Ditiro tša Baapostola 2:1-47
2 Ka letšatši la Monyanya wa Pentekoste+ barutiwa ka moka ba be ba bokane lefelong letee.
2 Ge ba sa dutše moo, go ile gwa kwagala modumo o mogolo wo o tšwago legodimong wo o bego o le bjalo ka ledimo le maatla, gomme wa tlala ntlo ka moka yeo ba bego ba dutše ka go yona.+
3 Ke moka ba bona dikgabo tša mollo tšeo di bego di bonagala bjalo ka ge eka ke maleme. Kgabo e nngwe le e nngwe e ile ya dula godimo ga motho yo mongwe le yo mongwe yo a bego a le moo.
4 Ka moka ga bona ba tlala moya o mokgethwa+ ba thoma go bolela ka maleme a fapafapanego, gomme yo mongwe le yo mongwe a bolela leleme leo moya o bego o mo thuša gore a le bolele.+
5 Ka nako yeo Bajuda ba ba hlomphago Modimo bao ba tšwago ditšhabeng ka moka lefaseng ba be ba dula Jerusalema.+
6 Ka gona ge batho ba ekwa modumo woo, ba ile ba bokana gomme ba makala ge ba ekwa barutiwa ba bolela maleme a gabo bona.
7 Ba ile ba šala ba ahlame ba ipotšiša gore: “Na batho ba ka moka ba bolelago ga se Bagalelia?+
8 Bjale go tla bjang gore ba kgone go bolela maleme a gabo rena?
9 Batho bao re nago le bona mo ke Bapareta, Bamede,+ Baelama,+ badudi ba Mesopotamia, ba Judea, ba Kapadokia, ba Ponto, ba profenseng ya Asia,+
10 ba Firigia, ba Pamfilia, ba Egepeta, ba ditikologong tša Libia yeo e lego kgauswi le Kirene, batho bao ba dulago moo ka nakwana ba etšwa Roma, Bajuda gotee le batho bao ba sokologetšego tumelong ya Sejuda,+
11 Bakereta le Baarabia. Eupša re kwa batho ba ka moka ba bolela ka dilo tše di makatšago tšeo Modimo a di dirilego ba šomiša maleme a gabo rena.”
12 Ka moka ga bona ba be ba maketše ebile ba gakanegile, ba botšišana ba re: “Gabotsebotse go diregang?”
13 Ba bangwe bona ba be ba ba kwera ba re: “Batho ba ba tagilwe.”
14 Eupša Petro o ile a ema le baapostola ba 11+ a bolelela godimo a re: “Banna ba Judea le lena badudi ka moka ba Jerusalema, mpheng tsebe gomme le ntheetšeng gabotse.
15 Batho ba ga se ba tagwa, ka gobane e sa le mesong kudu.*
16 Eupša ba phethagatša mantšu a moporofeta Joele ao a rego:
17 Modimo o re: ‘“Mehleng ya bofelo ke tla nea yo mongwe le yo mongwe wa lena moya wa ka, gomme barwa ba lena le barwedi ba lena ba tla porofeta, masogana a lena a bona dipono ke moka banna ba lena ba bagolo bona ba tla lora ditoro.+
18 Le gona mehleng yeo ke tla nea bahlanka ba ka ba banna le ba basadi moya wa ka, gomme le bona ba tla porofeta.+
19 Le gona ke tla dira dilo tše di makatšago legodimong le lefaseng. Go tla ba le madi, mollo le muši o montši.
20 Pele go etla letšatši le legolo le leo le boifišago la Jehofa,* letšatši le tla swifala gomme ngwedi ya ba o mokhwibidu bjalo ka madi.
21 Ke moka yo mongwe le yo mongwe yo a bitšago leina la Jehofa o tla phološwa.”’+
22 “Banna ba Isiraele, theetšang! Ka moka ga lena le tseba gore Jesu wa Monatsaretha o be a romilwe ke Modimo, le gore o ile a dira mehlolo le dilo tše di makatšago mo gare ga lena+ a thušwa ke Modimo.
23 Monna yo, ke yena yo le ilego la mo swara la ba la mo neela go batho bao ba hlokago molao gore ba mo kokotele koteng le go mmolaya. Modimo o ile a dumelela gore se se direge ka tsela yeo.+ Ka gona o be a tseba gore se se be se tla diragalela Jesu.+
24 Eupša Modimo o ile a mo lokolla lehung ka go mo tsoša bahung,*+ ka gobane go be go sa kgonege gore lehu le dule le mo kakatletše.+
25 Dafida o bolela mabapi le Kriste gore: ‘Ke dula ke nagana ka Jehofa ka gobane o ka letsogong la ka le letona e le gore ke se ke ka boifa selo.
26 Ka baka leo pelo ya ka e ile ya thaba gomme ka bolela ke thabile kudu. Ebile ke tla dula ke tshepile wena Modimo,
27 ka gobane o ka se ntlogele ka Lebitleng,* le gona o ka se dumelele mohlanka wa gago yo a botegago a bola.+
28 O ntsebišitše ditsela tšeo di išago bophelong. Go ba kgauswi le wena go tla dira gore ke thabe kudu.’+
29 “Banabešo, ke kgopela le ntumelele ke bolele le lena ke lokologile mabapi le rakgolokhukhu wa rena Dafida, gore o ile a hlokofala a ba a bolokwa+ gomme lebitla la gagwe le sa le gona go fihlela le lehono le.
30 Ka ge e be e le moporofeta ebile a be a tseba le gore Modimo o ile a bolela le yena a mo enela gore yo mongwe wa ditlogolo tša gagwe o tla dula setulong sa gagwe sa bogoši,+
31 o ile a tseba e sa le pele gore Kriste o be a tla tsošwa bahung, gomme a bolela gore ga se a ka a tlogelwa ka Lebitleng* le gore mmele wa gagwe ga se wa ka wa bola.+
32 Modimo o ile a tsoša Jesu bahung, gomme ka moka ga rena re dihlatse tša taba yeo.+
33 Ka gona, ka baka la ge Jesu a ile a rotogela legodimong, a dula ka letsogong le letona la Modimo+ gomme a hwetša moya o mokgethwa woo tatagwe a bego a mo tshepišitše wona,+ le rena o re file moya woo bjalo ka ge le bona ebile le ekwa.
34 Dafida ga se a rotogela magodimong, eupša o itše: ‘Jehofa o boditše Morena wa ka a re: “Dula ka letsogong la ka le letona
35 go fihla ke dira gore o gatakele manaba a gago.”’*+
36 Ka gona anke Baisiraele ka moka ba tsebe gore ka nnete Jesu yo le mo kokotetšego koteng,+ Modimo o mo dirile Morena+ le Kriste.”
37 Ge ba ekwa ditaba tše, dipelo tša bona di ile tša kwa bohloko kudu, gomme ba re go Petro le baapostola ka moka: “Banabešo, re swanetše go dirang?”
38 Petro a re go bona: “Itsholeng+ gomme le kolobetšwe+ leineng la Jesu Kriste e le gore le lebalelwe dibe tša lena,+ ke moka le tla hwetša moya o mokgethwa wo Modimo a tlago go le fa wona ntle le tefo.
39 Jehofa Modimo wa rena o dirile tshepišo+ ye go lena le go bana ba lena le go batho ka moka bao ba dulago kgole, e lego batho ka moka bao a ba biletšago go yena.”+
40 Petro o ile a tšwela pele a bolela ebile a efa bohlatse ka mo go feletšego a re: “Tlogelang go dira dilo tše mpe go swana le batho ba e le gore le se ke la tla la fedišwa.”+
41 Batho bao ba ilego ba amogela molaetša wa Petro ka pelo ka moka ba ile ba kolobetšwa.+ Letšatšing leo go ile gwa kolobetšwa batho ba e ka bago ba 3 000, gomme ba tlaleletša palo ya barutiwa.+
42 Ba ile ba tšwela pele ba ithuta dithuto tša baapostola, ba abelana dilo,+ ba eja le go rapela mmogo.+
43 Baapostola ba ile ba dira mehlolo e mentši kudu,+ gomme batho ka moka bao ba ilego ba e bona ba ile ba hlompha Modimo.
44 Batho ka moka bao ba ilego ba fetoga barutiwa ba ile ba bokana gomme ba abelana dilo ka moka.
45 Ba ile ba rekiša naga le dilo tšeo ba bego ba na le tšona,+ gomme tšhelete yeo ba e hweditšego ba e abelana go ya ka seo yo mongwe le yo mongwe a bego a se hloka.+
46 Letšatši le lengwe le le lengwe ba be ba kgobokana tempeleng. Ba be ba memana ka malapeng a bona gore ba ipshine ka dijo, ba dira seo ka dipelo ka moka ebile ba thabile kudu.
47 Ba be ba tumiša Modimo ebile batho ka moka ba ba amogela. Letšatši le lengwe le le lengwe Jehofa o ile a tšwela pele a oketša batho bao a bego a tlo ba phološa.+
Mengwalo ya Tlase
^ Phetolelo ya lentšu ka lentšu e re, “e sa le iri ya boraro ya letšatši.” Mo e ka bago iri ya senyane mesong.
^ Phetolelo ya lentšu ka lentšu e re, “o ile a mo lokolla mahlokong a lehu ka go mo tsoša bahung.”
^ Bona Tlhaloso ya Mantšu.
^ Goba, “Hadese.” Bona Tlhaloso ya Mantšu go “Lebitla.”
^ Phetolelo ya lentšu ka lentšu e re, “go fihla ke dira gore manaba a gago e be bogato bja dinao tša gago.”
