Ditiro tša Baapostola 7:1-60
7 Ke moka moperisita yo a phagamego o ile a re go Stefano: “Na dilo tše batho ba ba di bolelago ke nnete?”
2 Stefano yena a re: “Banabešo le lena botate, ntheetšeng. Modimo yo a nago le letago o ile a iponagatša go rakgolokhukhu wa rena Aborahama ge a be a le Mesopotamia pele a dula Harane,+
3 a re go yena: ‘Tloga nageng ya geno le go ba meloko ya gago o ye nageng yeo ke tlago go go bontšha yona.’+
4 Ke moka Aborahama o ile a tloga nageng ya Bakaladea, a yo dula Harane. Ka morago ga gore tatagwe a hlokofale,+ Modimo o ile a re a tle a dule nageng ye yeo le dulago go yona gona bjale.+
5 Ge a be a dula moo, Modimo ga se a ka a mo fa bohwa le ge e le bofe nageng ye. Ga se a ka a mo fa le ge e le karolwana ya naga eupša o ile a tshepiša gore o tlo mo fa yona gomme ka morago a tle a e fe bana ba gagwe,+ le ge ka nako yeo a be a sešo a ba le ngwana.
6 Le gona Modimo o ile a mmotša gore bana ba gagwe ba tla dula nageng yeo e sego ya gabo bona gomme batho ba tla ba dira makgoba le go ba tlaiša ka mengwaga e 400.+
7 Modimo o ile a ba a re: ‘Setšhaba seo se tlago go ba dira makgoba ke tlo se ahlola.+ Ka morago ga moo, ke tla ba ntšha nageng yeo gomme ba tla ba ntlhankela lefelong le.’+
8 “Le gona, Modimo o ile a dira kgwerano ya lebollo+ le Aborahama. Ka morago ga gore Aborahama e be tatago Isaka,+ o ile a mmolotša ka letšatši la seswai.+ Isaka o ile a ba tatago Jakobo. Jakobo a ba tatago barwa ba 12 bao e ilego ya ba malapa a 12.
9 Barwa bao ba Jakobo ba ile ba jela ngwanabo bona Josefa mona+ gomme ba mo rekišetša Baegepeta.+ Eupša Modimo o be a na le yena.+
10 O ile a mo thuša mathateng a gagwe ka moka, a dira gore a be bohlale le gore Farao Kgoši ya Egepeta a mo rate. Farao o ile a mo kgetha gore a buše Egepeta le go hlokomela ka mošate.+
11 Bjale go ile gwa ba le tlala nageng ka moka ya Egepeta le ya Kanana. Tlala yeo e ile ya baka masetlapelo a magolo gomme borakgolokhukhu ba rena ba be ba se na selo seo ba ka se jago.+
12 Eupša Jakobo o ile a kwa gore go be go na le dijo Egepeta gomme a romela barwa ba gagwe, bona borakgolokhukhu ba rena.+
13 Ge ba be ba eya moo la bobedi Josefa o ile a itsebiša go bona. Ke moka Farao o ile a tseba lapa la gabo Josefa.+
14 Josefa o ile a romela molaetša wa gore Jakobo tatagwe le meloko ya gagwe ka moka ba tle Egepeta.+ Ka moka ga bona e be e le ba 75.+
15 Ka gona Jakobo o ile a theogela Egepeta+ gomme a hlokofalela moo.+ Borakgolokhukhu ba rena le bona ba ile ba hlokofalela moo.+
16 Ba ile ba išwa Shikeme gomme ba bolokelwa lebitleng leo Aborahama a ilego a le reka ka tšhelete ya silifera go barwa ba Hamoro kua Shikeme.+
17 “Ge nako ya gore dilo tšeo Modimo a di tshepišitšego Aborahama di direge e batamela, Baisiraele ba ile ba oketšega ya ba ba bantši kudu Egepeta.
18 Ke moka go ile gwa ba le kgoši e nngwe Egepeta yeo e bego e sa tsebe Josefa.+
19 Kgoši yeo e ile ya logela batho ba gabo rena maanomabe, ya ba swara gampe ya ba ya ba gapeletša gore ba lahle masea a bona e le gore a hwe.+
20 Ka nako yeo Moshe o ile a belegwa. O be a le botsana kudu.* O ile a godišetšwa ka lapeng la tatagwe ka dikgwedi tše tharo.+
21 Eupša ge batswadi ba gagwe ba se sa kgona go mo fihla,+ morwedi wa Farao o ile a mo hwetša, a mo godiša bjalo ka morwa wa gagwe.+
22 Ka gona Moshe o ile a rutwa thuto ya maemo a godimo ya Egepeta. Le gona e be e le sekgwari sa go bolela ebile a dira dilo tše di makatšago.+
23 “Bjale ge a be a na le mengwaga e 40, o ile a nagana ka go yo etela banababo ba Baisiraele.+
24 Ya re ge a bona Moegepeta yo mongwe a swara Moisiraele wa gabo gampe a mo lwela gomme a bolaya Moegepeta yoo.
25 O be a nagana gore Baisiraele ba tla bona gore Modimo o šomiša yena gore a ba phološe, eupša ba ile ba se nagane bjalo.
26 Letšatšing le le latelago o ile a hwetša Baisiraele ba bangwe ba elwa, ke moka a leka go ba lamola, a re go bona: ‘Banabešo le bana ba motho. Bjale goreng le elwa?’
27 Eupša Moisiraele yo a bego a na le phošo o ile a kgorometša Moshe a re: ‘Ke mang a go kgethilego gore o re buše le gore o re ahlole?
28 Kgane le nna o nyaka go mpolaya ka mokgwa wo o bolailego Moegepeta maabane?’
29 Ge Moshe a ekwa taba yeo, o ile a tšhaba a yo dula nageng ya Midiane. Ge a le moo, o ile a ba le barwa ba babedi.+
30 “Ka morago ga mengwaga e 40, morongwa o ile a iponagatša go Moshe lešokeng la Thaba ya Sinai a le kgabong ya mollo wa mohlare wa meetlwa.+
31 Bjale Moshe o ile a makatšwa ke seo a se bonago. Eupša o ile a batamela gore a bone gore go diregang, ke moka gwa kwagala lentšu la Jehofa* le re:
32 ‘Ke nna Modimo wa borakgolokhukhu ba gago, Modimo wa Aborahama, wa Isaka le wa Jakobo.’+ Moshe o ile a thothomela kudu ke moka a se sa batamela mohlare woo.
33 Jehofa a re go yena: ‘Rola dieta* tša gago, ka gobane o eme lefelong le lekgethwa.
34 Ke bone kamoo batho ba ka ba gateletšwego ka gona Egepeta, ebile ke kwele sello sa bona+ gomme ka theoga gore ke ba hlakodiše. Bjale etla ke go rome Egepeta.’
35 Yena Moshe yo, ke yena yo Baisiraele ba ilego ba mo gana ba re: ‘Ke mang yo a go kgethilego gore o re buše ebile o re ahlole?’+ Ke yena yo Modimo a mo kgethilego+ gore a ba buše ebile a ba phološe a šomiša morongwa yo a bonagetšego go yena mohlareng wa meetlwa.
36 Monna yo o ba ntšhitše nageng ya Egepeta,+ a dira mehlolo le dilo tše di makatšago+ Lewatleng le Lekhwibidu+ le lešokeng ka mengwaga e 40.+
37 “Moshe ke yena a ilego a botša Baisiraele gore: ‘Modimo o tla le kgethela moporofeta yo a swanago le nna mo setšhabeng sa gabo lena.’+
38 Ke yena a bego a le gare ga setšhaba sa Baisiraele lešokeng, ge morongwa+ a be a bolela le yena+ gotee le borakgolokhukhu ba rena Thabeng ya Sinai. O ile a fiwa ditaelo tše kgethwa tšeo di nago le maatla e le gore a tle a re nee tšona.+
39 Borakgolokhukhu ba rena ba ile ba gana go mo kwa, ebile ba ile ba se iše felo ka yena.+ Le gona ka dipelong tša bona, ba be ba nyaka go boela Egepeta.+
40 Ba re go Arone: ‘Re direle medimo yeo e tlago go re eta pele. Ka gobane ga re tsebe gore go diragetše eng ka Moshe yo wa lena yo a re ntšhitšego Egepeta.’+
41 Ka yona nako yeo ba ile ba dira modingwana wa namane gomme ba o direla sehlabelo. Ba ile ba dira monyanya wa go keteka gore ba dirile namane yeo.+
42 Modimo o ile a ba hlanogela ke moka a ba tlogela gore ba rapele letšatši, ngwedi le dinaledi+ bjalo ka ge go ngwadilwe pukung ya baporofeta gore: ‘Lena Baisiraele na ga se lena le ilego la ntirela dihlabelo le go nnea dibego lešokeng ka mengwaga e 40?
43 Eupša le ile la tšea tente ya Mmoloko+ le naledi ya modimo Refane, e le diswantšho tšeo le di dirilego gore le di rapele. Ka baka leo ke tla le rakela ka kua ga Babilona.’+
44 “Borakgolokhukhu ba rena ba be ba na le tente lešokeng. Tente yeo e be e bontšha gore Modimo o na le bona. Modimo o ile a fa Moshe ditaelo tša gore e agiwe bjang, gomme borakgolokhukhu ba rena ba ile ba e dira go ya ka ditaelo tšeo.+
45 Borakgolokhukhu ba rena ba ile ba sepela le yona gotee le Joshua go ya nageng yeo e bego e le ya ditšhaba tše dingwe+ tšeo Modimo a ilego a di raka pele ba fihla moo.+ Tente yeo e ile ya dula moo go fihlela mehleng ya Dafida.
46 Modimo o be a rata Dafida, ebile Dafida o ile a kgopela go agela Modimo wa Jakobo ntlo.+
47 Eupša Solomone ke yena a ilego a agela Modimo ntlo.+
48 Fela Modimo yo Godimodimo ga a dule ka dintlong tšeo di dirilwego ke batho,+ bjalo ka ge moporofeta a bolela a re:
49 ‘Jehofa o re: Legodimo ke setulo sa ka sa bogoši+ gomme lefase ke moo dinao tša ka di gatago gona.+ Bjale ke ntlo ya mohuta mang yeo le ka nkagelago yona, goba le kae lefelo leo nka khutšago go lona?
50 Seatla sa ka ke sona se dirilego dilo tše ka moka?’+
51 “Lena banna ba manganga, le thatafiša dihlogo ebile ga le kwešiše. Le dula le ganetša moya o mokgethwa go no swana le borakgolokhukhu ba lena.+
52 Ke moporofeta ofe yo borakgolokhukhu ba lena ba sa kago ba mo tlaiša?+ Ba ile ba bolaya batho ka moka bao ba ilego ba bolela e sa le pele gore go tlo tla motho yo a lokilego,+ e lego motho yo lena le mo rekišitšego la ba la mmolaya.+
53 Le ge barongwa ba ile ba le nea Molao,+ ga se la ka la ba theetša.”
54 Bjale ge ba ekwa dilo tše ba ile ba kwata kudu ba ba ba nyaka go mo gobatša.
55 Stefano o ile a tlala moya o mokgethwa, ke moka a lebelela legodimong gomme a bona letago la Modimo, a bona le Jesu a le ka letsogong le letona la Modimo le yena a na le letago,+
56 gomme a re: “Bonang! Ke bona magodimo a bulega gomme Morwa wa motho+ a eme ka letsogong le letona la Modimo.”+
57 Ge a realo ba ile ba goeletša gomme ba ithiba ditsebe ka diatla ba kitimela godimo ga gagwe.
58 Ka morago ga gore ba mo lahlele ka ntle ga motse, ba ile ba mo kgatla ka maswika.+ Ke moka dihlatse+ tša maaka di ile tša bea diaparo tša tšona tša ka ntle fase kgauswi le dinao tša lesogana leo le bitšwago Saulo.+
59 Ge ba dutše ba kgatla Stefano ka maswika, o ile a kgopela Jesu go tšwa pelong a re: “Morena Jesu, amogela moya wa ka.”
60 Ke moka o ile a khunama a goeletša a re: “Jehofa, o se ke wa ba otla ka baka la sebe se.”+ Ka morago ga go bolela mantšu a o ile a hlokofala.
