E nngwe ya dilo tše di thabišago bophelong bja banyalani ke go ba le ngwana yo a phetšego gabotse. Le ge batswadi bao ba rata lesea la bona, ba ka tshwenyega kudu ge lesea leo le ka se gole. Ka mo go swanago, Jehofa o thaba kudu ge re tšea kgato ya mathomo ya go ba balatedi ba Jesu eupša o nyaka gore re bontšhe gore re gola moyeng. (1 Bakor. 3:1) Ge e le gabotse o nyaka gore re be Bakriste ba “gotšego ka mo go feletšego.” Ka Beibeleng lentšu la Segerika leo le fetoletšwego e le “go gola ka mo go feletšego” le ka bolela go ba motho yo mogolo. (1 Bakor. 2:6) Go swana le ge ngwana a gola gore e be motho yo mogolo, le rena re swanetše go ba Bakriste bao ba godilego moyeng e le gore re be le segwera sa kgauswi le Jehofa. Go ba Mokriste yo a godilego moyeng ga go bolele gore o ka se tsoge o kaonefaditše go dilo tše dingwe.—1 Tim. 4:15. w24.04 2 ¶1, 3

Ge e ba motho yo mongwe a ka go botšiša gore Jehofa ke’ng go wena, o ka mo araba bjang? O ka re ‘Jehofa ke Tate wa ka, Modimo wa ka le Mogwera wa ka.’ O ka ba o nagana le ka maina a mangwe ao o ka a dirišago go hlalosa Jehofa. Eupša o ka mo lebelela gape a swana le Motho yo a go memago. Kgoši Dafida o ile a bapetša segwera seo Jehofa a nago le sona le bahlanka ba gagwe ba botegago le tsela yeo motho yo a amogelago baeng a swarago baeng ba gagwe ka yona. O ile a botšiša gore: “Wena Jehofa, ke mang a ka bago moeng tenteng ya gago? Ke mang a ka dulago thabeng ya gago e kgethwa?” (Ps. 15:1) Mantšu a ao a buduletšwego, a bontšha gore re ka gwerana le Jehofa le go ba baeng tenteng ya gagwe. Jehofa o be a le noši pele a ka dira dilo ka moka. Ka morago ga nako e itšego o ile a amogela Morwa wa gagwe wa leitšibulo tenteng ya gagwe ya seswantšhetšo. Jehofa o ile a thoma go thabela go ba le baeng tenteng ya gagwe. Beibele e re botša gore Jehofa o be a ‘thabišwa’ ke go ba le Morwa wa gagwe. Moeng yoo wa mathomo kamoo tenteng yeo, o be a “thabile pele ga [Jehofa] ka mehla.”—Die. 8:30. w24.06 2 ¶1-3

Nagana ka tiragalo ye. Banna ba fetago ba 340 000 ba be ba kgobokane gore ba dire Dafida kgoši ya Isiraele. Ba be ba bolela e bile ba opelela Jehofa ba le kgauswi le meboto ya Heburone ka matšatši a mararo. (1 Dikor. 12:39) Gare ga lešaba leo go be go na lesogana leo le bitšwago Tsadoko, yoo batho ba bego ba ka se lemoge le gore o gona moo. Jehofa o ile a bona gore o gona e bile o be a nyaka gore le rena re tsebe. (1 Dikor. 12:​22, 26-28) Tsadoko e be e le moperisita yo a bego a šoma kgauswi kudu le moperisita yo a phagamego Abiathara. Modimo o be a neile Tsadoko bohlale le bokgoni bja go kwešiša thato ya gagwe. (2 Sam. 15:27) O be a na le sebete. Mehleng ye ya bofelo, Sathane o dira sohle seo a ka se kgonago gore a lwe le bahlanka ba Jehofa. (1 Pet. 5:8) Re swanetše go ba le sebete ge re dutše re emetše Jehofa gore a feditše Sathane le tshepedišo ye ya gagwe e kgopo ya dilo. (Ps. 31:24) Re ka kgona go ekiša Tsadoko ka go ba le sebete. w24.07 2 ¶1-3

Ge Jehofa a bopa monna wa mathomo le mosadi, o be a nyaka gore ba thabe. O ile a ba nea legae le lebotse, a dira gore ba thabele lenyalo le go ba nea kabelo e kgahlišago. Ba be ba swanetše go ba le bana ba bantšhi le go dira lefase ka moka gore e be paradeise go swana le serapa sa Edene. Go be go na le selo setee feela seo a bego a ba thibetše go se dira. O ile a ba botša gore ge ba ka se kwe taelo yeo ba tlo ba le sebe gomme ba hwa. Re a tseba gore go diregile eng. Sebopiwa se sengwe sa moya seo se bego se sa rate Modimo le batho, se ile sa dira gore Adama le Efa ba se ke ba kwa Jehofa gomme ba dire sebe. Ba ile ba dira seo Sathane a bego a se nyaka. Ba ile ba fetoga badiradibe ka baka la go se theetše Tatago bona yo a ba ratago. Seo Jehofa a se boletšego se ile sa direga. Go tloga lona letšatšing leo, ba bile le mathata a magolo. Ba ile ba thoma go tšofala ke moka ba hwa.—Gen. 1:​28, 29; 2:​8, 9, 16-18; 3:​1-6, 17-19, 24. w24.08 3 ¶3

Jehofa le Morwa wa gagwe yo a mo ratago kudu, ba nyaka gore re thabe. Psalme 119:2 e re: “Go thaba bao ba kwago dikgopotšo tša gagwe le bao ba lekago ka thata go tsoma tlhahlo ya gagwe.” Jesu le yena o itše: “Go thaba bao ba kwago Lentšu la Modimo gomme ba le boloka!” (Luka 11:28) Bahlanka ba Jehofa ke batho bao ba thabilego. Ka gobane re bala Lentšu la Modimo, e bile re leka go diriša seo re ithutago sona. (Jak. 1:​22-25) Ge re dira dilo tšeo Jehofa a nyakago re di dira o a thaba. (Mmo. 12:13) Ge re diriša seo re ithutilego sona ka Lentšung la Modimo, re kgona go kaonefatša tsela yeo re dirišanago le ba gabo rena le Bakristegotee le rena. Re phema mathata a mantšhi ge re latela tlhahlo ya Jehofa. Kgoši Dafida le yena o be a tseba se. Ge a be a opela ka melao, ditaelo le dikahlolo tša Jehofa o ile a re: ‘Ge ke di latela, ke tla holega kudu.’—Ps. 19:​7-11. w24.09 2 ¶1-3

Ke’ng seo Jehofa a se bonago ge a lebelela bahlanka ba gagwe bao ba lego mo lefaseng? O kgona go bona ge re nyamile le ge re thabile. (Ps. 37:18) O thaba kudu ge a bona re dira sohle seo re ka se kgonago gore re mo hlankele go sa šetšwe mathata ao re a kgotleletšego! O tloga a ikemišeditše go re thekga le go re kgothatša. Lengwalo la Psalme 147:3 le re botša gore Jehofa o ‘tlema dintho tša batho’ bao ba kwelego bohloko. Temana ye, e re botša gore Jehofa o thuša batho bao ba nyamilego. Re swanetše go dira’ng gore re holwe ke ditsela tšeo Jehofa a re thušago ka tšona? Nagana ka mohlala wo: Ngaka e ka thuša motho yo a gobetšego gore a fole. Eupša e le gore motho yoo a kgone go fola, o swanetše go latela ditaelo tša ngaka. Jehofa o diriša Lentšu la gagwe go bolela le batho bao ba nyamilego le go ba nea keletšo. w24.10 6 ¶1-2

Nakong e fetilego, dikgatišo tša rena di be di bolela ka seo se diregago ka batho bao Jehofa a ba ahlolago e le bao ba sa lokago. Re be re dumela gore bao ba ahlotšwego ga ba na kholofelo ya tsogo. Go na le dipego tše dintšhi tša Beibele tšeo di hlalosago kamoo Jehofa a ilego a ahlola batho ba sa lokago ka gona, go etša palo yeo e sa tsebjego ya batho bao ba ilego ba fedišwa ka meetsefula goba ditšhaba tšeo Jehofa a ilego a laela Baisiraele gore ba di fediše ge ba be ba eya nageng ya kholofetšo goba madira a 185 000 a Baasiria ao morongwa wa Jehofa a ilego a a bolaya ka bošego bjo tee. (Doit. 7:​1-3; Jes. 37:​36, 37) Na re ka bolela re kgodišegile gore Beibele e re nea mabaka a kwagalago a gore Jehofa a ka se tsoge a tsošitše batho bao a ba ahlotšego? Aowa, ga e re botše. Ga re tsebe gore Jehofa o be a ahlola bjang motho yo mongwe le yo mongwe, goba go tseba ge e ba bao ba ilego ba bolawa ba ile ba hwetša sebaka sa go ithuta ka Jehofa gomme ba itshola. w24.05 3 ¶5-7

Jesu o ile a nea papišo ya mohlologadi yo a bego a dula a kgopela moahlodi gore a mo thuše go hwetša toka. Ga go pelaelo gore barutiwa ba Jesu ba ile ba kwešiša papišo yeo, ka gobane le bona ba be ba sa swarwe gabotse. (Luka 18:​1-5) Le rena papišo yeo re a e kwešiša ka gobane ka dinako tše dingwe re fela re sa swarwe gabotse. Lehono batho ba kgetholla ba bangwe e bile ga ba na tekatekano, ka gona ga re makale ge ka dinako tše dingwe re sa swarwe gabotse. (Mmo. 5:8) Ga se ra letela gore bana babo rena goba dikgaetšedi ba se ke ba re swara gabotse, eupša seo se ka direga. Re a tseba gore bana babo rena le dikgaetšedi ga ba lwe le rena. Ga se ba phethagala. Re ka ithuta dilo tše dintšhi tseleng yeo Jesu a ilego a arabela ka gona ge baganetši ba gagwe ba kgopo ba be ba sa mo sware gabotse. Ge e ba re sa felele batho bao ba re ganetšago pelo, gona go ra gore re ka dira seo se swanago le go bana babo rena le dikgaetšedi. w24.11 2 ¶1-2

Batho ba bantšhi ba be ba tlwaetše go ja senkgwa mehleng ya Beibele. (Gen. 14:18; Luka 4:4) Ge e le gabotse, “senkgwa” se be se le bohlokwa kudu moo Beibele ka dinako tše dingwe e dirišago lentšu leo go hlalosa dijo ka kakaretšo. (Mat. 6:11) Le gona, Jesu o ile a diriša senkgwa mehlolong ya gagwe e mebedi yeo e tsebegago kudu. (Mat. 16:​9, 10) O mongwe wa mehlolo yeo go bolelwa ka ona go Johane kgaolo 6. Ka morago ga gore baapostola ba bolele ditaba tše dibotse, Jesu o ile a ba tšea gomme a tshela le bona Lewatle la Galilea ka sekepe gore ba ye go khutša. (Mar. 6:​7, 30-32; Luka 9:10) Ba ile ba fihla lefelong la ka thokwana motseng o bitšwago Betsaida. Ka morago ga gore batho ba bantšhi ba kwe gore Jesu o be a le moo, ba ile ba tla gore ba mmone. Jesu ga se a ka a ba raka. O ile a ba ruta ka Mmušo wa Modimo le go fodiša bao ba bego ba babja. Ge letšatši le be le sobela, barutiwa ba gagwe ba ile ba thoma go ipotšiša gore batho bao ba be ba tlo ja eng. Ka ge ba bangwe ba be ba sa swara dijo, ba be ba ka swanelwa ke gore ba ye go di nyaka.—Mat. 14:15. w24.12 2 ¶1-2

Batswadi ba rena ba mathomo e lego Adama le Efa ba be ba phethagetše ebile ba dula paradeiseng e botse. (Gen. 1:27; 2:​7-9) Ba be ba na le tebelelo ya go ba le bophelo bjo bo kgahlišago ka mo go sa felego. Eupša dilo di ile tša senyega, ba ile ba dira sebe. Ka baka leo, ba ile ba lahlegelwa ke legae la bona le lebotse le tebelelo ya go phela ka mo go sa felego. Ke’ng seo ba ilego ba se tlogelela bana ba bona? Beibele e re: “Ka baka leo go etša ge ka motho o tee [e lego Adama] sebe se tsene lefaseng gomme lehu la tsena ka sebe, ka go re’alo lehu le aparetše batho bohle gobane bohle ba dirile sebe.” (Baroma 5:12) Selo feela seo Adama a re tlogeletšego sona ke sebe seo se dirago gore re hwe. Sebe seo se swana le sekoloto seo go se nago yo a ka kgonago go se patela. (Ps. 49:8) Jesu o ile a swantšha dibe le dikoloto. (Mat. 18:​32-35) Ge re dira sebe go ba bjalo ka ge e ka re kolota Jehofa. Ebile re swanetše go patela sekoloto seo. Ge sekoloto seo se ka se patelwe, se tlo phumolwa feela ge re hlokofala.—Baroma 6:7. w25.02 2-3 ¶2-3

Ke tokelo go botša batho ba bangwe ka Mmušo wa Modimo! Ga se mang le mang a hwetšago tokelo yeo. Ka mohlala, nakong ya ge Jesu a be a le mo lefaseng, ga se a dumelela meoya e mebe gore e nee bohlatse ka yena. (Luka 4:41) Lehono, pele motho a ka ya tšhemong le batho ba Jehofa, o swanetše go phela ka tsela yeo e kgahlišago Jehofa. Re bontšha gore re tšeela godimo tokelo ya go bolela ditaba tše dibotse ka go nea bohlatse go gongwe le go gongwe mo re ka kgonago. Le rena re nyaka go swana le Jesu, ka gona re dira sohle seo re ka se kgonago gore re botše batho ditaba tše dibotse le go ba ruta therešo. (Mat. 13:​3, 23; 1 Bakor. 3:6) Mokgatlo wa Jehofa o ekiša mohlala wa Jesu ka go dira sohle seo o ka se kgonago gore o tsebiše batho ka leina la Modimo. Beibele ya Phetolelo ya Lefase le Lefsa ya Mangwalo a Makgethwa, e bapetše karolo e kgolo ka go bušetša leina la Modimo mo le swanetšego go ba gona. Ga bjale phetolelo ya Beibele ye e feletšego goba karolwana ya yona e hwetšagala ka maleme a fetago a 270. w24.04 9 ¶8-9

Bana babo rena ba bangwe bao ba nyetšego ba dira selo se itšego letšatši le lengwe le lengwe go bontšha basadi ba bona gore ba a ba rata. (1 Joh. 3:18) Banna ba ka bontšha basadi ba bona gore ba a ba rata ka ditsela tše bonolo tše bjalo ka go ba swara ka letsogo goba ka go ba gokarela. A ka mo ngwalela molaetša a mmotša kamoo a mo gopotšego ka gona goba a mmotšiša gore letšatši la gagwe le sepela bjang. A ka fela a mo ngwalela karata a mmotša gore o mo rata bjang. Ge monna a ka dira dilo tše o tla be a bontšha gore o rata mosadi wa gagwe ebile o tiiša lenyalo la bona. Monna yo a ratago mosadi wa gagwe o dula a mo reta ka dilo tšeo a di dirago le go mo kgothatša. Tsela e nngwe yeo a ka dirago seo ka yona ke ka go mo leboga ka dilo tšeo a di dirago gore a mo thekge. (Bakol. 3:15) Mosadi o ikwa a ratwa kudu ge monna wa gagwe a mo reta. Mosadi yoo o ikwa a bolokegile, a ratwa ebile a hlomphiwa. w25.01 11 ¶15; 13 ¶16

Psalme 15 e phetha ka mantšu ao a rego: “Motho yo a dirago dilo tše a ka se tsoge a šišintšwe.” Mopsalme o re botša bohlokwa bja go latela melao ya Jehofa ya motheo. Jehofa o nyaka gore re thabe. Ke ka baka leo a re neago tlhahlo yeo e tla re thušago go hwetša ditšhegofatšo le go dula re šireletšegile. Baeng bao ba lego tenteng ya Jehofa ba na le bokamoso bjo bo kgahlišago. Batlotšwa ba botegago ba tlo ba le “madulo a mantšhi” ao Jesu a ba lokišeditšego ona kua legodimong. (Joh. 14:2) Bao ba tlago go phela mo lefaseng ba fela pelo ya go bona lengwalo la Kutullo 21:3 le phethagala. Ka moka ga rena re tšeela godimo tokelo ye Jehofa a re neilego yona ya go re mema gore re be bagwera ba gagwe le go ba baeng tenteng ya gagwe ka mo go sa felego.—Ps. 15:​1-5. w24.06 13 ¶19-20

Letago ke eng? Ka Beibeleng, lentšu letago le ka šupa go selo se sengwe le se sengwe seo se dirago gore motho e be yo a kgahlišago. Jehofa o ile a bontšha letago la gagwe ka tsela e makatšago ka morago ga gore Baisiraele ba lokollwe bokgobeng kua Egepeta. Nagana ka boemo bjo: Baisiraele ba dimilione ba kgobokane Thabeng ya Sinai gore ba tle ba kwe seo Modimo a bego a nyaka go ba botša sona. Go ba le leru le leso leo le khupetšago thaba. Go ba le tšhišinyego e matla ya lefase yeo e latelwago ke muši o moso wo o khupetšago thaba, ke moka ka morago go ba le lešata le legolo la magadima. (Ek. 19:​16-18; 24:17; Ps. 68:8) Nagana gore Baisiraele ba ile ba kgahlega bjang ge ba bona Jehofa a bontšha letago la gagwe. Lehono re fa Jehofa letago ka go botša batho ka matla a gagwe le dika tša gagwe tše di kgahlišago. E bile re fa Jehofa letago ge re mo leboga ka dilo tšeo re kgonago go di dira ka baka la matla ao a re fago ona.—Jes. 26:12. w25.01 2 ¶2-3

Ge Baisiraele ba be ba eya Nageng ya kholofetšo, go be go na le banna ba tumilego bao ba bego ba nyatša Moshe. Banna bao ba ile ba re: “Setšhaba ka moka le sona ke se sekgethwa gomme Jehofa o gare ga sona.” (Num. 16:​1-3) Le ge Jehofa a be a bona ‘setšhaba ka moka e le se se sekgethwa,’ o be a kgethile Moshe gore e be yena a etelelago setšhaba sa Gagwe pele. Ge banna bao ba be ba nyatša Moshe, ge e le gabotse ba be ba nyatša Jehofa. Banna ba ba be ba se na taba le seo Jehofa a se nyakago, eupša seo bona ba bego ba se nyaka e be e le go ba le matla le botumo. Jehofa o ile a bolaya baetapele bao ba bego ba nyatša Moshe le batho ka moka bao ba bego ba ba thekga. (Num. 16:​30-35, 41, 49) Le lehono re a tseba gore Jehofa ga a amogele batho bao ba nyatšago ditaelo tšeo di tšwago go mokgatlo wa gagwe. w24.07 11 ¶11

Batho ba bantšhi ga ba dumele gore lefase le le kgauswi le go fela e bile ba a re kwera ka gobane re dumela seo. (2 Pet. 3:​3, 4) Go na le dilo tšeo Beibele e re botšago tšona tšeo di tla go go direga nakong ya masetlapelo a magolo, eupša ga e re botše dilo ka moka. Re swanetše go tshepa gore bofelo bo tlo tla ka nako yeo Jehofa a e beilego le gore nakong yeo o tla re hlokomela. Re swanetše go tshepa batho bao Jehofa a ba beilego gore ba re etelele pele e lego “mohlanka yo a botegago le wa temogo.” (Mat. 24:45) Ge masetlapelo a magolo a thoma, re ka hwetša ditaelo tšeo di ka re phološago. Gona bjale go bohlokwa kudu gore re tshepe batho bao Jehofa a ba beilego gore ba etelele mokgatlo wa gagwe pele. Ge re palelwa ke go kwa ditaelo gona bjale, re ka se kgone go di latela nakong ya masetlapelo a magolo. w24.09 11 ¶11-12

Batswadi ba kwešiša gore bana ba bona ba ka se no ba le tumelo ka gobane bona ba na le yona. Ge bana ba dutše ba gola ba ka ipotšiša dipotšišo tša go swana le gore: ‘Na Modimo o gona e le ka nnete? Na nka tshepa seo Beibele e se rutago?’ Beibele e re kgothaletša gore re diriše ‘matla a rena a tlhaologanyo’ le go ‘kgonthišetša dilo tšohle.’ (Baroma 12:1; 1 Bathes. 5:21) O ka thuša bjang bana ba gago gore ba tiiše tumelo ya bona? Thuša bana ba gago go bona gore seo Beibele e se rutago ke nnete. Ge bana ba gago ba botšiša dipotšišo, ba bontšhe gore ba ka hwetša bjang dikarabo ba diriša dithulusi tša go dira nyakišišo tše bjalo ka Watch Tower Publications Index le puku ya Tlhahlo ya go Dira Nyakišišo ya Dihlatse tša Jehofa. Ba ka ya ka tlase ga sehlogo seo se rego “Beibele,” ke moka ba nyaka sehlogwana seo se rego “E buduletšwe ke Modimo” gore ba hwetše bohlatse bja gore Beibele ga se puku feela yeo e ngwadilwego ke batho. Go e na le moo ke “lentšu la Modimo.”—1 Bathes. 2:13. w24.12 14-15 ¶4-5

Kamoo bagolo ba ka ekišago Jesu ka gona. Bagolo ba swanetše go tlwaetša bana babo rena ba bangwe go dira mešomo e oketšegilego ka phuthegong. Ba swanetše go tlwaetša le bana babo rena ba baswa. Bagolo ba swanetše go kwešiša gore bana babo rena bao ba ka se no thoma le go dira dilo ka moka gabotse. Ba swanetše go dula ba eletša bana babo rena le go ba thuša gore ba dule ba ikokobeditše, ba botega e bile ba dule ba ikemišeditše go dula ba hlankela bana babo rena le dikgaetšedi. (1 Tim. 3:1; 1 Pet. 5:5) Jesu o neile balatedi ba gagwe boikarabelo bja gore ba botše batho ba bangwe ditaba tše dibotse le go ba ruta ka mangwalo. Barutiwa ba ka ba ile ba nagana gore ba ka se kgone go dira seo Jesu a ba kgopetšego sona. Eupša o be a tseba gore ba tla kgona go dira mošomo woo. O ile a re go bona: “Go etša ge Tate a nthomile, le nna ke a le roma.”—Joh. 20:21. w24.10 16 ¶15; 17 ¶17

Dafida e be e le kgoši yeo e swarago batho gabotse. E be e le seopedi, a tseba go reta, e le mohlabani e bile e le moporofeta. O ile a kopana le mathata a mantšhi. O ile a fetša mengwaga e mentšhi a tšhabela Kgoši Saulo yo a bego a na le mona. Ka morago ga gore Dafida a be kgoši, o ile a swanelwa ke go tšhaba ka gobane morwa wa gagwe Abesalomo o be a nyaka go mo tšeela bogoši. Go sa šetšwe mathata ao Dafida a ilego a kopana le ona le dilo tšeo a bego a palelwa ke go di dira, o ile a dula botegela Modimo bophelong bja gagwe ka moka. Jehofa o ile a mo hlalosa e le “monna yo a kwanago le pelo ya [gagwe.]” Ka gona, go bohlokwa gore re kwe keletšo ya Dafida. (1 Dikg. 15:5) Nagana ka keletšo yeo Dafida a ilego a e nea morwa wa gagwe Solomone yo a bego a tlo mo hlatlama. Jehofa o be a kgethile Solomone gore a age tempele yeo batho ba bego ba tlo tumiša Jehofa go yona. (1 Dikor. 22:5) Solomone o be a tlo ba le mošomo o montšhi e bile o be a tlo hloka gore Jehofa a mo thuše go etelela setšhaba pele. A re kweng seo Dafida a ilego a mmotša sona. Dafida o ile a botša morwa wa gagwe gore ge a ka kwa Jehofa o tla atlega bophelong.—1 Dikg. 2:​2, 3. w24.11 10 ¶9-11

Monna yo a tlaišago mosadi wa gagwe o swanetše go šoma ka thata go lokiša segwera sa gagwe le Jehofa le go lokiša ditaba le mosadi wa gagwe. O swanetše go dira dilo tše di latelago: 1. O swanetše go thoma pele ka go lemoga gore o na le bothata. A tsebe gore Jehofa o bona dilo ka moka. (Ps. 44:21; Mmo. 12:14; Baheb. 4:13) 2. O swanetše go tlogela go tlaiša mosadi wa gagwe ebile a itshware gabotse. (Die. 28:13) 3. O swanetše go kgopela mosadi wa gagwe tshwarelo le go kgopela Jehofa gore a mo lebalele. (Dit. 3:19) O swanetše go lopa Jehofa gore a mo thuše go fetola tsela yeo a naganago ka yona, a bolelago ka yona le go dira dilo ka yona. (Ps. 51:​10-12; 2 Bakor. 10:5; Bafil. 2:13) 4. O swanetše go phela ka go dumelelana le seo a se rapelelago ka go hloya bošoro le go hlaba batho ba bangwe ka mantšu. (Ps. 97:10) 5. O swanetše go kgopela bagolo gore ba mo thuše. (Jak. 5:​14-16) 6. O swanetše go tseba gore ge a lekega go boela mekgweng ya kgale a ka dira eng. w25.01 11 ¶14

Na o rata Jehofa Modimo, yo a go neago dimpho tše dibotse le go dira gore o thabele bophelo? Na o nyaka go mmontšha gore o a mo rata? Tsela e kaone ya go dira seo ke go ineela go yena ke moka ka morago wa kolobetšwa. Ge o kolobetšwa o ba karolo ya lapa la Jehofa. Ka morago ga gore o kolobetšwe, Tatago wa legodimong yo e lego mogwera wa gago o tlo go hlahla le go go hlokomela ka gobane o tla ba o ineetše go yena. (Ps. 73:24; Jes. 43:​1,2) Ge o ineela ebile o kolobetšwa o tlo ba le kholofelo ya go thabela bophelo ka mo go sa felego. (1 Pet. 3:21) Na go na le selo seo se go šitišago go kolobetšwa? Ge e ba go le bjalo, ga o noši. Go na le batho ba bantšhi kudu bao le bona ba ilego ba swanelwa ke go fetoša tsela yeo ba phelago ka yona gore ba kgone go kolobetšwa. Gona bjale ba hlankela Jehofa ba thabile ebile ba na le mafolofolo. w25.03 2 ¶1-2

Gantšhi ka Beibeleng, dibe di swantšhwa le morwalo o boima. Ge Kgoši Dafida a hlalosa ka dibe tšeo a ilego a di dira o re: “Melato ya ka e pakelane godimo ga hlogo ya ka, e nkimela kudu go etša morwalo o boima.” (Ps. 38:4) Jehofa o lebalela batho bao ba itsholago. (Ps. 25:18; 32:5) Lentšu la Seheberu leo le fetoletšwego e le “go lebalela,” le ka bolela “go kuka” goba go “go rwala” selo se itšego. Ge Jehofa a re lebalela go no swana le ge a tloša morwalo o boima woo re o rwelego. Go na le mohlala o mongwe gape ka mo Beibeleng wo o bontšhago kamoo Jehofa a lahlelago dibe tša rena kgole ka gona. Lengwalo la Psalme 103:12 le re: “Go swana le ge bohlabela bo le kgole le bodikela, le dibe tša rena o di lahletše kgole le rena.” Bohlabela le bodikela di kgole le kgole, ebile di ka se tsoge di kopane. Ka mantšu a mangwe, re ka re Jehofa o tšea dibe tša rena a di lahlela kgole kudu le rena. Go tseba gore Jehofa o re lebalela ka mo go feletšego go a re kgothatša. w25.02 9 ¶5-6

Mohlala wa Jesu o thušitše moapostola Petro gore a be le boikokobetšo. Ka morago ga gore Jesu a boele legodimong, Petro o ile a dira mohlolo wa go fodiša monna yo a belegwego a golofetše. (Dit. 1:​8, 9; 3:​2, 6-8) Ge lešaba le bona mohlolo woo, le ile la kgobokanela Petro. (Dit. 3:11) Petro o be a sa nyake gore lešaba leo le mo rete, le ge a godišeditšwe lefelong leo batho ba gona ba bego ba rata maemo. O ile a ba le boikokobetšo gomme a botša lešaba leo gore le rete Jehofa le Jesu. O le boditše gore: “Ke ka leina la [Jesu] le ka tumelo ya rena leineng la gagwe, ge monna yo yo le mmonago e bile le mo tsebago a ile a tiišwa.” (Dit. 3:​12-16) Re ka ekiša Petro ka go dula re ithuta go ba le boikokobetšo. Re direla batho dilo tše dibotse ka gobane re ba rata ebile re rata le Jehofa e sego ka gobane re nyaka gore ba re rete. Re bontšha gore re na le boikokobetšo ge re thabela go hlankela Jehofa le go thuša bana babo rena le ge batho ba bangwe ba sa bone dilo tšeo re di dirago.—Mat. 6:​1-4. w25.03 10-11 ¶11-12

Re ka thabela tšhemo kudu ge re ka rata Jehofa le baagišani ba rena. (Mat. 22:​37-39) Nagana kamoo Jehofa a thabago ka gona ge a re bona re dira mošomo wo, o nagane le kamoo batho ba tšhemong ya geno ba tlago go thaba ka gona ge ba thoma go ithuta Beibele! Nagana le kamoo molaetša wa rena o tlago go phološa bao ba o amogelago. (Joh. 6:40) Na o palelwa ke go tšwa ka legaeng la gago? Ge e ba go le bjalo, dula o swaregile ka se o ka se dirago go bontšha gore o rata Jehofa le moagišani wa gago. Nakong ya leuba la COVID-19, Samuel le Dania ba be ba sa kgone go tšwa ka legaeng la bona. Nakong yeo e thata ba be ba dutše ba botša batho ditaba tše dibotse ka founo, ba ngwala mangwalo e bile ba swara dithuto tša Beibele ka Zoom. Le ge maemo a Samuel le Dania a be a sa ba dumelele go dira dilo tše dingwe, eupša ba ile ba dira seo ba ka se kgonago gomme ba hwetša lethabo. w24.04 18 ¶15-16

Na o ka thabela go nyala goba go nyalwa? Le ge lenyalo e se lona feela le dirago gore motho a thabe, Bakriste ba bantšhi bao ba sego lenyalong ba ka thabela gore ka letšatši le lengwe ba nyale. Pele o ka thoma go ratana le motho yo a itšego, o swanetše go rata Jehofa kudu, o itsebe gabotse e bile o be le tšhelete e lekanego go tlo hlokomela molekane wa gago. (1 Bakor. 7:36) Le gona, go kaone go tseba gore o nyaka motho wa mohuta mang pele o ka thoma go ratana. Ge e ba o ka se dire bjalo, o ka phaela ka thoko motho yo a go swanelago goba wa ratana le motho yo a sa go swanelego. Re a tseba gore motho yo mongwe le yo mongwe yo o ka nyalanago le yena e swanetše go ba Mokriste yo a kolobeditšwego. (1 Bakor. 7:39) Eupša ga se batho ka moka bao ba kolobeditšwego bao e tlago go ba balekane ba bakaone. Ka gona, o ka ipotšiša gore: ‘Ke nyaka go dira’ng bophelong? Ke dika tša mohuta mang tšeo ke bonago di le bohlokwa go motho yo ke nyakago go nyalana le yena? Na dilo tšeo ke di nyakago di a kwagala?’ w24.05 20 ¶1; 21 ¶3

Ge le dutše le tsebana gakaone, le ka lebeletšana bjang le mathata le go ngangišana? Batho bao ba ratanago ba fela ba sa bone dilo go swana. Lenyalo leo le tiilego le dira ke batho ba babedi bao ba ikemišeditšego go dirišana. Ka gona tsela yeo le dirišanago ka yona go rarolla mathata, e tla bontšha ge eba lenyalo la lena le ka atlega. Ipotšišeng gore: ‘Na re kgona go boledišana ka hlompho e bile re išitše maswafo fase? Na re dula re ikemišeditše go amogela diphošo tša rena le go leka go di lokiša? Na re kgona go fetofetoga le maemo, go kgopela tshwarelo le go lebalelana?’ (Baef. 4:31) Ge le dula le ngangišana seo se ka no se fetoge ge le nyalane. Ge eba o bona gore wena le motho yo o ratanago le yena ga le swanelane, go ka ba kaone gore le kgaogane. w24.05 29 ¶12

Re ka beela ba bangwe mohlala ge re ka theetša Jehofa dilong ka moka le go diriša melao ya motheo ya Beibele. Ge tumelo ya rena le tsebo ya rena di dutše di gola, re tsema medu therešong ya Jehofa. Ga re gakanege goba go gogwagogwa ke dikgopolo tša batho ba lefase le. (Baef. 4:14; Jak. 1:​6-8) Re tlo kgona le go thuša bao ba nago le mathata. (1 Bathes. 3:​2, 3) Bagolo e swanetše go ba batho bao ba nago le boitshwaro bjo bo botse, ba hlaphogetšwego monaganong, ba nago le thulaganyo le bao ba nago le tekatekano. Banna ba ba beela ba bangwe mohlala o mobotse ka go “swarelela ka go tia lentšung le le botegago.” (Tito 1:9; 1 Tim. 3:​1-3) Mohlala wo bagolo ba o beago le maeto a bodiši ao ba a dirago, di dira gore bagoeledi ba dule ba le gona dibokeng, tšhemong le go dira thuto ya motho ka noši. Ge bana babo rena le dikgaetšedi ba kopana le mathata, bagolo ba kgona go ba thuša go nagana ka Jehofa le merero ya gagwe. w24.06 31 ¶16-18

Ge Jesu a be a le mo lefaseng, o ile a ruta batho gore Jehofa o ikemišeditše go lebalela batho bao ba mo direlago diphošo. Nagana ka papišo ya morwa wa lehlaswa. Morwa yoo o ile a kgetha go tloga gae a ya go dira dilo tše mpe kudu. Eupša ge a thoma go bona gore o dirile diphošo, o ile a boela gae. Tatagwe o ile a dira’ng ge a mmona? Jesu o boletše gore ge morwa yoo a “le kgole tatagwe a mmona . . . , a mo kitimela a mo gokarela a mo atla ka lerato.” Morwa yoo o be a sa nagane gore tatagwe a ka mo lebalela. Ka gona o ile a ya gae gomme a kgopela go ba mošomi, eupša tatagwe o be a ikemišeditše go mo lebalela le go mo amogela ka gae. Tatagwe o ile a re: “O be a timetše gomme a hwetšwa.” (Luka 15:​11-32) Pele Jesu a etla lefaseng, o ile a bona ge Jehofa a be a lebalela badiradibe ba bantšhi bao ba bego ba itshola. Papišo ya Jesu e a re kgothatša e bile e re bontšha kamoo Jehofa a re lebalelago ka gona. w24.08 11 ¶11-12

Mokriste yo a hlaphogetšwego monaganong o dira diphetho tše dibotse tšeo di bontšhago gore o nagana go swana le Jehofa. Mokriste yoo, o dula a gopola gore segwera sa gagwe le Jehofa se bohlokwa kudu go feta dilo ka moka bophelong bja gagwe. Ga a ipone a le bohlokwa go feta batho ba bangwe ebile o kwešiša le gore ga a tsebe dilo ka moka. O bontšha gore o ithekgile ka Jehofa ka go dula a mo rapela. Re swanetše go dula re rapela Jehofa le ge re kgona go dira dilo tše itšego. Ge re ka rapela Jehofa gore a re hlahle, o tlo re thuša ge re swanetše go dira diphetho tše bohlokwa ebile re a tseba gore o tla re thuša. Re leboga gore Jehofa o re dirile gore re kgone go ekiša dika tša gagwe. (Gen. 1:26) Ke nnete gore re ka se tsoge re kgonne go ekiša Jehofa ka mo go feletšego.—Jes. 55:9. w25.03 11 ¶13; 13 ¶17-18

O se ke wa belaela maikemišetšo a batho ba bangwe. Ge e ba batho ba bangwe ba sa re leboge, ge eba re ba diretše selo se itšego, re ka ipotšiša gore: ‘Ba lebetše goba ba dira ka boomo?’ Mohlomongwe go ka ba go na le mabaka a mangwe ao a dirilego gore ba palelwe ke go re leboga. Ba bangwe ba ka thabela dilo tšeo re ba direlago tšona eupša ba hwetša go le thata go hlalosa kamoo ba ikwago ka gona. Mohlomongwe ba ka jewa ke dihlong ka ge e le bona ba tlwaetšego go thuša ba bangwe. Ge re rata bana babo rena le dikgaetšedi re ka se belaele maikemišetšo a bona. Seo se tlo re thuša gore re dule re nea batho ba bangwe re thabile. (Baef. 4:2) O se ke wa felela ba bangwe pelo. Kgoši e bohlale Solomone o ile a ngwala go re: “Lahlela borotho bja gago ka meetseng, ka gobane o tla bo hwetša gape ka morago ga matšatši a mantšhi.” (Mmo. 11:1) Mantšu a a re ruta gore batho ba bangwe ba ka tla ba re leboga ka morago ga nako e telele. w24.09 30 ¶18-19

Ka dinako tše dingwe bagolo ba tsebiša phuthego gore motho yo a dirilego sebe se segolo o kgalemetšwe. Re ka tšwela pele re dirišana le yena, ka gobane motho yoo o itshotše e bile o tlogetše go dira sebe. Motho yoo e sa le karolo ya phuthego e bile o hloka go kgothatšwa ke Bakristegotee le yena. (Baheb. 10:​24, 25) Eupša motho yoo a tlošitšwego ka phuthegong yena re swanetše go mo swara bjang? Re “lesa go gwerana” le yena, ‘le go ja ga re je’ le motho yo bjalo. (1 Bakor. 5:11) Na se se ra gore ge motho a tlošitšwe ka phuthegong ga se ra swanela go mmolediša le gatee? Ga go bjalo. Beibele e re re lese go gwerana le yena. Eupša ge e ba motho yoo e le wa leloko goba e be e le mogwera wa rena, re ka diriša letswalo la rena leo re le tlwaeditšego ka Beibele go kgetha ge e ba re tla mo mema gore a tle dibokeng. w24.08 30 ¶13-14