Psalme 91:1-16
91 Motho yo a dulago lefelong le le utegilego la yo GodimodimoO tla ikhweletša bodulo moriting wa Ramatlaohle.
2 Ke tla botša Jehofa ka re: “O setšhabelo sa ka le lefelo leo ke ikutago go lona,O Modimo wa ka yo ke mo tshepilego.”
3 Ka gobane yena o tla go phološa molabeng wa motanyi wa dinonyana,A go phološa le leubeng la bolwetši.
4 O tla go khupetša ka maphego a gagwe,Gomme wena o tla tšhabela ka tlase ga maphego a gagwe.
Modimo o tla dula a go hlokomela e bile o tla šireletšega tše e kego o šireleditšwe ke kotse e kgolo goba leboto le le tiilego.
5 O ka se boife selo le ge e le sefe se se tšhošago bošego,E bile o ka se boife mosebe wo o betšwago mosegare.
6 O ka se boife leuba la bolwetši leo le phatlalalago bošego,Goba go fedišwa mosegare wa sekgalela.
7 Batho ba 1 000 (sekete) ba tla wela ka thoko ga gagoGomme ba 10 000 (dikete tše lesome) ba wela ka letsogong la gago le letona,Eupša wena dilo tše tše mpe di ka se go diragalele.
8 Wena o tla bona ka mahlo a gagoGe batho ba babe ba otlwa.
9 Ka gobane o itše: “Jehofa ke setšhabelo sa ka.”
O dirile yo Godimodimo gore e be lefelo leo o ikutago go lona.
10 O ka se welwe ke dilo tše mpe,E bile ga go na kotlo yeo e tlago go wela batho bao ba lego tenteng ya gago.
11 Ka gobane Modimo o tla roma barongwa ba gagweGore ba go šireletše kae le kae mo o yago gona.
12 Ba tla go kuka ka diatla tša bona,Gore leoto la gago le se ke la kgopša ke leswika.
13 Wena o tla gata tawana le noga e kotsi.O tla gatakela tau e matla le noga e kgolo.
14 Modimo o itše: “Ka ge a mpontšhitše gore o a nthata, ke tla mo phološa,
Ke tla mo šireletša ka gobane o tseba leina la ka.
15 O tla mpitša gomme nna ka mo araba.
Ke tla ba le yena ge a le mathateng.
Ke tla mo phološa gomme ka mo dira gore a hlomphiwe.
16 Ke tla mo dira gore a phele nako e telele,Gomme ka mo dira gore a bone ge ke mo phološa.”
