Bagolo, balebeledi ba tikologo le ofisi ya lekala goba Sehlopha se Bušago, gantšhi ba re nea tlhahlo yeo e re thušago go hlankela Jehofa. Ka dinako tše dingwe re ka no se kwešiše tlhahlo yeo re e hwetšago. Re ka ipotšiša ge eba tlhahlo yeo e tlo re hola. Re ka thoma le go nagana ka mafokodi ao bana babo rena bao ba re neago tlhahlo ba nago le ona. Ge re sepela ka tumelo, re a tseba gore Jehofa ke yena a hlahlago mokgatlo wa gagwe ebile o re tseba gabotse. Ge re ka gopola seo, re tlo kwa tlhahlo yeo re e hwetšago ntle le go ngongorega. (Baheb. 13:17) Re a tseba gore ge re ekwa re tlo dira gore ka phuthegong go be le botee. (Baef. 4:​2, 3) Re tshepa Jehofa ebile re a tseba gore le ge bana babo rena bao ba etelelago pele ba sa phethagala, Jehofa o tlo re šegofatša ge re ka ba kwa. (1 Sam. 15:22) Jehofa o tlo dumelela gore go be le diphetogo ge eba tlhahlo e itšego e ka swanelwa ke gore e fetošwe. w25.03 23-24 ¶13-14

Re phela dinakong tšeo di kgahlišago kudu! Letšatši le lengwe le lengwe re bona boporofeta bja Beibele bo phethagala. Ka mohlala, re bona “kgoši ya leboa” le “kgoši ya borwa” di lwela go ba le matla mo lefaseng. (Dan. 11:40) Re bona le ditaba tše dibotse tša Mmušo wa Modimo di bolelwa ka botlalo lefaseng ka moka moo batho ba dimilione ba arabelago gabotse. (Jes. 60:22; Mat. 24:14) E bile re hwetša dijo tše dintšhi tša moya “ka nako ya maleba.” (Mat. 24:​45-47) Jehofa o re thuša go kwešiša gabotse ditiragalo tšeo di tlago go direga nakong e tlago. (Die. 4:18) Re ka kgodišega gore ge masetlapelo a magolo a thoma, re tla be re tseba dilo ka moka tšeo re swanetšego go di tseba tšeo di tlago go re thuša go kgotlelela le go dula re na le botee. Re swanetše go dumela gore go na le dilo tše dingwe tšeo re ka se di tsebego ka bokamoso. w24.05 8 ¶1-2

Mopsalme o bolela ka go senya leina. Go senya leina ke’ng? Ke go bolela maaka ka motho yo mongwe gomme seo sa senya botumo bja gagwe. Psalme 15:3 e re botša gore baeng bao ba lego tenteng ya Jehofa ga ba sware baagišane ba bona gampe e bile ga ba goboše bagwera ba bona. (Ps. 15:1) Re ka goboša bagwera ba rena bjang? Re ka goboša batho ba bangwe re sa lemoge ka go phatlalatša mabarebare ka bona. Ka mohlala: (1) kgaetšedi o tlogela tirelo ya nako e tletšego, (2) banyalani ga ba sa hlankela Bethele, goba (3) ngwanabo rena ga a sa hlankela bjalo ka mogolo goba mohlanka wa bodiredi. Na e ka ba mo go swanelago gore re phatlalatše mabarebare a gore ke ka baka la’ng ba se sa hlankela? Go ka ba le mabaka ao re sa a tsebego a gore go be le diphetogo tšeo. Go oketša moo, baeng bao ba lego ka tenteng ya Jehofa ‘ga ba sware baagišane ba bona gampe e bile ga ba goboše bagwera ba bona.’ w24.06 11 ¶11-13

E le gore re dule re rata Jehofa le go mmoifa re swanetše go dira diphetho tšeo di mo kgahlago. Ge o bala dipego tša ka Beibeleng ipotšiše gore, ‘Ge nkabe ke le boemong bjo ke balago ka bjona ke be ke tlo dira phetho efe?’ Ka mohlala, inagane o be o le gare ga setšhaba sa Baisiraele ge dihlodi tšela tše lesome di be di tliša pego e mpe ka morago ga gore di hlole naga yeo Jehofa a bego a tshepišitše go nea Baisiraele. O be o tlo dira’ng? Na o be o tlo tšhoga goba o be o tlo tshepa Jehofa? Baisiraele ba bangwe ba ile ba se tshepe seo Joshua le Kalebe ba ilego ba ba botša sona. Seo sa dira gore ba se tsene nageng ya kholofetšo.—Num. 14:​10, 22, 23. w24.07 10 ¶7

Gomere o ile a tlogela Hosea a ya go banna ba bangwe. Na mosadi yoo o be a ka fetoga a itshola? Ka ge Jehofa a kgona go bona dipelo, o ile a botša Hosea gore: “Boela o rate mosadi wa gago yo a ratanago le monna yo mongwe, e bile a dira bootswa le yena, go etša ge Jehofa a rata Baisiraele le ge ba rapela medimo e mengwe.” (Hos. 3:1; Die. 16:2) Le ge mosadi wa Hosea a be a sa dira sebe se segolo, Jehofa o ile a kgopela Hosea gore a mo lebalele le go boelana le yena. Jehofa o dirišitše mohlala wa Hosea go bontšha batho ba gagwe gore o ikwa bjang ka bona. Le ge ba dira dibe tše dikgolo, Jehofa o be a ba bontšha gore o sa ba rata le gore o ikemišeditše go ba thuša gore ba itshole gomme ba tlogele dilo tše mpe tšeo ba bego ba di dira. Mohlala wo o re bontšha gore Jehofa o re tseba gabotse, le gore o tlo dula a thuša motho yo a dirilego sebe se segolo gore a itshole. w24.08 10 ¶7

Bajuda bao ba ilego ba ba Bakriste ba ile ba swanelwa ke go dira diphetogo tše di kgolo gomme seo se be se se bonolo. Jehofa o be a kgethile Bajuda gore e be setšhaba sa gagwe. Jerusalema e be e le sedulo sa Mmušo wa Modimo mo lefaseng, gomme tempele e be e dirišetšwa borapedi bjo bo hlwekilego. Bajuda ka moka bao ba botegago ba be ba latela molao wa Moshe woo ba bego ba o rutwa ke baetapele ba bona. Melao yeo e be e bolela ka dijo tšeo ba di jago, lebollo, le gore ba sware bjang batho bao e bego e se Bajuda. Eupša ka morago ga lehu la Jesu, Jehofa o ile a se sa amogela dihlabelo tšeo ba bego ba di dira. Go be go se bonolo gore Bajuda bao ba fetogilego Bakriste ba tlogele tsela yeo ba bego ba tlwaetše go hlankela Jehofa ka yona. (Baheb. 10:​1, 4, 10) Bakriste bao ba godilego moyeng ba go swana le moapostola Petro, le bona ba ile ba thatafalelwa ke go amogela diphetogo tšeo. (Dit. 10:​9-14; Bagal. 2:​11-14) Bakriste bao ba ile ba thoma go tlaišwa ke baetapele ba bodumedi bja Sejuda ka baka la ditumelo tša bona tše mpsha. w24.09 9 ¶4

Ge Jehofa a nea batho ba gagwe dikabelo, o letetše gore ba di phethe ka tsela e rulagantšwego. (1 Bakor. 14:33) Ka mohlala, ke thato ya Jehofa gore ditaba tše dibotse di bolelwe lefaseng ka moka. (Mat. 24:14) Jehofa o neile Jesu boikarabelo bja go kgonthišetša gore mošomo wo o a dirwa. Jesu o ile a kgonthišetša gore mošomo wo o dirwa ka tsela e rulagantšwego gabotse. Lekgolong la pele la mengwaga ge diphuthego di be di hlongwa mafelong a fapanego, go ile gwa kgethwa bagolo gore ba etelele pele le gore ba nee tlhahlo. (Dit. 14:23) Kua Jerusalema go ile gwa kgethwa sehlopha sa bagolo, seo se bego se na le baapostola le banna ba bagolo bao ba bego ba dira diphetho tšeo go bego go letetšwe gore diphuthego ka moka di di latele. (Dit. 15:2; 16:4) “Diphuthego di ile tša tšwela pele di matlafatšwa tumelong le go oketšega ka palo” ka gobane bana babo rena le dikgaetšedi ba be ba latela tlhahlo yeo ba bego ba e hwetša go bagolo.”—Dit. 16:5. w24.04 8 ¶1

Mesong ya Nisani 16, basadi ba bangwe bao ba botegago ba ile ba ya lebitleng leo Jesu a bego a bolokilwe go lona. (Luka 24:​1, 10) Yo mongwe wa basadi bao e be e le Maria Magdalena. Ge Maria a fihla lebitleng leo, o ile a hwetša le se na selo. O ile a tloga a ya go botša Petro le Johane ke moka a ba šala morago ge ba eya lebitleng. Ge ba hwetša lebitla le se na selo, ba ile ba boela gae. Eupša Maria yena o ile a šala moo a lla. O be a sa tsebe gore Jesu o mo lebeletše. Jesu o ile a bona gore mosadi yo o be a mo llela gomme a nyaka go mo homotša. O ile a iponagatša go Maria gomme a mo direla selo se bonolo seo se ilego sa mo kgothatša. O ile a mo laela gore a ye go bana babo gomme a ba botše molaetša woo o bohlokwa. Maria o ile a ba botša gore Jesu o a phela.—Joh. 20:​17, 18. w24.10 13 ¶7

Moshe e be e le moporofeta, moahlodi, moetapele le mongwadi. O ile a ntšha setšhaba sa Isiraele bokgobeng kua Egepeta le go bona mehlolo e mentšhi ya Jehofa. Jehofa o ile a mo diriša go ngwala dipuku tše tlhano tša mathomo tša Beibele, a mo diriša go ngwala Psalme 90, mohlomongwe le Psalme 91. Go ka direga le gore ke yena a ngwadilego puku ya Jobo. Pele ga ge Moshe a ka hwa ge a be a na le mengwaga e 120, o ile a bitša setšhaba sa Isiraele gore a se gopotše ka dilo tšeo Jehofa a ba diretšego tšona. Ba ile ba bona mehlolo yeo Jehofa a bego a e dira e bile ba be ba le gona nakong ya ge a otla Baegepeta. (Ek. 7:4) Ba ile ba sepela nageng e omilego ge ba be ba tshela Lewatle le Lehwibidu le go bona ge Jehofa a be a fediša madira a Farao. (Ek. 14:​29-31) Ge ba be ba le lešokeng, ba ile ba bona ge Jehofa a ba šireletša le go ba hlokomela. (Doit. 8:​3, 4) Ge Baisiraele ba le kgauswi le go tsena nageng ya kholofetšo, Moshe o ile a ba kgothatša la mafelelo. w24.11 8-9 ¶3-4

Dilo tšeo Jesu a di boletšego ge a be a na le baapostola ba gagwe nakong ya Selalelo sa Morena, ga di swane le tšeo a di boletšego ge a be a na le lešaba kua Galilea. Ge Jesu a be a le Galilea ka 32 C.E., o be a bolela le Bajuda bao ba bego ba nyaka senkgwa go yena. O ile a ba botša ka selo seo se bego se le bohlokwa kudu seo se bego se tlo dira gore ba hwetše bophelo bjo bo sa felego. O boletše le gore bao ba hlokofetšego ba tlo tsošwa letšatšing la mafelelo gomme ba phela ka mo go sa felego. Mo o be a sa bolele ka batho ba sego kae bao ba bego ba tlo tlotšwa ka moya o mokgethwa go swana le ge a boletše ka morago Selalelong sa Morena. Go e na le moo, ge a be a le Galilea o be a bolela ka selo seo se kgahlišago seo se bego se tlo hwetšwa ke batho ka moka. w24.12 11 ¶10-11

Jehofa o hloile batho bao ba ratago bošoro. (Ps. 11:5) O hloile banna bao ba tlaišago basadi ba bona. (Mal. 2:16) Ge e ba monna a sa sware mosadi wa gagwe gabotse, o senya segwera sa gagwe le Modimo. Jehofa a ka no se theetše le dithapelo tša gagwe. (1 Pet. 3:7) Banna ba bangwe ba kweša basadi ba bona bohloko ka go ba kgadimola le go ba hlabela mašata. Jehofa o hloile batho ba go “galefa, go kwata, go hlaba mašata le go hlabana ka mantšu.” (Baef. 4:​31, 32) Monna yo a hlabago mosadi wa gagwe ka mantšu o senya lenyalo la gagwe le segwera sa gagwe le Jehofa. (Jak. 1:26) Ka mo go swanago, monna yo a bogelago diswantšho le dibidio tša batho ba sa aparago o senya segwera sa gagwe le Jehofa ebile o dira gore mosadi wa gagwe a nyatšege. Jehofa o letetše gore monna a dule a botegela mosadi wa gagwe ka dilo tšeo a di naganago le tšeo a di bolelago. Jesu o boletše gore monna yo a lebelelago mosadi yo mongwe gore a mo kganyoge, o šetše a dirile bohlotlolo le yena “pelong ya gagwe.”—Mat. 5:​28, 29. w25.01 9 ¶6-8

Go bolelwa gore re lokile go ra gore melato yeo re nago le yona e phumotšwe gomme ga go sa hlokega gore re patelele dibe tšeo re di dirago. Jehofa o sa dutše a nyaka gore re phele ka melao ya gagwe ya motheo le ge go sa nyakege gore re patelele dibe tša rena. Ga a bolele gore re lokile ka gobane go na le selo se itšego seo re se dirilego, ebile ga se gore o dumelelana le dibe tšeo re di dirago. Eupša Jehofa o pateletše dibe tša rena ka baka la tumelo yeo re nago le yona thulaganyong ya gagwe ya poelano le topollong yeo a e lefilego. (Baroma 3:24) Re holega bjang ge Jehofa a bolela gore re lokile? Bao ba kgethilwego go yo buša le Jesu legodimong go šetše go boletšwe gore ba lokile ebile ke bana ba Modimo. (Tito 3:7; 1 Joh. 3:1) Dibe tša bona di lebaletšwe. Ga ba sa na molato gomme ba swanelega go ba Mmušong. (Baroma 8:​1, 2, 30) Bao ba nago le kholofelo ya go phela lefaseng ba bolelwa gore ke bagwera ba Modimo gomme dibe tša bona di lebaletšwe.—Jak. 2:​21-23. w25.02 5 ¶17; 7 ¶18

A re kweng gore ke neng moo moapostola Petro a ilego a palelwa ke go ekiša tsela yeo Jehofa a naganago ka yona. Jesu o ile a botša barutiwa ba gagwe gore o tlo ya Jerusalema gomme ge a le moo o tlo golegwa, a tlaišwa le go bolawa. (Mat. 16:21) Petro o be a tseba gore Jesu e be e le Mesia yo a holofeditšwego yoo a bego a tlo phološa setšhaba sa Modimo. Ke ka baka leo go bego go se bonolo gore Petro a tshepe gore Jehofa o dumeletše gore Jesu a bolawe. (Mat. 16:16) Petro o ile a tšea Jesu a mo iša ka thoko ke moka a re go yena: “Ikwele bohloko Morena; o ka se feleletše ka tsela ye le gatee.” (Mat. 16:22) Petro le Jesu ba be sa dumelelane ka taba ye ka gobane Petro o be a sa ekiše tsela yeo Jehofa a naganago ka yona. Jesu o be a tseba gore o swanetše go tlaišwa le go bolawa e le gore a dire thato ya Modimo. Ke ka baka leo a ilego a gana keletšo ya Petro le ge Petro a be a nyaka go mo thuša. Seo se dirile gore Petro a ithute go nagana ka tsela yeo Modimo a naganago ka yona. Le rena re ithuta selo se bohlokwa tabeng ye. w25.03 9 ¶5-6

Na o kwele bohloko ka baka la ge batho bao o ba tshepago ba dirile dilo tšeo di go nyamišitšego? Le ge batho ba ka go swara gampe, Tatago wa legodimong o tlo no dula a go rata kudu. Mantšu a Dafida ao a lego go temaneng ya lehono, a ka re homotša ge batho ba bangwe ba re nyamiša. Puku e nngwe yeo e bolelago ka Dipsalme ge e hlalosa ka “batho bao ba tlaišegago” e re e ka ba “batho bao ba se nago le kholofelo.” Jehofa o thuša bjang batho bao ba tlaišegago? Jehofa o swana le motswadi yo a ratago ngwana wa gagwe yo a mo homotšago ge a lla, gomme o dira se se swanago le ka rena. O a re thuša ge re nyamišitšwe ke batho bao re ba ratago. O dula a ikemišeditše go re homotša le go thoba dipelo tša rena tšeo di kwelego bohloko. O re nea le dilo tše dintšhi tšeo di ka re thušago gore re kgone go kgotlelela mathata ao re nago le ona.—Jes. 65:17. w24.12 23 ¶13-14

Lehono bagolo ba ka kgodišega gore Jehofa o bona mošomo wo ba o dirago le go o tšeela godimo. Bagolo ba swaregile ka go dira maeto a bodiši, go ruta le go ya tšhemong, e bile bagolo ba bangwe ba bantšhi le bona ba thekga mošomo wa go aga meago ya mokgatlo le go thuša ge go na le dikotsi. Ba bangwe ba hlankela Dihlopheng tša go Etela Balwetši goba Dikomiting tša go Hloma Kwano le Sepetlele. Bagolo bao ba ikgafago ka ditsela tše, ba lebelela phuthego e le thulaganyo ya Jehofa. Ba phetha dikabelo tša bona ka dipelo ka moka, e bile ba kgodišegile gore Modimo o ba putsa ka baka la mošomo wo ba o dirago. (Bakol. 3:​23, 24) Re ka se be bagolo ka moka ga rena. Eupša go na le seo re ka se neago Jehofa. Modimo wa rena o thaba kudu ge re dira sohle seo re ka se kgonago go mo hlankela. O lemoga seo re se dirago go thekga modiro wa lefase ka moka go sa šetšwe gore ke se se kaakang. E bile o thaba kudu ge re lebalela batho ba bangwe. Kgodišega gore Jehofa o leboga seo o mo direlago sona. O a go rata, e bile o tlo go putsa.—Luka 21:​1-4. w24.06 23 ¶12-13

Pego ye ya Solomone e re botša ka seo se ka diragalelago bahlanka ba Jehofa. Motho a ka dira sebe ke moka ka morago a nagana gore sebe seo se no direga ka ponyo ya leihlo, goba a re “ke no bona se šetše se diregile.” Eupša ge motho yoo a ka naganišiša ka seo se diragetšego, a ka bona gore o be a dira diphetho tšeo di sego bohlale gomme a feleletša a dirile sebe se segolo. Dilo tšeo di ka akaretša bagwera ba babe, boithabišo bjo bo sa hlwekago goba go etela mafelo ao a belaetšago le go se diriše inthanete gabotse. Mohlomongwe o tlogetše go rapela, go bala Beibele le go ya tšhemong. Ka ge re kwele ka lesogana leo go bolelwago ka lona go Diema, re kgona go bona gore sebe seo ga se no direga ka ponyo ya leihlo. Re ithuta’ng? Ga se ra swanela no phema go dira sebe eupša re swanetše go phema le dilo tšeo di ka dirago gore mafelelong re dire sebe. Se ke seo Solomone a bego a leka go se hlalosa.—Mat. 5:​29, 30. w24.07 16 ¶10-11

Letlotlo le ke eng? Ke mošomo wo o phološago maphelo wa go bolela ditaba tše dibotse. (2 Bakor. 4:1) Dibjana tša letsopa ke eng? Di swantšhetša bahlanka ba Modimo bao ba botšago batho ba bangwe ditaba tše dibotse. Mehleng ya Paulo, barekiši ba be ba diriša dibjana tša letsopa go rwala dilo tše bohlokwa tša go swana le dijo, beine le tšhelete. Ka tsela e swanago, Jehofa o bontšha gore o a re tshepa ka go re nea molaetša o bohlokwa wa go bolela ditaba tše dibotse. Ka ge Jehofa a re thekga, re kgona go ba le matla ao re a hlokago a go bolela ditaba tše dibotse ka go botega. Ka dinako tše dingwe re ka tšhaba batho goba ra tšhaba go ganetšwa. Re ka fenya bjang bothata bjoo? Nagana ka thapelo yeo baapostola ba ilego ba e rapela ge ba be ba laelwa gore ba se ke ba bolela ditaba tše dibotse. Go e na le gore ba tšhoge, ba ile ba kgopela Jehofa gore a ba thuše go tšwela pele ba bolela ka sebete. Jehofa o ile a araba thapelo ya bona kapelapela. (Dit. 4:​18, 29, 31) Ge ka dinako tše dingwe o ka ikwa o tšhaba batho, o ka kgopela Jehofa gore a go thuše gore o se sa tšhaba batho gomme o ba rate. w24.04 16 ¶8-9

Go rata Jehofa go re dira gore re kgethagatše leina la gagwe. Re nyaka go hlatswa leina la Modimo ka ge Sathane a le tsentše ka gare ga maraga. (Gen. 3:​1-5; Jobo 2:4; Joh. 8:44) Ge re le tšhemong re nyaka go botša batho ka moka bao ba re theetšago gore Jehofa ke Modimo wa mohuta mang. Re nyaka gore motho yo mongwe le yo mongwe a tsebe gore Modimo ke lerato, gore tsela yeo a bušago ka yona e lokile e bile ke ya toka le gore Mmušo wa gagwe o tlo fediša tlaišego ka moka wa dira gore batho ka moka ba phele ka khutšo e bile ba thabile. (Ps. 37:​10, 11, 29; 1 Joh. 4:8) Ge re ruta batho ka Jehofa re kgethagatša leina la gagwe. Re thaba kudu ge re tseba gore re phelela leina la rena. w24.05 18 ¶12

Ngwanabo rena o bontšha gore o “amogela baeng” ge o direla batho ba bangwe dilo tše dibotse, go akaretša le bao e sego bagwera ba gagwe ba kgauswi. (1 Pet. 4:9) Nyakišišo e nngwe ge e hlalosa motho yo a amogelago baeng e re: “O amogela motho yo mongwe le yo mongwe ga gagwe e bile o dula a ikemišeditše go thuša le batho bao a sa ba tsebego.” Ipotšiše gore, ‘Na ke tsebega ka go amogela baeng?’ (Baheb. 13:​2, 16) Motho wa go amogela baeng o swara batho ka moka gabotse, e ka ba batho bao ba se nago sa bona goba bao ba šomago ka thata, ba bjalo ka balebeledi ba tikologo le bao ba tlago go nea dipolelo phuthegong ya gabo bona.—Gen. 18:​2-8; Die. 3:27; Dit. 16:15; Baroma 12:13. w24.11 21 ¶6

Ge Jesu a be a bolela ka papišo ya dikgarebe, o boletše ka dikgarebe tše lesome tšeo di bego di ile go gahlanetša monyadi. (Mat. 25:​1-4) Dikgarebe tšeo ka moka di be di nyaka go thekga monyadi. Jesu o hlalositše gore dikgarebe tša hlano di be di le bohlale, mola tše dingwe tše hlano e le “mašilo.” Dikgarebe tšeo tše bohlale di be di ikemišeditše go emela monyadi le ge a be a ka fihla bošego. Ke ka baka leo di tlilego le mabone le makhura a ona. E bile dikgarebe tšeo di tlile le makhura a oketšegilego gore le ge monyadi a ka latelwa di dule di na le mabone. Dikgarebe tše di be di dula di le komana madula a bapile. (Mat. 25:​6-10) Ge monyadi a fihla, dikgarebe tšeo tše bohlale di ile tša ya go ipshina le monyadi. Bakriste bao ba tloditšwego ba swana le dikgarebe tšeo tše bohlale, ka gobane le bona ba swanetše go dula ba botega ge ba letetše monyadi e lego Jesu Kriste.—Kut. 7:​1-3. w24.09 21 ¶6

Ge re dula re nagana kamoo ditaba tše dibotse di holago batho ka gona lefaseng, re tlo dula re na le mafolofolo. Ngwaga o mongwe le mongwe batho ba dimilione bao ba thabelago molaetša wa rena ba tla segopotšong le go ithuta Beibele le rena. Batho ba bantšhi ba a kolobetšwa gomme ba thoma go bolela ditaba tše dibotse. Ga re tsebe gore ke batho ba ba kae bao ba tlago go re theetša ge re bolela ditaba tše dibotse, eupša re a tseba gore Jehofa o kgoboketša lešaba le legolo leo le tlago go phologa masetlapelo a magolo. (Kut. 7:​9, 14) Jehofa o a tseba gore batho ba bantšhi ba tlo theetša ditaba tše dibotse ka gona re swanetše go dula re di bolela. (Luka 10:2) Barutiwa ba Jesu ba be ba dutše ba tsebja ka go bolela ditaba tše dibotse ka mafolofolo. Ge batho ba lemoga kamoo baapostola ba bego ba bolela ditaba tše dibotse ka gona, ba ile ba thoma go “lemoga gore ba kile ba ba le Jesu.” (Dit. 4:13) Eka batho ba ka bona gore le rena ge re bolela ditaba tše dibotse re ekiša mohlala wa Jesu. w25.03 18 ¶15; 19 ¶17-18

Ge re bala Beibele re ithuta gore Jehofa o na le taba le batho bao ba bonagalago okare ga ba bohlokwa. Ka mohlala, Jehofa o ile a roma moporofeta Samuele gore a ye ntlong ya Jese a tlotše yo mongwe wa barwa ba gagwe gore e tle e be kgoši ya Isiraele. Jese o ile a bitša barwa ba gagwe gore ba tle ba kopane le Samuele gomme a tlogela Dafida yo e bego e le yo mo nyenyane. Eupša Jehofa o be a kgethile Dafida. (1 Sam. 16:​6, 7, 10-12) Jehofa o ile a bona gore Dafida o be a mo rata kudu. Nagana kamoo Jehofa a go bontšhago gore o bohlokwa ka gona. O go nea dikeletšo tšeo di ka go thušago. (Ps. 32:8) A ka se kgone go go thuša ge eba a sa go tsebe. (Ps. 139:1) Ge o diriša dikeletšo tšeo Jehofa a go neago tšona, o tlo bona gore o na le taba le wena. (1 Dikor. 28:9; Dit. 17:​26, 27) Jehofa o bona dilo ka moka tšeo o di dirago gore o mo kgahliše. O go tseba kudu, o nyaka gore o batamele kgauswi le yena.—Jer. 17:10. w24.10 25-26 ¶7-9

Re a tseba gore o rata Jehofa e bile o nyaka go hlankela ba bangwe. Bjale o ka thušwa ke’ng gore o dire mešomo yeo ba e dirago? Nagana gore o tlo thaba bjang ge o thuša bana beno le dikgaetšedi. Jesu o boletše gore: “Go na le lethabo le legolo go neeng go feta go amogeleng.” (Dit. 20:35) Jesu o be a phelela seo a se bolelago. O be a thabela go thuša batho ba bangwe. Nagana ka mohlala wo o lego go Mareka 6:​31-34. Ka letšatši le lengwe Jesu le baapostola ba gagwe ba be ba lapile. Ba be ba e ya lefelong leo go se nago motho gore ba khutše. Eupša lešaba leo le bego le nyaka gore Jesu a le rute le ile la ba fihlela pele mo ba bego ba eya gona. Jesu a ka ba a ile a gana go ba ruta. Ka gobane yena le baapostola ba gagwe “ba be ba se na nako ya go iketla gaešita le go ja dijo.” Goba a ka ba a ile a gomiša lešaba leo ka morago ga go le botša dilo tše sego kae. Eupša ka ge a be a rata batho, “o ile a thoma go ruta lešaba leo.”—Mar. 6:35. w24.11 16 ¶9-10

Batswadi thušang ngwana wa lena gore a kgone go botša batho ba bangwe ka di nnete tšeo di lego ka Beibeleng. (Baroma 10:10) O ka mmotšha gore go botša batho di nnete tšeo di lego ka Beibeleng, go ka swantšhwa le go ithuta go bapala seletšo se itšego sa mmino. Ge motho a thoma go ithuta, a ka bapala dikoša tšeo di lego bonolo. Ke moka ge nako e dutše e eya, o tlo kgona go bapala le tše dingwe tšeo di lego thatanyana. Ngwana a ka dira se se swanago ge a hlalosetša batho ba bangwe ka ditumelo tša gagwe. Ka mohlala, a ka botšiša ngwana yo a tsenago le yena sekolo gore: “Na o be o tseba gore bahlami ba ekiša dilo tšeo di šetšego di le gona? E re ke go bontšhe bidio ye nngwe a še.” Ka morago ga go mmontšha bidio ya dihlogo tšeo di rego Na di Hlamilwe?, a ka bolela gore: “Ge e ba mohlami a retwa ka baka la go dira selo a ekiša seo se šetšego se le gona, ke mang a swanetšego go retwa ka baka la go dira selo seo la mathomo.” Potšišo yeo e ka dira gore motho a šale a nyaka go ithuta ka mo go oketšegilego. w24.12 19 ¶17-18

Jehofa o ile a rulaganya gore a neele Jesu e le topollo gore a kgone go re lokolla sebeng le lehung. Eupša sehlabelo sa motho o tee yo a phethagetšego se ka phološa bjang batho ba dimilione? Moapostola Paulo o ngwadile gore: “Gobane go etša ge ka go se kwe ga motho o tee [e lego Adama] ba bantši ba ile ba dirwa badiradibe, ka mo go swanago ka go kwa ga motho o tee [e lego Jesu] ba bantši ba tla dirwa ba lokilego.” (Baroma 5:19; 1 Tim. 2:6) Ka mantšu a mangwe, ka baka la motho o tee wa go se kwe, ka moka ga rena re bile makgoba a sebe le lehu. Ka gona, go ile gwa nyakega motho o tee yo a phethagetšego wa go kwa gore a re lokolle. Na Jehofa o be a ka se no dumelela bana ba Adama bao ba nago le dipelo tšeo di lokilego gore ba phele ka mo go sa felego? Batho bao ba sa phethagalago ba be ba ka lebelela phetho ya mohuta woo e le e botse kudu. Eupša go dira bjalo go be go ka se bontšhe gore Jehofa o na le toka. Ka ge Jehofa a lokile, o be a swanetše go dira se sengwe ka go se kwe ga Adama. w25.01 21 ¶3-4

Moapostola Paulo o be a tseba gore e se kgale o tlo bolawa, eupša o be a kgotsofetše ka tsela yeo a phetšego ka yona. O boletše gore: “Ke feditše go kitima lebelo, ke bolokile tumelo.” (2 Tim. 4:​6-8) Paulo o ile a dira phetho e botse ya go hlankela Jehofa, ebile o be a tseba gore Jehofa o thabela seo. Le rena re ka dira diphetho tše dibotse gomme Jehofa a re amogela. Re ka dira bjang seo? Ge Paulo a be a bolela ka yena le Bakriste ba bangwe bao ba botegago o itše: “Re sepela ka tumelo, e sego ka go bona.” Ka Beibeleng go “sepela” ka dinako tše dingwe go ka bolela tsela yeo motho a kgethago go phela ka yona. Ge motho a sepela ka tumelo o dira diphetho tšeo di bontšhago gore o tshepa Jehofa Modimo. Dilo tšeo a di dirago di bontšha gore o a tseba gore Modimo o tlo mo putsa le gore o tlo holega ka baka la go latela keletšo yeo a e hwetšago ka Lentšung la Jehofa.—Ps. 119:66; Baheb. 11:6. w25.03 20 ¶1-2

Batho ba bantšhi bao ba bego ba na le mekgwa ya bophoofolo ba ile ba dira diphetogo tše dikgolo maphelong a bona ba thušwa ke moya o mokgethwa. (Jes. 65:25) Ba ile ba šoma ka thata go fetoša mekgwa ya bona ya kgale. (Baef. 4:​22-24) Ke therešo gore ka ge re se ra phethagala re sa dutše re dira diphošo. Le ga go le bjalo, Jehofa o kgobokantšhitše ‘batho ba mehuta yohle’ bao ba mo ratago le bao ba ratanago gomme seo se dira gore ba be le khutšo le botee. (Tito 2:11) Selo sa mohuta wo se ka dirwa feela ke Modimo ramatlaohle! Seo Jehofa a se bolelago se dula se phethagala. (Jes. 55:​10, 11) Paradeise ya moya ke ya kgonthe. Jehofa o re neile lapa leo le nago le batho bao ba mo hlankelago leo re ka se le hwetšego felo. Ka ge re le karolo ya lapa la gagwe re na le khutšo e bile re ikwa re bolokegile. (Ps. 72:7) Ka baka leo re nyaka go thuša batho ba bantšhi ka mo go ka kgonegago ka gona gore le bona e be karolo ya lapa le. Re ka dira se ka go etiša pele mošomo wa go dira barutiwa.—Mat. 28:​19, 20. w24.04 23 ¶13, 15

Jesu o be a rata Jehofa ka monagano wa gagwe ka moka. O be a tseba seo Jehofa a nyakago gore a se dire, ebile o be a ikemišeditše go mo kwa le ge a be a tlo tlaišwa. Ka ge Jesu a be a nyaka go thabiša Tatagwe, ga se a ka a dumelela selo le ge e le sefe se mo šitiša go dira bjalo. Petro le baapostola ba bangwe ba be ba fetša nako ba na le Jesu gomme seo se ba thušitše go tseba gore o be a nagana bjang. Ge Petro a be a ngwala lengwalo la gagwe la mathomo o kgothaleditše Bakriste gore ba nagane go swana le Kriste. (1 Pet. 4:1) Ge a be a ngwala lengwalo leo, o ile a diriša lentšu leo le bego le dirišwa ke mašole ge a be a re “itlhameng.” Ge Bakriste ba ka ithuta go nagana go swana le Jesu, ba tlo itlhama gomme ba kgona go lwantšhana le kganyogo ya go dira dilo tše di fošagetšego le ya go ekiša batho bao ba sa hlankelego Jehofa.—2 Bakor. 10:​3-5; Baef. 6:12.w25.03 8-9 ¶1-3

Ke dilo dife tšeo o swanetšego go ithuta tšona ka motho yoo o ratanago le yena? Pele o ka rata motho yoo kudu, boledišanang ka dilo tše bohlokwa tša go swana le dilo tšeo motho yoo a nyakago go di dira mo bophelong. O ka dira eng gore o kgone go tseba motho wa ka sephiring wa pelo? Tsela e nngwe yeo le ka dirago se ke ka go bolela nnete, go botšišana dipotšišo le go theetšana ka kelohloko. (Jak. 1:19) Ka nako e nngwe, dilo tšeo di ka le thušago gore le kgone go bolela e ka ba go ja gotee, go sepela ka moka, le go ya tšhemong. Selo se sengwe seo se ka le thušago gore le kgone go tsebana gakaone, ke go fetša nako le na le bagwera goba ba leloko. Le ka dira le dilo tše dingwe tšeo di tlago go le thuša go bona gore motho yo o ratanago le yena o itshwara bjang maemong a itšego goba ge a na le batho ba fapafapanego. w24.05 27-28 ¶6-7

E se kgale, re tlo kopana le mathata ao a nyakago re ithekga ka Jehofa go feta le ge e le neng pele. Beibele le diphihlelo tša bana babo rena ba mehleng yeno di ka re thuša go naganišiša kamoo Jehofa a ilego a ba bjalo ka leswika go bahlanka ba gagwe. Naganišiša ka mo go tseneletšego ka dipego tšeo tša ka Beibeleng. Go dira bjalo go tlo go thuša gore o dire Jehofa Leswika la gago. Ge re ka ekiša dika tša gagwe re tlo kgona go kgothatša bana babo rena ka phuthegong. Ka mohlala, Jesu o ile a nea Simone leina la Kefase (leo le fetolelwago e le “Petro”), yeo e bolelago “Leswika.” (Joh. 1:42) Leina leo le be le bontšha gore Petro o tla tla a kgothatša phuthego le go e matlafatša. Bagolo ba hlaloswa e le “moriti wa leswika le legolo nageng e omilego.” Seo se bontšha kamoo ba šireletšago phuthego ka gona. (Jes. 32:2) Re a tseba gore phuthego e holega kudu ge bana babo rena le dikgaetšedi ba ekiša dika tša Jehofa. w24.06 28 ¶10-11

Dikgoši tša Isiraele tšeo Jehofa a bego a di lebelela di botega, di be di mo hlankela ka tsela yeo a e amogelago. Jehofa o be a lebelela dikgoši tše dingwe e le tšeo di sa botegego. Di ile tša se sa kwa melao ya Jehofa gomme tša thekga le borapedi bja maaka. (1 Dikg. 21:​25, 26; 2 Dikor. 12:1) Ke ka baka la’ng taba ya borapedi e be e le bohlokwa kudu go Jehofa? Ka gobane dikgoši di be di na le boikarabelo bja go dira gore ditšhaba tša tšona di hlankele Jehofa ka tsela yeo a e amogelago. Le gona, go rapela medingwana ya maaka go be go dira gore batho ba dire dibe tše dikgolo le go swara batho ka go hloka toka. (Hos. 4:​1, 2) Go oketša moo, Baisiraele le di kgoši tša bona ba be ba ineetše go Jehofa. Ke ka baka leo Beibele e swantšhago borapedi bja maaka le bohlotlolo. (Jer. 3:​8, 9) Motho yo a dirago bohlotlolo o kweša molekane wa gagwe bohloko kudu. Ka mo go swanago, mohlanka wa Jehofa yo a ineetšego go yena eupša a hlankela le medingwana ya maaka, o mo kweša bohloko kudu.—Doit. 4:23. w24.07 22-23 ¶12-15