Beibele e bolela ka batho bao ba thomilego ba lokile gomme ba feleletša e le batho ba sa lokago. Yo mongwe wa bona ke Kgoši Solomone. O be a rutilwe gabotse ka ditsela tša Modimo e bile Jehofa a mo šegofatša, eupša ka morago o ile a kgetha go hlankela medimo ya maaka. Dibe tša gagwe di ile tša galefiša Jehofa gomme Baisiraele bao ba ilego ba phela ka morago ba ile ba otlwa ka baka la seo. Beibele e re botša gore “Solomone a robala le borakgolokhukhu ba gagwe gomme a bolokwa Motseng wa Dafida tatagwe.” (1 Dikg. 11:​5-9, 43; 2 Dikg. 23:13) Na tsela yeo a bolokilwego ka yona e be e ra gore o tlo tsošwa? Beibele ga e re botše. Tsogo ke mpho e tšwago go Modimo yo lerato. O e nea batho bao a bonago ba ikemišeditše go mo hlankela kamoo go sa felego. (Jobo 14:​13, 14; Joh. 6:44) Na Solomone o tla hwetša mpho ya mohuta woo? Jehofa ke yena a tsebago karabo. Ge e le rena ga re tsebe selo. Selo feela seo re se tsebago ke gore Jehofa o tlo dira seo se lokilego. w24.05 4 ¶9

Ge re ineela go Jehofa re ba baeng tenteng ya gagwe ya seswantšhetšo. Re thabela dijo tše dintšhi tša moya le go gwerana le ba bangwe bao le bona e lego baeng tenteng ya Jehofa. Batho lefaseng ka moka ba ka kgona go ba ka tenteng ya Jehofa ya seswantšhetšo. Tente ya Jehofa e go gongwe le go gongwe moo bahlanka ba Jehofa ba lego gona. (Kut. 21:3) Re ka re’ng ka bao ba bego ba botega bao ba hlokofetšego? Na re ka re e sa le baeng tenteng ya Jehofa? Ee! Ke ka baka la’ng re rea’lo? Ka gobane Jehofa o sa ba gopola. Jesu o itše: “Eupša gore bahu ba a tsošwa go utolotšwe gaešita le ke Moshe ge a bolela pegong ya mabapi le sehlare sa meetlwa, ge a be a bitša Jehofa gore ke ‘Modimo wa Aborahama, Modimo wa Isaka le Modimo wa Jakobo.’ Ke Modimo wa ba phelago, e sego wa bahu, gobane go yena bohle ba a phela.”—Luka 20:​37, 38. w24.06 3 ¶6-7

Tsadoko o ile Heburone a swere dibetša e bile a ikemišeditše le go lwa. (1 Dikor. 12:38) O be a ikemišeditše go ya le Dafida ntweng le go šireletša Isiraele go manaba a yona. Le ge Tsadoko a ka no ba a be a sa tsebe ntwa, eupša o be a na le sebete. Ke’ng seo se thušitšego moperisita yo a swanago le Tsadoko gore a be le sebete? O be a le gare ga banna ba matla le bao ba nago le sebete. Ga go pelaelo gore o ile a holwa ke mohlala wa bona. Ka mohlala, Dafida e be e le moetapele yo a nago le sebete e bile e le mohlabani gomme Isiraele e nyaka go mo dira kgoši. (1 Dikor. 11:​1, 2) Dafida o be a dula a ithekga ka Jehofa gore a mo thuše go lwa le manaba a gagwe. (Ps. 138:3) Tsadoko o be a le gare ga banna ba bangwe bao le bona ba ilego ba mmeela mohlala o mobotse, banna ba bjalo ka Jehoyada le morwa wa gagwe wa mohlabani e lego Benaya le dikgošana tše 22 tšeo di bego di le ka lehlakoreng la Dafida.—1 Dikor. 11:​22-25; 12:​26-28. w24.07 3 ¶5-6

Saulo wa Tareso o be a dirile dilo tše dintšhi tše mpe, ka gona o be a swanetše go itshola gore a lebalelwe. O be a tlaiša balatedi ba Jesu Kriste. Bakriste ba bantšhi ba be ba nagana gore a ka se tsoge a fetogile. Eupša Jesu o be a tseba gore Saulo a ka fetoga gomme a itshola. Jehofa le Jesu ba be ba bona dika tše dibotse go Saulo. Ka gona Jesu o ile a re: “Monna yoo ke sebjana se ke se kgethilego.” (Dit. 9:15) Jesu o ile a diriša le mohlolo go thuša Saulo gore a itshole. (Dit. 7:58–8:3; 9:​1-9, 17-20) Ka morago ga gore Saulo a itshole gomme e be Mokriste, o ile a leboga kudu ka ge Jehofa a ile a mmontšha botho le kgaugelo. (1 Tim. 1:​12-15) Paulo o ile a dira’ng ge a be a ekwa gore bana babo le dikgaetšedi ba phuthego ya Korinthe, ba tlogela monna yo a dirago bootswa gore a tšwele pele a le ka phuthegong? Seo a ilego a se dira, se bontšha kamoo Jehofa a ratago batho bao a ba layago le go ba gaugela ge ba bontšha gore ba a itshola. w24.08 13 ¶15-16

Ganyenyane-ganyenyane, Jehofa o ile a bontšha gore batho bao ba nago le sebe ba ka dira’ng gore e be bagwera ba gagwe. Ka morago ga selo seo se diregilego kua Edene, Abele e lego morwa wa bobedi wa Adama le Efa, e bile yena wa mathomo wa go bontšha tumelo go Jehofa. O ile a direla Jehofa sehlabelo ka ge a be a mo rata e bile a nyaka go mo thabiša. Abele o dirile sehlabelo seo ka dikwana ka ge e be e le modiši. Jehofa o ile a ikwa bjang? O ile a ‘amogela Abele le sehlabelo sa gagwe.’ (Gen. 4:4) Jehofa o ile a amogela le dihlabelo tša batho ba bangwe ba bjalo ka Noa, bao ba bego ba mo rata le go mo tshepa. (Gen. 8:​20, 21) Ge Jehofa a be a amogela dihlabelo tšeo, o be a bontšha gore go a kgonega gore batho bao ba nago le sebe ba ka kgona go mo kgahliša le gore e be bagwera ba gagwe. w24.08 3 ¶5-6

Re ka kwa bohloko le go nyama ge re sa swarwe gabotse. (Mmo. 7:7) Bahlanka ba bangwe ba Jehofa bao ba botegago ba bjalo ka Jobo le Habakuku, le bona ba ile ba ikwa ka tsela yeo. (Jobo 6:​2, 3; Habak. 1:​1-3) Le ge go tlwaelegile gore re ikwe ka tsela yeo, re swanetše go ba šedi gore re se ke ra senya ditaba le go feta. Ka dinako tše dingwe re ka ipotšiša ge e ba re swanetše go tšwela pele re dira dilo tše dibotse ge re bona batho bao ba sa swarego ba bangwe gabotse ba ipshina ka bophelo. Mopsalme o ile a bona dilo di sepelela batho ba kgopo gabotse le ge ba be ba sa sware bahlanka ba Jehofa gabotse. O boletše gore: “Ba babe ke bona ba, bao ba dulago ba iketlile.” (Ps. 73:12) O ile a nyamišwa ke go bona batho ba sa swarwe gabotse gomme a bona eka go hlankela Jehofa ga go sa na mohola ke moka a bolela gore: “Ge ke be ke leka go kwešiša se, ke be ke tshwenyega.”—Ps. 73:​14, 16. w24.11 3 ¶5-7

Re fa Jehofa letago ka gobane re a mo hlompha. Re na le mabaka a mantšhi a go mo hlompha. Jehofa ke Ramatlaohle. (Ps. 96:​4-7) Bohlale bja gagwe re bo bona dilong tšeo a di dirilego. Ke yena a re bopilego ebile o a re hlokomela. (Kut. 4:11) O a botega. (Kut. 15:4) Dilo ka moka tšeo a di dirago di a atlega ebile o dula a dira dilo ka moka tšeo a di tshepišitšego. (Josh. 23:14) Moporofeta Jeremia o ile a bolela ka Jehofa gore: “Gare ga bohle ba bohlale ba ditšhaba le gare ga dikgoši tša tšona ga go yo a swanago le wena.” (Jer. 10:​6, 7) Re a bona gore re na le mabaka a kwagalago a gore re hlomphe Tatago rena wa legodimong. Jehofa o nyaka gore re mo hlomphe ebile re mo rate. Sa bohlokwa ke gore, re fa Jehofa letago ka gobane re a mo rata. w25.01 3 ¶5-6

Batho bao ba ganetšanago le Modimo ba rata go dira gore go bonagale eka dilo tše dibotse tšeo di dirwago ka mokgatlong, di bonagale eka ke tše mpe. Ka mohlala, Mangwalo a re ruta gore Jehofa o letetše gore batho bao ba mo hlankelago, e be bao ba hlwekilego mmeleng le boitshwarong e bile ba mo rapele ka tsela yeo a e amogelago. O letetše gore motho yo mongwe le yo mongwe yo a sa itshwarego gabotse e bile a sa itshole, a ntšhwe ka phuthegong. (1 Bakor. 5:​11, 12; 6:​9, 10) Re kwa taelo yeo ya Mangwalo. Eupša batho bao ba ganetšanago le rena ba rata go re latofatša ka gore ga re rate batho, ga re theetše e bile re a ahlola.Re swanetše go tseba gore ke mang a hlaselago mokgatlo. Sathane Diabolo ke yena a phatlalatšago ditaba tša maaka ka mokgatlo. Ke “tatago maaka.” (Joh. 8:44; Gen. 3:​1-5) Re swanetše go letela gore Sathane a diriše bao ba mo thekgago go phatlalatša ditaba tša maaka ka mokgatlo wa Jehofa. w24.04 10-11 ¶13-14

Ka morago ga gore masetlapelo a magolo a thome, go ka direga gore ba bangwe ge ba bona “Babilona o Mogolo” a fedišwa, ba gopole gore Dihlatse tša Jehofa di ile tša bolela gore seo se tlo direga. Na ge ba bangwe ba bona se se direga, ba ka dira diphetogo gomme ba ba le tumelo go Jehofa? (Kut. 17:5) Gopola gore go ile gwa direga eng kua Egepeta mehleng ya Moshe. Batho ba bantšhi bao e bego e se Baisiraele, ba ile ba tloga Egepeta ba sepela le Baisiraele. Ba bangwe ba bona ba ka ba ba ile ba thoma go ba le tumelo ge ba bona Dikotlo tše Lesome tšeo Moshe a bego a bolela ka tšona di direga. (Ek. 12:38) Selo se swanago se ka direga ka morago ga gore Babilona o Mogolo a fedišwe. Na re ka nyamišwa ke gore batho ba ba no bontšha tumelo ka motsotso wa mafelelo? Ga go bjalo! Re nyaka go ekiša Tatago rena wa legodimong, e lego “Modimo yo a gaugelago le yo a šokelago, yo a sa galefego kapela, yo a nago le lerato le legolo gomme selo se sengwe le se sengwe seo a se bolelago e lego nnete.”—Ek. 34:6. w24.05 11 ¶12-13

Go tlo direga’ng ge re ka thoma go lahla “mohlala wa mantšu a phedišago”? A re kweng ka mohlala wo o latelago. Bakriste ba nakong e fetilego ba ile ba phatlalatša mabarebare a gore letšatši la Jehofa le fihlile. Go bonagala go be go na le lengwalo leo batho ba bantšhi ba bego ba nagana gore le ngwadile ke moapostola Paulo. Bakriste ba bangwe ba kua Thesalonika ba ile ba tshepa mabarebare ao le go a phatlalatša. Ge nkabe ba ile ba gopola dilo tšeo moapostola Paulo a ba rutilego tšona nakong ya ge a be a na le bona, ba be ba ka se tshepe mabarebare ao. (2 Bathes. 2:​1-5) Paulo o be a eleditše bana babo gore e se ke ya no ba bo madumela tšohle. O ile a thuša bana babo gore ba se ke ba bušeletša phošo yeo. Ge a be a ngwalela phuthego ya Thesalonika lengwalo la bobedi o ile a re: “Ye ke tumedišo ya ka, nna Paulo, yeo ke e ngwalago ka seatla sa ka, yeo e lego seka lengwalong le lengwe le lengwe; ye ke tsela yeo ke ngwalago ka yona.”—2 Bathes. 3:17. w24.07 12 ¶13-14

Bakriste ba kua Judea ba be ba swanetše go kgotlelela ge ba dutše ba hlankela Jehofa ka gobane ba be ba tlo welwa ke mathata. Le ge Bakriste ba bangwe ba Baheberu ba ile ba tlaišwa kudu, ba bangwe ba bona ga se ba ka ba tlaišwa ka ge ebile Bakriste nakong ya ge go be go na le khutšo. Moapostola Paulo o ile a gopotša Bakriste bao gore ba swanetše go dula ba botega le ge ba tlo tlaišwa kudu. Ba be ba swanetše go botega go swana le Jesu. (Baheb. 12:4) Bajuda ba bantšhi ba be ba thoma go galefa le go ba ba šoro ge ba bona Bajuda ba bangwe ba fetoga Bakriste. Pejana ga moo, Bajuda ba fetago ba 40 ba ile ba “itlama ka keno ya thogako, ba bolela gore ba ka se je goba ba nwa go fihlela ge ba bolaile Paulo.” (Dit. 22:22; 23:​12-14) Le ge Bakriste bao ba be ba hloilwe le go tlaišwa, ba be ba swanetše go tšwela pele ba rapela gotee, ba bolela ditaba tše dibotse le go tiiša tumelo ya bona. w24.09 12 ¶15

Johane e be e le moapostola yo Jesu Kriste a bego a mo rata. (Mat. 10:2) Johane o be a dula a na le Jesu bodireding, a bona mehlolo yeo Jesu a bego a e dira e bile o be a dula a na le yena dinakong tša mathata. O be a le gona ge Jesu a bolawa a ba a mmona ka morago ga gore a tsošwe. O ile a bona ge phuthego ya Bokriste ya lekgolong la pele la mengwaga e be e gola go tloga go sehlopha se senyenyane sa batho bao ba botegago go fihla ge ditaba tše dibotse di “boletšwe tlholong yohle yeo e lego ka tlase ga legodimo.” (Bakol. 1:23) Nakong ya ge Johane e le mokgalabje, o ile a ba le tokelo ya go ngwala puku ya Kutollo. (Kut. 1:1) Johane o ile a ngwala le puku yeo e bitšwago ka yena. O ngwadile le mangwalo a mangwe a mararo. Ge Johane a be a ngwala lengwalo la boraro, o be a le ngwalela Mokriste yo a bitšwago Gayo, yo a bego a mo rata kudu. (3 Joh. 1) Se mokgalabje yo, yoo a botegago a ilego a se ngwala, se ile sa kgothatša balatedi ba Jesu ka moka go fihla le lehono. w24.11 12 ¶15-16

Monna yo a ratago mosadi wa gagwe o mo tšeela godimo. O mo lebelela e le mpho e botse kudu yeo e tšwago go Jehofa. (Die. 18:22; 31:10) Seo se dira gore a mo sware gabotse le ge ba sa bonwe ke batho ebile o a mo hlompha ge ba eba le thobalano. A ka se mo gapeletše gore a be le thobalano yeo e dirago gore a ikwe a se a lokologa, a ikwe a nyatšega goba yeo e ka tshwenyago letswalo la gagwe. Le yena o tlo dira sohle seo a ka se kgonago gore a dule a na le letswalo leo le hlwekilego pele ga Jehofa. (Dit. 24:16) Banna, Jehofa o a thaba ge a bona le dira sohle seo le ka se kgonago gore le hlomphe basadi ba lena ka dilo tšeo le di bolelago le tšeo le di dirago. Ikemišetše go dira dilo tšeo di ka se mo kwešego bohloko, o be botho, o mo hlomphe ebile o mmontšhe gore o a mo rata. Ge o dira bjalo o tla be o bontšha gore o a mo rata ebile o mo tšeela godimo. Ge o ka dula o hlompha mosadi wa gago o tlo ba le segwera seo se tiilego le Jehofa.—Ps. 25:14. w25.01 13 ¶17-18

Bahlanka ba Jehofa ga ba swane le batho bao ba sa mo hlankelego ka gobane bona ba rata go bolela ditaba tše dibotse. Re ka thušwa ke eng gore re dule re bolela ditaba tše dibotse ka mafolofolo? Mohlala wa Jesu o ka re thuša gore re be le mafolofolo ge re bolela ditaba tše dibotse. Jesu ga se a ka a fela matla ge a be a bolela ditaba tše dibotse. Ge e le gabotse o ile a dula a šoma ka thata. Go swana le molemi wa diterebe yo a feditšego mengwaga e meraro a leka go hlokomela mohlare wa mogo wo o sa kago wa tšweletša dienywa, Jesu le yena o feditše mengwaga e meraro a botša Bajuda ditaba tše dibotse le ge ba bantšhi ba be ba sa mo theetše. Jesu ga se a ka a tlogela go botša batho ditaba tše dibotse, go swana le ge molemi yola wa diterebe a se a ka a fela matla. (Luka 13:​6-9) Ge re ka ithuta tseleng yeo a bego a ruta ka yona le go mo ekiša, seo se tla re thuša gore re kgone go ba le mafolofolo. w25.03 14-15 ¶1-4

O swanetše go dira’ng ge e ba bona eka motho yo a itšego o a go swanela? Na o swanetše go no kitimela go mmotša kamoo o ikwago ka gona? Beibele e re motho yo bohlale o nagana pele a dira dilo. Ka gona, e ka ba gabohlale gore o ithute ka motho yo a go kgahlago pele o mmotša kamoo o ikwago ka gona. O ka dira’ng gore o ithute ka motho yo mongwe a sa tsebe? Ge o le dibokeng goba dipokanong tša segwera, o ka bona dika tše dingwe ka motho yoo, tše bjalo ka tsela yeo a ratago Jehofa ka yona, mohuta wa motho yo a lego yena le tsela yeo a itshwarago ka yona. O ka ipotšiša gore: ‘Bagwera ba gagwe ke bomang? O rata go bolela ka’ng? (Luka 6:45) Na dilo tšeo re nyakago go di dira bophelong di a swana?’ O ka boledišana le bagolo ba phuthegong ya gabo goba wa bolela le Bakriste bao ba godilego bao ba mo tsebago gabotse. (Die. 20:18) O ka ba botšiša gore motho yoo o tumile ka’ng le gore o na le dika tša mohuta mang. (Ruthe 2:11) Ge o dutše o ithuta ka motho yo a itšego, o se ke wa dira gore a lewe ke dihlong. Le gona, o se ke wa mo šalašala morago. w24.05 22 ¶7-8

Bagolo ga ba kitimele go nagana gore motho yo a dirilego sebe se segolo a ka se itshole. Ke nnete gore batho ba bangwe ba ka itshola ge bagolo ba kopana le bona la mathomo, eupša ba bangwe go ka nyakega gore bagolo ba se ke ba boledišana le bona gatee feela. Ka morago ga gore bagolo ba kopane le motho yoo la mathomo, go ka direga gore a šale a nagana ka taba yeo ba mmoditšego yona. E bile a ka no šala a rapela Jehofa a mo kgopela gore a mo lebalele. (Ps. 38:18) Se se ka dira gore ge ba tlo kopana le yena gape, ba hwetše a fetogile. Bagolo ba swanetše go bontšha motho yo a dirilego sebe se segolo botho e bile ba mo kwele bohloko e le gore ba mo thuše gore a itshole. Ba rapela gore Jehofa a šegofatše maiteko a bona a go thuša motho yoo gore a itshole e bile a fetoge.—2 Tim. 2:​25, 26. w24.08 22-23 ¶12-13

Jehofa ga a nyake gore go be le motho yo a fedišwago. O nyaka gore batho bao ba dirilego dibe tše dikgolo ba boele go yena. (2 Bakor. 5:20) Ke go tloga kgale Jehofa a dula a kgopela batho ba gagwe bao ba dirilego dibe tše dikgolo gore ba itshole gomme ba boele go yena. Bagolo ba šoma le Jehofa go thuša batho bao ba dirilego dibe tše dikgolo gore ba itshole. (Baroma 2:4; 1 Bakor. 3:9) Go ba le lethabo le legolo kudu legodimong ge modiradibe a itshola. Jehofa o thaba kudu ge batho bao ba tšwelego ka phuthegong ba boa gomme ba mo hlankela gape. Ge re nagana ka mokgwa wo Jehofa a re kwelago bohloko, a re gaugelago e bile a re bontšhago botho, seo se dira gore re mo rate kudu.—Luka 1:78. w24.08 31 ¶16-17

Ge nkabe Jesu a dumele gore batho bao ba mo dire kgoši, o be a tlo tšea karolo ditabeng tša dipolotiki tša Bajuda bao ba bego ba le ka tlase ga mmušo wa Roma. Beibele e re botša gore Jesu o ile a tloga gomme a ya thabeng a nnoši. Jesu ga se a ka a dumelela batho ba mo tutuetša gore a tsenele dipolotiki. O re rutile thuto e bohlokwa kudu. Batho ba ka se tsoge ba re kgopetše gore re ba nee dijo ka mohlolo, re fodiše balwetši goba re be dikgoši. Ba ka dira gore re tšee karolo dipolotiking ka go kgetha baetapele goba ka go bolela ka batho bao ba naganago gore ba ka ba buša gabotse. Eupša re ithuta selo sa bohlokwa kudu go Jesu. O ile a se tšee karolo ditabeng tša dipolotiki, ebile o ile a bolela le gore: “Mmušo wa ka ga se karolo ya lefase le.” (Joh. 17:14; 18:36) Lehono Bakriste ba ekiša tsela yeo Jesu a bego a nagana le go dira dilo ka yona. Re mo ekiša ka go thekga Mmušo wa Modimo, go botša batho ka ona le go rapelela gore o tle.—Mat. 6:10. w24.12 4 ¶5-6

Ge o bala, bona gore o ka diriša bjang dilo tšeo o ithutago tšona. Ka mohlala, o ka ekiša Jehofa ka go swara batho ka moka gabotse. Ekiša Jesu ka go rata Jehofa le batho ba bangwe. Ekiša Jesu ka go dira dilo ka moka tšeo Jehofa a di nyakago le go thuša batho ba bangwe le ge go se bonolo go dira bjalo. Le gona ekiša Jesu ka go botša batho ba bangwe ditaba tše dibotse gore le bona ba kgone go hwetša mpho e botse ya topollo. Ge re dutše re ithuta ka topollo, re tlo rata Jehofa le Morwa wa gagwe le go feta. Ka ge ba bona gore re a ba rata, le bona ba tlo re rata le go feta. (Jak. 4:8) A re duleng re diriša dilo ka moka tšeo Jehofa a re filego tšona gore re ithute ka topollo. w25.01 25 ¶16-17

Temana ya letšatši ya lehono e ka ngwalwa e le: “O lahletše dibe tša ka kgole gwa ba bjalo ka ge e ka ga sa nka ka go direla sebe.” Jehofa o sa tšwela pele go gatelela ntlha ye go Mika 7:​18, 19. Ditemana tše di re botša gore Jehofa o lahlela dibe tša rena ka garegare ga lewatle. Mehleng ya Beibele go be go sa kgonege gore batho ba hwetše selo seo se wetšego goba seo se lahletšwego ka lewatleng. Mehlala yeo re šetšego re ithutile ka yona e re bontšha gore ge Jehofa a re lebalela o a re imolla. Dafida o be a bolela nnete ge a be a re, “go thaba bao ditiro tša bona tša go hloka molao di swaretšwego le bao dibe tša bona di khupeditšwego.” (Baroma 4:7) Re tloga re bona gore Jehofa o re lebalela ka nnete. w25.02 9 ¶7-8

Lehono mo lefaseng go na le paradeise yeo e tletšego ka bophelo bjo bo kgahlišago. Paradeise ye e tletše ka batho ba dimilione bao ba thabelago khutšo ya kgonthe. Bao ba lego ka gare ga yona ba ikemišeditše go se e tlogele. Ba nyaka le gore batho ba bangwe ba bantšhi le bona ba tle ba thabele paradeise yeo. Paradeise yeo ke ya mohuta mang? Ke paradeise ya moya! Go thabiša kudu gore Jehofa o bopile lefelo le le lebotse gare ga lefase le le bušwago ke Sathane leo le tletšego ka lehloyo, bobe e bile le le kotsi. (1 Joh. 5:19; Kut. 12:12) Modimo wa rena yo a re ratago o bona dilo tše mpe tšeo di tlišwago ke tshepedišo ye ya dilo e bile o re nea dilo ka moka tšeo re di hlokago gore re šireletšege le gore re kgone go mo hlankela re thabile. Lentšu la gagwe le hlalosa paradeise ya moya e le lefelo leo le bolokegilego la “botšhabelo” le “serapa se se nošetšwago gabotse.” (Jes. 4:6; 58:11) Jehofa o thuša bao ba dulago paradeiseng ye gore ba kgone go thaba le go šireletšega mehleng ye e thata ya bofelo.—Jes. 54:14; 2 Tim. 3:1. w24.04 20 ¶1-2

Ge e ba o nyaka go nyala, ga go pelaelo gore o šetše o rapetše ka taba yeo. Jehofa ga a tshepiše go re nea balekane. Eupša o na le taba le dilo tšeo o di nyakago le tsela yeo o ikwago ka yona, le gona a ka go thuša go hwetša molekane yo mokaone. Ka gona, tšwela pele o mmotša ka dilo tšeo o di dumago le tsela yeo o ikwago ka yona. (Ps. 62:8) Mo kgopele bohlale le go se fele pelo. (Jak. 1:5) Lege o ka tšea nako o sa hwetše motho yo o ka nyalanago le yena, Jehofa o tshepiša go dula a go hlokomela. (Ps. 55:22) Lemoga gore: Go nyakana le molekane ga se gwa swanela go ba selo se bohlokwa kudukudu bophelong bja gago. (Bafil. 1:10) Go ba le lethabo la kgonthe ga se gwa ithekga ka gore o nyetše goba ga se wa nyala, eupša go ithekgile ka segwera seo o nago le sona le Jehofa. (Mat. 5:3) Ge e ba o se wa nyala, o ka kgona go oketša tirelo ya gago go Jehofa. (1 Bakor. 7:​32, 33) Diriša nako ya gago ka bohlale. w24.05 21 ¶4; 22 ¶6

Le swanetše go fetša nako e kaakang pele le ka nyalana? Go dira dilo ka lebelo go ka le wetša mathateng. (Die. 21:5) Tšeang nako ya lena gore le tsebaneng gabotse. Eupša seo ga se bolele gore le swanetše go no tšea nako e telele le ratana. Le Beibele e re: “Ge motho a letetše selo gomme se sa tle ka pela, a ka nyama.” (Die. 13:12) Ke’ng seo ba bangwe ba ka se dirago ge batho ba babedi ba ratana? Re ka ba thuša bjang? Re ka ba mema gore ba tle ba thabele dijo le rena, ba be le rena borapeding bja lapa, goba ba be le rena ge re ithabiša. (Baroma 12:13) Na ba hloka motho yo a ka ba hlokomelago, senamelwa goba lefelo leo ba ka bolelago ba sa šitišwego ke selo? Ge e ba go le bjalo na re ka ithaopela go ba thuša? (Bagal. 6:10) Ge eba batho bao ba ratanago ba go kgopela gore o tle o ba hlokomele, o ka tšea seo e le tsela e kaone ya go thuša bagwera ba gago. Hlokomela gore o se ke wa tlogela batho bao ba nnoši, eupša ge o lemoga gore ba nyaka go bolela ba fe sebaka. w24.05 30 ¶13-14

Bagolo ba swanetše go leka go tseba gore ke dilo dife tšeo di ka bago di dirile gore motho yoo a feleletše a dirile sebe se segolo. Ka mohlala, ba ka ipotšiša gore, na motho yo a ka ba a be a thomile go fokola tumelong ka ge a se sa ithuta goba a se sa ya tšhemong? Na o be a šetše a thomile go se sa rapela ka mehla? Na o be a šetše a thomile go dumelela dilo tše mpe tšeo a di kganyogago di mo laola? O be a thomile go phela le bomang? Dilo tšeo a ithabišago ka tšona ke tša mohuta mang? Na dilo tše ka moka e ka ba tšona di dirilego gore a feleletše a dirile sebe se segolo? Na motho yoo o a kwešiša gore dilo tšeo a di dirilego di dira gore Jehofa a ikwe bjang? Bagolo ba swanetše go botšiša motho yoo dipotšišo tšeo di tlago go mo thuša gore a bone gore ke dilo dife tšeo di ka bago di ile tša dira gore segwera sa gagwe le Jehofa se fokole, gomme a feleletša a dirile sebe se segolo. (Die. 20:5) Eupša ba swanetše go botšiša dipotšišo tšeo ka tsela e botho, ba se ke ba mmotšiša dipotšišo tšeo di ka mo lešago dihlong. Le gona, ba ka diriša dipapišo tšeo di ka dirago gore motho yoo a bone phošo ya gagwe gomme a itshole. Go ka direga gore ge bagolo ba kopana le motho la mathomo, a ka kwešwa bohloko ke phošo yeo a e dirilego a ba a feleletša a itshotše. w24.08 22 ¶9-11

Jesu o ile a bolela “ditaba tše dibotse tša Mmušo” ka mafolofolo ka gobane o be a tseba gore ke seo Modimo a nyakago gore a se dire. Jesu o be a dula a bolela ditaba tše dibotse. O be a “tloga motseng o mongwe go ya go o mongwe le go tloga motsaneng o mongwe go ya go o mongwe”, a bolela ditaba tše dibotse. (Luka 13:22) O ile a tlwaetša le balatedi ba gagwe ba bantšhi gore ba kgone go šoma le yena. (Luka 10:1) Jehofa le Jesu ba nyaka gore le lehono go bolela ditaba tše dibotse go be bohlokwa kudu maphelong a rena. (Mat. 24:14; 28:​19, 20) Re ka kgona go bolela ditaba tše dibotse ka mafolofolo ge re ka ekiša tsela yeo Jehofa a lebelelago batho ka yona. O nyaka gore batho ba bantšhi ba kwe ditaba tše dibotse. (1 Tim. 2:​3, 4) O re ruta gore re kgone go bolela molaetša wo gabotse. Le ge batho ba ka se kgone go re theetša gona bjale, ba ka tla ba re theetša pele masetlapelo a magolo a fela. w25.03 15-16 ¶5-7

Mokriste yo mongwe le yo mongwe a ka diriša letswalo la gagwe leo a le tlwaeditše ka Beibele ge a kopana le motho yo a tlošitšwego ka phuthegong. Ba bangwe ba ka kgetha go dumediša motho yoo le go dira gore a ikwe a amogelegile ge a tlile dibokeng. Eupša ga se ra swanela go swara magang le yena. Ba bangwe ba ka no ipotšiša gore, na Beibele ga e re ge Mokriste a dumediša motho yoo o thekga mediro ya gagwe e mebe? (2 Joh. 9-11) Lengwalo le le bolela ka bahlanogi le batho bao ba kgothaletša ba bangwe go dira dilo tše mpe. (Kut. 2:20) Ge motho e le mohlanogi goba a kgothaletša batho go dira dilo tše mpe, bagolo ba ka se mo etele. Re no tshepa gore motho yoo ka letšatši le lengwe o tla fetoga. Ge motho yoo a sa fetoge, ga re mo dumediše e bile ga re mo meme gore a tle dibokeng. w24.08 30-31 ¶14-15

Ka morago ga gore Jesu a fepe lešaba, yena le barutiwa gagwe ba ile ba tsena sekepeng gore ba boele Kaperenaume, eupša a ba tlogela a ya thabeng ka ge a be a sa nyake gore lešaba le mo dire kgoši. (Joh. 6:​16-20) Ge barutiwa ba dutše ba le ka sekepeng go ile gwa tsoga ledimo le matla gomme la baka maphoto a magolo. Ke moka Jesu o ile a tla go bona a sepela godimo ga meetse. O ile a bitša moapostola Petro gore le yena a sepele godimo ga meetse. (Mat. 14:​22-31) Ka morago ga gore Jesu a tsene ka sekepeng, ledimo le ile la homola. Barutiwa ba gagwe ba ile ba makala gomme ba bolela gore: “Ruri o Morwa wa Modimo.” (Mat. 14:33) Le ga go le bjalo, ga se ba ka ba ithuta selo go mohlolo woo o diragetšego pejana le seo se diregago gona bjale. Mareka o re botša gore: “[Baapostola] ba ile ba boifa, ba be ba se ba kwešiša seo ba bego ba swanetše go ithuta sona ka mohlolo wola wa dinkgwa.” (Mar. 6:​50-52) Ba be ba sa kwešiše matla ao Jehofa a a neilego Jesu a go dira mehlolo. w24.12 5 ¶7

Re ka bontšha gore re leboga seo Jehofa a re diretšego sona. Re ka leboga Jehofa ka go diriša nako ya rena ka bohlale nakong ya Segopotšo. Re ka laletša ba bangwe gore ba tle Segopotšong. Hlalosetša batho bao o ba memago gore go tlo direga eng Segopotšong. Ba bontšhe bidio ye e rego, Ke ka Baka la Eng Jesu a Ile a hwa? le yeo e rego, Gopola Lehu la Jesu go jw.org/nso. Bagolo ba swanetše go laletša batho bao ba fodilego moyeng. Go ba le lethabo le legolo kua legodimong ge motho a boela ka phuthegong ebile le rena re a thaba. (Luka 15:​4-7) Ge re tla be re le Segopotšong re swanetše go dumediša batho ka moka kudukudu bao e lego baeng goba bao e lego kgale ba sa tle dibokeng. Re nyaka gore ba ikwe ba le gae ga mahlaku.—Baroma 12:13. w25.01 29 ¶15

Le ge topollo e re thuša go kwešiša gore Modimo o lokile, e re thuša gape go bona gore o re rata gakaakang. (Joh. 3:16; 1 Joh. 4:​9, 10) Jehofa o rometše Morwa wa gagwe gore a tle a re hwele ka gobane o nyaka gore re phele ka mo go sa felego ebile o nyaka gore re be karolo ya lapa la gagwe. Ka morago ga gore Adama a dire sebe, Jehofa o ile a mo raka ka lapeng la gagwe. Seo se ile sa dira gore ka moka ga rena re se ke ra ba karolo ya lapa la Jehofa. Eupša ka lebaka la topollo, Jehofa o re lebalela dibe ebile o dira gore re kgone go ba karolo ya lapa la gagwe la batho bao ba bontšhago tumelo le bao ba kwago. Le gona bjale go a kgonega gore re be le segwera se sebotse le Jehofa le bana babo rena le dikgaetšedi. Ruri Jehofa o re rata kudu.—Baroma 5:​10, 11. w25.01 21 ¶6

Jehofa o re neile mpho e botse kudu ge a be a romela Morwa wa gagwe gore a re hwele. (2 Bakor. 9:15) Lehu leo la Jesu le dira gore re kgone go ba bagwera ba Jehofa. Ebile le dira gore re tle re kgone go phela ka mo go sa felego. Re na le mabaka a mantšhi a gore re leboge Jehofa yo a ilego a re nea topollo ka gobane a re rata kudu. (Baroma 5:8) Jesu o ile a re laela gore re gopole lehu la gagwe ngwaga o mongwe le o mongwe go re thuša gore re dule re leboga topollo le go e tšeela godimo. (Luka 22:​19, 20) Ngwageng wo segopotšo se tlo ba ka Labone la di-2 tša April 2026. Ka moka ga rena re swanetše go dira sohle seo re ka se kgonago gore re be gona. Re tlo holega kudu ge re ka beela nako ka thoko sehleng sa Segopotšo gore naganišiše ka seo Jehofa le Morwa wa gagwe ba re diretšego sona. w25.01 20 ¶1-2

Go ithuta kamoo Jehofa Modimo le Jesu ba re ratago ka gona, go tlo re thuša go bona dilo tšeo ba re diretšego tšona. Mohlomongwe sehleng sa Segopotšo o ka ithuta ka e nngwe ya Diebangedi. O se ke wa leka go bala dikgaolo tše dintšhi ka nako e tee. Go e na le moo, iketle gore o kgone go bona kamoo Jehofa le Jesu ba go ratago ka gona. Ge eba e le kgale o le ka phuthegong, o ka ipotšiša ge eba go na le dilo tše diswa tšeo o ka ithutago tšona ka toka ya Jehofa, lerato la gagwe le ka topollo. Nnete ke gore re ka se tsoge re feditše go ithuta ka dilo tše. Bala le go ithuta ka dilo ka moka tšeo re di hwetšago ka dikgatišong tša rena. w25.01 24-25 ¶13-15