Ditiro tša Baapostola 3:1-26
3 Bjale Petro le Johane ba be ba rotogela tempeleng mo e ka bago ka iri ya boraro thapama,* e lego nako ya go rapela.
2 Ka nako yeo, monna yo a belegwego a golofetše o be a rwelwe gomme a išwa keiting yeo e bego e le pele ga tempele yeo e bitšwago Keiti e Botse. O be a išwa moo letšatši le lengwe le le lengwe gore a kgopele batho bao ba tsenago ka tempeleng tšhelete.
3 Ge a bona Petro le Johane ba le kgauswi le go tsena ka tempeleng, o ile a ba kgopela tšhelete.
4 Eupša Petro le Johane ba ile ba mo lebelela ka mahlong ba re: “Re lebelele.”
5 O ile a ba lebelela a nagana gore ba tla mo fa se sengwenyana.
6 Eupša Petro a re go yena: “Ga ke na silifera le gauta, fela ke go nea seo ke nago le sona, ke re: Ka leina la Jesu Kriste wa Natsaretha, ema o sepele!”+
7 Ke moka Petro a mo swara ka seatla sa le letona a mo emiša.+ Ka yona nako yeo, maoto a motho yo le dikokoilane tša gagwe tša tia.+
8 Motho yoo o ile a taboga+ gomme a thoma go sepela. A tsena le bona ka tempeleng a sepela, a fofafofa ebile a tumiša Modimo.
9 Batho ka moka ba mmona a sepela ebile a tumiša Modimo.
10 Ba ile ba thoma go lemoga gore motho yoo, ke yo a bego a dulela go kgopela tšhelete keiting yeo e bitšwago Keiti e Botse ya tempeleng.+ Ba ile ba makala kudu ge ba bona a kgona go sepela.
11 Ge monna yo a be a sa dutše a swere Petro le Johane ba le mo go bitšwago Setupu sa Solomone,+ batho ka moka ba kitima ba ya go bona. Batho bao ba be ba maketše kudu.
12 Ge Petro a bona batho bao, a re go bona: “Batho ba Isiraele, ke ka baka lang se se le makatša? Ke ka baka lang le re lebeletše tše ekego re dirišitše maatla a rena goba boineelo bja rena go Modimo go dira gore motho yo a kgone go sepela?
13 Modimo wa Aborahama, wa Isaka le wa Jakobo,+ e lego yena Modimo wa borakgolokhukhu ba rena, o dirile gore Mohlanka wa gagwe+ Jesu+ a be le letago, e lego yena yo le ilego la mo gafela batho gore ba mmolaye+ le ge Pilato a be a šetše a dirile phetho ya go mo lokolla.
14 Le latotše monna yo yo mokgethwa le yo a lokilego la ba la kgopela gore go lokollwe motho yo e lego mmolai.+
15 Le gona le ile la kgetha go bolaya Moemedi yo Mogolo wa bophelo,+ eupša Modimo o mo tsošitše bahung, ebile re dihlatse tša taba yeo.+
16 Monna yo le mmonago ebile le mo tsebago, o matlafaditšwe ka leina la Jesu le ka baka la ge re na le tumelo leineng la gagwe. Tumelo yeo re nago le yona go Jesu e dirile gore monna yo a fodišwe pele ga lena ka moka.
17 Bjale banabešo, ke a tseba gore le dirile se ka baka la ge le be le sa tsebe,+ go no swana le ge babuši ba lena ba dirile.+
18 Modimo o ile a dumelela gore dilo tše di direge, e le gore go phethagale dilo tšeo baporofeta ba gagwe ba di boletšego e sa le pele, gore Kriste o be a tlo tlaišwa.+
19 “Ka gona itsholeng+ le sokologe+ gore dibe tša lena di phumolwe,+ e le gore Jehofa a tle a le lapološe,*
20 le gore a tle a romele Kriste yo a le kgethetšego yena, e lego Jesu.
21 Jesu o swanetše go dula legodimong go fihlela nako e fihla ya gore Modimo a tsošološe dilo ka moka tšeo a di boletšego a diriša baporofeta ba gagwe bao ba botegago ba mehleng ya kgale.
22 Ge e le gabotse Moshe o ile a re: ‘Jehofa Modimo wa lena o tla le kgethela moporofeta yo a swanago le nna mo setšhabeng sa gabo lena.+ Le theetšeng dilo ka moka tšeo a le botšago tšona.+
23 Motho yo a sa theetšego Moporofeta yoo o tla fedišwa.’+
24 Baporofeta ka moka go tloga ka Samuele go ya pele le bao ba ilego ba tla ka morago ga gagwe, ba ile ba bolela ka mo go kwagalago ka dilo tše.+
25 Lena le barwa ba baporofeta ebile le bajabohwa ba kgwerano yeo Modimo a e dirilego le borakgolokhukhu ba lena+ ge a be a re go Aborahama: ‘Malapa ka moka a mo lefaseng a tla šegofatšwa ka bana ba gago.’+
26 Ka morago ga gore Modimo a kgethe mohlanka wa gagwe, o ile a mo roma go lena pele+ gore a le šegofatše ka go le thuša gore le tlogele go dira dilo tše mpe.”
Mengwalo ya Tlase
^ Phetolelo ya lentšu ka lentšu e re, “mo e ka bago ka iri ya senyane.”
