Ebangedi ya Johane 21:1-25
21 Ka morago ga dilo tše Jesu o ile a iponagatša gape go barutiwa ba gagwe Lewatleng la Tiberiase. Ge a be a iponagatša,
2 Simone Petro, Thomase (yo a bego a bitšwa Lefahla),+ Nathaniele+ yo a tšwago Kana ya Galilea, barwa ba Tsebedeo+ le barutiwa ba bangwe ba babedi ba Jesu, ba be ba le gotee.
3 Simone Petro a re go bona: “Ke ya go rea dihlapi.” Bona ba re go yena: “Le rena re ya le wena.” Ke moka ba ya go namela sekepe eupša bošegong bjoo ba se sware selo.+
4 Le ge go le bjalo, eitše ge e eba mesong, Jesu a ema lebopong la lewatle, eupša barutiwa ba gagwe ba se lemoge gore e be e le yena.+
5 Ka gona Jesu a re go bona: “Bana ba ka, na le na le sa go ja?”* Bona ba re: “Aowa!”
6 A re go bona: “Lahlelang nnete ya lena ka lehlakoreng le letona la sekepe gomme le tla swara dihlapi.” Ka gona, ba e lahlela. Eupša ba ile ba palelwa ke go e goga ka ge e be e swere dihlapi tše dintši.+
7 Ke moka morutiwa yo Jesu a bego a mo rata+ a re go Petro: “Ke Morena!” Ge Simone Petro a ekwa gore ke Morena, o ile a apara seaparo sa gagwe sa ka ntle ka gobane o be a se a apara diaparo ka moka, ke moka a itahlela ka lewatleng.
8 Eupša barutiwa ba bangwe bao ba bego ba le ka sekepeng se senyenyane ba ile ba mo latela ba goga nnete yeo e bego e tletše dihlapi ka gobane ba be ba šaletšwe ke dimithara tše e ka bago tše 100* feela gore ba fihle lebopong.
9 Ge ba fihla lebopong ba ile ba bona mollo wa malahla o tuka gomme go bešitšwe dihlapi ebile go na le borotho moo.
10 Jesu a re go bona: “Tlišang tše dingwe tša dihlapi tšeo le sa tšwago go di swara.”
11 Ka gona, Simone Petro a namela sekepe a gogela nnete ya dihlapi lebopong. E be e tletše ka dihlapi tše dikgolo tše 153. Le ge dihlapi tšeo e be e le tše dintši, nnete yeo ga se ya ka ya gagoga.
12 Jesu a re go bona: “Etlang le je.” Eupša ga go na morutiwa le o tee yoo a ilego a ba le sebete sa go mmotšiša gore ke yena mang ka gobane ba be ba tseba gore e be e le Morena.
13 Jesu a tla a tšea borotho a ba fa bjona. Ka morago a tšea le dihlapi a ba fa tšona.
14 Bjale le e be e le lekga la boraro+ Jesu a tšwelela go barutiwa ka morago ga ge a tsošitšwe bahung.
15 Ge ba feditše go ja, Jesu a re go Simone Petro: “Simone morwa wa Johane, na o nthata go feta dilo tše?” Yena a re: “Ee Morena, o a tseba gore ke go rata kudu.” Jesu a re go yena: “Fepa dikwana tša ka.”+
16 Ka morago a mmotšiša la bobedi a re: “Simone morwa wa Johane, na o a nthata?” Petro a re go yena: “Ee Morena, o a tseba gore ke go rata kudu.” Jesu a re: “Diša dinku tša ka tše dinyenyane.”+
17 Jesu a bolela le yena la boraro a re: “Simone morwa wa Johane, na o nthata kudu?” Petro a nyama kudu ge Jesu a mmotšiša ka lekga la boraro a re: “Na o nthata kudu?” Ka gona Petro a re go Jesu: “Morena, o tseba dilo ka moka. O a tseba gore ke go rata kudu.” Jesu a re go yena: “Fepa dinku tša ka tše dinyenyane.+
18 Ke go botša nnete ge ke re, ge o be o sa le yo monyenyane o be o fela o ikapeša ke moka wa ya moo o nyakago go ya gona. Eupša ge o tšofala o tlo otlolla matsogo a gago gomme motho yo mongwe a go apeša ke moka a go iša mo o sa nyakego go ya gona.”
19 O boletše se go bontšha gore o be a tla hwa lehu la mohuta mang e lego leo le tlago go dira gore Modimo a retwe. Ka morago ga ge a boletše seo, o ile a re go Petro: “Tšwela pele o ntatela.”+
20 Petro a retologa gomme a bona morutiwa yo Jesu a bego a mo rata kudu+ a ba šetše morago, yena yoo nakong ya ge ba be ba eja dijo tša mantšiboa a ilego a ithekga ka sehuba sa Jesu gomme a re: “Morena, ke mang yo a tlago go go rekiša?”
21 Ka gona ge Petro a mmona, a re go Jesu: “Morena, go tla direga eng ka monna yo?”
22 Jesu a re go yena: “Ge e ba ke rata gore a tšwele pele a phela go fihlela ke boa, seo se go tshwenya ka eng? Wena tšwela pele o ntatela.”
23 Ka baka leo, mantšu a a gore morutiwa yoo a ka se hwe, a kwelwe ke barutiwa ba bangwe. Eupša Jesu ga se a botša morutiwa yoo gore a ka se hwe. Go e na le moo, o itše: “Ge e ba ke rata gore a tšwele pele a phela go fihlela ge ke boa, seo se go tshwenya ka eng?”
24 Yo ke morutiwa+ yo a neago bohlatse ka dilo tše le yo a di ngwadilego, ebile re a tseba gore bohlatse bja gagwe ke bja nnete.
25 Ge e le gabotse go na le dilo tše dingwe tše dintši tšeo Jesu a di dirilego. Le gona, ke nagana gore ge nkabe dilo tšeo di ngwadilwe ka botlalo, lefase ka bolona le be le ka se kgone go rwala mangwalo ao a go phuthwa ao a ngwadilwego.+
Mengwalo ya Tlase
^ Goba, “na le na le dihlapi?”
