Sehlabelo sa Jesu Kriste se šetše se re hola. Ka mohlala, Jehofa o kgona go re lebalela ka ge Jesu a re hwetše. Jehofa ga a gapeletšege go re lebalela. O re lebalela ka gobane a re rata. (Ps. 103:​3, 10-13) Ba bangwe ba ka ikwa ba sa swanelwe ke go lebalelwa ke Jehofa. Ke nnete gore ge e le gabotse ka moka ga rena ga re swanelege. Moapostola Paulo le yena o be a tseba gore ga a “swanelwe ke go bitšwa moapostola.” O ile a bolela le gore: “Eupša ke seo ke lego sona ka botho bjo bogolo bja Modimo.” (1 Bakor. 15:​9, 10) Jehofa o a re lebalela ge re itshola. Ka baka la’ng? O re lebalela ka gobane a re rata, e sego ka gobane a gapeletšega. Ge e ba o ikwa o se na mohola goba o nyamišwa ke dilo tšeo o di dirilego, gopola gore Jehofa o rometše Morwa wa gagwe gore a tle a hwele badiradibe bao ba itsholago.—Luka 5:32; 1 Tim. 1:15. w25.01 26-27 ¶3-4

Re ka se kgone go laola dilo tšeo batho ba di bolelago goba tšeo ba re dirago tšona, eupša re ka leka go laola tsela yeo re arabelago ka yona. Gantšhi go lebalela ke tsela e kaone ya go dira dilo. Ka baka la’ng? Ka gobane re rata Jehofa ebile o nyaka gore re lebalele batho ba bangwe. Ge e ba re ka dula re kwatile gomme ra se lebalele ba bangwe, re tlo dira dilo tša botlaela gomme ra se be le ditlamorago tše dibotse. (Die. 14:​17, 29, 30) Ge re lebalela batho ba bangwe, go tlo ba bonolo gore re ba sware gabotse. Re itirela selo se se kaone kudu, le gona re tlogela go hlwa re nagana ka selo seo se diregilego gomme re tlo boela ra ipshina ka bophelo. O ka thušwa ke’ng gore o se ke wa dula o kwatile? O se ke wa dulela go nagana kudu ka seo se diragetšego. Motho yo a bego a gobetše kudu, o hloka nako ya gore a fole ka morago ga gore a alafiwe. Ka mo go swanago, go ka re tšea nako gore re lebalele motho yo a re kwešitšego bohloko. (Mmo. 3:3; 1 Pet. 1:22) Kgopela Jehofa gore a go thuše go lebalela batho ba bangwe. w25.02 16-17 ¶8-11

Tše dingwe tša dithuto tša motheo tšeo re ilego ra ithuta tšona di akaretša boitsholo, tumelo, kolobetšo le tsogo ya bahu. (Baheb. 6:​1, 2) Tšeo e no ba dithuto tša motheo tšeo Bakriste ka moka ba di dumelago. Ka baka la se moapostola Petro o ile a bolela ka tšona ge a be a ruta lešaba nakong ya Pentekoste. (Dit. 2:​32-35, 38) Re swanetše go amogela dithuto tše gore re be barutiwa ba Kriste. Ka mohlala, Paulo o ile a re lemoša gore re ka se bolele gore re Bakriste ba therešo ge eba re sa dumele go tsogo ya bahu. (1 Bakor. 15:​12-14) Eupša ga se ra swanela go no kgotsofalela go tseba ditherešo tša motheo feela. Go fapana le dithuto tša motheo, dijo tša moya tše di tiilego ga di no akaretša melao ya Jehofa eupša di akaretša le melao ya gagwe ya motheo e lego seo se re thušago go kwešiša tsela yeo a naganago ka yona. E le gore re holwe ke dijo tšeo, re swanetše go ithuta, re naganišiše re be re diriše seo re ithutilego sona. Ge re dira bjalo re itlwaetša go dira diphetho tšeo di thabišago Jehofa. w24.04 5 ¶12-13

Modimo o ile a gopotša Jona gore Baninife ba be ba sa tsebe “phapano magareng ga seatla sa bona sa le letona le sa le letshadi.” (Jona 1:​1, 2; 3:10; 4:​9-11) Ka morago Jesu o ile a diriša mohlala wa Baninife go ruta batho ka toka ya Jehofa le kwelobohloko ya gagwe. Jesu o be a e ra gore’ng ge a be a re “ba tla tsoga le moloko wo kahlolong”? Jesu o be a ruta ka go “tsogela kahlolo.” (Joh. 5:29) O be a bolela ka Pušo ya gagwe ya Mengwaga e Sekete, moo ‘ba lokilego le ba sa lokago’ ba tlago go tsošwa. (Dit. 24:15) Bao ba sa lokago ba tlo “tsogela kahlolo.” Seo se ra gore Jehofa le Jesu ba tlo lebelela tsela yeo ba itshwerego ka yona le gore ba arabela bjang go seo ba ithutilego sona. Ge e ba motho wa Ninife a ka gana go hlankela Jehofa o tlo fedišetšwa sa ruri. (Jes. 65:20) Eupša bao ba kgethago go hlankela Jehofa ka go botega, ba tlo thabela go phela kamoo go sa felego.—Dan. 12:2. w24.05 5 ¶13-14

Tsela yeo Jesu a bego a dira dilo ka yona e be e bontšha gore Jehofa o na le kwelobohloko. (Joh. 14:9) Dilo tšeo Jesu a bego a di dira le go di bolela di be di bontšha gore Tatagwe wa legodimong o na le taba le batho bao ba sa phethagalago. Jesu o thušitše batho bao ba nago le sebe gore ba nyake go tlogela tsela yeo ba phelago ka yona gomme ba mo latele. (Luka 5:​27, 28) Jesu o be a tseba gore o tlo neela bophelo bja gagwe. O ile a botša balatedi ba gagwe gantšhinyana gore o tlo ekwa le go kokotelwa koteng. (Mat. 17:22; 20:​18, 19) O be a tseba gore sehlabelo sa gagwe se tlo fediša sebe. Jesu o ile a ruta le gore ka morago ga go neela bophelo bja gagwe o “tla gogela batho ba mehuta ka moka” go yena. (Joh. 12:32) Batho bao ba sa phethagalago ba ka kgahliša Jehofa ka go dumela gore Jesu ke Morena wa bona le go ekiša mohlala wa gagwe. Ge ba ka dira bjalo, mafelelong ba tla ‘lokollwa sebeng.’ (Baroma 6:​14, 18, 22; Joh. 8:32) Jesu o ile a ba le sebete le go ikemišetša go hwa ga sehlogo gore a re phološe.—Joh. 10:​17, 18. w24.08 5 ¶11-12

Na o gopola kamoo o ilego wa ikwa ka gona ge o be o ithuta ditherešo tša ka Lentšung la Modimo la mathomo? O ile wa ithuta gore Tatago wa magodimong o a go rata e bile o nyaka gore o be karolo ya lapa la gagwe. O tshepišitše gore o tlo fediša bohloko le tlaišego. O na le kholofelo ya gore o tlo bona batho ba o ba ratago bao ba hlokofetšego ba phela gape lefaseng le leswa. Jehofa o go tshepišitše le dilo tše dingwe tše dintšhi. (Mar. 10:​29, 30; Joh. 5:​28, 29; Baroma 8:​38, 39; Kut. 21:​3, 4) Dilo tšeo o ithutilego tšona di ile tša go thabiša. (Luka 24:32) O ile wa rata dilo tšeo o ithutilego tšona gomme wa nyaka go di botša batho ba bangwe! (Bapiša le Jeremia 20:9.) Ge re rata seo re ithutilego sona ka Beibeleng re tlo nyaka go se botša batho ba bangwe. (Luka 6:45) Re ikwa go swana le balatedi ba Jesu ba lekgolong la pele la mengwaga bao ba ilego ba bolela gore: “Re ka se ke ra tlogela go bolela ka dilo tše re di bonego le tše re di kwelego.” (Dit. 4:20) Re rata ditaba tše dibotse gomme re nyaka go di botša batho ba bantšhi kamoo re ka kgonago ka gona. w24.05 15 ¶5; 16 ¶7

Ka ge re le bahlanka ba Jehofa, re botša batho ba bangwe ditaba tše dibotse ka gobane re rata Tatago rena wa legodimong e bile re nyaka go thuša baagišani ba rena gore ba mo tsebe. Eupša ba bangwe ga ba thabele go bolela ditaba tše dibotse. Ka baka la’ng? Ba bangwe ba ka ba ba na le dihlong e bile ba ikwa okare ga ba na bokgoni bja go ruta. Ba bangwe ga ba rate go ya malapeng a batho bao ba sego ba ba mema. Ba bangwe ba tšhaba go ganetšwa. Ba bangwe ba rutilwe go phema dingangišano le batho ba bangwe. Bana babo rena ba le dikgaetšedi ba thatafalelwa ke go botša batho bao ba sa ba tsebego ditaba tše dibotse. Na le wena ka dinako tše dingwe o ikwa ka tsela ye gomme o hwetša go le thata go ya tšhemong? Ge e ba o ikwa ka tsela ye o se ke wa nyama. Go nagana gore ga o na bokgoni go ka bontšha gore o ikokobeditše, ga o nyake go ikgogela mahlo a batho e bile ga o nyake go ngangišana le batho ba bangwe. Ga go na motho yo a nyakago go ganetšwa, kudukudu ge a leka go direla batho ba bangwe selo se se lokilego. Tatago wa legodimong o bona mathata ao o kopanago le wona e bile o nyaka go go thuša.—Jes. 41:13. w24.04 14 ¶1-2

Ge o dutše o bala Beibele, go e na le gore o nyake go dira dilo ka moka ka nako e tee, kgetha tšeo o ka thomago ka tšona pele. Mokgwa o mongwe wo o ka šomago šo: Ngwala dilo tšeo o nyakago go di kaonefatša, ke moka o kgethe selo se tee goba tše pedi tšeo o nyakago go thoma ka tšona pele. Ke moka o tla kaonefatša tše dingwe ka morago. O ka thoma kae? Thoma ka selo seo go ka bago bonolo go se kaonefatša. Goba o ka thoma ka go kaonefatša moo o bonago gore o hloka go kaonefatša ka pelapela. Ge e ba o bone gore o swanetše go lokiša kae, dira nyakišišo ka dikgatišong tša rena. Rapela Jehofa gore a go thuše le gore a go nee “kganyogo le matla a gore [o] dire dilo tšohle tšeo a di ratago.” (Bafil. 2:13) Ke moka leka go diriša dilo tšeo o ithutilego tšona. Ge o dutše o bona gore o dira tšwelopele, o tlo kgona go ba le matla a go dira diphetogo tše dingwe. Ge o bona o kgonne go kaonefatša seka se itšego sa Bokriste goba o kgonne go tlogela mokgwa o itšego, o tlo ba le matla a go tšwela pele o dira diphetogo. w24.09 6 ¶13-14

O ka ba o kwešwa bohloko ke dilo tšeo o di dirilego nakong e fetilego tšeo di kwešitšego batho ba bangwe bohloko. Ke’ng seo se ka go thušago? Dira sohle seo o ka se kgonago gore o lokiše ditaba, le gona ba botše gore o kgopela tshwarelo. Kgopela Jehofa gore a thuše bao o ba kwešitšego bohloko. A ka thuša wena le bao o ba kwešitšego bohloko gore le kgone go tšwela pele le mo hlankela le gore le be le khutšo. Ithute diphošong tša gago gomme o ikemišetše go dumelela Jehofa a go diriša ka tsela yeo a nyakago ka yona. Nagana ka mohlala wa moporofeta Jona. Go e na le gore a ye Ninife moo Jehofa a mo romilego gona, o ile a tšhabela lefelong le lengwe. Jehofa o ile a mo phošolla, gomme Jona o ile a ithuta phošong ya gagwe. (Jona 1:​1-4, 15-17; 2:​7-10) Jehofa ga se a ka a mo swarela sekgopi. Modimo o ile a roma Jona gape gore a ye Ninife gomme lekgeng le o ile a mo kwa. Jona o ile a itshola ka baka la phošo yeo a e dirilego nakong e fetilego eupša ga se a gana ge Jehofa a mo roma gape.—Jona 3:​1-3. w24.10 8-9 ¶10-11

Ge Jehofa a re lebalela o tloša sekoloto sa rena ka go se phumola. Ge motho a tloša sekoloto se itšego, re tlo bona a thadile mothalo godimo ga tšhelete yeo re e kolotago. Eupša re sa tlo kgona go bona gore tšhelete yeo e be e le bokae ka gobane ga se a e phumola, o no thala mothalo godimo ga yona. E le gore re kwešiše mohlala wo gabotse, re swanetše go gopola gore mehleng ya kgale ba be ba šomiša enke yeo e bego e kgona go phumolega gabonolo. O be o ka kgona go e phumola ka sepontšhe seo se thapilego. Ka gona, ge sekoloto se phumotšwe, ga se sa bonagala. Motho a ka se sa kgona go bona tšhelete yeo motho yo mongwe a bego a e kolota. Go swana le ge re ka re motho yoo ga se a ka a ba le sekoloto. Go a thabiša go tseba gore ge Jehofa a re lebalela, go swana le ge eka ga se ra ka ra mo direla sebe.—Ps. 51:9. w25.02 10 ¶11

Ge e ba batho ba bangwe ba sa re ahlole gabotse goba ba sa re sware gabotse, re ka kgodišega gore Jehofa ke yena a tsebago seo se diragetšego. Go dira bjalo go tlo re thuša gore re kgone go kgotlelela ka gobane re tla be re tseba gore mafelelong Jehofa o tlo lokiša dilo. Ge e ba re tlogelela dilo ka matsogong a Jehofa, re tlo tlogela go dula re galefile goba go swara sekgopi. Go swara sekgopi go tlo dira gore re dule re nyamile, gwa re palediša go dira dilo tše dibotse le go senya segwera sa rena le Jehofa. Re ka se kgone go dira dilo ka moka tšeo Jesu a di dirilego. Ka dinako tše dingwe re ka bolela goba ra dira dilo tšeo re ka itsholelago tšona ka morago. (Jak. 3:2) E bile ka dinako tše dingwe, re ka palelwa ke go kgotlelela ge re sa swarwe gabotse. Ge e ba seo se ka direga, kgodišega gore Jehofa o tseba ditaba ka botlalo. Le Jesu o a kwešiša gore o ikwa bjang ka gobane le yena o ile a se swarwe gabotse. (Baheb. 4:​15, 16) Re leboga gore Jehofa o re nea keletšo yeo e re thušago gore re kgone go kgotlelela ge re sa swarwe gabotse. w24.11 6 ¶12-13

Batho ba swanetše go bontšha tumelo go Jesu gore ba tle ba hwetše “bophelo bjo bo sa felego.” (Joh. 3:​16-18, 36; 17:3) Bajuda ba bantši ba be ba sa dumele gore ba swanetše go bontšha tumelo go Jesu. Ba ile ba mmotšiša gore: “Bjale ke pontšho efe yeo o ka e dirago, e le gore re e bone gomme re go dumele?” (Joh. 6:30) Ba ile ba bolela gore borakgolokhukhu ba bona mehleng ya Moshe ba ile ba hwetša manna ao a bego a swantšhwa le senkgwa. (Neh. 9:15; Ps. 78:​24, 25) Go molaleng gore ba be ba sa tshwenyegile ka go hwetša dijo. Le ge Jesu a be a be a bolela ka “senkgwa sa kgonthe se se tšwago legodimong,” ba ile ba palelwa ke go mmotšiša gore o bolela ka’ng, ka gobane ba be ba sa nyake go kwešiša gore Jesu o bolela ka’ng. (Joh. 6:32) Ba be ba tshwenyegile ka dijo tša kgonthe gomme ba palelwa ke go kwa seo Jesu a bego a ba ruta sona. w24.12 5-6 ¶10-11

Ge ngwana wa gago a ithuta saense sekolong, o tlo lemoga gore dilo tše dintšhi di bopilwe ka ditsela tše di kgahlišago. Ka mohlala, matlakgogedi a dira gore sebakabaka se se ke sa ba kgole le lefase, a dira gore maphoto a mawatle a se ke a tshela mollwane, ebile a thuša gore re kgone go phela gabotse mo lefaseng. Bjale ke mang a bopilego dilo tše ka tsela ye e makatšago? Ke mang a dirilego gore dilo tše tša tlhago di dule gabotse le ka tsela e kgahlišago? Ge ngwana wa gago a dutše a ipotšiša dipotšišo tše, ke moo a tlago go kgona go bona gore Modimo o gona ebile ke yena a bopilego dilo tše ka moka. Ka nako e nngwe o ka botšiša ngwana wa gago gore, “ge e ba Modimo a re bopile, na go ka se kwagale go phetha ka gore o tlo re nea melao ya motheo yeo e re thušago gore re thabe?” O ka bala le yena Beibele gore o kgone go mmotšha kamoo Jehofa a letetšego gore re phele ka gona. w24.12 16 ¶8

Jehofa o ile a thuša moapostola Paulo go ngwala lengwalo leo le bego le laela gore motho yo a sa itsholego a tlošwe ka phuthegong. (1 Bakor. 5:13) Bakriste ba bangwe bona ba be ba swanetše go swara bjang motho yo a tlošitšwego ka phuthegong? Paulo o ile a ba botša gore ba “lese go gwerana” le yena. O be a era go re’ng? Paulo o ile a hlalosa gore taelo yeo e be e era gore ‘le go ja ba se ke ba ja le motho yoo.’ (1 Bakor. 5:11) Go ja le motho go ka dira gore o feleletše o swere magang le yena. Mo re kgona go bona gore Paulo o be a era gore phuthego e se ke ya gwerana le monna yoo. Se se be se tlo thuša ba bangwe ka phuthegong gore ba se ke ba feleletša ba itshwara go swana le yena. (1 Bakor. 5:​5-7) Le gona, ge batho ba bangwe ka phuthegong ba se sa gwerana le monna yoo, o be a tlo bona gore ga e sa le mogwera wa Jehofa, gomme seo sa dira gore a itshole. w24.08 15 ¶4-5

Kua Isiraele go be go na le letšatši letee mo ngwageng la go lebalelwa ga dibe. Letšatšing leo, moperisita yo a phagamego o be a neela dihlabelo tša diphoofolo bakeng sa batho. Go molaleng gore dihlabelo tša diphoofolo di be di ka se kgone go phumola dibe tša Baisiraele ka mo go feletšego ka gobane diphoofolo ga di swane le batho. Eupša Jehofa o be a ikemišeditše go lebalela Moisiraele yo mongwe le yo mongwe yo a bego a dira dihlabelo ka tsela yeo Jehofa a bego a nyaka ka yona. (Baheb. 10:​1-4) Dihlabelo tšeo Baisiraele ba bego ba di neela ka letšatši la poelano, ka dinako tše dingwe di be di ba thuša go lemoga gore ke badiradibe bao ba swanetšego gore ka letšatši le lengwe, ba tle ba hwetše selo seo se ka ba thušago gore dibe tša bona di tle di lebalelwe ka mo go feletšego. Jehofa o ile a dira eng gore batho ba tle ba kgone go lebalelwa dibe tša bona ka mo go feletšego? O ile a dira gore Morwa wa gagwe yo a rategago e be “sebego gatee ya ba moka gore a rwale dibe tša ba bantši.” (Baheb. 9:28) Jesu o ile a “nea moya wa gagwe gore e be topollo bakeng sa ba bantši.”—Mat. 20:28. w25.02 4 ¶9-10

“Moya o mafolofolo eupša nama e a fokola.” (Mat. 26:41b) Ge Jesu a be a bolela mantšu a, o be a bontšha gore o a kwešiša gore re batho ba sebe. E bile o be a re lemoša le gore re se ke ra itshepa kudu. Pele Jesu a ka bolela mantšu ao, barutiwa ba gagwe ba be ba mmoditše gore ba ka se tsoge ba mo tlogetše. (Mat. 26:35) Se se bontšha gore barutiwa bao ba be ba ikemišeditše go dira dilo tše dibotse. Eupša ba be ba sa lemoge gore ge ba ka kopana le mathata ba ka fela matla. Ke ka baka leo Jesu a ilego a ba botša mantšu ao a lego temaneng ye ya lehono. Sa go nyamiša ke gore barutiwa bao ba ile ba palelwa ke go dula ba ntšhitše mahlo dinameng. Ge Jesu a be a swarwa, barutiwa bao ba ile ba tšhaba. Ba ile ba dira sona seo ba bego ba boditše Jesu gore ba ka se se dire.—Mat. 26:56. w24.07 14 ¶1-2

Adama le Efa ba ile ba senya le segwera sa bona le Jehofa. Mathomong Adama le Efa e be e le karolo ya lapa la Modimo. (Luka 3:38) Eupša ka baka la go se kwe Jehofa, ba ile ba rakwa ka lapeng leo la gagwe pele ba ka ba le bana. (Gen. 3:​23, 24; 4:1) Ka ge re le ditlogolo tša bona, re swanetše gore re boelanywe le Jehofa. (Baroma 5:​10, 11) Ka mantšu a mangwe, re swanetše go ba le segwera seo se kgahlišago le yena. Go ya ka puku e nngwe ya ditšhupetšo, lentšu la Segerika leo le dirišitšwego e le “poelanyo” le ka bolela “go dira gore lenaba la gago e be mogwera wa gago.” Go a kgahliša go tseba gore Jehofa ke yena a tšerego mogato wa pele wa go dira gore se se kgonege. O dirile seo bjang? Jehofa o ile a dira gore go kgonege gore batho bao ba nago le dibe ba kgone go ba le segwera se sebotse le yena. O ile a rulaganya gore re kgone go hwetša seo Adama a se lahlilego ka go neelana ka motho yo a phethagetšego. w25.02 3-4 ¶7-8

Moapostola Paulo o ngwadile gore ‘kgalemelo yeo e neilwego ke ba bantšhi ba lena, e be e lekane bakeng sa motho yo bjalo.’ (2 Bakor. 2:​5-8) Ka mantšu a mangwe, tsela yeo monna yoo a bego a robala le mosadi wa tatagwe a kgalemetšwego ka yona e mo thušitše. (1 Bakor. 5:1) E mo thušitše bjang? E dirile gore a itshole. (Baheb. 12:11) Paulo o ile a laela Bakorinthe gore ‘ba lebalele ka botho’ motho yo a dirilego sebe le go mo ‘kgonthišetša lerato la bona.’ Hlokomela gore Paulo o ile a laela bagolo gore ba bušetše monna yoo ka phuthegong ka ge a be a itshola. O be a nyaka gore ba bontšhe monna yoo gore ba a mo rata e bile ba mo lebaletše. Ba be ba swanetše go dira bjalo ka dilo tšeo ba di bolelago, tsela yeo ba itshwarago ka yona le dilo tšeo ba di dirago. Dilo tšeo ka moka di be di tla bontšha gore ba mo amogela gape ka phuthegong. w24.08 15 ¶4; 16-17 ¶6-8

Moapostola Paulo o be a tseba gore go hlokega eng gore motho a kgotlelele. O gopoditše Bakriste gore ge ba kgotleletše mathata ga se ba swanela go itshepa eupša ba swanetše go tshepa Jehofa. Paulo o be a ka bolela a kgodišegile gore: “Jehofa ke mothuši wa ka; nka se boife.” (Baheb. 13:6) Ba bangwe ba bana babo rena gona bjale ba kgotleletše ka gore ba tlaišwa. Re ka bontšha gore re a ba rata ka go ba rapelela e bile ka nako e nngwe re ka ba thuša ka dilo tšeo ba di hlokago. Beibele e re botša gore ge e le gabotse “bohle bao ba ratago go phela ka boineelo go Modimo tswalanong le Kriste Jesu le bona ba tla hlomarwa.” (2 Tim. 3:12) Ke ka baka leo ka moka ga rena re swanetšego go itokišetša maemo a thata ao a tlago. Re swanetše go tshepa Jehofa ka mo go feletšego gona bjale le gore mohlang wa tlalelo o tla re thuša. Ka nako ya maleba o tlo imolla batho ka moka bao ba mmotegelago.—2 Bathes. 1:​7, 8. w24.09 13 ¶17-18

Bakorinthe ba thušitšwe ke’ng gore ba kolobetšwe? (2 Bakor. 10:​4, 5) Lentšu la Modimo le moya o mokgethwa di ile tša thuša Bakorinthe gore ba kgone go tlogela tsela yeo ba bego ba phela ka yona. (Baheb. 4:12) Batho bao ba bego ba dula Korinthe bao ba ilego ba amogela ditaba tše dibotse ka Kriste, ba ile ba kgona go tlogela mekgwa ya bona e swanago le botagwa, bohodu le go robala le batho ba bong bjo bo swanago le bja bona. (1 Bakor. 6:​9-11) Le ge Bakorinthe ba bangwe ba be ba na le mekgwa e mengwe e mebe yeo e bego e tsemile medu, ga se ba ka ba nagana gore ba tla palelwa ke go ba Bakriste. Ba ile ba dira sohle seo ba ka se kgonago gore ba sepele tseleng e pitlaganego yeo e išago bophelong bjo bo sa felego. (Mat. 7:​13, 14) Na o hwetša go le thata go tlogela mokgwa o itšego goba dilo tše itšego tšeo di go šitišago go kolobetšwa? O se ke wa fela matla. Kgopela Jehofa gore a go thuše go tlogela go kganyoga go dira dilo tšeo di fošagetšego. w25.03 6 ¶15-17

Jehofa o tshepiša go re nea bohlale bjo bo re thušago gore dira diphetho tšeo di mo kgahlišago. O re nea bohlale bjoo “ ka ntle le go [re] goboša.” Ka morago ga go rapela Jehofa gore a go thuše, leka go bona ka tsela yeo a go thušago ka yona. Ge o ka re o le lefelong leo o sa le tsebego gomme wa timela, o tlo kgopela motho yo a dulago moo gore a go thuše. Eupša o ka se sepele pele a fetša go botša gore o swanetše go tšea tsela efe gore o fihle mo o yago. Ka mo go swanago, ka morago ga gore o kgopele Jehofa gore a go nee bohlale, leka go hwetša dikarabo ka go nyakišiša ka melao ya Beibele le melao ya motheo yeo e sepedišanago le phetho yeo o swanetšego go e dira. Ka mohlala, ge e ba o dira phetho ya ge eba o tlo ba gona pokanong, o ka naganišiša ka melao ya motheo ya Beibele yeo e bolelago ka menyanya ya mašata, go gwerana le batho bao ba sa phelego ka melao ya Beibele le go etiša Mmušo wa Modimo pele.—Mat. 6:33; Baroma 13:13; 1 Bakor. 15:33. w25.01 16 ¶6-7

Boporofeta bja Jesaya bo bapetša bophelo bja batho bao ba lego paradeiseng ya moya le bja bao ba sego go yona. Jehofa o kgotsofatša dinyakwa tša moya tša bahlanka ba gagwe ka mo go tletšego. O re neile moya wa gagwe o mokgethwa, Beibele le dijo tše dingwe tša moya gore re kgone go ‘ja, . . . go nwa, . . . le go thaba.’ (Bapiša le Kutollo 22:17.) Go fapana le rena, bao ba sego paradeiseng ya moya ba swarwa ke “tlala. . . , ba a nyorwa e bile ba hlabja ke dihlong,’ ba swerwe ke tlala ya moya. (Amose 8:11) Jehofa o hlokomela batho ba gagwe ka dilo tšeo ba di hlokago go akaretša le dijo tša moya. (Joele 2:​21-24) O re nea dijo tša moya a diriša Beibele, dikgatišo tše di theilwego Beibeleng, wepesaete, diboka, dikopano tša tikologo le tša selete. Re tlo phela gabotse le go lapologa ge re ka diriša dilo tše letšatši le lengwe le le lengwe. w24.04 21 ¶5-6

Ge e ba o nyaka go ratana le motho yo a itšego, o ka dira gore wena le motho yoo le bolele le le lefelong la batho bohle goba le bolele ka founo. Botša motho yoo gore o a go kgahla e bile o nyaka go mo tseba gakaone. (1 Bakor. 14:9) Ge e ba go nyakega, nea motho yoo nako ya gore a naganišiše ka seo o mmoditšego sona. (Diema 15:28) Ge e ba motho yoo a go botša gore a ka se kgone go ratana le wena, hlompha phetho ya gagwe. O swanetše go dira’ng ge e ba motho yo mongwe a go botša gore o a go rata? Go ka direga gore motho yoo o ile a swanelwa ke go ba le sebete gore a tle a go botše kamoo a ikwago ka gona, hle e ba le botho e bile o mo hlomphe. Mmotše ge e ba o hloka nako ya go naganišiša ka seo a go boditšego sona. Eupša o se ke wa mo senyetša nako. (Die. 13:12) Ge e ba o sa nyake go ratana le yena, mmotše kamoo o ikwago ka gona. Ge e ba o nyaka go ratana le motho yoo, bolela le yena ka go lebanya ka seo o se letetšego go yena. w24.05 23-24 ¶12-13

Mohlomongwe ge Dafida e be e sa le moswa, o ile a ya moo madira a Baisiraele a bego a le gona. O ile a hwetša madira a tšhogile ka gobane senatla sa Bafilisita seo se bitšwago Goliata se be se tlile go “goboša madira a Isiraele.” (1 Sam. 17:​10, 11) Madira ao a be a tšhogile ka gobane a be a nagana kudu ka senatla seo le tsela yeo se bego se ba goboša ka yona. (1 Sam. 17:​24, 25) Eupša Dafida o ile a lebelela boemo bjoo ka tsela e fapanego. O be a tseba gore ge Goliata a goboša madira a Baisiraele ge e le gabotse o “[goboša] madira a Modimo yo a phelago.” (1 Sam. 17:26) Dafida o be a naganne ka Jehofa. O be a kgodišegile gore Modimo yo a ilego a mo thuša nakong ya ge e be e le modiši o tla mo thuša gape lekgeng le. Ruri Modimo o ile a mo thuša gore a fenye Goliata.—1 Sam. 17:​45-51. w24.06 21 ¶7

Nagana gore bophelo bja rena bo be bo ka ba bjang ge nkabe re sa hlankele Jehofa. Ge re dira bjalo re tlo dula re botega, gomme ra bolela mantšu ao mopsalme a a boletšego ao a rego: “Ge e le nna ke holwa ke go ba kgauswi le Modimo.” (Ps. 73:28) Re ka kgona go lebeletšana le mathata ao re kopanago le ona mehleng ye ya bofelo ka gobane re “makgoba a Modimo yo a phelago le wa therešo.” (1 Bathes. 1:9) Modimo wa rena ke wa kgonthe e bile o thuša bao ba mo hlankelago. O ile a thuša bahlanka ba gagwe ba mehleng ya kgale, e bile le lehono o sa tlo tšwela pele a re thuša. E se kgale re tlo lebeletšana le masetlapelo a magolo mo lefaseng. Eupša re ka se lebeletšane le ona re nnoši. Eka ka moka ga rena re ka ba le sebete kudu gomme ra re: “Jehofa ke mothuši wa ka; nka se boife.”—Baheb. 13:​5, 6. w24.06 25 ¶17-18

Beibele e bolela ka banna ba 40 bao ba ilego ba buša e le dikgoši Isiraeleng. Dikgoši tša go loka di ile tša dira dilo tše mpe. Nagana ka Kgoši ya go loka e lego Dafida. Jehofa o itše: “Dafida mohlanka wa ka. . . [o ile a] sepela ka morago ga ka ka pelo ya gagwe ka moka ka go dira feela se se lokilego mahlong a ka.” (1 Dikg. 14:8) Eupša monna yoo o ile a dira bohlotlolo le mosadi yo a nyetšwego a ba a loga leano la gore monna wa gagwe a bolawe ntweng. (2 Sam. 11:​4, 14, 15) Ka lehlakoreng le lengwe, dikgoši tše dingwe tšeo di sa botegego di ile tša dira dilo tšeo di lokilego. Nagana ka Rehoboama. O ile a “dira dilo tše mpe” mahlong a Jehofa. (2 Dikor. 12:14) Ka mohlala, o ile a kwa ge Jehofa a mo laela gore a se ke a lwa le meloko e lesome ya Isiraele le go e dumelela gore e ikgethele kgoši e mpsha. Le gona, o ile a dira gore metse e mentšhi mmušong wa gagwe e be e matla gore a kgone go šireletša batho ba Modimo go manaba a bona. (1 Dikg. 12:​21-24; 2 Dikor. 11:​5-12) Jehofa o be a lebelela eng gore a feleletše a re kgoši e a botega mahlong a gagwe? O be a lebelela seo se lego ka pelong ya gagwe, tsela yeo a bego a itshola ka gona le kamoo a mo hlankelago ka gona. w24.07 20 ¶1-3

Go tla direga’ng ge e ba baswa ba mengwaga ya ka tlase ga e 18 bao ba kolobeditšwego ba dira sebe se segolo? Go tlo kgethwa bagolo ba babedi gore ba kopane le moswa le batswadi ba gagwe ba Bakriste. Bagolo ba tlo nyaka go tseba gore ke’ng seo batswadi ba šetšego ba se dirile go thuša ngwana wa bona gore a itshole. Ge e ba moswa yoo a arabela gabotse ge batswadi ba gagwe ba mo thuša gore a itshole, gona bagolo bao ba babedi ba ka no phetha ka gore ga go nyakege komiti. Bagolo ba a tseba gore Jehofa o neile batswadi boikarabelo bja go thuša bana ba bona ge ba dirile diphošo. (Doit. 6:​6, 7; Die. 6:20; 22:6; Baef. 6:​2-4) Ba tlo fela ba etela moswa yoo le batswadi ba gagwe go kgonthišetša gore moswa yoo o hwetša thušo yeo a e hlokago. Bjale, go tlo direga’ng ge e ba moswa yoo a sa itshole gomme a tšwela pele a dira sebe se segolo? Ge e ba go le bjalo, go tlo kgethwa komiti yeo e tlago go kopana le yena gotee le batswadi ba gagwe ba Bakriste. w24.08 24 ¶18

Ka moka ga rena re a thaba ge motho yo mongwe a re nea mpho. Eupša re thaba kudu ge e le rena re neago batho ba bangwe. Ke ka gobane go nea go dira gore re thabe kudu, e bile Jehofa ga a re kgethele gore re nee batho ba bangwe eng. Re thaba kudu ge re nyakana le ditsela tšeo re ka thušago batho ba bangwe ka tšona le go dira sohle seo re ka se kgonago go ba thuša. Go thabiša kudu go bona kamoo Jehofa a re bopilego ka gona. (Ps. 139:14) Beibele e bolela gore re thaba kudu ge re nea batho ba bangwe, ke ka baka leo e hlalosago Jehofa e le “Modimo yo a thabilego.” (1 Tim. 1:11) Jehofa ke yena wa mathomo wa go nea, e bile ga go yo a ka neago go feta yena. Ke ka baka leo Moapostola Paulo a boletšego gore “gobane ka yena re na le bophelo, re a sepela e bile re gona.” (Dit. 17:28) Re a tseba gore “mpho e nngwe le e nngwe e botse le neo e nngwe le e nngwe e phethagetšego e tšwa godimo.” (Jak. 1:17) Ka moka ga rena re a tseba gore re nyaka go dula re thabišwa ke go nea le go thuša batho ba bangwe. Re ka thušwa ke go ekiša tsela yeo Jehofa a neago batho ba bangwe.—Baef. 5:1. w24.09 26 ¶1-4

Ka morago ga gore bahlanka ba bangwe ba ba bodiredi ba ithute ka dilo tšeo ba swanetšego go di dira gore ba hlankele e le bagolo, ba ka ipona ba sa swanelege. Eupša gopola gore Jehofa ga se a letela gore bagolo e be batho bao ba phethagetšego. (1 Pet. 2:21) E bile moya wa Jehofa o mokgethwa ke ona o tlago go go thuša gore o kgone go swanelega. (Bafil. 2:13) Na go na le seka seo o bonago okare o swanetše go šomela go sona? Rapela Jehofa gore a go thuše. Dira nyakišišo o be o kgopele yo mongwe wa bagolo gore a go thuše kamoo o ka kaonefatšago ka gona. Leka go swanelega go ba mogolo. Kgopela Jehofa gore a go thuše go tšwela pele o mo hlankela le go thuša bana beno ka phuthegong. (Jes. 64:8) Eka Jehofa a ka go thuša gore o swanelege go hlankela o le mogolo. w24.11 25 ¶17-18

Ga se ra swanela go nagana gore Jehofa o swanetše go re lebalela ka gobane ke kgale re mo hlankela. Re a tseba gore Jehofa o gopola dilo ka moka tšeo re ilego ra mo direla tšona. O re file Morwa wa gagwe e le mpho, e sego ka gobane a re kolota. Ge e ba re nagana gore Jehofa o gapeletšega go re lebalela ka gobane e le kgale re mo hlankela, gona re a iphora ebile ga re bontšhe gore re leboga seo Jesu Kriste a re diretšego sona. (Bapiša le Bagalatia 2:21.) Moapostola Paulo o be a tseba gore Jehofa ga a gapeletšege go mo lebalela. Gona ke ka baka la’ng a ntšha ka ga tšhwene ge a be a hlankela Jehofa? O be a nyaka go bontšha Jehofa gore o leboga dilo ka moka tšeo a mo diretšego tšona. (Baef. 3:7) Le rena re ekiša moapostola Paulo ka go hlankela Jehofa ka gobane re mo rata ebile re bontšha gore re leboga dilo ka moka tšeo a re diretšego tšona. w25.01 27 ¶5-6