Ditiro tša Baapostola 28:1-31
28 Ka morago ga gore re fihle re šireletšegile, re ile ra kwa gore sehlakahlaka seo re bego re le go sona se bitšwa Melite.+
2 Le ge badudi ba moo sehlakahlakeng seo ba be ba sa bolele leleme la rena, ba ile ba re bontšha botho. Ba re amogetše gabotse, ba ba ba gotša mollo ka gobane pula e be e ena ebile go tonya.
3 Paulo o ile a topelela dikgong, ya re ge a di bea mollong, gwa tšwa noga ya marabe e ekwa go fiša gomme ya mo loma seatla ya dula e mo kgomaretše.
4 Ge badudi ba moo sehlakahlakeng ba bona a longwa ke noga yeo ebile e sa tloge seatleng sa gagwe, ba ile ba botšana ba re: “Monna yo ke mmolai, le ge a phologile lehu lewatleng, modimogadi wa toka* ga se a mo dumelela gore a tšwele pele a phela.”
5 Eupša Paulo o ile a hlohlorela noga yeo ka mollong. Le ge e mo lomile, ga se ya mo gobatša.
6 Batho bao ba be ba letetše gore a ruruge goba a hlokofale kapelapela. Ka morago ga gore ba lete nako e telele, ba ile ba fetoša menagano ya bona ba re ke modimo ka baka la ge ba bona a sa diragalelwe ke selo.
7 Gona moo tikologong yeo, go be go na le mašemo a moetapele wa sehlakahlakeng seo e lego Pubulio. O ile a re amogela gabotse, ra fetša matšatši a mararo re dula le yena.
8 Tatago Pubulio o be a swerwe ke bolwetši bja letadi* ebile a swerwe ke teng e bohloko. Paulo a ya go yena, a mo rapelela, a mmea diatla ke moka a mo fodiša.+
9 Ka morago ga moo, batho ba bangwe ka moka ba moo sehlakahlakeng bao ba bego ba babja le bona ba ile ba tla go yena gomme a ba fodiša.+
10 Go bontšha gore ba a leboga, eitše ge re re re a sepela, ba re fa dimpho tše dintši le dilo tšeo re bego re tlo di hloka.
11 Ka morago ga ge re feditše dikgwedi tše tharo re le moo, re ile ra sepela ka sekepe seo se tšwago Aleksandria seo se feditšego marega sehlakahlakeng seo. Sekepe seo se be se na le seswantšho sa barwa ba Tseuse.
12 Re ile ra fihla boemakepeng bja Sirakuse, ra fetša matšatši a mararo re le moo.
13 Go tloga moo re ile ra ya Regio. Letšatšing le le latelago go ile gwa tšutla phefo yeo e tšwago ka borwa, ka gona re ile ra fihla Puteoli ka morago ga matšatši a mabedi.
14 Gona moo Puteoli re ile ra hwetša banababo rena, ba re kgopela gore re dule le bona matšatši a šupago. Ka morago ga go dula le bona re ile ra fetela Roma.
15 Ge banababo rena ba Roma ba ekwa gore re tla moo, ba ile ba tla ba re gahlanetša Mmarakeng wa Apiase le Dintlong tše Tharo tša Baeng. Ge Paulo a ba bona, o ile a leboga Modimo gomme a kgothatšega.+
16 Mafelelong ge re fihlile Roma, Paulo o ile a dumelelwa go dula a nnoši le lešole leo le bego le mo letile.
17 Ka morago ga matšatši a mararo o ile a bitša baetapele ba Bajuda. Ya re ge ba fihlile, a re go bona: “Banabešo, ke golegilwe kua Jerusalema, ka neelwa diatleng tša Baroma+ le ge ke be ke se ka senyetša motho ebile ke se ka tshela melao ya borakgolokhukhu ba rena.+
18 Ka morago ga ge ba ntshekišitše,+ ba be ba nyaka go ntokolla ka gobane ba be ba se na mabaka a gore ba nkahlolele lehu.+
19 Eupša ge Bajuda ba be ba ganetšana le phetho yeo, ke ile ka kgopela gore ke sekišwe ke Kesara.+ Le ge go le bjalo, ge ke iša molato wa ka go Kesara, ga se gore go be go na le seo ke bego ke nyaka go latofatša setšhaba sa gešo ka sona.
20 Ke ka baka leo ke ilego ka kgopela go le bona le go bolela le lena, ka ge ke tlemilwe ka ketane ye ka baka la motho yoo Baisiraele ba bego ba holofetše gore o tlo tla.”+
21 Bona ba re: “Ga se ra hwetša mangwalo ao a tšwago Judea ao a bolelago ka wena goba go kwa motho wa gabo rena yo a tšwago Judea a go bolela gampe.
22 Bjale re nyaka go kwa gore wena o reng, ka gobane re a tseba gore batho ka moka ba bolela gampe+ ka sehlopha se+ o lego go sona.”
23 Ba ile ba kgetha letšatši leo ba tlago go kopana le yena ka lona, gomme ba tla go yena e le ba bantši moo a bego a dula gona. A ba botša ditaba tše dibotse tša Mmušo wa Modimo letšatši ka moka, a ba hlalosetša ka Molao wa Moshe+ le ka baporofeta+ e le gore ba dumele go Jesu.+
24 Ba bangwe ba ile ba dumela dilo tšeo a bego a di bolela, eupša ba bangwe ba se di dumele.
25 Eitše ge ba thoma go sepela ka ge ba be ba sa dumelelane, Paulo a re go bona:
“Moya o mokgethwa o ile wa botša moporofeta Jesaya gore a yo bolela le borakgolokhukhu ba lena.
26 Wa re: ‘Sepela o yo botša setšhaba se o re: “Go kwa le tlo kwa eupša le ka se kwešiše, le tla lebelela eupša le ka se bone.+
27 Ka gobane dipelo tša batho ba di retetše, ba kwele ka ditsebe tša bona eupša ba se arabele. Ba tswaletše mahlo gore ba se sa bona selo, ba ba ba thiba ditsebe gore ba se kwe selo. Ka baka la seo ga ba kgone go kwešiša seo ba swanetšego go se dira, gomme ga ba boele go nna e le gore ke ba fodiše.”’+
28 Tsebang gore molaetša wo wa kamoo Modimo a phološago batho ka gona o botšwa le batho ba ditšhaba,+ gomme bona ba a o theetša.”+
29 * ——
30 Paulo o ile a fetša mengwaga e mebedi a dula ka ntlong ya gagwe yeo a e hirilego.+ O be a amogela batho ka moka bao ba bego ba etla go mo etela.
31 O be a ba botša ka Mmušo wa Modimo le go ba ruta ka Morena Jesu Kriste a sa tšhabe selo+ ebile go se na seo se mo thibelago.
