Ditiro tša Baapostola 21:1-40
21 Ka morago ga gore re laelane le bona re ile ra ya Kosi ka sekepe, letšatšing le le latelago ra ya Rode ke moka ra fetela Patara.
2 Ge re hwetša sekepe seo se yago Fenikia, re ile ra sepela ka sona.
3 Re ile ra bona sehlakahlaka sa Tsipero ka go le letshadi, ra fetela Siria ke moka ra ema Tiro sekepe sa fološa dithoto.
4 Ge re le moo Tiro re ile ra nyaka barutiwa go fihlela re ba hwetša gomme ra dula le bona matšatši a šupago. Eupša ba dulela go botša Paulo gore a se ke a ya Jerusalema ka gobane moya o mokgethwa o ile wa ba thuša go bona gore Paulo ga se a swanela go ya moo.+
5 Ge nako ya gore re sepele e fihla, barutiwa ka moka ba ile ba re felegetša, go akaretša le basadi le bana, gomme ba re ntšha motseng. Re ile ra khunama kgauswi le lewatle ra rapela,
6 ke moka ra laelana. Ka morago ga moo re ile ra namela sekepe gomme bona ba boela magaeng a bona.
7 Re ile ra tloga Tiro ka sekepe ra ya Tolomai, ra dumediša banababo rena moo gomme ra fetša letšatši letee re na le bona.
8 Letšatšing le le latelago ra ya Kesarea, ra fihlela ntlong ya moebangedi Filipi ra dula le yena. Filipi e be e le yo mongwe wa banna ba šupago+ bao ba ilego ba kgethwa ke baapostola kua Jerusalema.
9 O be a na le barwedi ba bane bao ba sego ba nyalwa, bao ba bego ba porofeta.+
10 Ka morago ga gore re dule moo nako e teletšana go ile gwa tla moporofeta yo mongwe yo a bitšwago Agabuse+ a etšwa Judea.
11 Ge a fihla moo o ile a tšea lepanta la Paulo a ipofa maoto le matsogo ka lona a re: “Moya o mokgethwa o re: ‘Bajuda ba tlo bofa mong wa lepanta le ka yona tsela ye kua Jerusalema,+ ke moka ba mo iša go batho ba ditšhaba.’”+
12 Bjale ge re kwele taba ye, rena le batho bao ba bego ba le moo re ile ra kgopela Paulo gore a se ke a ya Jerusalema.
13 Ke moka Paulo a araba a re: “Le llela eng, goreng le leka go mphetša maatla? Kgodišegang gore ke ikemišeditše go golegwa le go bolawa kua Jerusalema ka baka la leina la Morena Jesu.”+
14 Ge re be re bona gore o nyaka go sepela re ile ra mo tlogela gomme ra re: “Anke go direge seo Jehofa* a nyakago se direga.”
15 Ka morago ga moo, re ile ra itokišeletša go ya Jerusalema.
16 Re ile ra tloga le barutiwa ba bangwe bao ba tšwago Kesarea gomme ba re iša ntlong ya Menasone wa Tsipero yo e bego e le yo mongwe wa barutiwa ba mathomo gomme ra dula le yena.
17 Ge re fihla Jerusalema, banababo rena ba ile ba re amogela ba thabile.
18 Letšatšing le le latelago re ile ra sepela le Paulo ra ya go Jakobo,+ ebile bagolo ka moka ba be ba le moo.
19 O ile a ba dumediša, a ba botša dilo ka moka tšeo Modimo a di dirilego ditšhabeng tše dingwe ge a be a bolela ditaba tše dibotse.
20 Ge ba kwele se ba ile ba reta Modimo, ba re go Paulo: “Ngwanešo, o a tseba gore go na le Bajuda ba diketekete bao e lego barutiwa bao ba latelago Molao wa Moshe.+
21 Eupša ba kwele mabarebare a gore wena o ruta Bajuda ka moka ditšhabeng tše dingwe gore ba tlogele go kwa Molao wa Moshe. Le gona o ba botša gore ba se ke ba bolotša bana ba bona le go dira dilo tšeo batho ba bego ba tlwaetše go di dira.+
22 Re direng ka gore ba tlo kwa gore o mo?
23 Ka baka leo, dira seo re go botšago sona. Re na le banna ba bane bao ba dirilego keno.
24 Sepela le banna ba gomme le itlhwekiše go ya ka Molao, o ba patelele gore ba kotwe dihlogo. Seo se tlo dira gore batho ka moka ba tsebe gore mabarebare ao ba a kwelego ka wena ga se nnete, ebile ba tlo bona gore o itshwere gabotse le gore o latela Molao.+
25 Re ngwaletše banababo rena bao ba tšwago ditšhabeng tše dingwe ka phetho yeo re e dirilego ya gore ba swanetše go ralokela kgole le dilo tšeo di hlabetšwego medingwana ya diswantšho,+ go itshwara gampe ka tša thobalano,+ ba se ke ba ja madi+ ebile ba se ke ba ja diphoofolo tšeo di kgamilwego.”+
26 Letšatšing le le latelago Paulo o ile a sepela le banna bao, ba itlhwekiša go ya ka Molao.+ Ba ile ba tsena ka tempeleng gore ba yo bolela gore matšatši a bona a šupago a go itlhwekiša a tlo fela neng, e le gore moperisita a kgone go direla yo mongwe le yo mongwe sehlabelo letšatšing leo.
27 Ge matšatši ao a le kgauswi le go fela, Bajuda bao ba tšwago Asia ba ile ba mmona ka tempeleng gomme ba hlohleletša lešaba gore le mo galefele. Ba mo swara,
28 ke moka ba goeletša ba re: “Banna ba Isiraele, thušang! Monna yo ke yena a rutago batho ka moka dithuto tšeo di sa sepedišanego le molao wa mo, le Molao wa Moshe. O ba ruta le gore ba hlanogele batho ba gabo rena. Godimo ga moo, o šilafaditše lefelo le le lekgethwa ka go tliša Bagerika go lona.”+
29 Ba boletše se ka ge ba be ba nagana gore Paulo o ile a iša Torofimo+ wa Moefeso tempeleng ka ge ba ile ba ba bona ba le mmogo mo motseng.
30 Go ile gwa tsoga mpherefere mo motseng, batho ba tla ba kitima ba swara Paulo ba mo gogela ka ntle ga tempele. Ke moka mabati a tswalelwa kapelapela.
31 Ge ba be ba leka go mmolaya, molaodi wa mašole o ile a botšwa gore batho ba Jerusalema ka moka ba tsošitše mpherefere.
32 Kapelapela a tšea mašole le baetapele ba ona ba kitimela moo. Ge batho bao ba bona mašole le moetapele wa ona, ba ile ba tlogela go betha Paulo.
33 Ke moka moetapele wa mašole o ile a batamela, a swara Paulo gomme a laela gore ba mo tleme ka diketane tše pedi.+ O ile a botšiša gore: “Motho yo ke mang gona o sentše eng?”
34 Batho ba be ba goeletša ba bolela dilo tša go se swane. Ka ge go be go na le mpherefere ga se a kgona go kwa gore ba reng. Ke moka a laela gore Paulo a išwe moo mašole a dulago gona.
35 Ge ba fihla ditepising, mašole a ile a swanelwa ke go mo kuka ka gobane batho bao ba be ba galefile kudu.
36 Batho bao ba be ba ba šetše morago ba goeletša ba re: “Mmolayeng!”
37 Ge Paulo a be a le kgauswi le go fihla mo mašole a dulago gona, o ile a re go moetapele wa mašole: “Na nka bolela le wena?” Yena a re: “Na o tseba Segerika?
38 Na ga se wena Moegepeta yoo malobanyana mo a ilego a dira gore batho ba lwe le mmušo gomme wa fetša wa ya lešokeng o na le banna ba itlhamilego ba 4 000?”
39 Ke moka Paulo a re: “Ge e le gabotse ke nna Mojuda+ wa go tšwa Tareso+ kua Tsilitsia. Ke tšwa motseng wo o tsebegago kudu. Ke kgopela o ntumelele gore ke bolele le batho ba.”
40 Eitše ge a mo dumeletše, Paulo a ema ditepising a bontšha batho bao ka seatla gore ba homole. Ya re ge ba homotše, a bolela le bona ka Seheberu,+ a re:
