Genesi 49:1-33
49 Jakobo a bitša barwa ba gagwe gomme a re: “Kgobokanang gore ke tle ke le botše seo se tlago go le diragalela nakong e tlago.
2 Kopanang gomme le theetšeng, lena barwa ba Jakobo. Theetšang nna Isiraele tatago lena.
3 “Wena Rubeni+ o morwa wa ka wa mathomo, maatla a ka le leitšibulo la ka,+ o be o na le seriti kudu le maatla a magolo.
4 O ka se fete bomorwarrago ka gobane go swana le meetse ao a sa laolegego, o ile wa robala le mosadi wa ka, nna tatago.+ Ka nako yeo o ile wa se hlomphe lenyalo la ka. Ee, o robetše le mosadi wa ka.
5 “Simeone le Lefi ke bana ba motho.+ Ke banna ba ba šoro, ba dirišitše dibetša tša bona go bolaya.+
6 Anke ke se ke ka gwerana le bona. Anke pelo ya ka e se be mo ba kopanego gona, ka gobane ge ba be ba galefile ba ile ba bolaya batho.+ Le gona ba ile ba golofatša dipoo ntle le lebaka.
7 A go rogakwe dilo tšeo ba di dirilego ge ba be ba galefile, ka gobane dilo tšeo di sehlogo.+ Anke ke ba aroganye nageng ya Jakobo, gomme ke ba phatlalatše nageng ya Isiraele.+
8 “Ge e le wena Juda,+ bomorwarrago ba tla go tumiša.+ O tla fenya manaba a gago.*+ Barwa ba tatago ba tla go khunamela.+
9 Wena Juda o tawana.+ Wena morwa wa ka o tla ja phoofolo yeo o e bolailego gomme wa re go fetša wa sepela. O tla patlama wa ikotlolla go swana le tau. Le gona, go swana le tau, ke mang yo a ka lekago go go tshwenya?
10 Molamo wa bogoši o ka se tloge go Juda,+ le molamo wa mmuši o tla dula o le maotong a gagwe go fihlela Shilo a etla.+ Le gona, batho ba merafo ka moka ba tla mo kwa.+
11 O tla kgokelela tonki ya gagwe mohlareng wa diterebe, gomme ngwana wa tonki ya gagwe a mo kgokelela mohlareng wa diterebe tše dibose. O tla hlatswa diaparo tša gagwe ka beine le ka jusi ya diterebe.
12 Mahlo a gagwe ke a makhwibidu ka baka la go nwa beine, gomme meno a gagwe ke a mašweu ka baka la go nwa maswi.
13 “Sebulone+ yena o tla dula kgauswi le lewatle. O tla ba kgauswi le moo dikepe di emišwago gona ka ditshetledi,*+ gomme mollwane wa naga ya gagwe o tla ba ka thoko ya Sidone.+
14 “Isakara+ ke tonki e maatla, yeo e dutšego magareng ga mekotla e mebedi yeo e bofeletšwego saleng.
15 Le gona o tla bona gore lefelo la go khutša ke le lebotse le gore naga e a kgahliša. O tla rwala morwalo a sa gapeletšwe, gomme a šoma ka thata go swana le lekgoba.
16 “Dani+ yo e lego yo mongwe wa meloko ya Isiraele,+ o tla ahlola setšhaba ka moka.
17 Anke Dani e be noga e kotsi yeo e lego ka thoko ga tsela, yeo e lomago pere ditlhakong gore monamedi wa yona a we ka sa morago.+
18 Ke tla letela gore o mphološe, wena Jehofa.
19 “Gada+ yena o tla hlaselwa ke batho, eupša le yena o tla ba rakediša a ba hlasela ge ba tšhaba.+
20 “Go Ashere+ go tla tšwa dijo tša makhura, gomme o tla tšweletša dijo tšeo di swanetšego kgoši.+
21 “Nafutali+ ke tholo e tshesane ya tshadi. O bolela mantšu a mabotse.+
22 “Josefa+ ke lekala la mohlare wo o enywago dienywa woo o lego kgauswi le meetse, le woo makala a wona a golago a ba a feta leboto.
23 Eupša babetši ba mesebe ba be ba mo hloile, ba mo hlasela ga sehlogo ebile ba mmetša ka mesebe.+
24 Eupša bora bja gagwe bo ile bja dula bo tiile.+ Le gona diatla tša gagwe di ile tša dula di le maatla ebile di kgona go betša mesebe ka lebelo+ ka baka la diatla tša yo maatla yo a bego a thuša Jakobo, yena modiši, e lego leswika la Isiraele.
25 O tšwa go Modimo wa tatago lena gomme o tla le thuša, ebile o na le Ramatlaohle. Le gona, o tla le šegofatša ka ditšhegofatšo tšeo di tšwago magodimong le ka meetse ao a tšwago ka tlase ga lefase.+ Ebile o tla le šegofatša ka bana ba bantši le ka diruiwa tše dintši.
26 Ditšhegofatšo tšeo tatago a go filego tšona e tla ba tše dikgolo go feta dilo tše dibotse tša dithaba tšeo di dulago di le gona, gomme ka bobotse tša feta meboto yeo e tlago go dula e le gona go ya go ile.+ Josefa, yena yo a kgethilwego go bomorwarragwe, o tla dula a hwetša ditšhegofatšo tšeo.*+
27 “Benjamini+ o tla rathaganya manaba a gagwe go swana le phiri.+ Mesong o tla ja phoofolo yeo a e bolailego, gomme mantšiboa o tla arola dilo tšeo a di tšerego go manaba a gagwe.”+
28 Barwa bao ba Jakobo ka moka, ke bona bao meloko e 12 ya Isiraele e tšwilego go bona, gomme tatago bona o ba boditše dilo tšeo ge a be a ba šegofatša. O ile a šegofatša yo mongwe le yo mongwe wa bona go ya ka tšhegofatšo yeo e bego e mo swanetše.+
29 Ka morago ga moo a ba laela a re: “Ke tlo hwa go se kgale. Le mpolokeng le batho ba gešo.+ Le mpolokeng le botate leweng leo le lego nageng ya Efurone wa Mohethe,+
30 leweng leo le lego serapeng sa Makapela, leo le lego kgauswi le Mamure kua nageng ya Kanana, e lego serapa seo Aborahama a se rekilego go Efurone wa Mohethe gore go tle go bolokelwe batho ba gabo go sona.
31 Gona moo ke mo go boloketšwego Aborahama le Sara+ mosadi wa gagwe. Ke gona moo go boloketšwego Isaka+ le Rebeka mosadi wa gagwe, ebile ke gona moo nna ke boloketšego Lea gona.
32 Aborahama o ile a reka naga yeo le lewa leo le lego go yona go Bahethe.”+
33 Ka gona ge Jakobo a fetša go nea barwa ba gagwe ditaelo tšeo, o ile a robala mpeteng gomme a hlokofala, ke moka ba mmoloka le batho ba gabo.+
