Re swanetše go ba le tumelo go topollo gore re tle re kgone go phela ka mo go sa felego. (Baef. 1:7) Batho ba “dinku tše dingwe” bao Jesu a bego a bolela ka bona, ga se ba swanela go ja senkgwa le go nwa beine ge ba le segopotšong sa lehu la Jesu. (Joh. 10:16) Eupša sehlabelo sa Jesu Kriste se a ba hola le ge ba sa je. Ba tlo hwetša bophelo bjo bo sa felego ge feela ba dumela go seo Jesu a ilego a se ruta. (Joh. 6:53) Bao ba jago ba bontšha gore ke karolo ya kgwerano e mpsha ebile ba tlo buša le Jesu kua legodimong. Go sa šetšwe gore re batlotšwa goba re ba dinku tše dingwe, re swanetše go ba le tumelo e tiilego go sehlabelo sa Jesu gore re tle re hwetše bophelo bjo bo sa felego. w24.12 13 ¶14, 16

Nakong ya Selalelo sa Morena, Jesu o ile a nea baapostola ba gagwe senkgwa se sa omelwago, a ba botša le gore se emela mmele wa gagwe. Ke moka a ba nea beine, a ba botša gore e emela “madi a kgwerano e mpsha.” (Mar. 14:​22-25; Luka 22:20; 1 Bakor. 11:24) Jesu o dirile kgwerano e mpsha le batho bao ba tla bego ba buša le yena legodimong.” (Baheb. 8:​6, 10; 9:15) Nakong ya Selalelo sa Morena, Jesu o be a bolela le “mohlatswana.” Sehlotswana seo se thomilwe ke baapostola ba gagwe bao ba bego ba na le yena ka phapošing. Ke bona ba tlago go buša le Jesu legodimong. w24.12 11 ¶9-10

Jesu o ile a ekwa, a golegwa, a rogwa, a thomeletšwa, a ahlolwa le go tlaišwa. Mafelelong o ile a kokotelwa koteng ya tlhokofatšo gore a bolawe. Ge a dutše a kgotleletše dilo tšeo ka moka, Jehofa o be a ekwa bohloko kudu. O be a na le matla a go phološa Jesu eupša ga se a ka a a diriša. Ka baka la eng? Ka gobane Jehofa o a re rata. Sehlabelo sa Jesu se bontšha gabotse gore Jehofa o go rata kudu. O ile a dira dilo tše dintšhi le go kwa bohloko gore a go phološe sebeng le lehung. (1 Joh. 4:​9, 10) O nyaka gore ka moka ga rena re kgone go mo hlankela le ge re na le sebe le gore mafelelong re tle re kgone go fenya. w24.08 6 ¶13-14

Re ka kgona go kwešiša gabotse kamoo Jehofa a re ratago ka gona ge re ka naganišiša kamoo topollo e dirilego gore a kwe bohloko ka gona. Sathane o bolela gore ga go na mohlanka wa Modimo yo a ka dulago a mmotegela kudukudu ge dilo di sa sepele gabotse. Jehofa o ile a dumelela gore Jesu a tlaišege pele a ehwa go bontšha gore Sathane o bolela maaka a matala. (Jobo 2:​1-5) Jehofa o be a lebeletše nakong ya ge Jesu a rogwa ke batho ba bodumedi, a bethwa ebile a kokotelwa koteng. O be a dutše a lebeletše le ge Morwa wa gagwe a ehwa lehu le sehlogo. (Mat. 27:​28-31, 39) Jehofa o be a ka emiša seo se bego se direga ka ge a be a na le matla a go dira bjalo. (Mat. 27:​42, 43) Eupša ge nkabe Jehofa a ile a dira bjalo, go be go ka se be le topollo le gona re be re tlo phela ntle le kholofelo. Ka gona, Jehofa o ile a dumelela Morwa wa gagwe gore a tlaišege pele a ehwa. w25.01 22 ¶7

Ke Nisani 16, 33 C.E. gomme barutiwa ba Jesu ba be ba tšhogile e bile ba nyamile. Barutiwa ba bangwe ba babedi ba Jesu ba ile ba tloga Jerusalema ba ya Emause. Go tšwelela monna yo ba sa mo tsebego gomme o thoma go sepela le bona. Barutiwa ba thoma go mmotša ka dilo tšeo di kwešago bohloko tšeo di diragaletšego Jesu. Monna yoo o thoma go bolela le bona ka dilo tšeo ba ka se tsogego ba di lebetše. “[O] thoma go bolela ka Moshe le mangwalo a baporofeta ka moka,” ke moka a diriša mangwalo go hlalosa gore ke ka lebaka la eng Mesia a ile a swanelwa ke go tlaišega le go hwa. Ge banna bao ba bararo ba fihla Emause, monna yoo o ba botša gore ke yena Jesu yo a tsošitšwego bahung! (Luka 24:​13-35) Jesu o ile a fetša matšatši a masomenne mo lefaseng pele a ka boela legodimong, le gona o ile a tšwelela go barutiwa ba gagwe ka makga a mantšhi. Jesu o ile a kgothatša barutiwa ba gagwe bao ba bego ba nyamile e bile ba tšhogile. Le gona, ba ile ba thaba le go ba le sebete sa go ya bodireding le go ruta batho ditaba tše dibotse ka Mmušo wa Modimo. w24.10 12 ¶1-3

Ngwana o no gola ka tlhago ya ba motho yo mogolo. Eupša gore motho e be Mokriste yo a godilego moyeng ga go no itiragalela feela. Ka mohlala bana babo rena le dikgaetšedi ba kua Korinthe ba ile ba amogela ditaba tše dibotse ba kolobetšwa, ba amogela moya o mokgethwa, ba ba ba ithuta dilo tše dintšhi go Moapostola Paulo. (Dit. 18:​8-11) Le ga go le bjalo, mengwaga e mentšhi ka morago ga kolobetšo ya bona, ba bantšhi ba be ba sa dutše ba sa gola moyeng. (1 Bakor. 3:2) E le gore re gole moyeng re swanetše go thoma pele ka go nyaka go ba batho bao ba godilego. “Bao ba hlokago tsebo e ntšhi” e bile ba sa dire maiteko a go gola, ba ka se tsoge ba gotše moyeng. (Die. 1:22) Ga re nyake go swana le batho bao ba godilego bao ba sa nyakago gore batswadi ba bona ba ba direle diphetho. Go ena le moo re kwešiša gore ke boikarabelo bja rena gore re be batho bao ba godilego moyeng. Ge eba o nyaka go gola moyeng, rapela Jehofa gomme o mo kgopele gore a go ‘nee kganyogo le matla a gore o dire dilo tšohle tšeo a di ratago.’—Bafil. 2:13. w24.04 4 ¶9-10

Re kgona go bona tsela yeo Jehofa a ikwago ka yona ge a ahlola batho. (Hesek. 33:11) Jehofa ga a kitimele go fedišetša batho sa ruri. Ke Modimo yo a nago le kwelobohloko, e bile o e bontšha ka mehla ge go nyakega. Ke eng seo re se tsebago ka batho bao ba ka se tsošwego? Beibele e re botša ka batho ba sego kae ba bona. Jesu ile a bolela gore Judase Isikariote a ka se tsošwe. (Mar. 14:21; bona le Joh. 17:​12, Bala sehlogo seo se rego “Sebe Seo se ka se Lebalelwego ke sa Mohuta Mang?” go jw.org/nso.) Judase o ile a kgetha go dira dilo tšeo a bego a tseba gore Jehofa le Morwa wa gagwe ga ba di amogele. Ka mo go swanago Jesu o boletše gore ba bangwe ba baetapele ba bodumedi bao ba bego ba mo ganetša ba tlo hwa ntle le kholofelo ya tsogo. (Mat. 23:33) Moapostola Paulo le yena o boletše gore bahlanogi bao ba sa itsholego ba ka se tsošwe.—Baheb. 6:​4-8; 10:29. w24.05 4 ¶10-11

Sathane a ka se re gobatše ge e ba re ka dula re hlankela Jehofa. (1 Joh. 3:8) Lefaseng le leswa, Jehofa o tlo tšwela pela a šireletša bahlanka ba gagwe ba botegago gore Sathane a se ke a senya tumelo ya bona le gore ba se ke ba hwa. (Kut. 21:4) E tloga e le tokelo go ba moeng ka tenteng ya Jehofa le go thabela go gwerana le yena. (Hesek. 37:27) Re swanetše go itshwara bjang ge re le ka tenteng ya Jehofa? Ge e ba motho a ka go mema ka ntlong ya gagwe o ka ipotšiša gore o ka dira’ng gore o be moeng yo mokaone. Ka mo go swanago, re nyaka go tseba gore Jehofa o letetše eng go baeng bao ba gagwe. Ka ge re rata Jehofa re tlo dira sohle seo re ka se kgonago gore re mo “thabiše dilong ka moka.” (Bakol. 1:10) Re swanetše go dula re gopola seo e bile re mo hlomphe ka mo go tseneletšego. Go dula re dira se go tlo re thuša gore re se ke ra dira dilo tše di sa lokago. Re tloga re nyaka go “sepela” le Modimo wa rena.—Mika 6:8. w24.06 4 ¶8-9

Jehofa o ile a kgopela Aborahama e lego monna yo a bego a na le tumelo gore a dire selo se sengwe se boima. O ile a mo kgopela gore a dire sehlabelo ka morwa wa gagwe e lego Isaka. Kgopelo yeo e ile ya imela Aborahama kudu. Lega go le bjalo, o be a ikemišeditše go kwa Jehofa. Nakong ya ge Aborahama a le kgauswi le go bolaya Isaka, Jehofa o ile a mo thibela. Mohlala wo o be o bontšha seo Jehofa a bego a tlo se direla batho bao ba nago le tumelo ka ge a ba rata kudu. O be a ikemišeditše go neelana ka Morwa wa gagwe yo a mo ratago kudu gore e be sehlabelo. (Gen. 22:​1-18) Mengwaga e mentšhi ka morago ge Jehofa a be a nea Baisiraele melao, o ile a ba botša gore ba dire dihlabelo ka diphoofolo gore a ba lebalele melato ya bona. (Lef. 4:​27-29; 17:11) Dihlabelo tšeo di be di bontšha gore Jehofa o tlo neelana ka sehlabelo se segolo go di feta ka moka gore a phološe batho sebeng. Modimo o ile a botša baporofeta gore ba botše batho gore o tshepišitše go romela peu, e lego Morwa wa gagwe yo a tlo tlaišwago le go bolawa gore a phološe batho sebeng le lehung. Jehofa o re diretše selo se bohlokwa kudu.—Jes. 53:​1-12. w24.08 4 ¶7-8

Ge o bala Beibele, kgonthišetša gore o diriša seo o se balago. Ge o bala karolo e itšego ya Lentšu la Modimo, Ipotšiše gore, ‘nka diriša bjang se gona bjale goba nakong e tlago?’ Ka mohlala, a re re o bala 1 Bathesalonika 5:​17, 18. Ka morago ga go bala ditemana tše tše pedi, o ka ema gomme wa naganišiša ka tsela yeo o rapelago ka yona. Le gona, o ka naganišiša ka dilo tšeo o di rapelelago. Mohlomongwe o ka kgetha go leboga Jehofa ka dilo tše itšego tše tharo. Ka metsotso e sego kae, o ka ba mokwi le modiri wa Lentšu la Modimo. Nagana gore o ka holega bjang ge o ka diriša mokgwa wo letšatši le lengwe le le lengwe ge o bala Beibele! Ruri o tlo ba modiri wa Lentšu la Modimo. w24.09 4-5 ¶9-10

Jehofa o re bopile go swana le yena. Le ge re thabišwa ke go hwetša dimpho, Jehofa o dirile gore re thabe le go feta ge re nea batho ba bangwe. Re a thaba ge re thuša bana babo rena, e bile re a thaba ge ba re leboga. Le ge motho yo re mo thušitšego a ka se re leboge ga se ra swanela go nyama, ka gobane re a tseba gore re ekišitše Jehofa. Dula o gopola gore ge o nea ba bangwe, “Jehofa a ka kgona go go nea tše dintšhi kudu go feta [tšeo].” (2 Dikor. 25:9) Ga go na motho yo a ka neago go phala Jehofa! Le gona ga go yo a ka re putsago go feta Jehofa. A re direng sohle seo re ka se kgonago gore re ekiše Jehofa ka go rata go thuša batho ba bangwe. w24.09 31 ¶20-21

Jehofa o na le kwelobohloko ebile o a gaugela. (Ps. 103:13; Jes. 49:15) Ge re ekwa bohloko le yena o kwa bohloko. (Sak. 2:8) Go bonolo gore re be bagwera ba gagwe. (Ps. 25:14; Dit. 17:27) O ikokobeditše; “o a inama e le gore a lebelele legodimo le lefase, o thuša motho wa maemo a tlase gore a se sa dula leroleng.” (Ps. 113:​6, 7) Ruri dilo tše ka moka di dira gore re nyake go fa Modimo letago. Re fa Jehofa letago ka gobane re nyaka gore batho ba bangwe ba mo tsebe. Batho ba bantšhi ga ba tsebe nnete ka Jehofa. Ka baka la’ng? Ka gobane Sathane o phatlalatša maaka ka yena. (2 Bakor. 4:4) Sathane o botša batho gore Jehofa ke yo kgopo, ga a re rate ebile o dira gore batho ba tlaišege. Eupša rena re tseba nnete ka Modimo wa rena. Ka gona, re swanetše go botša batho nnete yeo gomme re mo fe letago.—Jes. 43:10. w25.01 3 ¶6-7

Lekgolong la pele la mengwaga, bao ba thekgago Sathane, ba ile ba bolela maaka ka Morwa wa Modimo yo a phethagetšego yo a bego a dira mehlolo. Ka mohlala, baetapele ba bodumedi ba ile ba botša batho gore matla ao Jesu a nago le ona a go leleka batemona, o a neilwe ke “mmuši wa batemona.” (Mar. 3:22) Nakong ya ge Jesu a sekišwa, baetapele ba bodumedi ba ile ba latofatša Jesu ka gore o senya Modimo leina ba ba ba kgothaletša batho gore ba mmolaye. (Mat. 27:20) Ka morago ge balatedi ba Kriste ba be ba bolela ditaba tše dibotse, bao ba bego ba ba ganetša ba ile ba “hlohleletša gampe batho ba ditšhaba” gore ba tlaiše Bakriste bao. (Dit. 14:​2, 19) Ge Morokami wa December 1, 1998 o bolela ka lengwalo la Ditiro 14:​2, o itše: “Batho bao ba thekgago Sathane, ba ile ba gana molaetša woo Bakriste ba bego ba o bolela ba ba ba bolela dilo tše mpe ka bona le go dira gore batho ba se ke ba ba theetša e bile ba ba hloye.” Le lehono, Sathane o sa ‘timetša lefase ka moka.’ w24.04 11 ¶15-16

Bokamoso bja motho, ga bo ithekge ka gore o hlokofetše neng. Jehofa ke moahlodi yo a phethagetšego. O ahlola batho gabotse le ka toko. (Ps. 33:​4, 5) Re ka tshepa gore “moahlodi wa batho lefaseng ka moka” o tla ahlola batho gabotse. Taba ya gore motho o swanelega go phela go ya go ile ga se ya ithekga ka gore o dula kae. Go tla ba go sa kwagale go phetha ka gore Jehofa o tla ahlola batho ba dimilione gore ke “dipudi” mola batho bao ba dula mafelong ao molaetša wa Mmušo o sa kago wa fihla go ona. (Mat. 25:46) Moahlodi wa go loka wa batho lefaseng ka moka, o na le taba le batho bao ba sa kago ba kwa ditaba tše dibotse. Ga re tsebe gore Jehofa o tlo dira dilo bjang nakong ya masetlapelo a magolo. Mohlomongwe batho bao ba tlo ba le sebaka sa go ithuta ka Jehofa, le go ba le tumelo go yena ge a tla be a kgethagatša leina la gagwe pele ga ditšhaba ka moka.—Hesek. 38:16. w24.05 12 ¶14-15

Bahlanka ba Jehofa ba rata go thušana. (2 Bakor. 8:4) Eupša ka dinako tše dingwe go nyakega sebete gore ba dire bjalo. Ka mohlala, ge go e ba le ntwa, bagolo ba lemoga gore bana babo bona le dikgaetšedi ba hloka go kgothatšwa, go thekgwa, mohlomongwe le go hwetša dilo tšeo di ka ba thušago gore ba kgone go ithuta ka Jehofa le dilo tše dingwe tšeo di ka ba thušago gore ba phele. Ka dinako tše dingwe bagolo ba bea maphelo a bona kotsing gore ba hlokomele mohlape wo ba o ratago. Ge go e ba le dikotsi go bohlokwa gore re be le botee. Latelang tlhahlo e tšwago ofising ya lekala la gabo lena. (Baheb. 13:17) Bagolo ba swanetše go dula ba hlahloba tlhahlo yeo e tšwago go mokgatlo ya go itokišeletša dinako tše kotsi. (1 Bakor. 14:​33, 40) Eba sebete eupša o le šedi. (Die. 22:3) Nagana pele o tšea kgato. Dira sohle seo o ka se kgonago gore o dule o šireletšegile. Ithekge ka Jehofa. A ka go thuša gore o thuše bana beno le dikgaetšedi ka tsela e bolokegilego. w24.07 4 ¶8; 5 ¶11

Kgoši Dafida o be a tseba Jehofa e bile a ithekga ka yena. Nakong ya ge a be a rakedišwa ke manaba a gagwe go akaretša le Kgoši Saulo, Dafida o ile a rapela Jehofa gore a mo thuše. Ka morago ga gore Jehofa a arabe thapelo ya gagwe le go mo phološa, Dafida o ile a bolela gore: “Jehofa ke Modimo yo a phelago!” (Ps. 18:46) Ge Dafida a be a bolela mantšu a, o be a sa no bontšha gore Modimo o gona. Nyakišišo e nngwe e re Dafida o ile a bontšha gore o tshepa Jehofa ka ge e le “Modimo yo a phelago yoo a dulago a thuša batho ba gagwe.” Dafida o be a tseba gore Modimo ke yo a phelago ka ge a ile a mo thuša bophelong bja gagwe, gomme seo se ile sa dira gore a ikemišetše go hlankela Jehofa le go mo tumiša. (Ps. 18:​28, 29, 49) Ge re kgodišegile gore Jehofa ke Modimo yo a phelago re tlo kgona go mo hlankela ka mafolofolo. Re tlo ba le matla a go kgotlelela mathata, ra ba ra kgona go tšwela pele re šoma ka thata tirelong ya Modimo. Re tlo ikemišetša le go dula re le bagwera ba Jehofa. w24.06 20-21 ¶3-4

Re ithuta’ng go seo moapostola Paulo a se boditšego Bathesalonika? Re swanetše go ba šedi ge re ekwa mabarebare goba ge re ekwa dilo tšeo di sa dumelelanego le tšeo re ithutilego tšona ka Beibeleng. Ge go be go buša Soviet Union, manaba a rena a ile a ngwalela bana babo rena lengwalo leo le bego le bonagala okare le tšwa ntlongkgolo. Lengwalo leo le be le kgothaletša bana babo rena gore ba dire dihlotswana. Le be le bonagala e le la nnete. Eupša bana babo rena bao ba botegago ga se ba forwa ke lengwalo leo. Ba ile ba lemoga gore seo se bego se bolelwa ke lengwalo leo ga se dumelelane le dilo tšeo ba bego ba ithuta tšona. Le lehono, manaba a rena a diriša inthanete go leka go re gakantšha le go re aroganya. Go e na le gore re ‘šišinywe ka pela,’ re ka itšhireletša ka go naganišiša ge eba dilo tšeo re di kwago le go di bala di dumelelana le ditherešo tšeo re ithutilego tšona.—2 Bathes. 2:2; 1 Joh. 4:1. w24.07 12 ¶14-15

E nngwe ya diphetho tše bohlokwa tšeo motho a ka di dirago ke go ineela go Jehofa le go ba karolo ya lapa la gagwe. Jehofa o nyaka gore yo mongwe le yo mongwe a dire phetho yeo. Ka baka la’ng? O nyaka gore ba thabele go gwerana le yena e bile ba phele go ya go ile. (Doit. 30:​19, 20; Bagal. 6:​7, 8) Jehofa ga a gapeletše batho gore ba mo hlankele. O dumelela motho yo mongwe le yo mongwe a ikgethela gore o nyaka go dira eng. Bakriste ba swanetše go dira eng ge Mokriste a dira sebe se segolo? Ge e ba motho yoo a sa itshole, o swanetše go tlošwa ka phuthegong. (1 Bakor. 5:13) Le ge motho yoo a ka tlošwa ka phuthegong, Jehofa o duma gore a itshole gomme a boele go yena. Ge e le gabotse, lebaka le legolo la gore Jehofa a re nee topollo ke gore a kgone go lebalela batho bao ba itsholelago dibe tša bona. Modimo wa rena yo a re ratago o kgothaletša batho bao ba dirilego dibe tše dikgolo gore ba itshole.—Sak. 1:3; Baroma 2:4; Jak. 4:8. w24.08 14 ¶1-2

Nakong ya ge moapostola Johane a ngwala lengwalo la boraro, go be go na le ba bangwe ka phuthegong bao ba bego ba ruta dithuto tša maaka le go baka dikarogano. Eupša ba bangwe ba ile ba tšwela pele ba “sepela tseleng ya nnete.” Ba be ba ekwa Jehofa e bile ba “phela ka melao ya gagwe.” (2 Joh. 4, 6) Bakriste ba bao ba botegago, ga se ba thabiša Johane feela eupša ba ile ba thabiša le Jehofa (Die. 27:11) Seo re ithutago sona. Go botega go dira gore re thabe. (1 Joh. 5:3) Ka mohlala, re a thaba ge re tseba gore re thabiša pelo ya Jehofa. O a thaba ge a bona re gana diteko tšeo di lego gona mo lefaseng gomme re ekwa seo Beibele e re botšago sona. Barongwa le bona kua legodimong ba a thaba. (Luka 15:10) Le rena re a thaba ge re bona Bakriste gotee le rena ba botega. (2 Bathes. 1:4) Ge tshepedišo ye e fihla mafelelong, re tlo kgotsofatšwa ke go tseba gore re ile ra dula re botegela Jehofa le ge re be re phela lefaseng leo le laolwago ke Sathane. w24.11 12 ¶17-18

O swanetše go tšea nako e kaaka’ng pele o ka botša motho gore o a go kgahla? Ge o ka kitimela go botša motho yo a itšego gore o a go kgahla, a ka nagana gore o dira dilo o se wa nagana. (Die. 29:20) Ka lehlakoreng le lengwe, ge o ka tšea nako e telele motho yoo a ka nagana gore ga o tsebe mo o emego kudukudu ge e ba le wena o mo kgahla. (Mmo. 11:4) Gopola gore taba ya gore motho yo a itšego o a go kgahla ga e re gore o tlo nyalana le yena. O swanetše go kgodišega gore o loketše go nyala le gore motho yo a go kgahlago e ka ba molekane yo mokaone. O swanetše go dira’ng ge o lemoga gore motho yo a itšego o nyaka go tsebana le wena gakaone? Ge e ba o sa mo nyake, o se ke wa mo fihlela. Go ka se be bose go dira gore motho a bone eka o nyaka go ratana yena mola go se bjalo.—Baef. 4:25. w24.05 22-23 ¶9-10

Jesu o tlo tšea feela Bakriste bao ba tloditšwego bao ba dulago ba botega go yo dula le yena legodimong. Mokriste yo mongwe le yo mongwe yo a tloditšwego ge a ka se dule a phakgame, a ka se kgoboketšwe le “bakgethwa” ba bangwe. (Mat. 24:31) Ka ge le rena re le bahlanka ba Modimo, re swanetše go kwa keletšo yeo Jesu a e neilego batlotšwa ya gore ba dule ba phakgame le go botega. Ka morago ga gore re ithute ka Jehofa le go mo tseba gabotse, re a tshepa gore o tlo ahlola gabotse. Ga re belaele gore nakong ye re phelago go yona, go na le Bakriste bao Jehofa a ba kgethilego gore e be batlotšwa. Re gopola seo Jesu a ilego a se bolela ka bašomi bao ba ilego ba thoma go šoma mo e ka bago ka iri ya lesometee serapeng sa merara. (Mat. 20:​1-16) Batho bao ba ilego ba thoma go šoma serapeng sa merara mosegare, ba ile ba gola tšhelete ya go lekana le ya bao ba ilego ba thoma go šoma mesong. Ka mo go swanago, ge Bakriste bao ba tloditšwego ba ka dula ba botega ba tlo hwetša moputso o swanago. Jesu a ka se lebelele gore ba kgethilwe neng go ba batlotšwa. w24.09 24 ¶15-17

Jesu o re beetše mohlala o mobotse wa kamoo re ka itshwarago ka gona ge re sa swarwe gabotse. Nagana ka tsela yeo batho ba bantšhi ba ilego ba mo swara ka gona, go akaretša le batho ba gabo. Batho ba gabo bao ba bego ba sa hlankele Jehofa, ba be ba nagana gore o hlakane hlogo. Baetapele ba bodumedi ba ile ba mo latofatša ka gore o dirišana le batemona gomme madira a Baroma a mo kwera, a mo tlaiša ke moka mafelelong a mmolaya. (Mar. 3:​21, 22; 14:55; 15:​16-20, 35-37) Ge dilo tše ka moka di direga, Jesu ga se a ka a itefeletša. Ke’ng seo re ithutago sona mohlaleng wa gagwe? (1 Pet. 2:​21-23) Jesu o re beetše mohlala o mobotse kudu wo re ka o ekišago. O be a tseba nako ya go bolela le ya go homola. (Mat. 26:​62-64) Ga se a ka a ikemelela nako e nngwe le e nngwe ge a latofatšwa. (Mat. 11:19) Ge a be a bolela ga se a ka a roga batho bao ba mo latofatšago go ba go ba tšhošetša. w24.11 4-5 ¶9-10

Nagana o e fa motho mpho e botse le yeo e ka mo holago. O ka nyama ge e ba o ka hwetša motho yoo a tšere mpho yeo a e phaetše ka thoko ebile a sa e diriše. Eupša o be o ka thaba kudu ge o ka hwetša motho yoo a diriša mpho yeo go bontšha gore o a go leboga. Mohlala wo o re ruta’ng ka Jehofa? Jehofa o re file Morwa wa gagwe gore a re hwele. Jehofa o thaba kudu ge re bontšha gore re leboga topollo le tsela yeo a re ratago ka yona. (Joh. 3:16; Baroma 5:​7, 8) Ge nako e dutše e ya, re ka thoma go tšeela fase mpho yeo Jehofa a re filego yona ya topollo. Go dira bjalo go no swana le go beela mpho yeo ya Jehofa ka thoko. Re ka no ba re sa thabela gore re na le mpho yeo, eupša ge nako e dutše e eya, ra se sa ba le taba le yona. Go re seo se se ke sa direga, re swanetše gore re dule re nagana ka seo Jehofa le Jesu ba re diretšego sona. w25.01 26 ¶1-2

Ngwanabo rena yo a sa tšwago go sokologa a ka se swanelege go ba mogolo. Le ge go sa nyakege gore o fetše mengwaga e mentšhi o kolobeditšwe, go nyakega nakwana e itšego gore o be Mokriste yo a godilego moyeng. Pele o ka kgethwa gore o be mogolo, o swanetše go bontšha gore o ekiša Jesu ka go ba le boikokobetšo le go se felele Jehofa pelo. (Mat. 20:23; Bafil. 2:​5-8) O ka bontšha gore o a botega ka go ithekga ka Jehofa le melao ya gagwe ya go loka le go latela tlhahlo yeo a re neago yona a diriša mokgatlo wa gagwe. Beibele e bontšha gore bagolo ba swanetše go ba le bokgoni bja go ruta. Na se ra gore o swanetše go ba seboledi sa phatlalatša seo se nago le bokgoni kudu? Aowa. Bagolo ba bantšhi ba kgona go ruta tšhemong le go dira maeto a bodiši le ge ba sa kgone go bolela phatlalatša. w24.11 23-24 ¶14-15

Dira nyakišišo ge eba o ka hwetša selo seo o sa se kwešišego. Ge o dutše o swaregile ka dilo tše dingwe mo letšatšing, naganišiša ka dilo tšeo o ithutilego tšona. Nagana gore dilo tšeo o ithutilego ka tšona di go ruta eng ka Jehofa, Morwa wa gagwe le kamoo ba go ratago ka gona. (Ps. 119:97) O se ke wa fela matla ge o sa hwetše dilo tše mpsha ge o ithuta goba o dira nyakišišo. Ipone o swana le motho yo a nyakago gauta. Ge motho a sa fele pelo a ka fetša diiri goba matšatši a mantšhi pele a ka hwetša gauta. Le ge a ka hwetša gauta e nnyane ga a fele matla ka gobane le yona e bohlokwa. Dilo tšeo re ithutago tšona ka Beibeleng di bohlokwa go feta gauta. (Die. 8:10) O se ke wa fela matla, tšwela pele o bala Beibele gomme o nyake dilo tše mpsha tšeo o ka ithutago tšona.—Ps. 1:2. w25.01 25 ¶14-15

Jehofa o nyaka gore re dule re ikemišeditše go lebalela bao ba re kwešitšego bohloko. (Ps. 86:5; Luka 17:4; Baef. 4:32) Re ka kwešwa bohloko ke dilo tšeo batho ba di bolelago goba ba di dirago, kudukudu ge e ba motho yoo e le wa gabo rena goba e le mogwera. (Ps. 55:​12-14) Ka dinako tše dingwe bohloko bjo re bo kwago bo ka swantšhwa le go hlabja ka thipa. (Die. 12:18) Re ka no leka go phaela ka thoko tsela yeo re ikwago ka yona. Eupša go dira bjalo go no swana le go tlogela thipa yeo mo ba go hlabilego gona. Seo se ra gore le rena re ka se fole ge e ba re phaela maikwelo a rena ka thoko. Gantšhi Beibele le yona e re motho a ka kwata, eupša e re lemoša gore re se ke ra kwatela sa ruri. (Ps. 4:4; Baef. 4:26) Ka baka la’ng? Ka gobane gantšhi ge motho a galefile o dira diphošo. (Jak. 1:20) Motho yo mongwe le yo mongwe a ka kwata, eupša re na le kgetho ya gore re ka dula re kwatile goba ra iša maswafo fase. w25.02 15 ¶4-6

Jesu o ile a diriša papišo go bontšha gore ga se ga bohlale gore motho a leke go ikgobokeletša mahumo eupša a se a “huma go Modimo.” (Luka 12:​16-21) Ditlalemeso ga di tsebje. (Die. 23:​4, 5; Jak. 4:​13-15) Le rena re ka kopana le mathata ao balatedi ba Kriste ba ilego ba kopana le ona. Jesu o itše batho ka moka bao ba nyakago go ba balatedi ba gagwe, ba swanetše go ikemišetša go “furalela” dilo ka moka tšeo ba nago le tšona. (Luka 14:33) Bakriste ba kua Judea ba ile ba dira sona seo. Ba be ba ikemišeditše go loba dilo tšeo ba bego ba na le tšona ka lethabo. (Baheb. 10:34) Le mehleng ya rena, bana babo rena ba bangwe ba ile ba lahlegelwa ke mešomo ya bona goba dilo tšeo ba nago le tšona ka baka la go se thekge dipolotiki. (Kut. 13:​16, 17) Ke’ng seo se ba thušitšego? Ba ile ba thušwa ke go tshepa mantšu a Jehofa ao a rego: “Le ka mohla nka se ke ka go tlogela le ge e le go go lahla.” (Baheb. 13:5) Re dira sohle seo re ka se kgonago gore re be le tšhelete yeo e tlago go re thuša ge re tšofetše ebile re a tshepa gore Jehofa o tlo re thuša ge re ka diragalelwa ke selo seo re bego re sa se letela. w25.03 29 ¶13-14

Jehofa o re thuša gore re be batho bao ba godilego moyeng. Bao e lego badiši le barutiši ka phuthegong ba ikemišeditše go thuša yo mongwe le yo mongwe gore a ‘gole ka mo go feletšego go fihlela a eba le dika tša Kriste ka moka.’ (Baef. 4:​11-13) Jehofa o re nea le moya wa gagwe o mokgethwa go re thuša gore re be le “monagano wa Kriste.” (1 Bakor. 2:​14-16) Go oketša moo Modimo o ile a budulela gore go ngwalwe Diebangedi tše nne tšeo di re bontšhago kamoo Jesu a bego a nagana ka gona, a bolela ka gona le go dira dilo nakong ya bodiredi bja gagwe bja mo lefaseng. O ka kgona go ba Mokriste yo a godilego moyeng ge o ka ekiša tsela ya Jesu ya go nagana le go dira dilo. E le gore re be Bakriste bao ba godilego moyeng re swanetše go ithuta ka mo go tseneletšego ka Kriste. w24.04 4-5 ¶11-12

Letšatši le lengwe le le lengwe re swanetše go dira diphetho. Diphetho tše dingwe go bonolo go di dira, go swana le go kgetha gore o tlo ja eng mesong le gore o tlo robala nako mang. Diphetho tše dingwe tšona go thata go di dira. Diphetho tše dingwe tšeo re di dirago di ka kgoma maphelo a rena, lethabo la rena, malapa a rena le tsela yeo re hlankelago Jehofa ka yona. Re nyaka gore diphetho tšeo re di dirago di re hole le go hola ba gabo rena. Sa bohlokwa le go feta ke gore diphetho tšeo re di dirago di swanetše go kgahliša Jehofa. (Baroma 12:​1, 2) Selo sa bohlokwa seo se ka go thušago go dira diphetho gabotse ke go hwetša ditaba ka botlalo. Ke ka baka la’ng seo se le bohlokwa? A re re motho o ya ngakeng ka ge a babja kudu. Na ngaka yeo e ka no thoma ka go botša motho yoo gore o bolawa ke eng le go mo nea dihlare ntle le go mo hlahloba goba go mmotšiša dipotšišo? Le gatee. Le wena o ka ekiša ngaka yeo ka go tseba ditaba ka botlalo pele o dira phetho e itšego. w25.01 14 ¶1-3

Ke eng seo re se tsebago ka kwelobohloko ya Jehofa? O bontšhitše bjang gore ga a nyake gore “go fedišwe le ge e le mang?” (2 Pet. 3:9) Nagana ka batho bao ba ilego ba dira dibe tše dikgolo gomme a ba bontšha kwelobohloko. Kgoši Dafida o ile a dira dibe tše dintšhi tše dikgolo, tšeo di akaretšago bohlotlolo le go bolaya. Dafida o ile a itshola gomme Jehofa a mo lebalela. (2 Sam. 12:​1-12) Kgoši Manase o ile a dira dilo tše dintšhi tše kgopo bophelong bja gagwe. Ka morago ga go dira dilo tšeo ka moka Jehofa o ile a mo lebalela ge a itshola. (2 Dikor. 33:​9-16) Mehlala ye, e re ruta gore Jehofa o bontšha kwelobohloko ge go nyakega gore a dire bjalo. O tlo tsoša batho bao ba ilego ba lemoga gore ba dirile dibe tše dikgolo gomme ba itshola. w24.05 4 ¶12