Genesi 39:1-23
39 Baishimaele+ ba ile ba tliša Josefa Egepeta+ gomme Potifara+ wa Moegepeta, yoo e bego e le ntona ya ka mošate wa Farao ebile e le moetapele wa mašole ao a bego a šireletša kgoši, a mo reka go bona.
2 Eupša Jehofa o be a na le Josefa.+ Ka baka leo Josefa o ile a atlega, ke moka a kgethwa gore a hlokomele ntlo ya mong wa gagwe wa Moegepeta.
3 Mong wa gagwe a bona gore Jehofa o be a na le yena le gore Jehofa o be a šegofatša dilo ka moka tšeo a bego a di dira.
4 Josefa o be a amogelwa ke mong wa gagwe gomme a dula a mo hlankela, ke moka a mmea gore a hlokomele ntlo ya gagwe le dilo ka moka tšeo a bego a na le tšona.
5 Go tloga ka nako yeo a mmeilego gore a hlokomele ntlo ya gagwe le gore a laole dilo tša gagwe ka moka, Jehofa o ile a šegofatša bohle bao ba bego ba dula ntlong ya Potifara ka baka la Josefa, le gona Jehofa o ile a šegofatša dilo ka moka tšeo a bego a na le tšona ntlong ya gagwe le mašemong.+
6 Mafelelong o ile a nea Josefa dilo ka moka gore a di hlokomele, eupša selo feela seo a bego a ikgethela sona e be e le dijo. Josefa yena o ile a gola, a bopega gabotse ebile a ba yo mobotse.
7 Bjale ka morago ga dilo tšeo mosadi wa Potifara a thoma go kganyoga Josefa gomme a re go yena: “Robala le nna.”
8 Eupša Josefa a gana gomme a botša mosadi wa mong wa gagwe a re: “Mong wa ka ga a tshwenyege ka selo ka mo ntlong ya gagwe, gomme o nneile dilo ka moka tšeo a nago le tšona gore ke di hlokomele.
9 Ke nna feela ke hlokomelago dilo ka moka tša ka mo ntlong ye, le gona o mphile dilo ka moka ka ntle le wena, ka gobane ke wena mosadi wa gagwe. Bjale nka dira bjang selo se sebe gakaakaa gomme ka direla Modimo sebe?”+
10 Ka gona letšatši le letšatši o be a leka go goketša Josefa gore a robale le yena, eupša Josefa o be a gana ebile a sa fetše nako a na le yena.
11 Bjale ya re ka letšatši le lengwe ge Josefa a be a le ka ntlong a dira mešomo ya gagwe gomme bahlanka ba ka ntlong yeo ba se gona,
12 mosadi wa mong wa gagwe a mo kakatlela ka seaparo sa gagwe, gomme a re: “Robala le nna!” Eupša Josefa a tlogela seaparo sa gagwe se swerwe ke mosadi yoo gomme a tšhabela ka ntle.
13 Gateetee ge mosadi yoo a bona gore Josefa o tlogetše seaparo sa gagwe go yena le gore o tšhabetše ka ntle,
14 o ile a goeletša bahlanka ba ntlong ya gagwe a re go bona: “Bonang! Monna wa ka o re tlišeditše Moheberu yo gore a tle a re segiše ka batho. Josefa o tlile mo a leka go nkata, eupša nna ka goeletša kudu.
15 Gateetee ge a ekwa gore ke a goeletša, a tlogela seaparo sa gagwe kgauswi le nna a tšhabela ka ntle.”
16 Ka morago ga moo a bea seaparo seo sa Josefa kgauswi le yena go fihlela mong wa gagwe a boa ka ntlong.
17 Ke moka a botša monna wa gagwe seo a se boditšego bahlanka bale a re: “Mohlanka yola wa Moheberu yo o mo tlišitšego mo o tlile go nna go tlo ntshegiša ka batho.
18 Eupša gateetee ge ke goelela, o ile a tlogela seaparo sa gagwe kgauswi le nna gomme a tšhabela ka ntle.”
19 Ge mong wa Josefa a ekwa seo mosadi wa gagwe a rego Josefa o mo dirile sona o ile a galefa kudu.
20 Ka gona mong wa Josefa a mo tšea a mo lahlela kgolegong, e lego lefelo leo kgoši e bego e bea batho bao ba golegilwego go lona, gomme Josefa a dula moo kgolegong.+
21 Eupša Jehofa a tšwela pele a na le Josefa le go mmontšha botho,* le gona o ile a dira gore molaodi yo mogolo wa kgolego a mo sware gabotse.+
22 Ka gona molaodi yo mogolo wa kgolego o ile a kgetha Josefa gore a hlokomele bagolegwa ka moka ka moo kgolegong. Josefa ke yena a bego a ba botša selo se sengwe le se sengwe seo ba swanetšego go se dira.+
23 Molaodi yo mogolo wa kgolego o be a sa tshwenyege ka selo seo se bego se hlokometšwe ke Josefa, ka gobane Jehofa o be a na le Josefa ebile Jehofa o ile a dira gore dilo ka moka tšeo Josefa a bego a di dira di atlege.+
Mengwalo ya Tlase
^ Goba, “lerato le le botegago.”
