Bahlanka ba bangwe ba Jehofa ga ba sa kgona go hlankela Modimo ka tsela yeo ba bego ba tlwaetše ka yona ka gobane ba tšofetše goba ba a babja. Seo se ka ba nyamiša. Ba ka ipotšiša gore, ‘na ke sa le bohlokwa go Jehofa?’ Mongwadi wa Psalme 71 le yena o ile a ipotšiša ge eba a sa le bohlokwa go Jehofa. Ke ka baka leo a ilego a rapela ka gore: “O se ke wa ntlogela ge ke felelwa ke matla.” (Ps. 71:​9, 18) Eupša mopsalme yoo o be a tseba gore ge a ka dula a botegela Jehofa, Jehofa o tlo dula a mohlahla le go mo thekga. Mopsalme yoo o ile a ithuta gore Jehofa o thabišwa ke batho bao ba dirago sohle seo ba ka se kgonago go mo hlankela le ge go na le dilo tšeo di ba šitišago. (Ps. 37:​23-25) Ge eba o tšofetše nagana gore Jehofa o ikwa bjang ka wena. O tlo go thuša gore o tšwele pele o mo hlankela le ge go na le dilo tšeo di go šitišago. (Psalme 92:​12-15) O se ke wa dulela go nagana kudu ka dilo tšeo o se sa kgonago go di dira. w24.10 28 ¶14-16

Bakriste bao ba sego ba gola moyeng ba thatafalelwa ke go dira diphetho tše dibotse, kudu ge go se na molao wo o lebanyago wa Beibele mabapi le boemo bjo ba lebeletšanego le bjona. Ba bangwe ba nagana gore ba ka dira dilo ka go rata ge eba go se na molao wa Beibele wo o ba thibelago. Ba bangwe ba ka nyaka gore go be le melao le moo e sa nyakegego gona. Ka mohlala, go bonagala Bakriste ba kua Korinthe ba ile ba botšiša moapostola Paulo ge e ba go na molao wo o ba thibelago go ja dijo tšeo di diretšwego medingwana goba aowa. Go e na le gore Paulo a ba botše gore ba dire eng, o ile a ba botša gore letswalo la bona le swanetše go šoma e bile motho yo mongwe le yo mongwe o na le “tshwanelo ya go ikgethela.” O ile a ba bontšha gore melao ya motheo ya Beibele e ka ba thuša gore ba dire diphetho tšeo di ka ba tlogelago ba na le letswalo leo le hlwekilego e bile ba sa kgopiše ba bangwe. (1 Bakor. 8:​7-9) Paulo o be a thuša Bakorinthe gore e be batho bao ba godilego moyeng le gore ba kgone go diriša maatla a bona a tlhaologanyo go e na le go ithekga ka batho ba bangwe gore ba ba direle diphetho goba go nyakana le melao mo e sa nyakegego gona. w24.04 5 ¶14

Mehleng ya Jona, batho ba Ninife ba ile ba ba le sebaka sa go itshola. Le gona, gopola seo Jesu a ilego a se bolela ka go “tsogela kahlolo.” Tsogo ye e tlo akaretša le “bao ba tlwaetšego go dira dilo tše mpe.” (Joh. 5:29) Go bonala go ka ba le kholofelo ka batho ba Sodoma le Gomora. Go ka direga gore ba bangwe ba batho bao ba tsošwe, le gona re ka tla ra hwetša sebaka sa go ba ruta ka Jehofa le Jesu Kriste. Ka mehla Jehofa ke yena a ‘fetlekago pelo le go hlahloba dipshio.’ Nakong ya ge Jehofa a tsoša batho o tlo “nea yo mongwe le yo mongwe go ya ka ditsela tša gagwe.” Jehofa o dula a bontšha batho kwelobohloko, eupša ge go nyakega gore a tiiše letsogo o dira bjalo. Ga se ra swanela go no phetha ka gore motho a ka se tsošwe ntle le ge re kgodišegile gore seo ke se Beibele e se bolelago! w24.05 5-6 ¶15-16

Ke go tloga kgale bahlanka ba Modimo ba dutše ba matlafatšwa ke Lentšu la Modimo ge ba lebeletšane le dikabelo tše thata tšeo ba swanetšego go di dira. Nagana ka mohlala wa moporofeta Jeremia. Ge Jehofa a be a mo nea kabelo ya go botša ba bangwe ka yena, Jeremia o ile a dikadika. Jeremia o itše: “Ga ke tsebe go bolela, gobane ke fo ba mošemanyana.” (Jer. 1:6) O ile a thušwa ke eng gore a be le matla a go botša batho ba bangwe ka Jehofa? O ile a matlafatšwa ke Lentšu la Modimo. O itše: “Gwa ba bjalo ka ge eka ke mollo o fišago wo o tswaleletšwego marapong a ka; ka lapa go homola.” (Jer. 20:​8, 9) Le ge batho bao Jeremia a bego a swanetše go ba botša ditaba tše dibotse ka Jehofa ba be ba thatafišitše dihlogo, eupša molaetša woo a bego a swanetše go ba botša wona, o ile wa mo nea matla a gore a phethagatše mošomo woo Modimo a mo filego wona. Bakriste ba matlafatšwa ke molaetša wo o lego ka Lentšung la Modimo. Moapostola Paulo o itše go ba le tsebo e nepagetšego go tlo kgothaletša bana babo gore ba “[phele] ka tsela yeo Jehofa a e amogelago” le go tšwela pele ba dira “mediro e mebotse.”—Bakol. 1:​9, 10. w24.04 14-15 ¶2-4

Tsadoko o ile a dula a botegela Jehofa le ge Moperisita yo a Phagamego Abiathara a ile a kgetha go thekga morwa wa Dafida e lego Adonija yo a bego a nyaka go tšea sedulo sa bogoši. Dafida o be a tseba gore a ka dula a tshepa Tsadoko. Ka morago ga gore boradia bja Adonija bo utollwe, Dafida o ile a tshepa Tsadoko, Nathane le Benaya gore ba tlotše Solomone bjalo ka kgoši. (1 Dikg. 1:​32-34) Go ba gare ga bahlanka ba Jehofa bao ba botegago ba bjalo ka Nathane le ba bangwe bao ba bego ba thekga kgoši Dafida, go ka ba go ile gwa tiiša Tsadoko le go mo kgothatša. Ge Solomone a e ba kgoši, o ile a “bea moperisita Tsadoko legatong la Abiathara.” (1 Dikg. 2:35) O ka ekiša bjang Tsadoko? Ge e ba motho yo o mo ratago a kgetha go tlogela go hlankela Jehofa, wena dula o botegela Jehofa. (Josh. 24:15) Jehofa o tlo go nea matla le sebete. Ithekge ka yena ka go rapela le go dula o na le bahlanka ba gagwe bao ba botegago. Jehofa o tšeela godimo potego ya gago e bile o tlo go putsa ka baka la yona.—2 Sam. 22:26. w24.07 6-7 ¶16-17

Psalme 15:2 e re botša gore mogwera wa Modimo, “ke yo a se nago molato, yo a dirago se se lokilego.” Se ke seo re swanetšego go dula re se dira. Na go a kgonega gore ‘re dule re se na molato’? Ee. Ga go na motho yo a phethagetšego, eupša ge re ka dira sohle seo re ka se kgonago go dula re ekwa Jehofa, o tlo re lebelela ‘re se na molato.’ Ge re ineela go Jehofa e bile re kolobetšwa, re thoma go sepela le Modimo. Gopola gore mehleng ya Beibele, go no ba Moisiraele go be go sa bolele gore motho ke moeng tenteng ya Jehofa. Ba bangwe ba be ba mo rapela eupša e sego “ka go rereša le ka go loka.” (Jes. 48:1) Baisiraele ba botegago ba ile ba swanelwa ke go ithuta ka melao ya motheo ya Jehofa le go e latela. Ka mo go swanago, le lehono go no kolobetšwa le go kopanela le phuthego ya Bokriste ga go bolele gore Modimo o a re amogela. Re swanetše go dula re ‘dira se se lokilego.’ w24.06 9 ¶4; 10 ¶6

Ke dilo dife tšeo di re bontšhago gore Jehofa o rata go nea? A re boneng mehlala e se go kae. Jehofa o re nea dilo tšeo re di hlokago e lego dijo, diaparo le lefelo la go dula. Le ge a ka se dule a re nea dilo tša maemo a godimo, o tlo dula a re nea dilo tšeo re di hlokago. (Ps. 4:8; Mat. 6:​31-33; 1 Tim. 6:​6-8) Na Jehofa o re nea dilo tšeo re di hlokago ka gobane a gapeletšega? Aowa! Re bona se ka mantšu ao Jesu a boletšego go Mateo 6:​25, 26. O boletše ka dinonyana gore: “Ga di bjale peu goba go buna goba go kgobela dintlong tša polokelo.” O tšwetše pele ka gore: “Tatago lena wa legodimong o a di fepa.” Ka morago ga go bolela dilo tše ka moka o ile a botšiša gore: “Na ga le bohlokwa go di feta?” Jesu o be a leka go re ruta’ng? Ka ge Jehofa a kgona go hlokomela diphoofolo, le rena re a tshepa gore o tla re hlokomela! Jehofa o swana le tate yo lerato, o hlokomela lapa la gagwe ka gobane a le rata.—Ps. 145:16; Mat. 6:32. w24.09 26-27 ¶4-6

Mohlanka wa bodiredi ke ngwanabo rena yo a kolobeditšwego yo a kgethilwego ke moya o mokgethwa gore a thuše bagolo ka phuthegong. Bahlanka ba bodiredi ke banna bao ba ratago Jehofa le go phela ka melao ya gagwe. Le gona ba rata bana babo bona le di kgaetšedi kudu. (Mat. 22:​37-39) Ngwanabo rena yo a kolobeditšwego a ka dira’ng gore e be mohlanka wa bodiredi? Beibele e re botša gore e le gore ngwanabo rena a swanelege go ba mohlanka wa bodiredi o swanetše go ba le dika tša mohuta mang. (1 Tim. 3:​8-10, 12) Ge o nyaka go ba mohlanka wa bodiredi, ithute ka dika tšeo gomme o šome ka thata gore o be le tšona. Eupša o swanetše go tseba gore ke ka baka la’ng o nyaka go ba mohlanka wa bodiredi. w24.11 15 ¶4-5

Batho ba bangwe ba bolela gore ba badile Beibele gantšhi. Eupša na ba dumela seo e se rutago? Na ba lekile go phela ka go dumelelana le seo Beibele e se rutago goba go dira diphetogo maphelong a bona? Gantšhi karabo ke aowa. Eupša batho ba Modimo ba diriša seo ba ithutilego sona ka Beibeleng! Re dira sohle seo re ka se kgonago go diriša dilo ka moka tšeo re ithutago tšona ka Beibeleng. Gantšhi ga go bonolo go bala Lentšu la Modimo le go diriša seo o ithutilego sona. Re ka thatafalelwa ke go hwetša nako ya go bala Beibele. Goba re ka bala ka lebelo, ke moka ra palelwa le ke go naganišiša ka seo re ithutago sona. Goba re ka imelwa ke go bona diphetogo tšeo re swanetšego go di dira. Bothata bjo bongwe le bjo bongwe bjoo o ka kopanago le bjona bo na le tharollo. Jehofa o tlo go thuša. Eka re ka dira sohle seo re ka se kgonago gore re be badiri ba Lentšu. Ga go pelaelo gore ge re ka bala Lentšu la Modimo le go le diriša maphelong a rena, re tlo dula re thabile.—Jak. 1:25. w24.09 7 ¶15-16

Jehofa o diriša moya wa gagwe o mokgethwa go re kgothatša ge re ekwa bohloko goba ge motho yo re mo ratago a hlokofala. Ge e ba o lebeletšane le mathata, rapela Jehofa ka mehla gomme o mo ntšhetše sa mafahleng. (Ps. 86:3; 88:1) Dula o kgopela Jehofa gore a go tšhollele moya wa gagwe o mokgethwa. O tlo dula a go thuša. Na o ile wa welwa ke mathata ao a go fetšago matla? Moya o mokgethwa o ka go thuša gore o tšwele pele o hlankela Jehofa ka go botega. (Baef. 3:16) O swanetše go dira’ng gore moya o mokgethwa o kgone go go thuša? Dira dilo tšeo di ka thušago moya wa Modimo gore o šome go wena. Dilo tšeo di akaretša go ba gona dibokeng ka mehla le go ya tšhemong. Tlatša monagano wa gago ka dikgopolo tša Jehofa letšatši le lengwe le le lengwe. (Bafil. 4:​8, 9) Ge o dutše o bala, naganišiša ka batho ba ka Beibeleng bao ba ilego ba kopana le mathata, ke moka o bone kamoo Jehofa a ilego a ba thuša ka gona gore ba kgone go kgotlelela. w24.10 9 ¶12-14

Re rata batho go swana le Jehofa le Morwa wa gagwe. (Die. 8:31) Re ba kwela bohloko ka gobane ga ba na “kholofelo” e bile ga ba “tsebe Modimo.” (Baef. 2:12) Ba na le mathata a mantši, gomme rena re na le selo seo se ka ba thušago e lego ditaba tše dibotse tša Mmušo wa Modimo. Ka ge re ba rata e bile re ba kwela bohloko re dira sohle seo re ka se kgonago gore re ba botše ditaba tše dibotse. Molaetša wo o bohlokwa o ka dira gore ba be le kholofelo, wa ba thuša le gore ba be le bophelo bjo bo kaone gona bjale. Le go ba thuša gore ba be le kholofelo ya bophelo bja kgonthe, e lego bophelo bjo bo sa felego lefaseng le leswa la Modimo. (1 Tim. 6:19) Ka ge re rata batho re ba botša gore tshepedišo ye e kgopo ya dilo e tlo fedišwa. (Hesek. 33:​7, 8) Re nyaka gore ba tsebe seo se tlago go direga nakong ya masetlapelo a magolo. Sa pele, bodumedi bja maaka bo tlo fedišwa, ke moka ka morago gwa fedišwa tshepedišo ye e kgopo ya dilo ka ntwa ya Haramagedone.—Kut. 16:​14, 16; 17:​16, 17; 19:​11, 19, 20. w24.05 16-17 ¶8-9

Moapostola Paulo o ile a kgothaletša Bakriste gore ba “[šuthelele] kgalefo ya Modimo.” Re šuthelela kgalefo ya Jehofa ka go mo dumelela gore a dire phetho ya gore o tla tliša toka neng le gona bjang. Ka morago ga gore ngwanabo rena yo a bitšwago John a se swarwe gabotse, o ile a re: “Ke ile ka swanelwa ke go laola tsela yeo ke ikwago ka yona gore ke se ke ka dira dilo tšeo di fošagetšego. Lengwalo la Baroma 12:​19, le nthušitše gore ke se ke ka fela pelo le gore ke tshepe Jehofa.” Re holega kudu ge re dumelela Jehofa a re thuša go lokiša ditaba. Go dira bjalo, go tlo re thuša gore re se ke ra imelwa le go hlakahlakana ka baka la go leka go lokiša mathata ao re tsebago gore re ka se kgone go a lokiša. Jehofa o ikemišeditše gore thuša. O re botša gore: “Tefetšo ke ya ka, ke tla lefetša.” Ge e ba re tshepa gore Jehofa ‘o tla re lefetša,’ gona re tla kgona go se dule re galefile ka gobane re a tseba gore Jehofa o tlo dira selo seo se lokilego. w24.11 6 ¶14-15

Re swanetše go hlokomela gore dilo tšeo e se ke ya ba tšona di tlago pelo maphelong a rena. Moapostola Paulo le yena o ile a nea Bakriste ba lekgolong la pele la mengwaga keletšo e swanago. O ile a bolela ka dilo tšeo di ilego tša diragalela Baisiraele go akaretša le seo se diragetšego kgauswi le Thaba ya Sinai. O ile a tšwela pele a ba eletša ka gore le se “kganyoge dilo tše di gobatšago, go etša ge [Baisiraele] ba ile ba di kganyoga.” (1 Bakor. 10:​6, 7, 11) Jehofa o ile a nea Baisiraele dijo ka mohlolo eupša ka ge ba be ba na le megabaru ba ile ba feleletša ba bile le ditlamorago tšeo di sego bose. (Num. 11:​4-6, 31-34) Ge ba be ba dirile namane ya gauta, ba ile ba ja, ba nwa ba ba ba ipshina. (Ek. 32:​4-6) Paulo o ile a bolela ka dilo tšeo di diragaletšego Baisiraele gore a lemoše Bakriste nakong ya ge tshepedišo ya Bajuda e le kgauswi le go fedišwa ka 70 C.E. Gona bjale ka ge re phela mehleng ya bofelo, re swanetše go tšeela keletšo ya Paulo godimo. w24.12 6 ¶13

Jehofa ke “Modimo yo a thabilego,” ebile o nyaka gore le rena re thabe. (1 Tim. 1:11) Go na le dilo tše dintšhi tšeo a re filego tšona e le gore re thabele bophelo. (Jak. 1:17) E nngwe ya dilo tšeo ke lenyalo. Ge monna le mosadi ba nyalana, ba tshepišana gore ba tlo ratana le go hlomphana. Ge ba ka dula na ratana le go hlomphana ba tlo thaba. Go a nyamiša go bona gore banyalani ba bantšhi ga ba sa swarana ka tsela yeo ba tshepišanego gore ba tla swarana ka yona ge ba be ba nyalana. Se se dira gore ba se ke ba thaba. Jehofa o letetše gore banna ba sware bjang basadi ba bona? Jehofa o nyaka gore banna ba hlomphe basadi ba bona. Monna yo a hlomphago mosadi wa gagwe, o tla mo swara gabotse le go mo rata.—1 Pet. 3:7. w25.01 8 ¶1-2; 9 ¶4-5

Ga re belaele gore lengwalo leo moapostola Paulo a ilego a le ngwalela Baheberu le ile la thuša Bakriste ba lekgolong la pele la mengwaga gore ba tle ba kgone go kgotlelela mathata ao ba bego ba tlo lebeletšana le ona. Paulo o ile a kgothaletša bana babo gore ba ithute Mangwalo ka mo go tseneletšego le go a kwešiša. Go dira bjalo go be go tlo ba thuša gore ba lemoge dithuto tšeo di be di tlo fokodiša tumelo ya bona. O ile a ba kgothaletša le gore ba tiiše tumelo ya bona gore ba tle ba kgone go latela taelo ya Jesu le go kwa bao ba etelelago pele ba sa ngongorege. O thušitše Bakriste bao gore ge ba dutše ba kgotleletše mathata a bona, ba bone seo e le tlwaetšo e tšwago go Tatago bona yo lerato. Le rena re ka swana le Bakriste bao, ra bona go kgotlelela e le sebaka se sebotse sa go tlwaetšwa ke Jehofa. Seo se tlo re thuša gore re kgone go kgotlelela go fihla mafelelong.—Baheb. 3:14. w24.09 13 ¶17, 19

Ka Beibeleng go bolelwa gore Jehofa o ile a bona go nyakega topollo gore re kgone go lebalelwa dibe le gore re kgone go ba bagwera ba gagwe. Go be go nyakega topollo ya mohuta mang gore batho ba kgone go hwetša seo Adama a se lahlilego? Gopola gore Adama le Efa ba ile ba fetoga batho bao ba sa phethagalago, ba se sa ba le tebelelo ya go phela ka mo go sa felego. Ka gona, topollo e swanetše go lekana le selo seo se lahlegilego. (1 Tim. 2:6) Topollo yeo e ka ba ka monna yo a godilego yoo a phethagetšego, yo a ka kgonago go phela ka mo go sa felego mo lefaseng, le yo a ka ikemišetšago go neela bophelo bja gagwe bakeng sa rena. A re kweng mabaka a mararo ao a dirilego gore Jesu a kgone go ba topollo. (1) O be a phethagetše, “ga se a ka a dira sebe.” (1 Pet. 2:22) (2) O be a ka kgona go phela ka mo go sa felego mo lefaseng. (3) O be a ikemišeditše go hwa le go neela bophelo bja gagwe bakeng sa rena.—Baheb. 10:9. w25.02 4-5 ¶11-12

Kgodišega gore Jehofa o a go rata ebile o nyaka gore o be karolo ya lapa la gagwe. Jehofa o tlo go thuša gore o kgone go fenya mathata ka moka ao a go šitišago gore o kolobetšwe. Jesu o ile a botša barutiwa ba gagwe ba lekgolong la pele la mengwaga gore: “Ge e ba le na le tumelo e lekanago le thoro ya sehlare sa mosetata, le tla re go thaba ye: ‘Tloga mo o ye mola,’ ke moka ya tloga gomme go ka se be le seo se le palelago.” (Mat. 17:20) Batho bao Jesu a bego a bolela le bona ba be ba phetše le yena mengwaga e sego kae feela. Tumelo ya bona e be e sa gola. Jesu o ile a ba kgonthišetša gore ge ba ka dula ba na le tumelo, Jehofa o tlo ba thuša ge ba ka ba le mathata a magolo. Le wena Jehofa o tlo go thuša. Ge e ba o bona gore go na le dilo tšeo di ka go šitišago go kolobetšwa, di tlogele ntle le go dikadika. Ineele go Jehofa le gore o kolobetšwe. Ge o ka dira bjalo o ka se tsoge o itshotše. w25.03 7 ¶18-20

Re ka kgona go kgotlelela mathata ge re tseba gore Modimo yo a phelago o ikemišeditše go re thuša. Re ka kgodišega gore Jehofa o tlo re thuša ge re ka gopola dilo tšeo a di dirilego nakong e fetilego. (Jes. 37:​17, 33-37) O ka bala le dipego tšeo di lego wepesaeteng ya rena ya jw.org tšeo di bontšhago kamoo Jehofa a ile a thekga bana babo rena le dikgaetšedi mehleng ya rena. E bile o ka gopola le kamoo Jehofa a ilego a go thuša ka gona. O se ke wa tshwenyega ge e ba o se wa ka wa diragalelwa ke selo se segolo. Ka baka la’ng? Ka gobane ke kgale Jehofa a go thuša. O go gogetše go yena gore o be mogwera wa gagwe. (Joh. 6:44) Kgopela Jehofa gore a go thuše go gopola dinako tšeo a ilego a araba dithapelo tša gago. Gopola kamoo a ilego a go thuša ka gona nakong ya ge o be o tloga o hloka thušo, goba a go thuša go lebeletšana le boemo bjo itšego bjo boima. Go naganišiša ka dilo tšeo go tlo go thuša go tshepa gore Jehofa o tlo dula a go thuša. w24.06 21 ¶8

Re nyaka go dula re dira dilo tšeo di thabišago Jehofa. Eupša ka ge re sa phethagala re ka fela re lekega go dira dilo tše di fošagetšego. (Baroma 7:​21-23) Ge re ka se hlokomele, re ka bona e se phošo go dira dilo tše di fošagetšego. E le gore re dule re botegela Jehofa le Morwa wa gagwe, re swanetše go gopola keletšo ya Jesu ya gore re dule re phakgame. Ka moka ga rena re ka lekega go dira sebe. Eupša yo mongwe le yo mongwe go na le moo a fokolago gona, e ka ba go lekega go dira sebe se segolo, go itshwara ka tsela e sa hlwekago goba go dira dilo tšeo di dirwago ke bao ba sa hlankelego Modimo. Ka mohlala, yo mongwe a ka no ba a lwantšhana le go dira bootswa. Yo mongwe a ka ba a lwantšhana le mekgwa e sa hlwekago ya go swana le go swaraswara ditho tša bong ka morero wa go ikgotsofatša goba go bogela dibidio le diswantšho tša batho bao ba sa aparago. Mola batho ba bangwe ba ka ba ba tšhaba batho, ba ikgogomoša, ba fela pelo goba ba lebeletšane le mathata a mangwe. w24.07 14 ¶3; 15 ¶5

Nagana gore go be go tla direga eng ge nkabe bagolo ba gane go bušetša monna yo a bego a itshola ka phuthegong, goba ka morago ga gore a bušetšwe phuthego e palelwe ke go mmontšha gore e a mo rata. O be a ka ‘imelwa ke go nyama go feta tekano.’ O be a ka ipona a se na mohola. E bile o be a ka tlogela go leka go lokiša segwera sa gagwe le Jehofa. Se sengwe gape ke gore ge nkabe Bakriste bao ba palelwe ke go swarela monna yoo, ba be ba tlo senya segwera sa bona le Jehofa. Ka baka la’ng? Ka gobane ba tla be ba sa ekiše Jehofa yo a lebalelago batho bao ba itsholago, go e na le moo, ba tla be ba ekiša Sathane yo a lego sehlogo e bile a sa kwele batho bohloko. Le gona, ba tla be ba dumelela Sathane gore a ba diriše go nyamiša monna yo gore a se ke a hlankela Jehofa.—2 Bakor. 2:​10, 11; Baef. 4:27. w24.08 17 ¶7, 10-11

Jesu Kriste o ile a nea diphuthego “dimpho” tšeo e lego banna bao ba hlankelago ka tsela e fapanego. O ile a hlahla bagolo kua Jerusalema gore ba romele Paulo, Baranaba, le ba bangwe gore e be balebeledi ba basepedi. (Dit. 11:22) Ka baka la’ng? Ka gobane ba be ba swanetše go dira mošomo wo o bego o swanetše go dirwa ke bagolo le bahlanka ba bodiredi e lego go tiiša diphuthego. (Dit. 15:​40, 41) Balebeledi ba tikologo ba dula ba le tseleng. Ba bangwe ba sepela maeto a matelele ge ba etela diphuthego. Beke e nngwe le e nngwe, molebeledi wa tikologo o nea dipolelo tše mmalwa, o dira maeto a bodiši le go swara seboka sa babulamadibogo, seboka sa bagolo le go swara diboka tša tirelo ya tšhemo. O lokišetša dipolelo le go rulaganya dikopano. O ruta dikolong tša babulamadibogo, o rulaganya seboka se se kgethegilego le babulamadibogo ba tikologo e bile o swaragana le merero e mengwe yeo ka dinako tše dingwe e akgofilego yeo a e abetšwego ke ofisi ya lekala. w24.10 21 ¶12-13

Moporofeta Jeremia o tsopotše mantšu ao Jehofa a a boletšego go temana ya letšatši ya lehono. Moapostola Paulo o ile a tsopola mantšu ao ge a be a re: “Nka se sa hlwa ke gopola dibe tša bona le ka mohla.” (Baheb. 8:12) Mantšu ao a ra go re’ng? Ka Beibeleng, lentšu “gopola” ga se ka mehla le bolelago go dula o gopola dilo tšeo di ilego tša direga nakong e fetilego goba go nagana ka tšona. Go e na le moo, le ka bolela gore motho a ka dira selo se itšego. Modiradibe yo a bego a fegilwe kgauswi le Jesu o ile a re: “Jesu, o nkgopole ge o tsena Mmušong wa gago.” (Luka 23:​42, 43) Monna yoo, o be a kgopela gore Jesu a mo direle selo se itšego. Tsela yeo Jesu a arabile a ka yona e bontšhitše gore o tla tsoša monna yoo. Ge Jehofa a re botša gore a ka se sa gopola dibe tša rena, o ra gore a ka se tle a re patediša ka baka la tšona. A ka se tle a re otlela dibe tšeo re ilego ra di dira ka gobane o tloga a phumotše melato ya rena. w25.02 10-11 ¶14-15

Go tseba dika tša Jehofa, merero ya gagwe le dilo tšeo a di ratago goba a di hloilego go tlo re thuša gore re kwešiše dilo gabotse. Ipotšiše gore, ‘Dilo tšeo ke di tsebago ka Jehofa di nthuša bjang gore ke dire diphetho tšeo di mo kgahlišago?’ (Baef. 5:17) Ka dinako tše dingwe re ka swanelwa ke go nyamiša batho bao re ba ratago gore re kgone go kgahliša Jehofa. Ka mohlala, batswadi bao ba ratago morwedi wa bona ba ka nyaka gore a nyalwe ke monna wa go ba le tšhelete goba yo a ka kgonago go patela magadi a mantšhi, le ge a sa hlankele Jehofa gabotse. Re a tseba gore ba nyaka gore ngwana wa bona a hlokomelwe, eupša ke mang a tlo mo thušago gore a hlankele Jehofa gabotse? Jehofa yena o ikwa bjang? Lengwalong la Mateo 6:33 go na le karabo. Temaneng yeo Bakriste ba kgothaletšwa go “tsoma Mmušo pele.” Le ge re rata batswadi ba rena le batho ba moo re dulago gona, selo sa bohlokwa kudu go rena ke go kgahliša Jehofa. w25.01 17 ¶9-10

Re hloka thušo ya Jehofa gore re kgone go bolela ditaba tše dibotse ka mafolofolo le ge re ganetšwa. (Kut. 12:17) Ke ka baka la’ng re ka kgodišega gore Jehofa o tlo re thekga? Nagana ka thapelo ya Jesu yeo e lego go Johane kgaolo 17. Jesu o ile kgopela Jehofa gore a thuše baapostola ba gagwe gomme Jehofa o ile a araba thapelo yeo. Lengwalo la Ditiro le re botša kamoo Jehofa a ilego a thuša baapostola gore ba bolele ditaba tše dibotse ka mafolofolo le ge ba be ba tlaišwa. Ge Jesu a be a rapela, o ile a kgopela Jehofa gore a šireletše batho bao ba bego ba tlo dumela seo baapostola ba bego ba tlo ba ruta sona. Seo se akaretša le rena. Jehofa o sa dutše a araba thapelo ya Jesu, gomme o tla re thuša go swana le ge a ile a thuša baapostola. (Joh. 17:​11, 15, 20) Go ka ba thatanyana go dula re bolela ka mafolofolo ge bofelo bo dutše bo batamela eupša Jesu o tshepišitše gore o tlo dula a re thuša.—Luka 21:​12-15. w25.03 18 ¶13-14

Bahlanka ba Modimo ba “goeletša ka lethabo” ka gobane ba leboga Jehofa kudu. Ditherešo tše di agago le dikholofetšo tše di lego ka Lentšung la Modimo tše di kgothatšago gotee le kholofelo yeo re nago le yona yeo e theilwego sehlabelong sa Jesu sa topollo, di dira gore re be le “boemo bjo bobotse bja pelo.” Re thaba kudu ge re bolela! (Ps. 34:8; 133:​1-3) Bahlanka ba Jehofa bao ba lego paradeiseng ya moya ba na le dika tše pedi tše dikgolo e lego lerato le botee. “Botee” bjo bo re bontšha gore bophelo bo tla ba bo le bjang lefaseng le leswa moo bahlanka ba Jehofa ba tlago go ratana le go ba le botee go feta lehono. (Bakol. 3:14) Motho yo mongwe le yo mongwe yo a nyakago go thaba le go kgotsofala e le ka kgonthe, o swanetše go latswa paradeise ya rena ya moya. Bahlanka ba Jehofa lefaseng ka moka ba na le botumo bjo bobotse go sa šetšwe gore lefase le nagana eng ka bona.—Jes. 65:15. w24.04 21 ¶7-8

Re ka thuša bjang Bakriste bao ba nyakago go nyala? Tsela e nngwe ke ka go hlokomela seo re se bolelago. (Baef. 4:29) Re ka ipotšiša gore: ‘Na ke kwera batho bao ba nyakago go nyala? Na ge ke bona ngwanabo rena le kgaetšedi bao ba sego ba nyalana ba boledišana, na ke phetha ka gore ba nyaka go ratana?’ (1 Tim. 5:13) Ga se ra swanela go dira gore bao ba sego lenyalong ba ikwe ba se bohlokwa. Re ka dira sohle seo re ka se kgonago gore re kgothatše bana babo rena bao ba sego lenyalong! Re ka dira’ng ge re ka nagana gore ngwanabo rena yo a itšego le kgaetšedi ba swanelana? Beibele e re botša gore re naganele batho ba bangwe. (Baroma 15:2) Batho ba bangwe bao ba sego lenyalong ga ba rate go nyakelwa batho gomme rena re swanetše go hlompha seo. (2 Bathes. 3:11) Ba bangwe ba ka thabela go thušwa, eupša re swanetše go ba botšiša pele.—Die. 3:27. w24.05 24-25 ¶14-15

Ka dinako tše dingwe re kopana le mathata ao a ka dirago gore bophelo bja rena bo be thata goba bo fetoge ka mo go feletšego. Go a kgothatša go tseba gore re ka ya go Jehofa ge re hloka thušo. Ge a re thuša, re a kgodišega gore “Jehofa ke Modimo yo a phelago!” (Ps. 18:46) Ka morago ga go bolela mantšu ao, Dafida o ile a re Modimo “o swana le Leswika le legolo.” Ke ka baka la’ng a ka swantšha Jehofa le leswika? Beibele e diriša lentšu “leswika” go re thuša go kwešiša dika tše dingwe tšeo Jehofa a nago le tšona. Gantšhi ka Beibeleng ge bahlanka ba Jehofa ba mo tumiša ba mo hlalosa e le leswika. Jehofa o bitšwa Leswika la mathomo go Doiteronomio 32:4. Ge Hanna a be a rapela, o ile a re “ga go leswika leo le etšago Modimo wa rena.” (1 Sam. 2:2) Habakuku o ile a re Jehofa ke “Leswika la ka.” (Habak. 1:12) Mongwadi wa Psalme 73 o ile a re Modimo “ke leswika la ka.” (Ps. 73:26) Jehofa le yena o ile a ipitša leswika.—Jes. 44:8. w24.06 26 ¶1, 3

Dikgoši tša Isiraele tšeo di bego di rata Jehofa di be di mo hlankela ka dipelo tša tšona ka moka. Ge Beibele e bolela ka Josia e re: “Go be go se gwa ka gwa ba le kgoši e swanago le yena pele gagwe yeo e ilego ya boela go Jehofa ka pelo ya yona ka moka.” (2 Dikg. 23:25) Solomone yo a ilego a dira dilo tše mpe ka morago, yena “pelo ya gagwe e be e se e feletšego go Jehofa Modimo.” (1 Dikg. 11:4) Le gona, ge Beibele e bolela ka kgoši yeo e bego e sa botege e lego Abijama, e re: “Pelo ya gagwe ya se be e feletšego go Jehofa Modimo.” (1 Dikg. 15:3) Gantšhi Beibele e diriša lentšu “pelo” go hlalosa tsela yeo motho a lego ka yona, e lego seo se akaretšago dilo tšeo a di ratago, dilo tšeo a di naganago, tsela yeo a dirago dilo ka yona, mekgwa ya gagwe, dilo tšeo a kgonago go di dira le dilo tšeo a nyakago go dira. Go hlankela Jehofa ka pelo e feletšego go bolela’ng? Motho wa pelo e feletšego ga a ikwe eka o gapeletšega go hlankela Modimo. Go e na le moo, o hlankela Jehofa ka gobane a mo rata ka pelo ka moka e bile a mo hlompha. E bile o dira seo bophelong bja gagwe ka moka. w24.07 21 ¶4-5

Go na le mohlala o mongwe wo Jehofa a o dirišago go re bontšha ka mo a re lebalelago ka gona. O itše: “Ke tla phumola dikarogo tša gago bjalo ka ge eka di khupeditšwe ke leru, dibe tša gago ka di phumola bjalo ka ge eka di khupeditšwe ke maru.” (Jes. 44:22) Ge Jehofa a re lebalela, go no swana le ge eka o diriša maru go khupetša dibe tšeo re mo direlago tšona gore di se ke tša bonagala. Mohlala wo o re ruta’ng? Ge Jehofa a re lebalela ga se ra swanela go ikwa re le molato bophelong bja rena ka moka. Sehlabelo sa Jesu Kriste se phumola melato ya rena ka moka. Ge e ba re itshola, Jehofa o phumola dibe tša rena ka moka gwa ba bjalo ka ge eka ga se tša ka tša ba gona. Ge Jehofa a re lebalela seo se dira gore re kgone go ba le segwera se se botse le yena le gona re ka se sa ikwa re na le molato. w25.02 10 ¶11-14

Jehofa o nyaka gore bagolo ba gopole gore ba na le boikarabelo bja go netefatša gore phuthego e dula e hlwekile. (1 Bakor. 5:7) Le gona, o nyaka gore ge eba go kgonega, motho yo a dirilego sebe se segolo a itshole. Ge ba thuša motho, ba tshepa gore o tla itshola gomme a fetoga. Ka baka la’ng? Ka gobane ba nyaka go ekiša Jehofa yo a nago le “lerato le legolo e bile [e le] yo a gaugelago.” (Jak. 5:11) Moapostola Johane yo a bego a tšofetše le yena o be a bontšha gore o rata phuthego. O ngwadile gore: “Bana ba ka ba ba rategago, ke le ngwalela dilo tše gore le se ke la dira sebe. Eupša ge e ba motho a ka dira sebe, re na le mothuši yo a nago le Tate, e lego Jesu Kriste, yena yo a dirago dilo tše di lokilego pele ga Modimo.” (1 Joh. 2:1) Ka maswabi, ka dinako tše dingwe Mokriste a ka gana go itshola. Ka gona, o swanetše go tlošwa ka phuthegong. w24.08 25 ¶19-20

O se ke wa ipapetša le batho ba bangwe! Ka baka la’ng? Ka gobane Jehofa le yena ga a re bapetše le batho ba bangwe. (Bagal. 6:4) Ka mohlala, Maria o ile a tlotša Jesu ka makhura a go tura a monko o bose. (Joh. 12:​3-5) Mohlologadi yo a bego a diila o ile a neela ka ditšheletiana tša tšhipi tše pedi. (Luka 21:​1-4) Eupša Jesu o bone dimpho tšeo ka moka di le bohlokwa. Jesu o be a ekiša Jehofa. Ka gona re ka kgodišega gore Jehofa o tšeela godimo dilo ka moka tšeo re kgonago go mo direla tšona ka gobane re mo rata. Ka moka ga rena re fela re belaela. Eupša Beibele e ka re thuša gore re se sa ba le dipelaelo. Dira sohle seo o ka se kgonago, go hwetša dikarabo tša dipotšišo tšeo o ka bago o na le tšona e le gore o se sa belaela. Kgodišega gore Jehofa o go tseba gabotse. O leboga dilo ka moka tšeo o mo direlago tšona e bile o tlo dula a go šegofatša. Jehofa o rata bahlanka ba gagwe ka moka e bile o ba bona ba le bohlokwa. w24.10 25 ¶3; 29 ¶17-18