore a namele ka kariking a dule le yena fase.
32 Bjale o be a bala lengwalo leo le rego: “O ile a tlišwa go swana le nku yeo e tlogo hlabja, le go swana le kwana yeo e ikhomoletšego pele ga motho yo a e kotago. Le gona, ga a bolele le ge e ka ba lentšu letee.+
33 Ge a be a tlontlollwa, o ile a se ahlolwe ka go hloka toka.+ Ke mang yo a ka itshwenyago ka ditaba tša mabapi le moloko wa gagwe? Ka gobane bophelo bja gagwe bja mo lefaseng bo ile bja tlošwa.”+
34 Ntona yeo ya re go Filipi: “Ke kgopela o mpotše gore moporofeta mo o bolela ka mang? Na o bolela ka yena goba o bolela ka motho yo mongwe?”
35 Filipi o ile a mo araba gomme a thoma ka go mo hlalosetša lengwalo leo a bego a le bala, a ba a mmotša ditaba tše dibotse ka Jesu.
36 Bjale ge ba dutše ba le tseleng, ba ile ba fihla mo go nago le meetse gomme ntona yeo ya re: “Bona! Meetse šea, ke eng seo se nthibelago go kolobetšwa?”
37 * ——
38 Ntona yeo e ile ya laela gore kariki e emišwe gomme yena le Filipi ba tsena ka meetseng, ke moka Filipi a mo kolobetša.
39 Ge ba etšwa ka meetseng, kapejana moya wa Jehofa o ile wa tloša Filipi moo gomme ntona yeo ya se sa hlwa e mmona, eupša e ile ya sepela e thabile.
40 Filipi yena o ile a ikhwetša a le Ashidodo gomme a tšama a sepela tikologo yeo ka moka a bolela ditaba tše dibotse metseng ka moka go fihlela a fihla Kesarea.+
Mengwalo ya Tlase
^ Phetolelo ya lentšu ka lentšu e re, “gwa tla molaki.” Bona Tlhaloso ya Mantšu go “Moopafatšwa.”
