Barutiwa ba Jesu ba ile ba amogela Lentšu la Modimo gomme ba leka go le diriša maphelong a bona. (Joh. 17:6) Eupša ba ile ba se kwešiše gore ke ka baka la’ng Jesu a ile a bolawa bjalo ka sesenyi. Jesu o be a tseba gore barutiwa ba gagwe ba na le tumelo e bile ba rata Jehofa eupša ba be ba swanetše go kwešiša Mangwalo gabotse. (Luka 9:​44, 45; Joh. 20:9) Ka gona, o ile a ba thuša go kwešiša seo ba se balago. A re boneng gore o ile a dira seo bjang ge a be a tšwelela go barutiwa ba babedi bao ba bego ba le tseleng yeo e lebilego Emause. Jesu ga se a no thoma ka go botša banna bao gore ke yena mang. Go e na le moo, o ile a ba botšiša dipotšišo. Ka baka la’ng? Mohlomongwe o be a nyaka go kwa gore ke’ng seo ba se naganago le seo se ba tshwenyago. Ba ile ba mo ntšhetša sa mafahleng. Ba mmoditše gore ba be ba nagana gore Jesu e tla ba kgoši ya Isiraele gomme a ba buše go e na le gore ba bušwe ke Baroma. (Luka 24:​18-27) Jesu o ile a diriša mangwalo go thuša banna bao gore ba kwešiše seo se diragetšego. Ka morago, Jesu o ile a kopana le barutiwa ba bangwe ke moka a ba botša seo a se boditšego barutiwa bale ba babedi.—Luka 24:​33-48. w24.10 14 ¶9-10

Jesu o ithutile go Tatagwe wa legodimong ka dilo tšeo a swanetšego go di dira le dilo tšeo a swanetšego go di bolela. Mokgatlo wa Jehofa o ekiša mohlala wa Jesu ka go thea dithuto tša wona Lentšung la Modimo. (2 Tim. 3:​16, 17) Re dula re gopotšwa gore re bale Lentšu la Modimo le go le diriša. Re holega kudu ge re ithuta Beibele le go diriša dikgatišo tšeo di theilwego go yona. Ka mohlala, re kgona go bapetša seo Beibele e se rutago le tlhahlo yeo re e hwetšago go mokgatlo. Ge re bona gore tlhahlo yeo re e hwetšago e theilwe Mangwalong, re tlo kgona go bota mokgatlo wa Jehofa kudu. (Baroma 12:2) Jesu o ile a “bolela ditaba tše dibotse tša Mmušo wa Modimo.” (Luka 4:​43, 44) Le gona, Jesu o ile a laela barutiwa ba gagwe gore le bona ba bolele ka Mmušo. (Luka 9:​1,2; 10:​8,9) Lehono, batho ka moka bao ba lego ka mokgatlong wa Jehofa ba bolela ka Mmušo go sa šetšwe gore ba dula kae. w24.04 9 ¶5-7

Dula o tshepa tlhahlo yeo mokgatlo wa Jehofa o re neago yona. Jehofa o ile a diriša Moshe ke moka ka morago a diriša Joshua gore ba hlahle setšhaba sa Isiraele. (Josh. 1:17) Ge Baisiraele ba be ba theetša banna bao Jehofa a ba kgethilego dilo di be di ba sepelela gabotse. Ge go be go thoma go ba le phuthego ya Bokriste, go be go na le baapostola ba 12 bao ba bego ba hlahla phuthego yeo. (Dit. 8:​14, 15) Ke moka ka morago go ile gwa ba le bagolo kua Jerusalema. “Diphuthego di ile tša tšwela pele di matlafatšwa tumelong le go oketšega ka palo letšatši le letšatši” ka baka la go latela tlhahlo yeo di bego di e newa ke banna bao ba botegago. (Dit. 16:​4, 5) Le rena lehono dilo di tlo re sepelela gabotse ge re ekwa tlhahlo yeo mokgatlo wa Jehofa o re neago yona. w24.07 10 ¶10

Jehofa o be a rata Kgoši Dafida kudu. O ile a ba a bolela le gore ke “monna yo a kwanago le pelo ya [gagwe].” Eupša Dafida o ile a dira dibe tše dikgolo tša go swana le bohlotlolo le go bolaya. Go ya ka molao, Dafida o be a swanetšwe ke go bolawa. (Lef. 20:10; Num. 35:31) Eupša Jehofa o be a nyaka go thuša Dafida gore a itshole. Jehofa o ile a romela moporofeta Nathane gore a ye go Kgoši Dafida go mo thuša gore a itshole, le ge ka nako yeo Dafida a be a sa itshole. Nathane o ile a diriša mohlala woo o ilego wa thuša Dafida gore a bone gore o dirile dibe tše dikgolo le gore o swanetše go itshola. Dafida o ile a itshola. (2 Sam. 12:​1-14) O ile a ngwala le psalme yeo e bontšhago kamoo a itsholago ka gona. (Ps. 51) Psalme yeo ile ya thuša le batho ba bantšhi bao ba dirilego dibe gore ba itshole. Go kgahliša kudu go bona gore Jehofa o be a rata Dafida le gore o mo thušitše gore a itshole. w24.08 10 ¶9

Batho ba bantšhi ba a tseba gore go godiša bana ke mošomo o mogolo. Ge e ba o godiša bana re a go reta ge o leka go ba thuša gore ba be le tumelo. (Doit. 6:​6, 7) Ge bana ba dutše ba gola, ba ka thoma go botšiša dipotšišo tše dintšhi ka dilo tšeo Beibele e di rutago le melao ya motheo yeo e lego gona yeo re phelago ka yona. Mathomong o ka tshwenyega ge bana ba gago ba thoma go botšiša dipotšišo. Ka dinako tše dingwe dipotšišo tšeo di ka dira gore o nagane gore bana ba gago ga ba na tumelo. Eupša ge bana ba dutše ba gola ba ka thoma go botšiša dipotšišo gore ba kgone go tiiša tumelo ya bona. (1 Bakor. 13:11) Ka gona o se ke wa tšhoga ge ba thoma go botšiša dipotšišo. Lebelela dipotšišo tšeo e le selo seo se ka thušago ngwana wa gago gore a kgone go inaganela le go emela ditumelo tša gagwe. w24.12 14 ¶1-2

Bakriste ba Baheberu ba be ba swanetše go ba le tumelo e tiilego gore ba tle ba kgone go phologa masetlapelo ao a bego a tlo wela Judea. (Baheb. 10:​37, 38) Jesu o be a lemošitše balatedi ba gagwe gore ba swanetše go tšhabela dithabeng ge ba bona madira a dikologa Jerusalema. Keletšo ya gagwe e be e tlo thuša Bakriste ka moka bao ba bego ba dula Jerusalema le bao ba bego ba dula Judea. (Luka 21:​20-24) Gantšhi ge mašole a hlasela, batho bao ba dulago magaeng ba be ba tšhabela motseng wa Jerusalema ka ge go be go na le maboto ao a bego a tlo ba šireletša. Go be go bonagala go sa kwagale gore batho ba tšhabele dithabeng, ka gona go be go nyakega tumelo gore motho a dire bjalo. Bakriste ba Baheberu ba swanetše go tshepa bao Jesu a bego a ba diriša go hlahla phuthego. Go ka direga gore bao ba bego ba etelele pele ba ile ba nea ditaelo tšeo di bego di thuša phuthego gore e latele tlhahlo ya Jesu ka nako ya maleba le ka thulaganyo.—Baheb. 13:17. w24.09 10 ¶9-10

Ge Jesu a be a le mo lefaseng, o ile a dira dilo ka moka tšeo Tatagwe a bego a mo kgopetše gore a di dire. (Joh. 17:4) Eupša Jesu o be a sa nagane gore ke yena feela a bego a ka dira seo Tatagwe a bego a se nyaka. O ile a tlwaetša ba bangwe nakong ya bodiredi bja gagwe bja mo lefaseng. O be a tshepa barutiwa ba gagwe. O ile a ba nea boikarabelo bja go bolela ditaba tše dibotse le go hlokomela bahlanka ba Jehofa. Banna bao ba be ba šoma ka thata e bile ba botegela Jesu. Jesu o be a fela a eletša barutiwa ba gagwe, eupša a dira seo ka botho. Ba bangwe ba barutiwa ba gagwe ba be ba sa tshepe gore o ile a bolawa le go tsošwa, ka gona o ile a ba thuša go kwešiša therešo ye le go ba eletša. (Luka 24:​25-27; Joh. 20:27) O ile ba botša le gore ba swanetše go tshwenyega ka go hlokomela bahlanka ba Modimo go e na le go tshwenyega ka dikgwebo tša bona le go dira tšhelete. (Joh. 21:15) O ile a ba gopotša gore ba swanetše go tshwenyega ka seo ba se dirago ge ba hlankela Jehofa go e na le go ipapetša le batho ba bangwe. (Joh. 21:​20-22) O ile a phošolla tsela yeo ba bangwe ba bego ba nagana ka yona ka Mmušo wa Modimo, a ba thuša le gore ba tshwenyege kudu ka go bolela ditaba tše dibotse. —Dit. 1:​6-8. w24.10 15-16 ¶13-14

Go kwa go a šireletša. Go swana le Baisiraele bao ba bego ba le kgauswi le go tsena nageng ya kholofetšo, le rena re kgauswi le go tsena lefaseng le leswa leo Modimo a le tshepišitšego, e bile re tlo bona ge a le fetoša go ba paradeise. (Jes. 35:1; Luka 23:43) Diabolo le matemona a gagwe ba tla be ba se gona. (Kut. 20:​2, 3) Go tla be go se sa na bodumedi bja maaka bjo bo šitišago batho go hlankela Jehofa. (Kut. 17:16) Mebušo yeo e gatelelago batho e tla be e se gona. (Kut. 19:​19, 20) Paradeiseng go tla be go se na marabele. (Ps. 37:​10, 11) Batho lefaseng ka moka ba tla be ba ekwa melao e lokilego ya Jehofa yeo e dirago gore go be le khutšo le botee. Batho ba tla be ba ratana e bile ba tshepana. (Jes. 11:9) Bophelo bo tla be bo kgahliša kudu. Sa go kgahliša le go feta ke gore, ka ge re tla be re ekwa Jehofa, re tlo phela ka mo go sa felego.—Joh. 3:16. w24.11 9 ¶7

Boporofeta bjo bo lego temaneng ya lehono, bo phethagala mo mehleng ya rena. Molaetša wa Mmušo o hwetšagala ka maleme a fetago a 1 000, e bile wepesaete ya jw.org e dira gore batho bantšhi lefaseng ba kgone go hwetša ditaba tšeo. Jesu o ile a botša balatedi ba gagwe gore ba ka se “fetše tikologo ya metse,” goba go bolela le motho yo mongwe le mongwe pele a etla go ahlola batho. (Mat. 10:23; 25:​31-33) Mantšu ao a Jesu a tlo phethagala le mehleng ya rena. Lehono batho ba bantšhi ga ba kgone go hwetša ditaba tše dibotse ka ge modiro wa rena o thibetšwe dinageng tša gabo bona. Go oketša moo, go belegwa bana bantšhi letšatši le lengwe le lengwe. Re dira sohle seo re ka se kgonago gore re botše “batho ba ditšhaba tšohle, meloko yohle le maleme ohle” ditaba tše dibotse. (Kut. 14:6) Tabakgolo ke gore re ka se kgone go botša batho ka moka ditaba tše dibotse pele bofelo bo fihla. w24.05 10 ¶6-7

Jesu o be a homotša batho ba bangwe le go ba kgothatša. O be a sa omanye balatedi ba gagwe. (Luka 8:​47, 48) Ruri o beetše banna ba Bakriste mohlala o mobotse kudu! Jesu o boditše banna gore ba swanetše go botegela basadi ba bona. O boletše mantšu ao a boletšwego ke Jehofa a gore monna o swanetše go “kgomarela mosadi wa gagwe.” (Mat. 19:​4-6) Lediri la Segerika leo le dirišitšwego temaneng ye e lego “go kgomarela” le ka hlaloswa e le “sekgomaretši.” Ka gona, lerato la monna le mosadi le swanetše go tia bjalo ka selo seo se kgomareditšwego. Gantšhi dilo tšeo di kgomareditšwego di a senyega ge di ka kgomarollwa. Ka gona, ge monna le mosadi ba ka kgaogana, ba tlo kwa bohloko kudu. Monna yo a ratago mosadi wa gagwe a ka se tsoge a lebeletše diswantšho le dibidio tša batho bao ba sa aparago. A ka se lebele “dilo tšeo di se nago mohola.” (Ps. 119:37) Ge e le gabotse a ka se tsoge a kganyogile mosadi yo mongwe ntle le wa gagwe.—Jobo 31:1. w25.01 10 ¶12-13

Batho ga ba lebalele ka tsela ya go swana. Tsela yeo Jehofa a lebalelago ka yona, ga e swane le yeo rena re lebalelago ka yona. Ga go na motho yo a ka lebalelago go swana le Jehofa. Ge mopsalme a bolela ka Jehofa o itše: “Ka gobane o tloga o lebalela batho dibe tša bona, ke ka baka leo batho ba go hlomphago kudu.” (Ps. 130:4) Ge Jehofa a re lebalela, o re lebalela ka nnete. Ke yena a re rutago gore re swanetše go lebalelana bjang. Ka mangwalong a mangwe a Seheberu, ge bangwadi ba hlalosa kamoo Jehofa a re lebalelago ka gona, ba dirišitše mantšu ao ba sa kago ba a diriša ge ba hlalosa tsela yeo rena re lebalelanago ka yona. Ge Jehofa a go lebalela o phumola sebe sa gago, ebile le kgona go boela le be bagwera gape. Re leboga ge Jehofa a sa re felele pelo ebile a dula a re lebalela ka mo go feletšego. w25.02 8 ¶1-3

Go atlega ga rena tšhemong ga se gwa ithekga ka gore batho ba bangwe ba arabela bjang. Ka baka la’ng? Ka gobane re dirile seo Jehofa le Jesu ba nyakago re se dira, re boditše batho ba bangwe ditaba tše dibotse. Le ge re sa hwetše batho bao re ba botšago ditaba tše dibotse goba molaetša wa rena o ganetšwa, re ka thaba ka gobane re a tseba gore re thabiša Tatago rena wa legodimong. (Die. 27:11) Re ka thabišwa gape ke ge mogoeledi yo mongwe a hweditše motho yo a thabelago tšhemong. Morokami o swantšha modiro wa rena le go tsoma ngwana yo a timetšego. Batho ba bantšhi ba tšea karolo ya go tsoma ngwana yoo, ba akaretša mafelo a mantšhi gore ba mo hwetše. Ge ngwana yoo a hwetšwa, batho ka moka ba a thaba go sa šetšwe gore o hweditše ke mang. Ka mo go swanago, re šoma re le sehlopha mošomong wo wa go dira batho barutiwa. Ka moka ga rena re a hlokana gore re akaretše tšhemo ya rena e bile ka moka ga rena re a thaba ge motho yo mongwe a thoma go tla dibokeng. w24.04 18 ¶13-14

Re fela pelo ya go bona gore bokamoso bo re swaretše eng! Ka thekgo ya Jehofa, re fela pelo ya go bona batho ba bantšhi ba amogela therešo pele masetlapelo a magolo a thoma. E bile re thabišwa kudu ke gore le nakong ya masetlapelo a magolo go tlo ba le batho bao ba tlogelago Sathane gomme ba thoma go rapela Modimo. Re na le mošomo o mogolo wo re swanetšego go o dira. Mošomo woo o bohlokwa kudu, e bile re ka se tsoge re o dirile gape. Ke wa go bolela ditaba tše dibotse lefaseng ka moka. Re se ke ra lebala gore re swanetše go dula re gopotša batho ka seo se lego kgauswi le go direga. Batho ba swanetše go tseba gore lefase le le lebe le kgauswi le go fedišwa. Go rata ditaba tše dibotse, go rata batho le go rata Jehofa Modimo le leina la gagwe, go tlo dira gore re tšwele pele re bolela ditaba tše dibotse ka mafolofolo le go se dikadike go fihlela Jehofa a re: “Go lekane!” w24.05 19 ¶14-16

Bošegong bja ge Jesu a ka bolawa, o ile a ruta Petro le baapostola ba bangwe bohlokwa bja go ba le boikokobetšo. Barutiwa ba gagwe ba ile ba makatšwa ke go bona a dira mošomo woo gantšhi o bego o dirwa ke bahlanka. Jesu o ile a hlobola diaparo tša gagwe tša ka ntle, a itata ka lešela mathekeng gomme a thoma go ba hlapiša dinao. (Joh. 13:​4, 5) O ile a hlapiša dinao tša barutiwa ba gagwe ka moka ebile go ka ba go mo tšere nako ka ge e be e le ba 12. O ile a hlapiša le Judase yo a bego a tlo mo eka. Jesu o ile a bontšha boikokobetšo ka go dira mošomo woo. O ile a re go bona: “Na le kwešiša seo ke se dirilego go lena? Le mpitša ‘Morutiši,’ le ‘Morena,’ gomme le a rereša gobane ke yena. Ka gona ge e ba nna gaešita le ge ke le Morena le Morutiši ke le hlapišitše dinao, le lena le swanetše go hlapišana dinao.”—Joh. 13:​12-14. w25.03 10 ¶9-11

Batho bao re phelago gare ga bona ba dira gore go be thata go gwerana le Jehofa. Ba bantšhi ga ba dumele gore Modimo o gona. Gantšhi bao ba sa mo kwego, go bonala dilo di ba sepelela gabotse. Ge re bona seo se direga, re ka no se sa botegela Jehofa. Le ge re tseba gore Modimo o gona, re ka thoma go nagana gore a ka se sa re hlokomela. Mongwadi wa Psalme 73 le yena o ile a ikwa ka tsela yeo. O be a bona batho bao a phelago gare ga bona ba sa kwe melao ya Modimo eupša dilo di ba sepelela gabotse. Ka baka la seo, o ile a thoma go ipotšiša ge eba go sa le bohlokwa gore a hlankele Modimo. (Ps. 73:​11-13) Ke eng seo se thušitšego mopsalme gore a se sa ikwa ka tsela yeo? O ile a naganišiša ka seo se tlago go diragalela batho bao ba se nago taba le Jehofa. (Ps. 73:​18, 19, 27) O ile a naganišiša le ka mehola yeo e bago gona ka baka la go hlankela Jehofa. Le rena re ka naganišiša ka tsela yeo Jehofa a re šegofaditšego ka yona. w24.06 25 ¶16-17

Ba bangwe mehleng ya Beibele ba be ba sa sware bana babo bona bao ba se nago sa bona gabotse ka go ba adima tšhelete gomme ba e nyaka e na le tswalo. Baahlodi ba bangwe ba be ba amogela letsogo le kobong ke moka ba se ahlole ba bangwe ka toka. Dilo tšeo di šišimiša Jehofa. (Hesek. 22:12) Go bohlokwa gore re fele re hlahloba tsela yeo re lebelelago tšhelete ka yona. Ipotšiše gore: ‘Na ke dula ke nagana ka tšhelete le ka dilo tšeo e ka di rekago? Ge ke kgopela motho yo a itšego tšhelete, na ke tšea nako go mo patela le go phetha ka gore ga a nape a e hloka? Na ge ke na le tšhelete ke ipona ke le bohlokwa e bile ke a timana? Na ke bona bana bešo le dikgaetšedi ba rata dilo tše di bonagalago ge ba na le tšhelete? Na ke leka go gwerana le bahumi gomme ka phaela badiidi ka thoko?’ Re ka dula re le bagwera ba Jehofa ge e ba re sa rate tšhelete. Seo se tlo dira gore Jehofa e dule e le mogwera wa rena. w24.06 12-13 ¶17-18

Re swanetše go lwela go nagana ka dilo tše dibotse gore re se ke ra wela molekong. Ge eba re ka ithuta go rata se sebotse ra hloya se sebe, re tlo kgona go lwela go dira se se lokilego. (Amose 5:15) Ge eba re dula re nagana ka dilo tše dibotse, re tlo kgona go lebeletšana le diteko tšeo re ka ikhwetšago re le ka gare ga tšona. Re ka thušwa ke go dula re dira dilo tšeo di re batametšago kgauswi le Jehofa. Ge re le dibokeng goba tšhemong, re tlo kgona go kgahliša Jehofa. (Mat. 28:​19, 20; Baheb. 10:​24, 25) Ge eba re bala le go ithuta Lentšu la Modimo e bile re naganišiša ka lona, re tlo kgona go rata se se lokilego gomme ra hloya se sebe. (Josh. 1:8; Ps. 1:​2, 3; 119:97) Gopola gore Jesu o ile a botša barutiwa ba gagwe gore, “le rapele le sa kgaotše, gore le se tsene molekong.” (Mat. 26:41) Jehofa o tlo re thuša gore re kgone go dula re mo kgahliša.—Jak. 4:8. w24.07 17-18 ¶14-16

Batho bao ba tlwaetšago ba bangwe ba leka ka thata go ekiša kamoo Jehofa a tlwaetšago ba bangwe ka gona. Jehofa o thabela go nea batho bohlale bja gagwe. Le rena re nyaka go swana le Jehofa, re thabele go tlwaetša batho ba bangwe. Ga se ra swanela go tšhaba go tlwaetša ba bangwe re nagana gore ba tlo re tšeela legato. Ba bangwe ba re: ‘Ka ge ba se ba tlwaetšwa ke motho le bona ba ka se tlwaetše ba bangwe.’ Bahlanka ba Jehofa ga se ba swanela go nagana bjalo. Go e na le moo, re thabela go tlwaetša ba bangwe le go dira sohle seo re ka se kgonago go ba thuša. (1 Bathes. 2:8) Re tshepa gore mafelelong le bona ba tlo “swanelegela gabotse go ruta ba bangwe.” (2 Tim. 2:​1, 2) Ge e ba re ikemišeditše go thušana re tlo thaba, e bile le bao re ba tlwaetšago le bona ba tlo thaba. w24.09 29 ¶12-13

O se ke wa nyama ge o bona gore go na le dilo tše dingwe tšeo o sa di kgonego. Go na le dilo tše dingwe tšeo o ka thušago ka tšona ka phuthegong. Kgopela Jehofa a go thuše go kwešiša mantšu ao a lego go 1 Bakorinthe 12:​12-30. Mantšu ao Paulo a a boletšego, a re bontšha gore mohlanka yo mongwe le yo mongwe wa Jehofa o na le seo a ka se dirago go thuša ka phuthegong. Dira sohle seo o ka se kgonago go hlankela Jehofa le go thuša bana beno le dikgaetšedi. Kgodišega gore bagolo ba tseba dilo tšeo o di kgonago le gore ba tlo go fa dikabelo tšeo ba tsebago gore o tlo kgona go di phetha. (Baroma 12:​4-8) Bakriste ka moka ba swanetšego go ba le tšona. Mokriste yo mongwe le yo mongwe o swanetše go ba le segwera se se tiilego le Jehofa, a thabele go thuša ba bangwe le go phela ka tsela yeo e thabišago Jehofa. w24.11 17 ¶12-13

Hanna o ile a kopana le mathata a mantšhi kudu ao a ilego a dira gore a lle. Bothata bjo bongwe bjo ao a bego a na le bjona ke gore o be a le lenyalong la segadikane gomme mosadi wa monna wa gagwe yo mongwe e lego Penina, o be a mo hloile. Hanna o be a sa kgone go ba le bana, mola Penina a be a na le bana ba mmalwa. (1 Sam. 1:​1, 2) Penina o be a dula a kwera Hanna ka ge a be a palelwa ke go ba le bana. Hanna o be a nyamile, “a lla ebile a sa je,” le gona “o be a kwele bohloko moyeng.” (1 Sam. 1:​6, 7, 10) Hanna o ile a homotšwa ke’ng? O ile a homotšwa ke go ya tabarenakeleng. Ge a be a le moo, o ile a lopa Jehofa ka gore: ‘Ela hloko tlaišego ya lekgoba la gago la mosadi gomme o nkgopole.’ (1 Sam. 1:11) Jehofa o ile a bona gore o be a tshwenyegile, a lla, ke moka ka morago a mo thuša gore a kgone go ima.—1 Sam. 1:​19, 20; 2:21. w24.12 21 ¶5-7

Topollo e re ruta gore Jesu o rata batho, kudukudu batho bao ba mo latelago. (Joh. 13:1) Ka mohlala, Jesu o be a tseba gore ge a le mo lefaseng o tlo kopana le mathata, kudukudu ge a tlo bolawa ga sehlogo. Eupša o ile a dira dilo tšeo tše thata ka moka, e sego ka gobane Jehofa a mo romile, eupša ka gobane a rata batho. O ile a ya tšhemong, a ruta batho a ba a hlankela ba bangwe. Le bošegong bja pele ga ge a ka bolawa, o ile a ipha nako ya go hlapiša barutiwa ba gagwe maoto, a ba botša mantšu a mafelelo a kgothatšago le go ba nea ditaelo tšeo ba bego ba swanetše go di latela. (Joh. 13:​12-15) Nakong ya ge Jesu a be a le koteng ya tlhokofatšo o ile a ipha nako ya go nea sekebekwa seo se bego se kokotetšwe kgauswi le yena kholofelo le go kgonthišetša gore mmagwe o tlo šala a hlokometšwe. (Luka 23:​42, 43; Joh. 19:​26, 27) Jesu ga se a no bontšha batho gore o a ba rata ka go ba hwela, eupša o ile a ba swara gabotse le go ba bontšha botho. w25.01 23 ¶11

Beibele e diriša mohlala o mongwe go re thuša go kwešiša gore ge Jehofa a re lebalela re a imologa. Ka ge re le batho ba go dira diphošo, re “makgoba a sebe.” Re leboga Jehofa ka ge a ile a kgona go re “lokolla sebeng” ka go re lebalela. (Baroma 6:​17, 18; Kut. 1:5) Go tseba gore Jehofa o re lebaletše go dira gore re thabe go swana le lekgoba leo le lokolotšwego. Jehofa o re fodišitše a diriša sehlabelo sa Jesu Kriste. (1 Pet. 2:24) Ge re dira sebe re senya segwera sa rena le Jehofa, eupša ka baka la topollo o kgona go re lebalela gomme ra boela ra ba bagwera ba gagwe. Ge motho a fodišitšwe o a thaba, le rena re a thaba ge Jehofa a re lebalela. w25.02 11 ¶16; 13 ¶17

Ge Jesu a be a bolela ka papišo ya ditalente, o boletše ka makgoba a mabedi ao a bego a botega le lekgoba le letee leo le bego le sa botege. (Mat. 25:​14-30) Makgoba a mabedi ao a bego a botega, a swantšhetša Bakriste ba ba tloditšwego ba botegago. Mong wa bona e lego Jesu o ba mema gore ba thabe le yena. Ba hwetša moputso wa bona wa go phela legodimong e lego tsogo ya pele. (Mat. 25:​21, 23; Kut. 20:5b) Mohlala wa lekgoba la sebodu o lemoša Bakriste ba tloditšwego. Bjang? Ba swanetše go šoma ka thata. Papišong ya dikgarebe le papišong ya ditalente, Jesu o be a sa re gore Bakriste ba tloditšwego le bona ba tlo tšwafa, o be a ba lemoša gore go tlo direga eng ge ba ka se sa ba le mafolofolo. Ba tla be ba paletšwe ke go dira sohle se ba se kgonago gore ba “kgonthišetše go bitšwa le go kgethwa ga [bona],” gomme ba ka se sa ya legodimong. w24.09 22 ¶10; 23 ¶12-13

Ka moka ga rena re nyaka go kgona go itlhokomela le go hlokomela malapa a rena. (Mmo. 7:12; 1 Tim. 5:8) Re a tseba gore pele motho a amogela mošomo, o tlo nagana ka tšhelete yeo a tlago go e gola eupša ge eba re nagana ka seo feela, go ra gore ga re sepele ka tumelo. Ge eba re sepela ka tumelo, re tlo naganišiša kamoo mošomo wo re o kgethago o ka kgomago segwera sa rena le Jehofa ka gona. Re ka ipotšiša gore: ‘Na mošomo woo o tlo nyaka gore ke dire dilo tšeo Jehofa a di hloilego?’ (Die. 6:​16-19) ‘Na o tlo ntšhitiša go hlankela Jehofa gabotse le go dira gore ke fetše nako e ntšhi ke se na lapa la ka?’ Ge eba karabo ya gago go dipotšišo tše e le ee, gona go ka ba kaone gore o se ke wa amogela mošomo woo le ge go le thata go hwetša mošomo. Ka ge re sepela ka tumelo, re dira diphetho tšeo di bontšhago gore re tshepa gore Jehofa o tlo re hlokomela.—Mat. 6:33; Baheb. 13:5. w25.03 21 ¶5-6

Re swanetše go dula re leka go lebelela bana babo rena le dikgaetšedi ka tsela yeo Jehofa a ba lebelelago ka yona. Re dira seo ka go lebelela dilo tše dibotse tšeo ba di dirago e sego mafokodi a bona, ao e se kgale a tlago go fela. Re ka rarolla mathata ao a bago gona gare ga rena ka go bontšhana lerato. Ge re dira bjalo re tlo gogela batho bao ba nyakago go swarwa ka tsela e swanago, paradeiseng ya moya. Eka re ka dula re leboga kudu paradeise ye Jehofa a re diretšego yona. Motho yo mongwe le yo mongwe yo a nyakago go lapologa, go kgotsofala, go iša maswafo fase le go šireletšega, o swanetše go tla paradeiseng ya moya gomme a se ke a tloga go yona! Eupša hlokomela gore Sathane o dula a leka ka thata go re tloša paradeiseng ye. (1 Pet. 5:8; Kut. 12:9) Ga se ra swanela go mo dumelela a atlega. A re duleng re šoma ka thata gore re šireletše paradeise ye ya rena ya moya e botse, yeo e nago le khutšo le e hlwekilego. w24.04 24-25 ¶18-19

Batswadi, le ka thuša bana ba lena gore ba rate go hlankela Jehofa. Rutang bana ba lena go bona gore go ithuta Beibele, go ba gona dibokeng le go ya tšhemong ke dilo tšeo di swanetšego go tla pele maphelong a bahlanka ba Jehofa. Ge le ka se dire bjalo, bana ba lena ba tlo no lebelela go ba Hlatse ya Jehofa e le “kereke ya ka gae.” Gomme seo se ka dira gore go hlankela Jehofa go se ke gwa tla pele maphelong a bona goba ba tlogele go mo hlankela ka mo go feletšego. Na motho yo a tlogelago go hlankela Jehofa ke ya pala ya leswa? Aowa, ka gobane a ka itshola gomme a boela a hlankela Jehofa ka tsela yeo a e amogelago. E le gore a kgone o dira bjalo, o swanetše go amogela thušo yeo bagolo ba mo neago yona. (Jak. 5:14) Ge a ka dira bjalo a ka se itshole ka gobane Jehofa o tlo mo amogela. w24.07 24-25 ¶18-19

Le ka dira’ng gore le dule le hlwekile? Ge lerato la lena le dutše le gola, ke ga tlhago gore le thome go kganyogana. Ke’ng seo se ka le thušago gore le dule le itshwere gabotse? Phemang go bolela ka dilo tšeo di sa hlwekago, go ba noši le go nwa kudu. (Baef. 5:3) Dilo tšeo di ka dira gore go be bonolo gore le ikhwetše le wetše sebeng se segolo. Se sengwe sa dilo tšeo di ka le thušago ke go dula le boledišana ka dilo tšeo le ka di dirago gore le dule le hlwekile. (Die. 22:3) O ka bontšha motho o o ratanago le yena gore o a mo rata ka tsela yeo e amogelegago. Ge eba maikwelo a gago a thobalano a thoma go ba a matla, go ka ba boima go dira phetho e bohlale. (Sefela 1:2; 2:6) Ka dinako tše dingwe go bontšha motho gore o a mo rata, go ka dira gore le feleletše le dirile sebe. (Die. 6:27) Ge le sa thoma go ratana, boledišanang ka dilo tšeo le ka di dirago gore le dule le hlwekile le go kgahliša Jehofa.—1 Bathes. 4:​3-7. w24.05 29 ¶10-11

Re nyaka gore batho ba bangwe ba kgone go ithekga ka rena ge ba welwa ke mathata. (Die. 17:17) Re ka dira’ng gore re tsebege ka go botega? Re ka dira gore re bontšhe dika tša Jehofa ka mehla, e lego dika tše bjalo ka go dira dilo tšeo o tshepišitšego go di dira le go swara nako. Bagolo bao ba botegago ba hola phuthego. Bjang? Bagoeledi ba thaba kudu ge ba kgona go ikgokaganya le mogolo, kudukudu yo e lego molebeledi wa sehlopha sa bona sa tšhemo. Le gona bagoeledi ba ikwa ba hlokometšwe ge bagolo ba ikemišetša go ba thuša. E bile bagoeledi ba tshepa bagolo ge ba bona gore ba ithekga ka tlhahlo ya mokgatlo go e na le go ithekga ka dikgopolo tša bona. Bana babo rena le dikgaetšedi ba tshepa bagolo bao ba kgonago go swara sephiri le go dira dilo tšeo ba tshepišago go di dira. w24.06 30 ¶14-15

Mehleng ye re phelago go yona re ka se letele gore Jehofa a tloše mathata ao re nago le ona, eupša re kgodišegile gore o tlo re thuša go a kgotlelela. (Ps. 41:3) Jehofa o re nea matla, bohlale le khutšo ya monagano gore re kgotlelele mathata a diriša moya o mokgethwa. (Die. 18:14; Bafil. 4:13) O re nea le kholofelo gore ka letšatši le lengwe malwetši ao a lego gona a tlo fela. (Jes. 33:24) Ka Beibeleng go na le mantšu ao a ka re thobago ge re ekwa bohloko. (Baroma 15:4) Ge kgaetšedi yo mongwe wa kua bodikela bja Afrika a be a botšwa gore o na le bolwetši bja kankere, o be a dulela go lla. O bolela gore: “Lengwalo leo le ilego la nthuša gantšhi ke la Jesaya 26:3. . . . temana yeo e ile ya nthuša go bona gore Jehofa o dula a re fa khutšo ya monagano yeo e re thušago gore re kgone go kgotlelela mathata ao re nago le ona.” Na le wena go na le lengwalo letee leo le kgonago go go thuša ge o na le mathata ao ka dinako tše dingwe go bonagalago a ka se fele? w24.12 24 ¶17-18

Bagolo ba ekiša tate yoo ge ba thuša bao ba tlošitšwego ka phuthegong. Ba nyaka go thuša batho bao ba tlogetšego Jehofa gore ba boele go yena. (Luka 15:​22-24, 32) Legodimong go ba le lethabo le legolo ge motho a boela ka phuthegong. Le rena mo lefaseng re thaba kudu. (Luka 15:7) Jehofa o nyaka gore batho bao ba sa itsholego ba tlošwe ka phuthegong. Eupša ga a ba lahle, o nyaka gore ba boele go yena. Lengwalo la Hosea 14:4 leo le rego: “Ke tla ba alafa gomme ba thoma go botega. Ke tla ba rata ka pelo ya ka ka moka ka gobane ga ke sa ba galefetše,” le bontšha kamoo Jehofa a ikwago ka gona ka batho bao ba itsholago. Ka ge lengwalo le le bontšha bagolo gore Jehofa o ikwa bjang ka batho ba gagwe, bagolo ba swanetše go dula ba ntšhitše mahlong dinameng go bona ge e ba motho a thoma go bontšha gore o a itshola. Le gona lengwalo le, le swanetše go kgothatša batho bao ba tlogetšego Jehofa gore ba bone gore o a ba rata e bile o nyaka gore ba boele go yena kapelapela. w24.08 28 ¶8-9

Ka dinako tše dingwe, batho ba bangwe ba ka no se leboge dilo tšeo re ba diretšego tšona. Ba ka no se leboge nako yeo re e feditšego re ba thuša goba tšhelete yeo re e dirišitšego go ba thuša. Ge e ba se se ka re diragalela, re ka thušwa ke’ng gore re se ke ra nyama? Re ka thušwa ke go gopola gore ga re thabišwe ke gore batho ba bangwe ba a re leboga ge re ba thušitše. (Dit. 20:35), Re ka thabela go nea batho ba bangwe le ge ba sa re leboge. Bjang? Dula o ekiša Jehofa. Jehofa o dula a re nea dilo tše dibotse le ge re sa mo leboge. (Mat. 5:​43-48) Jehofa o re botša gore adimang “le sa holofele go boelwa ke selo,” gobane “moputso wa lena e tla ba o mogolo.” (Luka 6:35) “Selo” seo go bolelwago ka sona mo temaneng ye se akaretša le go lebogwa ke ba bangwe. O se ke wa nyama ge batho ba bangwe ba sa go leboge. Dula o gopola gore Jehofa ke yena a tlago go go putsa ka ge o rata go nea ba bangwe.—Die. 19:17; 2 Bakor. 9:7. w24.09 29 ¶14-16