Genesi 2:1-25
2 Ka gona Modimo a fetša go bopa+ magodimo le lefase le dilo ka moka tšeo di lego go tšona.
2 Pele letšatši la bošupa le thoma, Modimo o be a šetše a feditše mošomo wo a bego a o dira. Ke moka o ile a khutša ka letšatši la bošupa ka morago ga ge a feditše mošomo wo a bego a o dira.+
3 Le gona Modimo a šegofatša letšatši la bošupa gomme a le dira le lekgethwa. Ka morago ga gore a fetše go dira dilo ka moka tšeo a bego a nyaka go di bopa, o ile a khutša.
4 Tše ke ditaba tša nakong ya ge Modimo a bopa magodimo le lefase, le tša letšatšing leo Jehofa* Modimo a bopilego legodimo le lefase.+
5 Go be go se gwa tšwa go eba le dimela le mehlare mo lefaseng ka gobane Jehofa Modimo o be a se a tšwa a neša pula, ebile go se na motho yo a ka lemago.
6 Eupša kgodi e be e tšwelela lefaseng gomme e nošetša naga ka moka.
7 Jehofa Modimo a bopa motho ka lerole la mobu+ gomme a budulela moya wa bophelo+ ka dinkong tša gagwe, ke moka motho a thoma go phela.*+
8 Le gona Jehofa Modimo a dira serapa ka bohlabela bja Edene,+ ke moka gona moo a bea motho yo a mmopilego.+
9 Jehofa Modimo a dira gore go mele mohlare o mongwe le o mongwe o kgahlišago wa dienywa tše dibotse tšeo di ka jewago, a ba a dira gore go mele mohlare wa bophelo+ gare ga serapa seo le mohlare wa go tseba se sebotse le se sebe.+
10 Bjale go be go na le noka e tšwago Edene gore e nošetše serapa seo, gomme go tloga moo e be e arogana e eba dinoka tše nne.
11 Leina la noka ya pele ke Pishone, ke yona e elago go dikologa naga ka moka ya Hafila, moo go nago le gauta.
12 Gauta ya naga yeo ke e botse, ebile nageng yeo go na le boreku* bjo bo bitšwago deliamo le leswika le bohlokwa leo le bitšwago onikisi.
13 Leina la noka ya bobedi ke Gihone, ke yona e elelago go dikologa naga ka moka ya Ethopia.*
14 Leina la noka ya boraro ke Hidekele,*+ ke yona e elelago bohlabela bja Asiria.+ Ke moka noka ya bone yona ke Eforate.+
15 Jehofa Modimo a bea motho serapeng sa Edene gore a se leme le go se hlokomela.+
16 Jehofa Modimo a laela motho a re: “O ka ja dienywa tša mohlare o mongwe le o mongwe mo serapeng go fihlela o kgotsofala.+
17 Eupša ge e le mohlare wa go tseba se sebotse le se sebe o se ke wa ja dienywa tša wona, ka gobane mohlang o ka di jago o tlo hwa lehu.”+
18 Ke moka Jehofa Modimo a re: “Ga go botse gore monna a tšwele pele a phela a nnoši. Ke tla mo direla mothuši yo a mo swanelago.”+
19 Bjale Jehofa Modimo o be a šetše a dirišitše mobu go bopa diphoofolo ka moka tša naga le dinonyana ka moka tšeo di fofago magodimong, ke moka a di nea motho gore a bone gore o tla nea e nngwe le e nngwe leina lefe. Leina le ge e le lefe leo motho a le neago sephedi se sengwe le se sengwe, e be e eba leina la sona.+
20 Ka gona motho a reela diruiwa ka moka maina le dinonyana ka moka tše di fofago magodimong a ba a reela le diphoofolo ka moka tša naga, eupša yena o be a se na mothuši yo a mo swanelago.
21 Ke moka Jehofa Modimo a swariša monna boroko bjo bogolo, gomme ya re ge a sa robetše a ntšha e nngwe ya dikgopo tša gagwe a thiba ka nama mo e bego e le gona.
22 Jehofa Modimo a bopa mosadi ka kgopo yeo a e ntšhitšego go monna, gomme a mo tliša go monna.+
23 Ke moka monna a re:
“Mafelelong yo ke yena lerapo la marapo a kaLe nama ya nama ya ka.
Yena yo o tla bitšwa Mosadi,Ka ge yena a ntšhitšwe go monna.”+
24 Ke ka baka leo monna a tlago go tlogela tatagwe le mmagwe, a kgomarela mosadi wa gagwe gomme bona e tla ba nama e tee.+
25 Monna le mosadi wa gagwe ba be ba se ba apara,+ eupša ba sa hlabje ke dihlong.
Mengwalo ya Tlase
^ Le ke lekga la mathomo leina la Modimo le tšwelela ka Beibeleng. Ka Seheberu leina le le ngwalwa ka ditlhaka tše nne e lego יהוה (YHWH). Bona Dit. A4.
^ Phetolelo ya lentšu ka lentšu e re, “motho ya ba moya o phelago.” Bona Tlhaloso ya Mantšu.
^ Boreku ke selo sa go tanya seo se tšwelelago mehlareng e mengwe.
^ Goba, “Kushe.” Ga go tsebje gabotse gore lefelo le le mo kae.
^ Goba, “Tikirisi.”
