Genesi 21:1-34
21 Jehofa o ile a šegofatša Sara go etša ge a boletše, gomme Jehofa a dira kamoo a tshepišitšego ka gona.
2 Ge Aborahama a be a šetše a tšofetše, Sara o ile a ima gomme a mmelegela morwa ka yona nako yeo Modimo a bego a boletše gore o tla ba le ngwana ka yona.
3 Ke moka Aborahama a reela morwa wa gagwe yoo Sara a bego a mmelegetše yena leina a re ke Isaka.
4 Aborahama a bolotša Isaka morwa wa gagwe ge a be a na le matšatši a seswai go etša ge Modimo a mo laetše.
5 Aborahama o be a na le mengwaga e 100 ge Isaka a be a belegwa.
6 Ke moka Sara a re: “Modimo o dirile gore ke sege. Yo mongwe le yo mongwe yo a kwago ka taba ye o tla sega le nna.”*
7 A oketša ka gore: “Ke mang yo a bego a ka nagana gore ke tla belegela Aborahama morwa? Bjale ke nna yo ke mmelegetše morwa le ge a tšofetše.”
8 Ngwana yoo a gola gomme Sara a mo tshweša letswele. Aborahama a dira mokete o mogolo letšatšing leo Isaka a tshwešitšwego letswele ka lona.
9 Eupša Sara a dula a bona gore morwa wa Hagara wa Moegepeta yo a mmelegetšego Aborahama, o kwera Isaka.
10 Ke moka Sara a re go Aborahama: “Raka mosadi yo wa lekgoba le morwa wa gagwe, ka gobane morwa wa gagwe a ka se je bohwa gotee le Isaka morwa wa ka!”
11 Eupša taba yeo Sara a e boletšego ka morwa wa Aborahama e ile ya dira gore Aborahama a šulafalelwe kudu.
12 Ke moka Modimo a re go Aborahama: “O se ke wa tshwenyega ka mošemane yo le lekgoba la gago la mosadi. Theetša seo Sara a go botšago sona ka bona, ka gobane Isaka ke yena e tlago go ba tatago setšhaba se segolo seo ke go tshepišitšego sona.
13 Ge e le morwa wa lekgoba leo la mosadi, le yena ke tla dira gore bana ba gagwe e be setšhaba se segolo ka gobane le yena ke ngwana wa gago.”
14 Ka gona Aborahama a tsoga ka masa a tšea senkgwa le lepotlelo la mokgopa* leo le nago le meetse gomme a di nea Hagara. O ile a mo rweša tšona magetleng ke moka a mo raka le mošemane yoo. Hagara a tloga a tšama a ralala lešokeng la Beresheba.
15 Mafelelong meetse ao a fela gomme Hagara a tlogela mošemane yoo ka tlase ga mohlašana o mongwe.
16 Ke moka Hagara a tloga a yo dula a nnoši kua kgojana ka gobane o be a ipoditše gore: “Ga ke nyake go bona ge mošemane yo a ehwa.” A dulela kgojana gomme a goeletša a lla.
17 Ka morago Modimo a kwa mošemane yoo a lla, gomme morongwa wa Modimo a bitša Hagara a le magodimong a re go yena: “Bothata bja gago ke’ng Hagara? O se ke wa boifa, ka gobane Modimo o kwele mošemane yoo moo a lego gona.
18 Ema! Sepela o yo tsoša mošemane yola o mo sware ka seatla gomme o mo hlokomele, ka gobane ke tlo dira gore bana ba gagwe e be setšhaba se segolo.”
19 Modimo o ile a dira gore a bone sediba sa meetse. Ke moka a ya go sona, a tlatša lepotlelo la gagwe ka meetse gomme a nea mošemane yoo a nwa.
20 Modimo a hlokomela mošemane yoo gomme a gola. O ile a dula lešokeng a betša mesebe.
21 O ile a dula lešokeng la Parane gomme mmagwe a yo mo nyalela mosadi nageng ya Egepeta.
22 Ka yona nako yeo Abimeleke le Pikolo molaodi wa mašole a gagwe a re go Aborahama: “Modimo o na le wena dilong ka moka tšeo o di dirago.
23 Bjale nkenele pele ga Modimo gore o ka se radie nna, bana ba ka le ditlogolwana tša ka. Le gore o tla mpontšha botho* bjo ke go bontšhitšego bjona, wa ba wa bo bontšha le batho ba nageng yeo o bego o dula go yona.”
24 Ke moka Aborahama a re go yena: “Ke a ikana.”
25 Eupša Aborahama a llela Abimeleke mabapi le sediba sa meetse seo bahlanka ba Abimeleke ba bego ba se tšere ka kgang.
26 Abimeleke a re: “Ga ke tsebe gore ke mang yo a dirilego taba ye. Ke thoma go ekwa ka wena lehono le. Go re’ng o be o sa mpotše yona?”
27 Ke moka Aborahama a tšea dinku le dikgomo a di nea Abimeleke gomme ba dira kgwerano.
28 Ge Aborahama a hlaotše dikwana tše tshadi tše šupago mohlapeng,
29 Abimeleke a re go Aborahama: “Ke ka baka la eng o hlaotše dikwana tše tše šupago tše tshadi?”
30 Ke moka yena a re: “Tšea dikwana tše tše šupago tše tshadi tše ke go fago tšona gore e be bohlatse bja gore ke nna ke epilego sediba se.”
31 Ke ka baka leo Aborahama a ilego a bitša lefelo leo gore ke Beresheba, ka gobane yena le Abimeleke ba ile ba dira keno moo.
32 Ka morago ga gore ba dire kgwerano kua Beresheba, Abimeleke o ile a sepela le Pikolo molaodi wa mašole a gagwe gomme ba boela nageng ya Bafilisita.
33 Ka morago ga moo a bjala mohlare wa motamarisiki* Beresheba, gomme gona moo a tumiša leina la Jehofa Modimo wa neng le neng.
34 Aborahama a dula nageng ya Bafilisita nako e telele.
