Ditiro tša Baapostola 6:1-15
6 Bjale nakong yeo ya ge barutiwa ba be ba oketšega, Bajuda ba ba bolelago Segerika ba ile ba ngongorega ka Bajuda bao ba bolelago Seheberu, ka gobane bahlologadi bao ba bolelago Segerika ba be ba tshedišwa mahlo letšatši le lengwe le le lengwe ge go be go abiwa dijo.+
2 Ka gona ge baapostola ba lesomepedi ba ekwa ka taba yeo ba ile ba bitša lešaba la barutiwa gomme ba re: “Ga go botse gore re tlogele go ruta lentšu la Modimo e le gore re yo fa batho dijo ditafoleng.+
3 Bjale banababo rena kgethang banna ba šupago bao ba nago le botumo bjo bobotse mo gare ga lena,*+ bao ba tletšego moya o mokgethwa ebile ba lego bohlale,+ e le gore re ba fe boikarabelo bja go hlokomela modiro wo o bohlokwa,+
4 ke moka rena re tla swarega ka go rapela le go ruta lentšu la Modimo.”
5 Seo ba se boletšego se ile sa kgahla lešaba ka moka la barutiwa gomme ba kgetha Stefano monna yo a nago le tumelo le yo a tletšego moya o mokgethwa, le Filipi,+ Prokoro, Nikanoro, Timone, Paramena le Nikolase wa kua Antiokia yo a bego a sokologetše tumelong ya Sejuda.
6 Ba ile ba tliša banna bao go baapostola, gomme ka morago ga gore baapostola ba rapele, ba ile ba ba bea diatla.+
7 Ka baka leo lentšu la Modimo le ile la tšwela pele le phatlalala,+ gomme palo ya barutiwa ya oketšega kudu+ Jerusalema. Ke moka baperisita ba bantšintši ba ile ba fetoga badumedi.+
8 Bjale Stefano e lego monna yoo Modimo a bego a mo amogela ebile a mo file maatla a magolo, o be a dira mehlolo e megolo le dilo tše di makatšago pele ga batho.
9 Eupša go ile gwa tla banna ba bangwe bao ba tšwago sehlopheng seo se bitšwago Sinagoge ya Balokologi. Ba ile ba tla ba na le Bakirene, Baaleksandria le batho ba bangwe bao ba tšwago Tsilitsia le Asia, e le gore ba tle ba ngangišane le Stefano.
10 Fela ba ile ba se kgone go ngangišana le yena ka baka la ge a be a le bohlale ebile a thušwa ke moya o mokgethwa ge a be a bolela.+
11 Ke moka ba hlohleletša batho ka sephiring gore ba bolele ba re: “Re mo kwele a bolela dilo tše mpe kudu ka Moshe le ka Modimo.”
12 Ba ile ba dira gore setšhaba, banna ba bagolo le ditsebi tša molao ba tle go yena ka lebelo, gomme ba mo swara ka kgang ba mo iša lekgotleng la Sanhedrine.
13 Ke moka ba ile ba tliša dihlatse tšeo di ilego tša bolela maaka tša re: “Monna yo o dulela go bolela dilo tše mpe ka lefelo le le lekgethwa le ka Molao.
14 Ka mohlala, re kwele a bolela gore Jesu yo wa Monatsaretha o tla phušola lefelo le gomme a fetoša melao yeo Moshe a re filego yona.”
15 Ke moka ge batho ka moka bao ba bego ba dutše lekgotleng la Sanhedrine ba mo lebelela, ba ile ba bona sefahlego sa gagwe se swana le sa morongwa.
Mengwalo ya Tlase
^ Goba, “banna ba šupago bao ba bolelwago gabotse.”
