Re swanetše go šoma ka thata gore re be Bakriste bao ba godilego e bile re lwele go dula re le ka tsela yeo. E le gore re kgone go dira se, re swanetše go phema go ikholofela kudu. (1 Bakor. 10:12) Re swanetše “go itekola” go bona ge eba re sa tšwela pele go gola moyeng. Ge moapostola Paulo a be a ngwalela Bakolose lengwalo, o ile a ba bontšha bohlokwa bja gore ba dule ba gola moyeng. Le ge Bakriste bao ba be ba gotše ka mo go feletšego, Paulo ile a ba lemoša gore ba se ke ba forwa ke tsela ya lefase ya go dira dilo. (Bakol. 2:​6-10) Epafora yo a bego a tseba phuthego yeo gabotse, o ile a rapela ka mehla a rapelela gore ‘mafelelong ba eme ba feletše’ goba ba gotše moyeng. (Bakol. 4:12) Re ka ithuta’ng go se? Epafora le Paulo ba be ba kwešiša gore go nyakega maiteko le thušo ya Jehofa gore motho a dule a gotše moyeng. Ba be ba nyaka gore Bakolose ba dule ba tiile goba e be Bakriste bao ba godilego ka mo go feletšego go sa šetšwe mathata ao ba bego ba kopana le ona. w24.04 6-7 ¶16-17

Ge re boifa Jehofa, re bontšha gore re mo rata kudu e bile ga re nyake go dira selo le ge e le sefe go mo nyamiša. Re šoma ka thata gore re tsebe phapano magareng ga selo se se lokilego le se sa lokago, le phapano magareng ga nnete le maaka e le gore Jehofa a dule a re amogela. (Die. 2:​3-6; Baheb. 5:14) Ge re ka tšhaba batho go feta kamoo re boifago Modimo re ka hlanogela therešo. A re boleleng ka mohlala wa dihlodi tše 12 tšeo di bego di ile go hlola naga yeo Jehofa a bego a e tshepišitše Baisiraele. Dihlodi tše 10 di ile tša tšhošwa ke Bakanana gomme tša lebala ka Jehofa. Di boditše setšhaba gore: “Re ka se kgone go lwa le ditšhaba tšeo ka gobane di na le matla go re feta.” (Num. 13:​27-31) Ge motho a lebeletše, Bakanana ba be ba na le matla. Eupša bao ba bego ba nagana gore setšhaba se ka se fenye manaba a sona ba be ba bontšha gore ga ba dumele gore Jehofa o tlo ba thuša. w24.07 9 ¶5-6

Na re ka kgodišega gore Jehofa o tlo ahlola gabotse? Ee! Aborahama o ile a kwešiša gabotse gore Jehofa o phethagetše, ke yo bohlale e bile ke “Moahlodi” yo a nago le kwelobohloko. O ile a tlwaetša morwa wa gagwe gomme a mo nea le boikarabelo bja go ahlola. (Joh. 5:22) Jehofa le Jesu ba tseba seo se lego ka pelong ya yo mongwe le yo mongwe. (Mat. 9:4) Ge ba ahlola ba tlo dula ba dira “se se lokilego”! A re duleng re ikemišeditše go tshepa Jehofa. Ke yena a swanelwago ke go ahlola e sego rena! (Jes. 55:​8, 9) Re a tseba gore Jehofa le morwa wa gagwe ba tlo ahlola gabotse, ka gobane Jesu o ekiša tatagwe ka go ba le toka le kwelobohloko.—Jes. 11:​3, 4. w24.05 7 ¶18-19

Re ka ithuta bohlokwa bja go botega nakong ya ge Jesu a kopana le Nathaniele la mathomo. Ge Filipi a tliša mogwera yoo wa gagwe go Jesu, go ile gwa direga selo seo se makatšago. Le ge Jesu a be a se a ka a kopana le Nathaniele, o ile a bolela gore: “Bona Moisiraele yoo ge e le gabotse go se nago bofora go yena.” (Joh. 1:47) Jesu o ile a bona Nathaniele a botega ka tsela e makatšago. Nathaniele o be a swana le rena a se a phethagala, eupša e be e se moikaketši. Jesu o ile a rata seo ka Nathaniele gomme a mo reta. Psalme 15 e bolela ka dilo tšeo re swanetšego go di dira ge re dirišana le batho ba bangwe. Psalme 15:3 e re moeng tenteng ya Jehofa, “ga a senye batho maina ka leleme la gagwe. Ga a sware moagišane wa gagwe gampe, e bile ga a goboše bagwera ba gagwe.” Go senya batho ba bangwe maina go ka ba gobatša.—Jak. 1:26. w24.06 10 ¶7, 9; 11 ¶10

Ge o ka lokišetša gabotse ge o eya tšhemong, o ka se sa tšhoga kudu ge o bolela le batho ba bangwe. Jesu o ile a thuša barutiwa ba gagwe gore ba kgone go lokišetša pele ba eya tšhemong. (Luka 10:​1-11) Ba ile ba thabišwa ke seo ba se fihleletšego ka ge ba ile ba thabišwa ke seo Jesu a ba rutilego sona. Re ka lokišetša bjang go ya tšhemong? Re swanetše go nagana ka seo re nyakago go se bolela gomme re se hlalose ka tsela yeo e kwagalago go rena le ka mantšu a rena. Re ka nagana le ka ditsela tše tharo tšeo batho ba tšhemong ya rena ba tlwaetšego go re araba ka tšona gomme re nagane gore re ka ba araba bjang. Ka gona ge re kopana le batho re ka leka go iketla, ra myemyela e bile ra ba botho. w24.04 16 ¶6-7

Lebaka le legolo la gore re ye tšhemong le go bolela ditaba tše dibotse ke ka gobane re rata Jehofa le leina la gagwe. Re tšea bodiredi bja rena e le tsela ya go tumiša Jehofa Modimo yo re mo ratago. Re dumela gore Jehofa Modimo wa rena o swanelwa ke go amogela letago, kgodišo le matla. Re nea Modimo wa rena kgodišo le letago ge re nea ba bangwe bohlatse bja gore o “bopile dilo ka moka” le gore re bile gona ka baka la gagwe. Re nea Jehofa matla ka go diriša nako le dilo tšeo re nago le tšona gore re bolele ditaba tše dibotse kamoo re kgonago ka gona ge maemo a re dumelela. (Mat. 6:33; Luka 13:24; Bakol. 3:23) Ge e le gabotse re ka re, re rata go bolela ka Modimo yoo re mo ratago. Re rata go botša batho ka leina la Modimo le seo le se bolelago. w24.05 17 ¶11

Jehofa o dira gore re be le khutšo ya monagano le go kgotsofala, e bile o tlo re nea bophelo bjo bo sa felego nakong e tlago. Re ka holofela Jehofa re kgodišegile gore o nyaka go re putsa e bile o na le matla a go dira bjalo. Ge e ba re kgodišegile re tlo kgona go dula re hlankela Jehofa go swana le ge bahlanka ba gagwe ba nakong e fetilego ba ile ba dira. Se ke seo Timotheo a se dirilego lekgolong la pele la mengwaga. (Baheb. 6:​10-12) Timotheo o ile a tshepa Modimo yo a phelago. (1 Tim. 4:10) Ka gona o ile a kgona go šoma ka thata le go ikgafa. Ka ditsela dife? Moapostola Paulo o ile a mo kgothaletša gore a dule a kaonefatša tsela ya gagwe ya go ruta le go bolela phatlalatša. Timotheo o be a swanetše go beela badumedi gotee le yena mohlala o mobotse. Le gona o be a na le dikabelo tše thata tšeo di bego di akaretša go nea keletšo e tiilego eupša ka tsela e lerato go bao ba bego ba e hloka. (1 Tim. 4:​11-16; 2 Tim. 4:​1-5) Timotheo o be a kgodišegile gore Jehofa o be a tlo mo putsa.—Baroma 2:​6, 7. w24.06 22-23 ¶10-11

Ge Baisiraele ba be ba sa kwe melao ya Jehofa, o be a diriša baporofeta ba gagwe go ba thuša go bona diphošo tša bona le gore ba di lokiše. Ka mohlala, Jehofa o ile a diriša Jeremia go botša Baisiraele gore: “Boa, wena Isiraele wa mohlanogi, . . . nka se le lebelele ka sefahlego se se befetšwego, ka gobane ke a botega. . . . Nka se dule ke befetšwe go iša mehleng ya neng le neng. Elang hloko molato wa lena, ka gobane le senyeditše Jehofa.” (Jer. 3:​12, 13) Jehofa o ile a diriša le Joele go botša Baisiraele gore: “Boelang go nna ka dipelo tša lena ka moka.” (Joele 2:​12, 13) A diriša Jesaya go ngwala gore: “Itlhwekišeng; tlošang bobe ditirong tša lena ka pele ga ka; tlogelang go dira bobe.” (Jes. 1:​16-19) Ke moka a diriša le Hesekiele go ngwala gore: ‘Na ruri ke kgahlwa ke lehu la yo kgopo? Ke kgahlwa ke gore a furalele ditsela tša gagwe gomme a dule a phela. Ga ke kgahlwe ke lehu la yo a hwago. Ka gona, furalelang ditsela tša lena gomme le dule le phela.’ (Hesek. 18:​23, 32) Jehofa o a thaba ge a bona batho ba itshola, ka gobane o nyaka gore ba phele go ya go ile. w24.08 9 ¶5-6

Bahlanka ba Modimo ka moka ba amogela dijo tša moya, tlhahlo yeo e tšwago go Jehofa le tšhireletšo yeo ba e hlokago. Tsela e nngwe ya go bontšha gore Jehofa ga a kgetholle ke ka go kgonthišetša gore batho ba lefaseng ka moka ba kgona go bala Beibele. Mangwalo a Makgethwa a be a hwetšagala ka maleme a mararo feela e lego: Seheberu, Searama le Segerika. Na batho bao ba kgonago go bala Beibele ka maleme a mathomong ba na le segwera sa kgauswi le Jehofa go feta bao ba sa kgonego go bala maleme ao? Aowa. (Mat. 11:25) Jehofa ga a re amogele ka baka la ge re rutegile goba re kgona go bolela maleme a fapafapanego. O thuša batho ka moka gore ba be le bohlale bja gagwe, go sa šetšwe gore ba rutegile kudu goba ga se ba rutega. Lentšu la gagwe leo le buduletšwego e lego Beibele le fetoletšwe ka maleme a mantšhi kudu, gomme seo se dira gore batho lefaseng ka moka ba kgone go ithuta ka yena le go ba bagwera ba gagwe.—2 Tim. 3:​16, 17. w24.06 6-7 ¶13-15

Go fedišwa ga tshepedišo ya Sejuda, yeo Jesu a bego a boletše ka yona go be go batamela. Bakriste bao ba be ba ka diriša nako e šetšego gore ba lwele go ba le dika tša go swana le tumelo le kgotlelelo. (Baheb. 10:25; 12:​1, 2) Re tlo welwa ke masetlapelo a magolo a go feta ao a ilego a wela Bakriste ba Baheberu. (Mat. 24:21; Kut. 16:​14, 16) Re tlo boledišana ka keletšo yeo Jehofa a ilego a e nea Bakriste bao, yeo e ka re holago le lehono. Moapostola Paulo o ile a kgothaletša badumedi gotee le yena gore ba bale Lentšu la Modimo ka mo go tseneletšego. (Baheb. 5:14–6:1) Paulo o ile a diriša mangwalo a Seheberu go bontšha bana babo gore tsela ya Bokriste ya go hlankela Jehofa e phala ya Sejuda. Paulo o be a tseba gore go ithuta Lentšu la Modimo ka mo go tseneletšego go be go tlo thuša Bakriste bao gore ba lemoge dithuto tša maaka gomme ba se ke ba arošwa. w24.09 8-9 ¶2-3; 10 ¶6

Balatedi ba Jesu ba be ba hloka go kgothatšwa. Ka baka la’ng? Ba bangwe ba be ba tlogetše magae a bona, malapa a bona le dikgwebo tša bona gore e be balatedi ba Jesu. (Mat. 19:27) Ba bangwe ba be ba sa swarwe gabotse ka ge e le barutiwa ba Jesu. (Joh. 9:22) Ba ile ba ikgafa ka ge ba be ba dumela gore Jesu ke Mesia yo a holofeditšwego. (Mat. 16:16) Ka morago ga gore Jesu a bolawe, ba ile ba šala ba se na kholofelo e bile ba nyamile. Ga go pelaelo ge Jesu a bona barutiwa ba gagwe ba lla, ga se a lebelela seo e le go hloka tumelo eupša o be a kwešiša gore ba kwele bohloko ka baka la go lahlegelwa ke mogwera wa bona. Ka gona, ka letšatši leo a tsošitšwego ka lona, o ile a thoma go kgothatša bagwera ba gagwe. Ka mohlala, o ile a iponagatša go Maria Magdalena yo a bego a lla lebitleng la gagwe. (Joh. 20:​11, 16) O ile a iponagatša le go barutiwa ba babedi bao ba bego ba le tseleng ya go ya Emause. O ile a iponagatša le go moapostola Petro. w24.10 13 ¶5-6

Batswadi, thušang bana ba lena go kgona go hlalosa gore ke ka baka la’ng ba dumela gore go na le Mmopi. O ka boledišana le bana ba gago ka dihlogo tšeo di lego go Jw.org/nso tšeo di rego “Bafsa ba a Botšiša—Tlholo Goba Tlhagelelo?” Ngwana wa gago a ka kgetha sehlogo seo a bonago gore se ka kgona go mo thuša go ka kgona go hlalosetša ba bangwe, gore ke ka baka la’ng a dumela gore Mmopi o gona. Mo kgothaletše gore a boledišane le bona ka dilo tše bonolo tšeo di ka dirago gore poledišano yeo e kgahliše. Ka mohlala, ngwana yo a tsenago sekolo le yena a ka re go yena: “Nna ke tshepa dilo tšeo ke di bonago ebile ga sa nka ka bona Modimo.” Ngwana wa gago a ka araba ka gore: “Nagana o sepela lešokeng gomme ge o le moo wa bona sediba seo se epilwego, sediba seo se tla no go bontšha gore go na le motho yo a lego bohlale yo a ilego a se dira. Ge e ba go le bjalo, re kgona go bona gore go na le yo a hlodilego lefase la rena le dilo tšeo di lego go lona. w24.12 18 ¶16

Ka moka ga rena re hloka keletšo gore re dire diphetho tše bohlokwa bophelong. Re ka hwetša keletšo yeo go bagolo le go Bakriste ba bangwe bao ba godilego. Ge e ba e le ba bagolo kudu, ga se ra swanela go nagana gore keletšo ya bona e fetilwe ke nako. Jehofa o nyaka re ithuta go batho bao ba godilego. Ke kgale ba phela, ka gona ba na le phihlelo, ba a kwešiša e bile ba bohlale. Mehleng ya Beibele, Jehofa o ile a diriša banna bao ba godilego gore ba kgothatše batho ba gagwe le go ba hlahla. Nagana ka mohlala wa Moshe, wa Dafida le moapostola Johane. Ba phetše ka dinako tšeo di sa swanego e bile le maemo a bona a bophelo a be a sa swane. Ge ba be ba le kgauswi le go hlokofala, ba ile ba nea ba baswa keletšo e bohlale. Banna ba ka moka ba ile ba bontšha gore go kwa Modimo go bohlokwa. Go sa šetšwe gore re ba bagolo goba ba banyenyane, re ka holwa ke keletšo ya bona.—Baroma 15:4; 2 Tim. 3:16. w24.11 8 ¶1-2

Mehleng ya Noa, Modimo o ile a botša batho gore ba se ke ba ja madi. (Gen. 9:​3, 4) Jehofa o ile a nea le Baisiraele molao wa gore ba se ke ba ja madi. Mang le mang yo a bego a ka ja madi o be a swanetše gore “a bolawe.” (Lef. 7:27) Jesu o be a hlompha melao yeo Jehofa a e neilego batho ba gagwe. (Mat. 5:​17-19) O be a ka se tsoge a kgothaleditše Bajuda gore ba je nama ya gagwe le go nwa madi a gagwe ka nnete. Le ge a be a bolela le mosadi wa Mosamaria o ile a diriša papišo. O itše: “Meetse ao ke tlago go [go] nea ona a. . . go nea bophelo bjo bo sa felego.” (Joh. 4:​7, 14) Jesu o be a sa re gore mosadi yoo o tla no hwetša bophelo bjo bo sa felego ka go no nwa meetse a itšego. Ka mo go swanago, o be a sa re gore lešaba leo le lego Kaperenaume le be le tla hwetša bophelo bjo bo sa felego ka go ja nama ya gagwe le go nwa madi a gagwe. w24.12 9 ¶4-6

Banna ba Bakriste ba swanetše go hlokomela gore ba se ke ba nagana le go lebelela basadi ka tsela e fošagetšego. Ka baka la’ng? Ka gobane motho a ka thoma go dira dilo tše itšego ka baka la tsela yeo a naganago ka yona. Moapostola Paulo o ile a kgothaletša Bakriste ba tloditšwego ba kua Roma gore ba lese go “bopega ka sebopego sa tshepedišo ye ya dilo.” (Baroma 12:​1, 2) Ge Paulo a be a ngwalela Bakriste ba Roma lengwalo leo, e be e le kgale phuthego yeo e le gona. Mantšu a Paulo a be a bontšha gore ba bangwe ka phuthegong ba be ba sa dira dilo goba go nagana go swana le batho bao e sego Bakriste. Ke ka baka leo a ilego a ba kgothaletša gore ba fetoše tsela yeo ba naganago le go dira dilo ka yona. Keletšo ye e sa šoma go banna ba Bakriste le lehono. Eupša sa go nyamiša ke gore go sa na le banna ba bangwe bao ba naganago go swana le batho bao ba sa hlankelego Modimo gomme ba tlaiša basadi ba bona. w25.01 9 ¶4

Lehono bagolo ke banna bao ba šomago ka thata. Ba dira modiro wa boebangedi. (2 Tim. 4:5) Ba etelela pele tšhemong ka mafolofolo, ba rulaganya modiro wa boboledi tšhemong ya gabo bona e bile ba tlwaetša bagoeledi go bolela ditaba tše dibotse le go ruta ka tsela e kwagalago. E bile ba hlankela e le baahlodi bao ba nago le kwelobohloko le go se tšee lehlakore. Ge Mokriste a dira sebe se segolo, bagolo ba šoma ka thata go mo thuša gore a lokiše segwera sa gagwe le Jehofa. Ba kgonthišetša gore phuthego e dula e hlwekile. (1 Bakor. 5:​12, 13; Bagal. 6:1) Sa bohlokwa le go feta, bagolo ba tsebja e le badiši. (1 Pet. 5:​1-3) Ba nea dipolelo tšeo di lokišeditšwego gabotse, ba leka go tseba motho yo mongwe le yo mongwe ka phuthegong e bile ba dira maeto a bodiši. Bagolo ba bangwe ba thuša go aga Diholo tša Mmušo le go di hlokomela, ba rulaganya dikopano tša selete, ba šoma Dikomiting tša go Hloma Kwano le Dipetlele le Dihlopheng tša go Etela Balwetši. Bagolo ba tloga ba šoma ka thata! w24.10 20 ¶9

Beibele e re botša gore ka ge topollo e patetšwe, re lokolotšwe sebeng gomme ga re sa na sekoloto. Moapostola Petro o boletše gore: “Le tseba gore e be e se ka dilo tše di senyegago, e lego silifera goba gauta, ge le hlakodišitšwe tseleng ya lena ya lefeela ya bophelo yeo le e gafetšwego ke borakgolokhukhu ba lena. Eupša e bile ka madi a bohlokwa, a swanago le a kwana e hlokago sekodi le sepatso, ona a Kriste.” (1 Pet. 1:​18, 19) Sebe le lehu ga di sa re buša ka ge go bile le tefelo ya topollo. (Baroma 5:21) Re tloga re leboga Jehofa le Jesu gore ba patetše dikoloto tša rena ka madi goba bophelo bja Jesu Kriste. w25.02 5 ¶15-16

Re ka itšhireletša bjang? A re kweng seo re ka ithutago sona go lesogana leo go bolelwago ka lona go Diema kgaolo 7. Le ile la robala le mosadi wa seotswa. Temana 22 e re botša gore lesogana leo le ile la šala mosadi yoo morago “gateetee.” Ditemana tše di fetilego di bontšha gore lesogana leo ile la dira diphetho tše di sego bohlale tšeo di dirilego gore le feleletše le dirile sebe se segolo. Ke’ng seo se dirilego gore lesogana leo le feleletše le dirile sebe? Bošego “le be le feta kgauswi le khona ya seterata seo go dulago mosadi yo a hlokago boitshwaro.” Le ile la sepela le lebile ntlong ya gagwe. (Die. 7:​8, 9) Ga se la ka la tšhaba ge le bona mosadi yoo. Lesogana leo le ile la dumela mosadi yoo a le khisa, gomme la mo theetša ge a bolela gore o dirile dihlabelo. Mohlomongwe o be a leka go dira gore lesogana leo le mmone e le motho yo mokaone. (Die. 7:​13, 14, 21) Ge nkabe lesogana leo le ile la phema dilo tšeo di dirilego gore le dire sebe, nkabe le se la dira bootswa le mosadi yoo. w24.07 16 ¶8-9; 19 ¶19

Jehofa ga a nyake gore bahlanka ba gagwe ba dire dibe tše dikgolo. Ga a nyake re nagana gore batho bao ba dirago dibe tše dikgolo e bile ba sa itshole ba ka no tšwela pele ba le ka phuthegong go sa direge selo ka bona. Le ge Jehofa a re kwela bohloko, ga a no re dumelela gore re itshware ka tsela e nngwe le e nngwe, e bile ga a fetole melao ya gagwe. (Juda 4) Ge nkabe Jehofa a no dumelela batho bao ba sa itsholego gore ba tšwele pele ba le ka phuthegong, seo se be se ka se bontšhe gore o re kwela bohloko ka gobane go be go tla ba le mathata a mantšhi ka phuthegong. (Die. 13:20; 1 Bakor. 15:33) Re a tseba gore Jehofa ga a nyake gore go be le motho yo a fedišwago. O nyaka gore ge e ba go kgonega, batho ka moka ba phologe. Ge batho ba itshola e bile ba nyaka go lokiša segwera sa bona le yena, o ba kwela bohloko. (Hesek. 33:11; 2 Pet. 3:9) Ge monna wa kua Korinthe a be a itshola e bile a tlogela sebe seo a bego a se dira, Jehofa o ile a diriša moapostola Paulo go botša phuthego gore e lebalele monna yoo le go mo amogela ka phuthegong. w24.08 17 ¶7; 18-19 ¶14-15

Papišong ya gagwe ya dinku le dipudi, Jesu o boletše gore o tlo ahlola batho go ya ka tsela yeo ba thekga bana babo bao ba tloditšwego. (Mat. 25:​31-46) Nakong ya “masetlapelo a magolo,” Jesu o tlo ahlola batho gore ke dinku goba ke dipudi pele ga Haramagedone. (Mat. 24:21) Go swana le ge modiši a kgetholla dinku go dipudi, Jesu le yena o tlo kgetholla bao ba thekgago balatedi ba gagwe ba tloditšwego go bao ba sa ba thekgego. Jesu, yo Jehofa a mo kgethilego gore a ahlole, o tlo ahlola batho ka toka. (Jes. 11:​3, 4) O tlo ahlola batho a lebeletše tsela yeo ba dirago dilo ka yona, ba naganago ka yona, dilo tšeo ba di bolelago le kamoo ba thekgago bana babo ba tloditšwego. (Mat. 12:​36, 37) Jesu o tla be a tseba gore ke bomang bao ba thekgago bana babo bao ba tloditšwego go dira mošomo wa bona. Tsela e kaone yeo motho a ka thušago bana babo Kriste ke ka go ba thuša go bolela ditaba tša dibotse. w24.09 20-21 ¶3-4

Ge eba re se ra kgodišega ka selo se sengwe seo re se dumelago re ka nyakišiša ka sona ka Beibeleng. A re re moswa o nagana gore Jehofa ga a na taba le yena. Na o swanetše go no tshepa seo a se naganago? Aowa, o swanetše go bala Lentšu la Modimo e le gore a ‘kgonthišetše dilo tšohle.’ Jehofa o diriša Beibele go bolela le rena. Re swanetše go šoma ka thata e le gore re kwešiše tsela yeo Jehofa a naganago ka yona. Ge re bala Beibele re swanetše go ithuta ka mangwalo ao a tlago go re thuša ka dilo tšeo re tshwenyegilego ka tšona. Re ka thušwa le ke go dira nyakišišo ka dithulusi tšeo mokgatlo wa Modimo o re neago tšona. (Die. 2:​3-6) Re ka kgopela Jehofa gore a re thuše go hwetša dikarabo tša dipotšišo tšeo re nago le tšona. Re ka nyaka melao metheo ya Beibele le dilo tšeo di ka re thušago. w24.10 25 ¶4-5

Jehofa a ka se tsoge a šegofaditše maiteko a motho yoo a iponago a le bohlokwa ebile a nagana gore o phala batho ba bangwe. (1 Bakor. 10:​24, 33; 13:4) Balatedi ba bangwe ba Jesu ba ile ba nyaka ditokelo tše itšego e le gore ba be le maemo. Nagana ka seo moapostola Johane le Jakobo ba ilego ba se dira. Ba ile ba kgopela Jesu gore a ba nee maemo a bohlokwa Mmušong wa gagwe. Jesu ga se a kgahlwa ke seo ba ilego ba se dira. Ke ka baka leo a ilego a botša baapostola ba gagwe ka moka gore: “Mang le mang yo a nyakago go ba yo mogolo gare ga lena e swanetše go ba modiredi wa lena, gomme mang le mang yo a nyakago go ba wa pele gare ga lena e swanetše go ba mohlanka wa bohle.” (Mar. 10:​35-37, 43, 44) Bana babo rena bao ba nyakago go ba bahlanka ba bodiredi ka gobane ba nyaka go thuša ba bangwe ba tlo hola phuthego.—1 Bathes. 2:8. w24.11 15-16 ¶7-8

Ge o dira diphetho, go rata batho go tlo go thuša gore o se ke wa dira dilo tšeo di holago wena feela. (1 Bakor. 10:​23, 24, 32; 1 Tim. 2:​9, 10) O tlo kgona go dira diphetho tšeo di bontšhago gore o rata batho bao ebile o a ba hlompha. Pele o ka dira phetho e kgolo, naganišiša ka dilo tšeo di ka diregago pele o ka dira phetho yeo. Jesu o re rutile go “bala ditshenyegelo.” (Luka 14:28) Nagana ka dilo ka moka tšeo di ka dirago gore phetho yeo e atlege. Ka dinako tše dingwe o ka swanelwa ke go bolela le ba leloko go kwa gore ke’ng seo ba ka se dirago gore ba go thekge. Ke ka baka la’ng go naganišiša ka tsela ye gole bohlokwa? Ge o ka naganišiša gabotse o tlo kgona go bona ge e ba o ka swanelwa ke go fetoša phetho yeo goba wa tšwela pela ka yona. Le gona, ge o ka boledišana le ba leloko gomme wa theetša seo ba se naganago o tlo kgona go dira phetho e botse yeo e atlegago. w25.01 18-19 ¶14-15

Jesaya o re botša gore ke ka baka la’ng re swanetše go ba le mabaka a go “hlalala le go thaba” mo paradeiseng ya moya. Paradeise ye e dirilwe ke Jehofa. (Jes. 65:​18, 19) Ka gona ga go makatše ge Jehofa a re diriša go thuša batho go tšwa mekgatlong ye ya lefase, yeo e sa rutego therešo ka Modimo gomme ra ba thuša gore ba be karolo ya paradeise ya moya! Re thabela ditšhegofatšo tšeo re di hwetšago ge re le therešong e bile re nyaka go botša ba bangwe ka tšona. (Jer. 31:12) Re tloga re leboga le go thabela kholofelo yeo re nago le yona ka ge re le badudi ba paradeise ya moya. Beibele e re tshepiša gore re tla “ aga dintlo [ra] dula go tšona; [re] tla bjala dirapa tša merara [ra] ja dienywa tša tšona.” Re ka se “itapišetše lefeela” ka gobane re tla ba “bašegofatšwa ba Jehofa.” O re tshepiša bophelo bjo bo šireletšegilego, bjo bo kgotsofatšago le bjo bo nago le morero. O a tseba gore re hloka eng gomme o “[tlo] kgotsofatša kganyogo ya batho le diphoofolo.”—Jes. 65:​20-24; Ps. 145:16. w24.04 22-23 ¶11-12

Re dira Jehofa Leswika la rena ge re ithekga ka yena. Ge re mo theetša ka mehla re tlo holega. (Jes. 48:​17, 18) Re tlo mo tshepa le go feta ge re bona ka mo a re thekgago ka gona. Re tlo kgona go lebeletšana le mathata ao re kopanago le ona re kgodišegile gore Jehofa o tlo re thuša. Jehofa ga a šišinyege go swana le leswika le legolo leo le tiilego. O swana le leswika le legolo goba thaba e sa fetogego e bile merero ya gagwe ga e fetoge. (Mal. 3:6) Ge go be go e ba le borabele kua tšhemong ya Edene, Jehofa ga se a ka a tšewa ke maikwelo. Moapostola Paulo o ngwadile gore Jehofa “a ka se ke a itatola.” (2 Tim. 2:13) Se se bolela gore go sa šetšwe dilo tšeo di diregago, Jehofa a ka se tsoge a tlogetše dika tša gagwe, merero ya gagwe goba tsela yeo a dirago dilo ka yona. Ge re ka tshepa Modimo, re ka kgona go mo kgopela gore a re thuše ge re na le mathata.—Ps. 62:​6, 7. w24.06 27-28 ¶7-8

Ge eba o na le motho yo o ratanago le yena ke eng seo se ka go thušago go tseba ge eba o swanetše go nyalana le yena goba o swanetše go kgaogana le yena? Tsebanang gabotse. Go ka direga gore o ithutile dilo tše dingwe ka motho yo a itšego pele o ka ratana le yena. Eupša gona bjale o na le sebaka se sebotse sa go tseba “motho wa sephiring wa pelo.” Go ithuta ka motho yo o ratanago le yena, go tlo go thuša go tseba gore o rata Modimo gakaakang, ke motho wa mohuta mang le gore o nagana bjang. Ge nako e dutše e ya, o swanetše go kgona go araba dipotšišo tša go swana le gore: ‘Na motho yo e tlo ba molekane yo mokaone?’ (Die. 31:​26, 27, 30; Baef. 5:33;1 Tim. 5:8) ‘Na re ka kgona go hlokomelana maikwelong? Na re tla kgona go kgotlelelana?’ (Baroma 3:23) Ge le dutše le tsebana gakaone gopolang gore: Taba ya gore le a swana ga e re gore le a swanelana, eupša go kgona go kgotlelelana mafokodi ke gona go ka le thušago gore le kgone go bona ge eba le swanelana. w24.05 27 ¶5

Kgoši Dafida o ile a dira sebe se segolo. Eupša ge moporofeta Nathane a be a mmotša kamoo Jehofa a ikwago ka gona ka seo a se dirilego, o ile a itshola kudu. (Ps. 51:​3, 4, 17) Kgoši Hesekia le yena o ile a senyetša Jehofa. (2 Dikor. 32:25) Eupša go swana le Dafida, Hesekia o ile a itshola. (2 Dikor. 32:26) Mafelelong Jehofa o ile a mo lebelela e le kgoši e botegago yeo e ilego ya “dira dilo tše di lokilego mahlong a Jehofa.” (2 Dikg. 18:3) Re ithuta’ng? Re swanetše go itshola ka baka la dibe tša rena gomme re dire sohle seo re ka se kgonago gore re se ke ra di bušeletša. Re swanetše go arabela bjang ge bagolo ba re nea keletšo, le ka diphošo tšeo di bonagalago e le tše dinyenyane? Ga se ra swanela go bona eka Jehofa goba bagolo ga ba sa na taba le rena. Dikgoši tše di lokilego tša Isiraele le tšona di be di fela di hwetša keletšo e bile di phošollwa. (Baheb. 12:6) Ge eba re eletšwa re swanetše (1) go arabela gabotse, (2) re dire diphetogo tšeo di nyakegago, re be re (3) hlankele Jehofa ka dipelo tša rena ka moka. Ge eba re itshola ka baka la dibe tšeo re di dirilego, Jehofa o tlo re lebalela.—2 Bakor. 7:​9, 11. w24.07 21 ¶8; 22 ¶9, 11

Gabotsebotse motho yo a dirilego sebe se segolo o tlošwa ka phuthegong ge e ba a sa itshole. (Bagal. 6:7) Go reng re realo? Ka gobane bagolo ba lekile gantšhi go mo thuša gore a itshole eupša yena a no gana. (2 Dikg. 17:​12-15) Tsela yeo a itshwarago ka yona e bontšha gore ga a na taba le melao ya Jehofa. (Doit. 30:​19, 20) Bagolo ba tlo tsebiša phuthego gore motho yoo ga e sa le yo mongwe wa Dihlatse tša Jehofa. Lebaka la gore go dirwe tsebišo ye ga se gore motho yo a lešwe dihlong. Eupša ke go thuša Bakriste gore ba kwe taelo ya mangwalo yeo e rego ba “lese go gwerana” le motho yo, ‘le go ja ba se ke ba ja’ le yena. (1 Bakor. 5:​9-11) Taelo yeo e tloga e thuša phuthego. Moapostola Paulo o ngwadile gore: “Komelo e nyenyane e bediša hlama ka moka.” (1 Bakor. 5:6) Batho bao ba sa itsholego ba ka dira gore le ba bangwe ka phuthegong ba se sa phela ka melao ya Jehofa.—Die. 13:20; 1 Bakor. 15:33. w24.08 27 ¶3-4

Re ka diriša matla a rena goba mafolofolo a rena go ba thuša. Ka mohlala, re ka thuša batho bao ba tšofetšego ka go ba ela mabenkeleng, go ba thuša go hlwekiša ka gae le go ba direla dilo tše dingwe tšeo ba di hlokago. Goba re ka ithaopela go hlwekiša Holo ya Mmušo goba go thuša ka go e hlokomela. Dilo tšeo re di bolelago di ka kgona go tiiša ba bangwe. Na go na le motho yo o tsebago gore o tlo thaba ge o ka mo reta? Ge e ba a le gona, mo rete! Goba na o tseba motho yo a hlokago go kgothatšwa? Ge e ba o mo tseba, hle mo kgothatše! O ka kgetha go mo etela, wa mo founela goba wa mo romela molaetša. O se ke wa tshwenyega kudu gore o tla reng. Mantšu a mabedi a mararo ao o a boletšego a ka thuša ngwaneno gore a kgone go kgotlelela mathata ao a lebeletšanego le ona.—Die. 12:25; Baef. 4:29. w24.09 28 ¶8-10

Ge e ba o na le nako e itšego o le mohlanka wa bodiredi, o ka ba o šetše o thomile go šoma ka thata gore o swanelege go ba mogolo. O ka dira’ng gore o swanelege bakeng sa “modiro [wo] o mobotse”? Ke mešomo efe yeo mogolo a e dirago? O etelela pele tšhemong, o šoma ka thata go dira maeto a bodiši le go ruta e bile o kgothatša ba bangwe ka phuthegong ka seo a se bolelago le seo a se dirago. Ke ka baka leo Beibele e bitšago bagolo gore ke “dimpho.” (Baef. 4:8) O ka dira eng gore o swanelege go hlankela bjalo ka mogolo? Go swanelega go ba mogolo ga go swane le go hwetša mošomo. Gore o hwetše mošomo, o swanetše gore o be le bokgoni bjo itšego bjo mongmošomo a bo nyakago. Eupša gore o be mogolo, o swanetše go ba le dika tše itšego tšeo go bolelwago ka tšona ka Beibeleng. Dika tšeo go bolelwa ka tšona go 1 Timotheo 3:​1-7 le Tito 1:​5-9. w24.11 20 ¶1-3