Psalme 18:1-50
Ditaelo tšeo di yago go mohlahli. Koša ya Dafida mohlanka wa Jehofa, yeo a e opeletšego Jehofa letšatšing la ge Jehofa a mo phološa diatleng tša manaba a gagwe ka moka go akaretša le Saulo. O itše:
18 Ke a go rata, wena Jehofa matla a ka.
2 Jehofa ke leswika la ka le legolo, sebo sa ka le Mohlakodiši wa ka.
Modimo wa ka o swana le leswika la ka leo ke tšhabelago go lona,Ke kotse ya ka le lenaka* la ka la go mphološa, lefelo la ka leo ke tšhabelago go lona leo ke ikwago ke šireletšegile.
3 Ke bitša Jehofa, ka gobane o swanelwa ke go tumišwa,Gomme ke tla phološwa go manaba a ka.
4 Go bjalo ka ge eka ke tateditšwe ke dithapo tša lehu.Banna ba go se re selo bao ba swanago le mafula ba ntšhošitše.
5 Ke tateditšwe ke dithapo tša Lebitla,*Lehu le mpeetše molaba pele ga ka.
6 Ke ile ka bitša Jehofa ke le mathateng a magolo,Ka dula ke llela Modimo wa ka gore a nthuše.
O ile a kwa lentšu la ka a le tempeleng ya gagwe,Gomme o ile a kwa ge ke llela gore a nthuše.*
7 Lefase la thoma go šišinyega,Dithaba tša šikinyega,Tša ya pele le morago ka gobane o be a galefišitšwe.
8 Muši wa tšwa dinkong tša gagwe,Mollo o mogolo wa tšwa molomong wa gagweGomme magala a tuka a etšwa go yena.
9 Ge a dutše a theoga, o ile a dira gore magodimo a iname.Leswiswi le leso le be le le ka tlase ga dinao tša gagwe.
10 O ile a tla a fofa a nametše mokerubi,
A tla ka lebelo a le maphegong a sebopiwa sa moya.*
11 Ke moka a ikhupetša ka leswiswi,Leswiswi la maru a maso ao a tletšego ka meetse,La mo khupetša bjalo ka ge eka o ikhupeditše ka tente.
12 Ke moka seetša sa phadima pele ga gagwe,Gomme sefako le magala a tukago mollo tša tšwa mo marung.
13 Ke moka Jehofa a dira gore kua magodimong go kwagale modumo,Gomme yo Godimodimo a dira gore lentšu la gagwe le kwagale,Gwa tšhologa sefako le magala a tukago mollo.
14 A thuntšha mesebe ya gagwe, e le gore a šwalalanye manaba a ka,A gadimiša magadima a gagwe e le gore a ba gakantšhe.
15 Dinokana tše di utamilego tša thoma go bonagala,Metheo ya lefase ya thoma go utologa ka gobane wena Jehofa o galefile,Ya utollwa ke modumo wa mohemo wo o tšwago dinkong tša gago.
16 A otlolla seatla sa gagwe a le kua godimo,A ntshwara gomme a nntšha ka gare ga bodiba bja meetse.
17 O mphološitše go manaba a ka ao a bego a le matla,Le go bao ba ntlhoilego, bao ba bego ba mpheta ka matla.
18 Ba ntlhasetše letšatšing la ge ke wetšwe ke kotsi,Eupša Jehofa yena o ile a nthekga.
19 O ile a nkiša lefelong leo le šireletšegilego.O ile a mphološa ka gobane ke be ke mo kgahla.
20 Jehofa o a ntšhegofatša ka baka la ge ke lokile.O a ntšhegofatša ka gobane ga ke na molato.
21 Ka gobane ke be ke dula ke itshwara ka tsela yeo Jehofa a nyakago ka yona,Gomme ga se ka dira bobe ka lahla Modimo wa ka.
22 Ke dula ke gopola melao ya gagwe,Gomme nka se lebale ditaelo tša gagwe.
23 Ke tla dula ke se na molato pele ga gagwe,E bile ke tla dula ke phema go dira sebe.
24 Anke Jehofa a ntšhegofatše ka baka la ge ke lokile,Le ka gobane ga ke na molato.
25 Ge motho a botega, le wena o tla dirišana le yena ka potego.Monna yo a se nago molato o tla dirišana le yena ka go loka.
26 Bao ba dirago dilo tša go loka, le wena o ba direla dilo tša go loka.Eupša ga o forwe ke bao ba ratago bofora.
27 Ka gobane wena o phološa badiidi,Eupša o kokobetša bao ba ikgogomošago.
28 Ka gobane wena Jehofa o mpha seetša.O Modimo wa ka yo a fetošago leswiswi leo le ntikologilego gore e be seetša.
29 Ka thušo ya gago ke tla hlasela bao ba nkamogago dilo tša ka.Ka thušo ya Modimo ke tla tshela maboto.
30 Tsela ya Modimo wa nnete e phethagetše,Dilo tšeo Jehofa a di bolelago di sekile.
O swana le kotse ya go šireletša batho ka moka bao ba tšhabelago go yena.
31 Modimo yo mongwe ke mang ka ntle le Jehofa?
Le gona ke mang e lego leswika ge e se Modimo wa rena?
32 Modimo wa nnete ke yena a mphago matla,O tla mpulela tsela,
33 O dira gore maoto a ka a kitime bjalo ka a kgama,*E le gore ke kgone go ema mafelong a phagamego.
34 O ntlwaetša ntwa,Ga bjale ke kgona go koba bora bja koporo.
35 O ntšhireletša ka kotse ya gago,O nthekga ka letsogo la gago le letona,Gomme boikokobetšo bja gago bo a mphagamiša.
36 O mpulela tsela gore ke kgone go sepela go yona,Maoto a ka a ka se kgopše.
37 Ke tla kitimiša manaba a ka go fihlela ke a swara.Nka se boe go ba go fihlela a fedišwa.
38 Ke tla a rathaganya gore a se sa kgona go ema.Ke tla a gatakela ka dinao tša ka.
39 Wena o tla mpha matla a gore ke lwe,O tla dira gore manaba a ka a we pele ga ka.
40 O tla dira gore manaba a ka a tšhabe ge a mpona.*Ke tla bolaya bao ba ntlhoilego.
41 Ba llela thušo, eupša ga go yo a ba phološago,Ba llela Jehofa, eupša le yena ga a ba arabe.
42 Ke tla ba šila, ba swana le lerole leo le tšewago ke phefo.Ke tla ba tšholla tše ekego ke tšholla leraga diterateng.
43 Wena o tla mphološa go batho bao ba ratago go swayaswaya diphošo.
O tla nkgetha gore ke be moetapele wa ditšhaba.
Ke tla hlankelwa ke batho bao ke bego ke sa ba tsebe.
44 Dilo tšeo ba di kwelego ka nna di tla dira gore ba ntheetše.Batho ba go tšwa dinageng tše dingwe, ba tla khunama pele ga ka ba tšhogile.
45 Batho ba go tšwa dinageng tše dingwe ba tla fela matla,Ba tla tšwa mafelong ao ba ikutilego go ona ba thothomela.
46 Jehofa ke Modimo yo a phelago,
Anke a retwe ka gobane o swana le Leswika le legolo leo ke tšhabelago go lona,
Anke Modimo yo a mphološago a godišwe.
47 Modimo wa nnete ke Molefeletši wa ka.O dira gore batho ba ikokobeletše nna.
48 O mphološa go manaba a ka ao a galefilego,Wena o a mphagamiša gore bao ba ntlhaselago ba se mphihlelele,O mphološa go monna yo a nyakago go nkweša bohloko.
49 Ke ka baka leo ke tlago go go reta gare ga ditšhaba, wena Jehofa,Ke tla opela dikoša tša go reta leina la gago.
50 O dira gore kgoši ya gagwe yeo a e kgethilego e fenye manaba a yona ka tsela e makatšago,O bontšha motlotšwa wa gagwe botho bjo bogolo,*O bo bontšha Dafida le ditlogolo* tša gagwe go ya go ile.
Mengwalo ya tlase
^ Gantšhi ka Beibeleng lenaka la phoofolo le emela matla goba bolaodi.
^ Bona Tlhaloso ya Mantšu.
^ Phetolelo ya lentšu ka lentšu e re, “Sello sa ge ke llela gore a nthuše se ile sa fihla ditsebeng tša gagwe.”
^ Goba, “maphegong a phefo.”
^ Kgama ke phoofolo yeo e nyakilego go swana le phala.
^ Goba, “o tla dira gore ke bone bokamorago bja melala ya manaba a ka.”
^ Goba, “lerato le le botegago.”
^ Phetolelo ya lentšu ka lentšu e re, “peu.”
