Psalme 34:1-22
Koša ya Dafida, ge a be a itira segaswi pele ga Abimeleke, yoo a ilego a mo raka gomme a tloga.
א [Aleph]
34 Ke tla reta Jehofa ka dinako tšohle,Nka se tlogele go mo tumiša.
ב [Beth]
2 Ke tla bolela dilo tše dibotse ka Jehofa.Ba boleta ba tla di kwa gomme ba thaba.
ג [Gimel]
3 Tumišang Jehofa gotee le nna,A re tumišeng leina la gagwe re le gotee.
ד [Daleth]
4 Ke ile ka rapela Jehofa gomme a nkaraba,
A nntšha dilong ka moka tšeo di mpoifišago.
ה [He]
5 Go thaba bao ba mo tshepago,Ka gobane ba ka se hlabje ke dihlong.
ז [Zayin]
6 Yo a hlokago thušo o biditše Jehofa gomme yena a mo kwa.
A mo thuša mathateng a gagwe ka moka.
ח [Heth]
7 Morongwa wa Jehofa o šireletša bao ba boifago Modimo,Gomme o a ba phološa.
ט [Teth]
8 Lekang Jehofa le bone gore o lokile.*Go thaba motho yo a tšhabelago go yena.
י [Yod]
9 Boifang Jehofa lena bakgethwa ba gagwe ka moka,Ka gobane bao ba mmoifago ga ba hloke selo.
כ [Kaph]
10 Ditawana tše matla di ka bolawa ke tlala,Eupša bao ba tsomago Jehofa ba ka se hloke selo se sebotse.
ל [Lamed]
11 Lena barwa ba ka, etlang le ntheetšeng,Ke tla le ruta go boifa Jehofa.
מ [Mem]
12 Ge e ba o nyaka go ipshina ka bophelo,Le go phela nako e telele o thabile,
נ [Nun]
13 Gona kgonthišetša gore ga o bolele selo se sebe,Le gore ga o bolele dilo tša maaka.
ס [Samekh]
14 Tlogela go dira se sebe gomme o dire se sebotse.Tsoma khutšo gomme o e phegelele.
ע [Ayin]
15 Jehofa o dula a hlokometše baloki,*Gomme o a ba kwa ge ba llela gore a ba thuše.
פ [Pe]
16 Eupša Jehofa o lwa le bao ba dirago dilo tše mpe,O tlo ba fediša mo lefaseng gore go se be le yoo a ba gopolago.
צ [Tsade]
17 Baloki ba goeleditše Jehofa gomme yena a ba kwa,A ba phološa ditlalelong tša bona ka moka.
ק [Qoph]
18 Jehofa o kgauswi le bao ba tlaišegago,Le gona o phološa bao ba nyamilego o šoro.
ר [Resh]
19 Mathata a moloki ke a mantšhi,Eupša Jehofa o mo ntšha go ona ka moka.
ש [Shin]
20 O a mo hlokomela e bile o šireletša marapo a gagwe ka moka,Ke ka baka leo go se nago leo le tlago go robega.
ת [Taw]
21 Ba babe ba tlo welwa ke mathata ao a tlo ba bolayago.Bao ba hloilego moloki bona ba tla bonwa molato.
22 Jehofa o phološa maphelo a bahlanka ba gagwe.Batho ka moka bao ba tšhabelago go yena ba ka se bonwe molato.
