Ditiro tša Baapostola 13:1-52
13 Phuthegong ya Antiokia go be go na le baporofeta le barutiši.+ Bona e be e le Baranaba, Simeoni yo a bego a bitšwa Nigere, Saulo, Lukio wa Kirene le Manaene yo a tsenego sekolo le Heroda mmuši wa selete.
2 Ge ba be ba dutše ba hlankela Jehofa* le go itima dijo, moya o mokgethwa wa re go bona: “Kgethang Baranaba le Saulo+ gore ba tle ba dire modiro wo ke ba kgethetšego wona.”+
3 Ka morago ga gore ba itime dijo le go rapela, ba ile ba ba bea diatla gomme ba ba tlogela ba sepela.
4 Ka gona banna ba bao ba romilwego ke moya o mokgethwa ba ile ba theogela Seleukia, go tloga moo ba ile ba sepela ka sekepe ba ya sehlakahlakeng sa Tsipero.
5 Ge ba fihla motseng wa Salami ba ile ba botša batho lentšu la Modimo disinagogeng tša Bajuda. Le gona ba be ba na le Johane yo a bego a ba thuša ka dilo tše ba di hlokago.+
6 Ka morago ga ge ba sepetše sehlakahlakeng seo ka moka go fihla Phafo, ba ile ba kopana le monna yo mongwe wa Mojuda yo a bitšwago Bara-Jesu. Monna yoo e be e le moloi ebile e le moporofeta wa maaka.
7 O be a šomela moetapele wa profense e lego Seregio Paulose, yo e bego e le monna yo bohlale. Seregio Paulose o ile a bitša Baranaba le Saulo, ka gobane o be a tloga a nyaka go kwa lentšu la Modimo.
8 Eupša motho yo yoo e lego moloi yo a bitšwago Elima,* (leina le le ra gore moloi) o ile a ba ganetša. Ke moka a leka go dira gore Seregio Paulose a se ke a ithuta ka Modimo.
9 Saulo yoo leina la gagwe le lengwe e lego Paulo, o ile a tlala moya o mokgethwa gomme a mo lebelela ka mahlong
10 a re: “Wena moradia towe, o morwa wa Diabolo+ ebile o dira dilo tše mpe kudu. Ga o rate dilo tše di lokilego. O tlo tlogela neng go bolela maaka ka ditsela tše di lokilego tša Jehofa?
11 Bjale tseba gore Jehofa o tlo go otla wa foufala. O tlo fetša nakonyana o sa bone seetša sa letšatši.” Ka yona nako yeo, mahlo a gagwe a ile a aparelwa ke kgodi e koto le leswiswi gomme a tšama a phopholetša a nyaka batho gore ba mo sware ka seatla ba mo hlahle.
12 Ge moetapele wa profense a bona seo se diregilego, o ile a fetoga modumedi ka gobane o be a makaditšwe ke dilo tšeo a ithutilego tšona ka Jehofa.
13 Bjale Paulo le banna bao a bego a na le bona, ba ile ba tloga Phafo ka sekepe ba ya Perega yeo e lego Pamfilia. Eupša Johane+ yo a bego a bitšwa Mareka o ile a ba tlogela a boela Jerusalema.+
14 Ba ile ba tloga Perega ba ya Antiokia kua Pisidia. Ka letšatši la Sabatha ba ile ba ya sinagogeng,+ ba dula fase.
15 Ka morago ga gore batho ba balelwe Molao+ le dipuku tša baporofeta, batho bao ba etelelago pele sinagogeng ba ile ba kgopela Paulo le Baranaba ba re: “Banabešo, ge e ba go na le mantšu ao le ka a bolelago a go kgothatša batho ba, a boleleng.”
16 Ka gona, Paulo o ile a ema a ba bontšha ka seatla gore ba homole gomme a re:
“Lena Baisiraele le lena batho ka moka bao ba boifago Modimo, theetšang.
17 Modimo wa setšhaba se sa Isiraele o kgethile borakgolokhukhu ba rena, a ba dira gore e be setšhaba seo se nago le maatla kudu le ge ba be ba dula nageng yeo e sego ya gabo bona ya Egepeta gomme o ile a šomiša maatla a gagwe a magolo* go ba ntšha nageng yeo.+
18 O ile a ba kgotlelela kua lešokeng ka mengwaga e ka bago e 40.+
19 Ka morago ga gore a fediše ditšhaba tše šupa tša nageng ya Kanana, o ile a fa borakgolokhukhu ba rena naga yeo gore e be bohwa bja bona.+
20 Dilo tše ka moka di diragetše ka mengwaga e ka bago e 450.
“Ka morago ga moo o ile a ba fa baahlodi gore ba ba etelele pele go fihlela ka moporofeta Samuele.+
21 Eupša go tloga ka nako yeo go ya pele ba ile ba nyaka go bušwa ke kgoši.+ Ke moka Modimo o ile a kgetha Saulo morwa wa Kishe, wa moloko wa Benjamini+ gore e be kgoši. Saulo o ile a buša ka mengwaga e 40.
22 Ka morago ga gore Modimo a tloše Saulo gore e se sa ba kgoši, o ile a kgetha Dafida gore e be kgoši.+ O ile a bolela ka yena a re: ‘Ke kgethile Dafida morwa wa Jese,+ e lego yena monna yo a nkgahlago,+ o tlo dira dilo ka moka tšeo ke nyakago gore a di dire.’
23 Ka ge Modimo a be a tshepišitše Baisiraele gore o tlo ba tlišetša mophološi, o ile a ba tlišetša Jesu go tšwa ditlogolong tša Dafida.+
24 Pele Jesu a fihla, Johane o ile a botša Baisiraele gore ba kolobetšwe go bontšha gore ba a itshola.+
25 Eupša ge Johane a be a le kgauswi le go fetša mošomo wo Modimo a bego a mo file wona, o be a fela a re: ‘Ga se nna motho yo le naganago gore ke yena. Eupša go na le yo a tlago ka morago ga ka yo ke sa swanelegego go tlemolla marala a dieta* tša gagwe.’+
26 “Banabešo, lena ditlogolo tša Aborahama le lena batho ba bangwe bao ba boifago Modimo, Modimo o rometše molaetša wa gore o tlo re phološa bjang.+
27 Batho bao ba dulago Jerusalema le babuši ba bona, ga se ba ka ba amogela Jesu, eupša ge ba be ba mo ahlola, ba ile ba phethagatša dilo tšeo di boletšwego ke Baporofeta,+ e lego dilo tšeo di balelwago batho ka sabatha e nngwe le e nngwe.
28 Le ge ba sa ka ba hwetša lebaka la gore a bolawe,+ ba ile ba gapeletša Pilato gore a laele gore a bolawe.+
29 Bjale ge ba feditše go dira dilo ka moka tšeo di bego di ngwadilwe ka yena, ba ile ba mo fegolla koteng gomme ba bea setopo sa gagwe ka lebitleng.+
30 Eupša Modimo o ile a mo tsoša bahung.+
31 Ka morago ga moo, o ile a fetša matšatši a mantši a iponagatša go batho bao a tlogilego le bona Galilea go ya Jerusalema. Gona bjale batho bao ba botša batho ba bangwe ka yena.+
32 “Bjale re le botša ditaba tše dibotse ka dilo tšeo Modimo a di tshepišitšego borakgolokhukhu ba rena.
33 Modimo o ile a dira seo a se tshepišitšego borakgolokhukhu ba rena gore go holege rena bana ba bona. O dirile bjalo ka go tsoša Jesu bahung,+ bjalo ka ge go ngwadilwe ka yena psalmeng ya bobedi gore: ‘O morwa wa ka, go tloga lehono nna ke Tatago.’+
34 Modimo o ile a mo tsoša bahung gomme a mo fa mmele wo o sa bolego. O ile a bontšha gore taba ye ke nnete ka go bolela gore: ‘Ke tla mmontšha botho* bjalo ka ge ke tshepišitše Dafida. Tshepišo ye e tla phethagala.’+
35 Le gona go psalme e nngwe o itše: ‘O ka se dumelele mohlanka wa gago yo a botegago a bola ka lebitleng.’+
36 Dafida yena o ile a hlankela Modimo wa gagwe. O ile a hlokofala, a bolokwa le borakgolokhukhu ba gagwe gomme a bola.+
37 Eupša Jesu yo Modimo a mo tsošitšego bahung, yena ga se a ka a bola.+
38 “Bjale banabešo, re le tsebiša gore le ka kgona go lebalelwa dibe ka baka la gagwe.+
39 Go ya ka Molao wa Moshe+ go be go ka se kgonege gore le se ke la ba le molato, eupša motho yo mongwe le yo mongwe yo a dumelago go Jesu a ka se be le molato.+
40 Itlhokomeleng gore le se ke la diragalelwa ke dilo tšeo baporofeta ba di boletšego ge ba be ba re:
41 ‘Lena bao le nago le lenyatšo, tsebang gore mehleng ya lena go tla direga selo seo le ka se se tshepego gaešita le ge le se hlaloseditšwe. Ge le bona selo seo se direga le tlo makala gomme la hwa.’”+
42 Bjale eitše ge ba sepela, batho ba ile ba ba kgopela gore ba ba botše ka ditaba tše ka Sabatha e latelago.
43 Ka morago ga gore batho bao ba bego ba kopane sinagogeng ba phatlalale, Bajuda ba bantši le batho bao ba bego ba sokologetše tumelong ya Sejuda bao ba bego ba hlankela Modimo ba ile ba sepela le Paulo le Baranaba. Paulo le Baranaba ba ile ba ba kgothaletša gore ba tšwele pele ba dira dilo tšeo di tla dirago gore Modimo a dule a ba rata.*+
44 Ka Sabatha e latelago, mo e nyakilego go ba batho ka moka motseng ba ile ba kgobokana gore ba tlo kwa lentšu la Jehofa.
45 Ge Bajuda ba bona batho bao ba bantši, ba ile ba ba le mona kudu gomme ba thoma go ganetša dilo tšeo Paulo a bego a di bolela.+ Ge ba be ba dira bjalo ba be ba bontšha gore ba nyatša Modimo.
46 Paulo le Baranaba ba ile ba ba araba ka sebete ba re: “Ke lena batho ba mathomo bao re bego re swanetše go ba botša lentšu la Modimo.+ Eupša ka ge le gana go le theetša, le bontšha gore ga le swanelwe ke go hwetša bophelo bjo bo sa felego. Ka gona ditaba tše re tla di botša batho ba ditšhaba.+
47 Ka gobane Jehofa o re boditše gore: ‘Ke le kgethile gore le be seetša sa ditšhaba, le gore le thuše batho gore ba phološwe go fihla mafelelong a lefase.’”+
48 Ge batho ba ditšhaba ba ekwa taba ye, ba ile ba thaba kudu ba ba ba thoma go tumiša Jehofa. Ke moka batho ka moka bao ba bego ba tloga ba nyaka go amogela lentšu la Modimo,* ba ile ba fetoga barutiwa.
49 Lentšu la Jehofa le ile la bolelwa nageng ka moka.
50 Eupša Bajuda ba ile ba hlohleletša basadi bao ba bego ba tumile ka gore ba boifa Modimo le banna bao ba hlomphiwago, gomme bona ba thoma go tlaiša+ Paulo le Baranaba ba ba lahlela ka ntle ga motse.
51 Paulo le Baranaba ba ile ba hlohlora lerole dinaong tša bona* ba ya Ikonia.+
52 Ke moka barutiwa ba tšwela pele ba tlala moya o mokgethwa ebile ba thaba kudu.+
Mengwalo ya Tlase
^ Yo ke Bara-Jesu yo go boletšwego ka yena go tem. 6.
^ Phetolelo ya lentšu ka lentšu e re, “o ile a šomiša letsogo leo le emišitšwego.”
^ Phetolelo ya lentšu ka lentšu e re, “diramphašane.”
^ Goba, “lerato le le botegago.”
^ Goba, “a ba bontšhe botho bjo bogolo.”
^ Goba, “bao ba nago le tshekamelo e swanetšego ka bophelo bjo bo sa felego.”
^ Go hlohlora lerole dinaong go be go bontšha gore ga ba na molato.
