Genesi 4:1-26
4 Bjale Adama a robala le Efa mosadi wa gagwe gomme yena a ima.+ Ge a belege Kaine,+ o ile a re: “Jehofa o nthušitše gore ke belege ngwana wa mošemane.”
2 Ka morago o ile a ima gape gomme a belega ngwanabo Kaine e lego Abele.+
Ge Abele a gola o ile a ba modiši, eupša Kaine yena a ba molemi.
3 Ge go fetile nako e itšego, Kaine a tlišetša Jehofa tše dingwe tša dibjalo tša tšhemong ya gagwe gore a mo direle sehlabelo ka tšona.
4 Eupša Abele yena o ile a tliša maitšibulo a mohlapeng+ wa gagwe le makhura a ona. Le ge Jehofa a ile a amogela Abele le sehlabelo sa gagwe,+
5 ga se a ka a amogela Kaine le sehlabelo sa gagwe. Ka gona, Kaine o ile a galefa kudu ebile sefahlego sa gagwe se be se bontšha gore o nyamile.
6 Ke moka Jehofa a re go Kaine: “O reng o galefile kudu ebile sefahlego sa gago se bontšha gore o nyamile?
7 Ge e ba o ka fetoga wa dira se se lokilego, na nka se go amogele gape? Eupša ge e ba o sa fetoge, tseba gore go na le sebe seo se go laletšego mojako, gomme se nyaka go go laola. Na o tla se fenya?”
8 Ka morago ga moo Kaine a re go Abele ngwanabo: “A re ye kua nageng.” Ya re ge ba le nageng Kaine a hlasela Abele ngwanabo gomme a mmolaya.+
9 Ka morago Jehofa a botšiša Kaine a re: “Abele ngwaneno o kae?” Yena a re: “Ga ke tsebe. Na ke nna mohlokomedi wa ngwanešo?”
10 Ke moka Modimo a re: “O dirileng? Theetša! Madi a ngwaneno a nkgoeletša a le mobung.+
11 Bjale o rogakilwe ebile ke go raka mo lefelong le, ka gobane o tšholletše madi a ngwaneno mo mobung wo ka seatla sa gago.+
12 Ge o lema mobu, mobu woo ka se tšweletše dibjalo tše di lekanego. Wena o tlo dula o tšhaba ebile o ralala lefaseng.”
13 Ke moka Kaine a re go Jehofa: “Kotlo ya sebe seo ke se dirilego ke e kgolo kudu ebile nka se kgone go e kgotlelela.
14 Lehono o nthaka mo nageng ye, gomme ke tlo ba kgole kudu le wena. Le gona ke tlo dula ke tšhaba le go ralala mo lefaseng, ebile motho le ge e le ofe yo a nkhwetšago, ruri o tlo mpolaya.”
15 Ke moka Jehofa a re go yena: “Ka baka leo, motho le ge e le ofe yo a go bolayago o tla otlwa gašupa.”
Ka gona, Jehofa a bea seka sa go lemoša motho le ge e le ofe yo a ka hwetšago Kaine gore a se ke a mmolaya.
16 Kaine a napa a tloga pele ga Jehofa gomme a yo dula nageng ya ka bohlabela bja Edene+ e le motšhabi.
17 Ka morago ga moo Kaine a robala le mosadi wa gagwe+ gomme mosadi yoo a ima a belega Henoge. Ke moka a aga motse gomme a o reela ka leina la morwa wa gagwe Henoge.
18 Ka morago Henoge o ile a ba tatago Iradi. Iradi a ba tatago Mehuyaele, Mehuyaele a ba tatago Methushaele gomme Methushaele a ba tatago Lamege.
19 Lamege a tšea basadi ba babedi. Leina la wa pele e be e le Ada gomme leina la wa bobedi e le Tsila.
20 Ada a belega Jabale. Jabale e bile wa mathomo wa go dula ditenteng le go ba le diruiwa.
21 Leina la ngwanabo e be e le Jubale. Jubale e bile wa mathomo wa go letša diharepa le dinaka.
22 Ge e le Tsila yena o ile a belega Tubala-kaine, yena o be a dira dilo tše dingwe le tše dingwe tšeo di dirilwego ka koporo le tšhipi. Kgaetšedi ya Tubala-kaine e be e le Naema.
23 Ke moka Lamege a bolela le basadi ba gagwe e lego Ada le Tsila a re:
“Ekwang seo ke se bolelago lena basadi ba ka,Ntheetšeng:
Ke bolaile motho yo a nkgobaditšego,Ee, ke bolaile lesogana leo le mpethilego.
24 Ge e ba Kaine a tla lefeletšwa+ gašupa,Gona Lamege yena o tla lefeletšwa ga masomešupašupa.”
25 Adama a robala gape le mosadi wa gagwe gomme mosadi yoo a ima, a belega morwa a mo reela leina la Sethe,*+ ka gobane o itše: “Modimo o nneile morwa* yo mongwe legatong la Abele, ka gobane Kaine o mmolaile.”+
26 Sethe le yena a ba le morwa gomme a mo reela leina a re ke Enoshe.+ Ka nako yeo batho ba ile ba thoma go bitša leina la Jehofa.
