Re rapelela gore batho ba bantšhi ba amogele ditaba tše dibotse gomme ba tle borapeding ba therešo go sa na le nako. Eupša go tlo direga’ng ka bao ba sa theetšego molaetša gona bjale? E ka no ba thato ya Jehofa gore a phološe batho bao ba fetošago maphelo a bona ge ba bona Babilona o Mogolo a fedišwa. Ge e ba go le bjalo, go bohlokwa kudu gore re dule re lemoša batho. Dilo tšeo re ba botšago tšona gona bjale ba ka tla ba di gopola nakong e tlago. (Bapiša le Hesekiele 33:33.) Mohlomongwe ba ka nagana ka seo re ilego ra ba botša sona gomme ba kgetha go hlankela Jehofa pele selemo e e ba ngwagola. Go swana le moleta kgolego wa kua Filipi yo a ilego a fetoga ka morago ga “tšhišinyego e kgolo ya lefase,” mohlomongwe ba bangwe bao ba sa arabelego gabotse ba ka fetoga ge ba bona Babilona o Mogolo a fedišwa.—Dit. 16:​25-34. w24.05 17 ¶9-10

Re ithuta thuto ya bohlokwa go seo moapostola Paulo a se ngwaletšego Bakriste ba Baheberu. Ba bangwe ga se ba ka ba tšwela pele go gola moyeng, ge e le gabotse ba ‘boetše ba nyaka le maswi e sego dijo [tša moya] tše di tiilego.’ (Baheb. 5:12) Ba be ba sa nyake go ithuta le go amogela dilo tše diswa tšeo Jehofa a bego a ba ruta tšona a diriša phuthego. (Die. 4:18) Ka mohlala, Bajuda ba bantšhi ba be ba sa dumela go molao wa Moshe le ge mengwaga e 30 pele ga moo, molao wo o fedišitšwe ke sehlabelo sa Jesu. (Tito 1:10) Yo mongwe le yo mongwe yo a ilego a bala lengwalo leo Paulo a le ngwaletšego Baheberu o tla dumela gore puku ye e na le dijo tša moya tše di tiilego. Lengwalo le le ile la thuša Bakriste bao go bona gore tsela ya go hlankela Jehofa yeo a e hlomilego ka Jesu Kriste e be e le yona e kaone e bile e be e ba thuša go lebeletšana le kgateletšo yeo Bajuda ba bego ba ka ba bea ka tlase ga yona.—Baheb. 10:​19-23. w24.04 6 ¶15

Batho ba dibilione ba ile a ba hwa ka morago ga gore Adama le Efa ba thekge Sathane ge a be a hlanogela Jehofa Modimo. Na go tlo direga eng ka batho ba ka moka? Palo e lekanyeditšwego ya balatedi ba Kriste ba botegago e lego ba 144 000, e tlo tsošetšwa bophelong bjo bo sa felego legodimong. (Kut. 14:1) Batho ba bantšhi bao ba ratago Jehofa e tlo ba karolo ya “tsogo ya. . . ba lokilego,” gomme ge ba ka dula ba botega nakong ya Pušo ya Kriste ya Mengwaga e Sekete le nakong ya teko ya mafelelo, ba tlo phela ka mo go sa felego mo lefaseng. (Dan. 12:13; Baheb. 12:1) E bile ka yona nako yeo, “ba sa lokago” e lego bao ba sa kago ba hlankela Jehofa goba bao ba bego ‘ba tlwaetše go dira dilo tše mpe,’ ba tlo hwetša sebaka sa gore ba fetoše maphelo a bona gomme ba hlankele Jehofa Modimo. (Joh. 5:29; Luka 23:​42, 43) Le ga gole bjalo, go na le batho bao ba bego ba tlwaetše go dira dilo tše kgopo bao Jehofa a ka se ba tsošego ka gobane ba be ba lwantšhana le yena le merero ya gagwe.—Luka 12:​4, 5. w24.05 2 ¶3; 5 ¶15; 6 ¶17

Motho yo a nyakago go amogelwa ke Jehofa, o swanetše go ikemišetša go dula a “bolela nnete ka pelong ya gagwe.” (Ps. 15:2) Mo ga go bolelwe ka go no phema go bolela maaka. Jehofa o nyaka gore re dule re botega dilong ka moka. (Baheb. 13:18) Se se bohlokwa ka gobane “Jehofa o hloile motho wa go radia ba bangwe, eupša ke mogwera yo mogolo wa batho bao ba lokilego.” (Die. 3:32) Motho yo a ‘bolelago nnete ka pelong ya gagwe’ ga a itire eka o kwa Jehofa ge a le gare ga batho eupša a roba melao ya gagwe ge a le noši. Jehofa o nyaka gore re se ke ra ba baikgakanyi. Motho yo a ikgakanyago a ka bona eka melao e mengwe ya motheo ya Jehofa ga se e bohlale. (Jak. 1:​5-8) A ka no se kwe Jehofa go dilo tšeo a bonago eka ga di bohlokwa. Ge a ka bona a sa wele mathateng ka baka la go se kwe melao ya Jehofa, a ka no se kwe le go feta gomme borapedi bja gagwe ya ba bja boikaketši. (Mmo. 8:11) Eupša rena re nyaka go dula re botega dilong tšohle. w24.06 10 ¶7-8

Bahlanka ba Jehofa ba rata therešo yeo ba ithutago yona ka Beibeleng. Ge re dutše re bala Beibele tumelo ya rena e a tia. (Baroma 10:17) Re dumela gore Jehofa o dirile phuthego ya Bokriste gore e be “kokwane le sethekgo sa therešo.” (1 Tim. 3:15) Sathane o nyaka gore re se sa tshepa Beibele goba go tshepa tlhahlo yeo re e hwetšago ka mokgatlong wa Modimo. (Baef. 4:14) E se kgale Sathane o tlo diriša maaka a gagwe go timetša batho gore ba se ke ba tshepa Modimo. (Kut. 16:​13, 14) Re swanetše go letela gore Sathane a galefe le go feta. (Kut. 12:9) Ke ka baka leo re swanetšego go šoma ka thata gore re tsebe phapano magareng ga nnete le maaka ao Sathane a a bolelago. Go bohlokwa gore re latele nnete yeo. (Baroma 6:17; 1 Pet. 1:22) Seo se tlo re thuša go phologa masetlapelo a magolo. w24.07 8 ¶1-3

Ge Jehofa a be a dira gore Baisiraele e be setšhaba, o ile a ba nea melao yeo ba ilego ba dumela go e latela. Ge ba be ba ka latela melao yeo, Jehofa o be a tlo ba šireletša le go ba šegofatša. Eupša ge Baisiraele ba be ba ka kgetha go se latele melao ya Modimo goba ba kgetha go rapela medimo e mengwe, Jehofa o be a ka se sa ba šegofatša e bile dilo di be di ka se ba sepelele gabotse. Seo se be se sa bolele gore Jehofa o be a ba hlapile diatla. Ba be ba ka kgona go ‘boela go Jehofa Modimo wa bona gomme ba dira dilo ka moka tšeo a ba laetšego tšona.’ (Doit. 30:​1-3, 17-20) Ka mantšu a mangwe, ba be ba ka itshola. Ge ba be ba ka dira bjalo, Jehofa o be a tlo ba amogela gape le go ba šegofatša. Baisiraele ba be ba tshela melao ya Jehofa gantšhi. Se se ile sa dira gore dilo di se ke tša ba sepelela gabotse. Eupša Jehofa o ile a dula a thuša batho ba gagwe gore ba mo hlankele gape. O ile a romela baporofeta gantšhi le gantšhi gore ba thuše batho ba gagwe gore ba itshole le go boela go yena.—2 Dikg. 17:​13, 14. w24.08 9 ¶4-5

Bakriste ba Baheberu bao ba bego ba dula Jerusalema le Judea ba ile ba ba le mathata ka morago ga lehu la Jesu. Ka morago ga gore go be le phuthego ya Bokriste, bana babo rena ba ile ba tlaišwa kudu. Mengwaga e ka bago e 20 ka morago, balatedi ba Jesu ba ile ba ba le mathata a ditšhelete, mohlomongwe ka baka la tlala le bodiidi tšeo di ilego tša ba gona nageng yeo. (Dit. 11:​27-30) Ka bo 61 C.E., Bakriste ba be ba sa tlaišwe kudu, eupša nakong e tlago ba be ba tlo tlaišwa le go feta. Ka nako yeo moapostola Paulo o ile a ba ngwalela lengwalo leo le ba kgothatšago, leo ba bego ba tloga ba le hloka. Lengwalo leo Paulo a le ngwaletšego Baheberu le be le le nakong ka gobane ba be ba tlo tlaišwa e se kgale. Paulo o ile a nea Bakriste keletšo yeo e bego e tlo ba thuša gore ba kgotlelele masetlapelo ao a bego a tlo ba wela e se kgale.—w24.09 8 ¶1-2

Ge dilo di sa re sepelele gabotse, bana babo rena le dikgaetšedi ba re bontšha kamoo Jehofa a re ratago ka gona. Ba ka re kgothatša ka go fetša nako le rena goba ba re theetša ge re ba botša ka dilo tšeo di re tshwenyago. Ba ka re kgothatša ka temana ya Beibele goba ba rapela le rena. (Baroma 15:4) Ka dinako tše dingwe, ngwanabo rena goba kgaetšedi a ka re gopotša kamoo Jehofa a lebelelago dilo ka gona gomme seo sa re thuša gore re kgotlelele. Bakriste gotee le rena ba ka re thuša ka dilo tšeo re di hlokago, go swana le go re nea dijo. Ka dinako tše dingwe re ka swanelwa ke go kgopela batho ba bangwe thušo gore ba kgone go re thekga. (Die. 17:17) Ka dinako tše dingwe ba ka no se tsebe gore re ikwa bjang goba ke eng seo re se hlokago. (Die. 14:10) O se ke wa tšhaba go botša ba bangwe kamoo o ikwago ka gona. Ba botše gore ke eng seo se ka go thušago. O ka boledišana le mogolo o tee goba ba babedi bao o ikwago o lokologa ge o bolela le bona. Bokgaetšedi ba bangwe ba kgothatšwa ke go bolela le bokgaetšedi bao ba godilego. w24.10 10 ¶15-16

Batho ba bantšhi ba leka go ja dijo tša phepo le go itšhidulla gore ba dule ba phetše gabotse. Eupša ba a tseba gore le ge ba dira dilo tše, ba tlo tšofala le go hlokofala. Batho ba bangwe ba nagana gore ga go kgonege go phela go ya go ile mola ba bangwe ba sa nyake go phela go ya go ile ka gobane bophelo bo tletše ka mathata. Eupša go lengwalo la Johane 3:16 le 5:​24, Jesu o boletše gore go a kgonega gore motho a be le “bophelo bjo bo sa felego.” Ka letšatši le lengwe, Jesu o ile a fepa lešaba le lentšhi ka mohlolo a diriša senkgwa le hlapi. Mohlolo woo Jesu a o dirilego o be o kgahliša, eupša seo Jesu a ilego a se bolela ka moragonyana se be se kgahliša le go feta. Nakong ya ge a be a eya Kaperenaume yeo e lego kgauswi le lebopo la Galilea, o ile a botša lešaba leo le bego le mo šetše morago gore o tlo tsoša batho bao ba hlokofetšego gomme ba phela ka mo go sa felego. (Joh. 6:​39, 40) Mantšu a Jesu a bontšha gore batho ba bantšhi bao ba hlokofetšego ba tlo tsošwa gomme wena le batho bao o ba ratago la phela ka mo go sa felego. w24.12 8 ¶1-2

Pego ya mokgatlo wa World Health Organization e bontšha gore banna ba bantšhi ba tlaiša basadi ba bona ka go ba betha, go ba hlaba ka mantšu le ka go ba kweša bohloko maikwelong. Banna ba bangwe ba swara basadi ba bona gabotse ge ba le gare ga batho, eupša ge ba le gae ba ba tlaiša. Ke eng seo se ka dirago gore banna ba bangwe ba tlaiše basadi ba bona? Ba ka ba ba godišitšwe lapeng leo tatago bona a bego a tlaiša mmago bona gomme ba nagana gore ga se phošo go dira bjalo. Ba bangwe ba tlaiša basadi ka baka la setšo. Ba rutilwe gore monna wa nnete o swanetše go bontšha mosadi gore go lla sa mang seeta. Banna ba bangwe ga ba kgone go laola kamoo ba ikwago ka gona. Banna ba bangwe bao ba tlwaetšego go bogela diswantšho le dibidio tša batho ba sa aparago, ba ka feleletša ba lebeletše basadi le thobalano ka tsela yeo e sego yona. Dipego tše dingwe di bontšha gore nakong ya COVID-19 banna ba bantšhi ba ile ba thoma go tlaiša basadi ba bona. Le ga go le bjalo, monna ga se a swanela go tlaiša mosadi wa gagwe le gatee. w25.01 8 ¶2-3

Jesu o ile a bolela gore taelo e bohlokwa kudu molaong wa Modimo ke yeo e rego: “O rate Jehofa Modimo wa gago ka pelo ya gago ka moka, ka moya wa gago ka moka, ka matla a gago ka moka le ka monagano wa gago ka moka.” (Luka 10:27) Dilo tšeo re di dirago di ka bontšha gore re rata Jehofa ka dipelo tša rena ka moka. Dilo tšeo di ka akaretša dilo tšeo re di kganyogago, tsela yeo re ikwago ka yona le go mo hlankela ka matla a rena ka moka. Ke nnete gore re ka se tsoge re kgonne go nagana tlwaa go swana le Jehofa. Eupša re ka kgona go kwešiša tsela yeo a naganago ka yona ka go ithuta “monagano wa Kriste,” ka gobane Jesu o nagana go swana le Tatagwe.—1 Bakor. 2:16. w25.03 8 ¶1

Ka ge Jesu a be a phethagetše, o be a swana le Adama pele a dira sebe. (1 Bakor. 15:45) Ka ge Jesu a ile a re hwela, o ile a kgona go patela sekoloto seo re nago le sona. (Baroma 5:19) Jesu o ile a ba “Adama wa mafelelo.” Ga go sa hlokega gore go tle motho yo mongwe yo a phethagetšego gore a tle a patele sekoloto sa Adama. Jesu o hwile “gatee ya ba moka.” (Baheb. 7:27; 10:12) Poelano le topollo di fapana bjang? Poelano ke kgato yeo Jehofa a e tšeago gore a lokiše segwera sa gagwe le batho. Topollo ke tefo yeo e dirwago gore poelano e kgonege bakeng sa Modimo le batho bao ba nago le sebe. Jesu o ile a neelana ka bophelo bja gagwe e le sehlabelo gore a patele dikoloto tša rena.—Baheb. 9:14. w25.02 5 ¶12-13

Go lebelela Jehofa e le yo a phelago go tlo re thuša gore re nagane gabotse ka mathata ao re kopanago le ona. Bjang? Re tlo thoma go lebelela mathata a rena e le kgang yeo e lego gona magareng ga Jehofa le Sathane. Diabolo o re ge re kopana le mathata re tlo tlogela go hlankela Jehofa. (Jobo 1:​10, 11; Die. 27:11) Ge re kgotlelela mathata a rena ka katlego re bontšha gore re rata Jehofa le gore Sathane o bolela maaka a matala. Na o ganetšwa ke ba mmušo, o na le mathata a ditšhelete, batho ga ba arabele gabotse ge o le tšhemong goba o na le mathata a mangwe? Ge e ba go le bjalo gopola gore bothata bjoo o lebeletšanego le bjona bo ka dira gore o thabiše pelo ya Jehofa. Gopola le gore Jehofa a ka se dumelele gore o lekwe go feta kamoo o ka kgotlelelago ka gona. O tlo go nea matla a go kgotlelela. w24.06 22 ¶9

Na o tseba dilo tšeo di go lekago ga bonolo? Ga se ra swanela go iphora ka gore ga re na mafokodi goba re ka se tsoge re dirile diphošo. (1 Joh. 1:8) Paulo o bontšhitše gore le “bao [ba] nago le ditshwanelego tša moya” ba ka wela melekong ge e ba ba sa itlhokomele. (Bagal. 6:1) Re swanetše go gopola gore re tlo fela re kgopša. (2 Bakor. 13:5) Ge re lemoga gore go na le mo re fokolago gona re swanetše go dira’ng? Re swanetše go šoma ka thata gore re lwantšhane le mafokodi ao. Ka mohlala, mehleng ya Beibele mafelo ao a bego a swanetše go šireletšwa kudu mo motseng e be e le dikeiti. Ka gona le rena re swanetše go hlokomela mafokodi ao re nago le ona gore re se ke ra lekega ga bonolo.—1 Bakor. 9:27. w24.07 15 ¶5-7

Mediro e mebotse yeo go bolelwago ka yona temaneng ya lehono e akaretša go bolela ditaba tše dibotse. Ge re bala Lentšu la Modimo gomme re naganišiša ka lona, tumelo ya rena go Jehofa e a tia gomme re kgona go bona bohlokwa bja go botša batho ba bangwe molaetša wa Mmušo. E le gore re holwe ke Lentšu la Modimo, ga se ra swanela go kitima ge re bala, re ithuta le go naganišiša. Tšea nako ya gago ge o ithuta. Ge o ka kopana le lengwalo le o sa le kwešišego gabotse, o se ke wa no le feta. Go e na le moo, nyaka tlhathollo ya lona ka go Watch Tower Publications Index goba ka go Tlhahlo ya go Dira Nyakišišo ya Dihlatse tša Jehofa. Ge o ka tšea nako ya gago ge o ithuta, o tlo kgodišega gore Lentšu la Modimo ke therešo. (1 Bathes. 5:21) Ge o kgodišegile, o tlo thabela go botša batho ba bangwe ka seo o ithutilego sona. w24.04 15 ¶4-5

Dafida o itše: “[Jehofa] o lokile e bile o dula o ikemišeditše go lebalela.” (Ps. 86:5) Mika o ngwadile gore: “Ke Modimo ofe yo a swanago le wena, yo a swarelago diphošo le go lebalela dibe tša batho?” (Mika 7:18) Jesaya yena o rile: “Anke motho yo kgopo a tlogele tsela ya gagwe, le yo kotsi a tlogele menagano ya gagwe; anke a boele go Jehofa yo a tlago go mo gaugela, le go Modimo wa rena ka gobane o tla mo lebalela kudu.” (Jes. 55:7) Bakriste ba kua phuthegong ya Korinthe ba be ba swanetše go ekiša Jehofa gomme ba amogele monna yo a bego a itshola ka phuthegong, le go mmontšha gore ba a mo rata. Paulo o boletše gore ge e ba ba lebalela monna yoo, ba tla be ba bontšha gore ‘ba a kwa dilong tšohle.’ Ke nnete gore go be go fetile dikgwedi tše sego kae monna yoo a tlošitšwe ka phuthegong, eupša o be a itshola. Ka gona go be go ka se nyakege gore go fete nako e telele pele a ka bušetšwa ka phuthegong. w24.08 17-18 ¶12-13

Re phela nakong yeo go nago le diphetogo tše dikgolo! E se kgale Jesu o tlo ahlola motho yo mongwe le yo mongwe yo a phelago mo lefaseng. Jesu o ile a hlalosa gore go tlo direga eng pele kahlolo yeo e e ba gona ka go nea balatedi ba gagwe “pontšho” ya go ba gona ga gagwe le ya “bofelo bja tshepedišo ya dilo.” (Mat. 24:3) Pontšho yeo, go bolelwa ka yona go Mateo kgaolo 24 le 25, Mareka kgaolo 13 le Luka kgaolo 21. Jesu o ile a diriša dipapišo tše tharo gore nea ditemošo tšeo di ka re thušago. O dirišitše papišo ya dinku le dipudi, ya dikgarebe tše bohlale le tša mašilo le ya ditalente. Papišo e nngwe le e nngwe e tlo re thuša go kwešiša gore Jesu o tlo ahlola batho go ya ka dilo tšeo ba bego ba di dira. w24.09 20 ¶1-2

Jesu o re beetše mohlala o mobotse, ka gobane dilo ka moka tšeo a bego a di dira di be di bontšha gore o be a rata Jehofa le batho ba bangwe. O be a dira le mešomo e mengwe yeo batho ba bangwe ba bego ba e nyatša. (Mat. 20:28; Joh. 13:​5, 14, 15) Bana babo rena, ge le rata Jehofa le batho ba bangwe, Jehofa o tlo le thuša gore le swanelege go ba bahlanka ba bodiredi. (1 Pet. 5:5) Lehono batho ba bantšhi ba rata batho bao ba šomago ka thata gore ba phale ba bangwe eupša bahlanka ba Jehofa ga ba bjalo. Ngwanabo rena yo a ratago batho ba bangwe go swana le Jesu a ka se nyake go ba le matla e le gore a laole ba bangwe goba go nyaka go ba le maemo. Ge e ba motho wa go rata maemo goba go laola batho ba bangwe a ka kgethwa ka phuthegong, o tlo gana go dira mešomo e mengwe yeo e bonagalago e nyatšega. O tlo bona mešomo yeo e swanetše go dirwa ke ba bangwe.—Joh. 10:12. w24.11 15 ¶6-7

Lefaseng ka moka, go nyakega banna bao ba ka hlankelago ka diphuthegong. (Baef. 4:8) Ge e ba o le ngwanabo rena yo a kolobeditšwego na o ka kgona go thuša? (Die. 3:27) Na o ikemišeditše go šoma ka thata gore mafelelong o be mohlanka wa bodiredi? Ge e ba o šetše o le mohlanka wa bodiredi, na o ka šoma ka thata gore mafelelong o be mogolo? Na o ka kgona go beakanya maemo a gago gore o ye Sekolong sa Baebangedi ba Mmušo? Sekolo seo se tlo go thuša gore Jesu a go diriše ka mo go oketšegilego. Ge eba o bona okare o ka se kgone, kgopela Jehofa a go thuše. Mo kgopele a go fe moya o mokgethwa gore o kgone go phetha dikabelo tšeo o di newago ka phuthegong. (Luka 11:13) Tsela yeo banna bao ba kgethilwego ba šomago ka thata ka yona, e bontšha gore Jesu o re etelela pele mehleng ye ya bofelo. (Mat. 28:20) Re leboga kudu gore re na le Kgoši e lerato le e botho e bile e tseba dilo ka moka tšeo re di hlokago gomme e re nea bana babo rena bao ba re thušago. Leka go bontšha banna ba gore o leboga mošomo o mobotse wo ba o dirago. w24.10 23 ¶16-17

Go tlo direga eng ka dilo ka moka tšeo di bakelago batho ba Modimo bohloko le tlaišego? Dilo tšeo di tlo ‘lebalwa e bile tša utega mahlong a Modimo.’ (Jes. 65:16) Jehofa o tlo tloša mathata a rena ka moka gomme re ka se sa gopola le kamoo mathata ao a ilego a re kweša bohloko ka gona. Gona bjale re a thaba ge re eba gona dibokeng moo re kgonago go khutša gomme ra lebala ka mathata ao a tlišwago ke lefase le le lebe. Re thuša le bana babo rena le dikgaetšedi gore ba lapologe ge re ba bontšha lerato, lethabo, khutšo, botho, le boleta e lego dika tšeo di enywago ke moya wa Modimo. (Gal. 5:​22, 23) Ke tšhegofatšo e kgolo go ba karolo ya mokgatlo wa Modimo! Bao ba dulago ba le paradeiseng ya moya ba tlo bona go phethagala ga tshepišo ya Modimo ya magodimo a “mafsa le lefase le lefsa.” w24.04 22 ¶9-10

Le ge batho ba bantšhi ba ipshina ka go ratana ba swanetše go gopola gore morero o mogolo ke gore ba feleletše ba nyalane. Ka letšatši la lenyalo, baratani ba ikana pele ga Jehofa gore ba tlo dula ba ratana le go hlomphana ge feela ba sa phela. Pele re ka dira keno le ge e le efe re swanetše go naganišiša gabotse. Go bjalo le ka keno ya lenyalo. Go ratana go thuša batho gore ba kgone go tsebana gabotse e bile ba kgone le go dira phetho e botse. Ka dinako tše dingwe ba ka kgetha gore ba nyalane goba ba kgaogane. Ge baratani ba ka kgetha go kgaogana ga se gore ba paletšwe. Go ena le moo, seo se ba thušitše gore ba kgone go bona gore ba ka phedišana goba go se bjalo. Ke ka baka la’ng go le bohlokwa gore re kwešiše morero wa go tsebana gakaone? Batho bao ba sego lenyalong ba swanetše go gopola gore ga se ba swanela go ratana le motho yoo ba se go ba ikemišetša go nyalana le yena. w24.05 26-27 ¶3-4

Bana ba Bakriste ba ka ba le dihlong tša go emela ditumelo tša bona. Ka mohlala, ba ka lewa ke dihlong tša go hlalosa ditumelo tša bona ge ka klaseng go bolelwa gore dilo di no ba gona ka go itiragalela. Ka baka la’ng? Morutiši wa bona a ka ba bontšha gore go na le bohlatse bja gore dilo di no ba gona ka go itiragalela. O ka thuša bjang bana ba gago gore ba kgone go ba le sebete sa go emela ditumelo tša bona maemong a bjalo? Thuša ngwana wa gago go bona gore ga se a swanela go ba le dihlong ka nnete yeo a e tsebago ka tlholo. Ka baka la’ng? Ka gobane borasaense ba bantšhi ba a tseba gore dilo ga se tša no ba gona ka go itiragalela. Tsela yeo dilo tšeo di bopilwego di hlakahlakanego ka yona, e bontšha borasaense bao gore go na le yo a di hlamilego. Seo se dira gore ba se ke ba dumela thuto ya gore dilo di no ba gona ka go itiragalela. Selo se sengwe seo se ka thušago ngwana wa gago gore a be le tumelo ke go tseba gore ke’ng seo se thušitšego bana babo le dikgaetšedi go dumela gore dilo di bopilwe. w24.12 18 ¶14-15

Jesu o be a kgodišegile gore go tlo ba le batho ba bangwe bao ba theetšago ditaba tše dibotse. Seo se mo thušitše gore a dule a thabile gomme a šome ka thata ge a bolela ditaba tše dibotse. Ka mohlala, mo e ka bago ka 30 C.E., Jesu o ile a lemoga gore batho ba bantšhi ba ikemišeditše go mo theetša gomme a ba swantšha le mašemo ao a šweufaletšwego go bunwa. (Joh. 4:35) O ile a botša barutiwa ba gagwe gore: “Puno ke e kgolo.” (Mat. 9:​37, 38) Ka morago o ile a re go bona: “Puno ke e kgolo. . . Kgopelang Mong wa puno gore a romele bašomi punong ya gagwe.” (Luka 10:2) Jesu o be a tseba gore go na le batho bao ba nyakago go kwa ditaba tše dibotse gomme o be a thaba ge ba mo theetša. Jesu o rutile balatedi ba gagwe gore ba dule ba na le mafolofolo ge ba bolela ditaba tša dibotse ka go ba gopotša gore molaetša wo ba o bolelago o tlo ba le mafelelo a mabotse. w25.03 18-19 ¶15-16

Jehofa ke setšhabelo sa rena. Go swana le ge re ka ikuta ka leswika ge go na le ledimo, Jehofa le yena o re šireletša go dilo tšeo di ka beago maphelo a rena kotsing. O a re šireletša gore re se ke ra tlaišega kudu. E bile o tshepiša gore o tlo fediša dilo ka moka tšeo di dirago gore re se ke ra ikwa re bolokegile. (Hesek. 34:​25, 26) Tsela e nngwe yeo re ka dirago gore Jehofa e be Leswika la rena ka yona ke ka go rapela. Ge re rapela, Jehofa “o tla šomiša Kriste Jesu go [re] nea khutšo” yeo e šireletšago dipelo tša rena le menagano. (Bafil. 4:​6, 7) Jehofa o tlo dula a re thekga. Re ka mo tshepa ka gobane ke “Leswika la mehleng ya neng le neng.” (Jes. 26:​3, 4) O tlo dula a le gona go phethagatša dilo tšeo a di tshepišitšego, go kwa dithapelo tša rena le go dula a re thekga. Re ka ithekga ka Jehofa ka gobane o botegela batho bao ba mo hlankelago. (2 Sam. 22:26) A ka se tsoge a lebetše dilo tšeo re di dirago e bile o tlo re putsa.—Baheb. 6:10; 11:6. w24.06 27 ¶4-6

Re swanetše go phema dilo tšeo di ka dirago gore re se ke ra botegela Jehofa. Re swanetše go ntšha mahlo dinameng ge re kgetha dilo tšeo re ithabišago ka tšona. Re swanetše go kgetha le bagwera ba bakaone bao ba sa dirego gore re nagane gore go ba le tšhelete ke selo sa bohlokwa kudu bophelong. Ge e ba re lemoga gore go na selo seo se re šitišago go hlankela Jehofa goba go mo rata, re swanetše go tlogela go se dira pele selemo e eba ngwagola. (Mat. 5:​29, 30) Ga se ra swanela go ba pelopedi. Re ka iphora ka gore ge e ba re swaregile ka dilo tšeo di re batametšago kgauswi le Jehofa gona go ra gore dilo tše mpe di ka se re gobatše. Ka mohlala, nagana o be o le ka ntle gomme go tonya kudu e bile go tšutla moya. Ge o fihla o gotša mollo gore o kgone go ruthela. O nagana gore o ka ruthela ge o ka tlogela lebati le butšwe gomme le tsenya moya ola wa go tonya wa ka ntle? Le gatee. Re ithuta’ng? Ga se ra no swanela go ithuta Beibele feela e lego seo se tiišago segwera sa rena le Jehofa. Seo se bolela gore re swanetše go ganetša “moya” o tonyago wa lefase le goba dilo tšeo di ka senyago segwera sa rena le Jehofa.—Baef. 2:2. w24.07 21 ¶6-7

Nagana gore Jesu o ile a kwa bohloko bjang ge a be a kgotleletše go gobošwa le go se swarwe gabotse. Le ga go le bjalo, o ile a dula a na le lerato e bile a tshepa Jehofa le ge a be a tlaišega. Go e na le gore a roge madira ao a bego a mo kokotela koteng, o ile a rapela ka gore: “Tate ba lebalele gobane ga ba tsebe seo ba se dirago.” (Luka 23:34) Ge e ba re rapelela bao ba re tlaišago, re ka se dule re ba galefetše goba re ba hloile e bile seo se tlo dira le gore re ba lebelele gabotse. Ge feela re sa le mo tshepedišong ye ya dilo, re tlo no fela re swarwa gampe. Ga se ra swanela go tlogela go rapela Jehofa le go mo kgopela gore a re thuše go kgotlelela mathata ao re nago le ona ka moka. Eka re ka ekiša tsela yeo Jesu a ilego a itshwara ka yona le go tšwela pele re diriša keletšo yeo re e hwetšago ka Lentšung la Modimo. Ge re dira bjalo, re ka kgodišega gore Jehofa o tlo re šegofatša kudu.—1 Pet. 3:​8, 9. w24.11 6 ¶16; 7 ¶17, 19

Jehofa o hloile sebe, e bile ga a nyake gore batho ba no phela ka mokgwa wo ba ratago ka gona. (Ps. 5:​4-6) O nyaka gore re hlomphe melao ya gagwe yeo e lego ka Beibeleng. Jehofa o a tseba gore ka ge re na le sebe, re tlo fela re dira diphošo. (Ps. 130:​3, 4) Eupša ga a kgotlelele ‘batho bao ba sa mmoifego, bao ba dirišago botho bja gagwe bjo bogolo gampe e le lebaka la gore ba itshware ka tsela yeo e feteletšego.’ (Juda 4) Beibele e re botša gore Modimo o tlo diriša ntwa ya Haramagedone go ‘fediša batho bao ba sa mmoifego.’ (2 Pet. 3:7; Kut. 16:16) Taba ya go thabiša ke gore Jehofa ga a nyake gore go be le motho le o tee yo a fedišwago. Beibele e re Jehofa o nyaka gore “bohle ba fihlelele boitsholo.” (2 Pet. 3:9) Bagolo ba ekiša Jehofa ka go se fele pelo ge ba thuša batho bao ba dirilego sebe se segolo gore ba fetoge gomme ba lokiše segwera sa bona le Jehofa. w24.08 26 ¶1-2

Re ka ekiša Jehofa ka go nea batho ba bangwe dilo tšeo ba di hlokago ka gobane re ba rata. Ka mohlala, na go na le Mokriste gotee le wena yo o mo tsebago yo a hlokago dijo goba diaparo? Jehofa a ka go diriša gore o thuše motho yoo ka go mo nea dilo tšeo a di hlokago. Batho ba Jehofa ba tsebega ka go thušana ge go na le mathata. Ka mohlala, nakong ya bolwetši bja Covid, bana babo rena ba be ba thušana ka go fana dijo, diaparo le dilo tše dingwe tše bohlokwa. Ba bangwe ba be ba neela go thekga modiro wa lefaseng ka moka. Seo se dirile gore bana babo rena lefaseng ka moka ba hwetše thušo. Bana babo rena le dikgaetšedi bao ba kgonnego go thuša, ba kwešišitše gabotse mantšu ao a lego go Baheberu 13:16 ao a rego: “Le se ke la lebala go dira botse le go abelana le ba bangwe dilo tšeo le nago le tšona, gobane Modimo o kgahlišwa ke dihlabelo tše bjalo.” w24.09 27 ¶6-7

Nagana ka mohlala wo. A re re o nyaka mošomo gore o kgone go hlokomela lapa la gago. Go na le mešomo e mebedi yeo o ka kgethago go yona. O hlahloba gore ke mošomo wa mohuta mang, dinako tša ona, nako yeo o ka e fetšago o eya mošomong le dilo tše dingwe. O lemoga gore mešomo ye ka bobedi ga e thulane le melao ya motheo ya Beibele. Mohlomongwe o rata o mongwe wa mešomo yeo ka gobane ke mohuta wa mošomo wo o ratago goba ka gobane o patela gabotse. Eupša go na le dilo tše dingwe tšeo o swanetšego go nagana ka tšona pele o ka dira phetho. Ka mohlala, o ka ipotšiša gore na mošomo wo ke o kgethago o tlo ntšhitiša go ya dibokeng? Na o tla ntšhitiša go hlokomela lapa laka le go dira gore ba hlankele Jehofa gabotse? Go ipotšiša dipotšišo tše go tlo go thuša gore o kgone go tseba “dilo tšeo di lego bohlokwa kudu,” e lego go hlankela Jehofa le dilo tšeo lapa la gago le di hlokago go e na le go nagana kudu ka tšhelete yeo o ka e hwetšago mošomong wo o kgethago. Mafelelong o tla kgona go dira phetho yeo Jehofa a tla e šegofatšago. w25.01 17 ¶11-13

Le ge batho ba bangwe ba ka se go sware gabotse, o ka kgodišega gore Jehofa o a go rata e bile o bohlokwa go yena. Ge o ka ikwa o ‘nyamile o šoro,’ gopola gore Jehofa o bone dika tša gago tše dibotse gomme a go gogela go yena. (Joh. 6:44) O dula a ikemišeditše go go thuša ka gobane o bohlokwa go yena. Re ka ithuta ka dika tša Jehofa ka go naganišiša ka mohlala wa Jesu. Nakong ya ge Jesu a be a le mo lefaseng, o be a bontšha gore o na le taba le batho bao ba bego ba nyatšwa e bile a ba kwela bohloko. (Mat. 9:​9-12) Ge mosadi yo mongwe yo a bego a nyaka go fola a kgoma seaparo sa Jesu gore a fole, Jesu o ile a mo kgothatša le go mo reta ka baka la tumelo ya gagwe. (Mar. 5:​25-34) Jesu o be a dula a bonagatša dika tša Tatagwe. (Joh. 14:9) O ka kgodišega gore Jehofa o go lebelela o le bohlokwa, e bile o a tseba gore o na le dika tše dibotse tšeo di akaretšago tumelo. Le gona o a tseba gore o mo rata kudu. w24.10 7 ¶4-5

Dafida o ile a ba le mathata a mantšhi mo bophelong ao a ilego a dira gore a lle. Batho ba bantšhi ba ile ba se mo sware gabotse. Le batho bao a bego a ba tshepile ba ile ba mo nyamiša. (1 Sam. 19:​10, 11; 2 Sam. 15:​10-14, 30) Ka nako e nngwe o ile a ngwala gore: “Ke dulela go lla. Bošego ka moka ke kolobiša mpete wa ka ka megokgo, e bile ke kolobiša sofa ya ka ka megokgo.” (Ps. 6:6) Le ge Dafida a be a na le mathata o be a kgodišegile gore Jehofa o a mo rata. O ngwadile gore: “Jehofa o tla nkwa ge ke lla.” (Ps. 6:8) Mantšu a temana ya lehono a tloga a bontšha gore Jehofa o re rata kudu. Dafida o be a bona okare Jehofa o tsenya megokgo ya gagwe ka lepotlelong la mokgopa ebile o ngwala le ka dilo tšeo di mo tshwenyago ka pukung ya gagwe. Dafida o be a kgodišegile gore Jehofa o tseba ka mathata ao a nago le ona. Dafida o be a tseba gore Tatagwe wa legodimong o tseba ka mathata ao a kopanago le ona ebile o tseba kamoo a dirago gore a ikwe ka gona. w24.12 22 ¶11-12